ʻUlutukua kae Mafamafatatau

“Fakamanatu kiate kinautolu ke nau . . . fakaʻatūʻi [“ʻulutukua,” NW].”—TAI. 3:1, 2.

1, 2. Ko e hā e lau ʻa e Tohi Tapú fekauʻaki mo e hoko ʻo ʻulutukuá, pea ko e hā ʻoku feʻungamālie ai ení?

 KO Sihova, ʻa ʻetau Tamai fakahēvani ʻofá, ʻoku poto taʻefakangatangata. ʻI hotau tuʻunga ko ʻene ngaahi meʻa fakatupú, ʻoku tau hanga kiate ia ki ha tataki ʻi heʻetau moʻuí. (Sāme 48:14) ʻOku tala mai ʻe he ākonga Kalisitiane ko Sēmisí “ko e poto ʻoku mei ʻolunga, ko hono anga tuʻu muʻa ko e maʻa, pea hoko ai mo ʻene melino mo ʻene anga fakaʻatūʻi, ʻo taka fakaoleole, ʻo mohu manavaʻofa, pea fuhi ai ʻa e fua lelei, pea ʻoku ʻikai ngutungutuua, ʻoku ʻikai momoleʻolunga.”—Sem. 3:17.

² “Tuku ke ʻilo ʻe he kakai kotoa pē hoʻomou anga-fakaʻatuʻí,” ko e ekinaki ia ʻa e ʻapositolo ko Paulá. a (Fili. 4:5, NW) Ko Kalaisi Sīsū ʻa e ʻEiki mo e ʻUlu ʻo e fakatahaʻanga Kalisitiané. (Ef. 5:23) He mahuʻinga moʻoni kia kitautolu taki taha ke tau ngāue ʻi ha founga fakaʻatuʻi, ʻo ʻulutukua ki he tataki ʻa Kalaisí pea hoko ʻo ʻulutukua ʻi heʻetau feangainga mo e niʻihi kehé!

3, 4. (a) Fakatātaaʻi ʻa e ngaahi ʻaonga ʻoku hoko ʻi he taimi ʻoku tau ʻulutukua aí. (e) Ko e hā te tau lāulea ki aí?

³ ʻOku tau maʻu ʻaonga ʻi he taimi ʻoku tau hehema ai ke ʻulutukua ʻi ha founga mafamafatataú. Ke fakatātaaʻi: Hili hono ʻiloʻi ha faʻufaʻu fakaetautoitoi ʻa ia naʻe mahaloʻi ʻi Pilitānia, ne hā ngali loto-lelei ai ʻa e tokolahi ʻo e kau pāsese vakapuná ke muimui ʻi he ngaahi lao ke ʻoua ʻe fakaheka ʻa e ngaahi meʻa ʻa ia naʻe ngofua pē ʻa hono fakaheka ki muʻá. ʻI heʻetau fakaʻuli ʻi ha meʻalelé, ʻoku tau sio ai ki he fiemaʻu ke ʻulutukua ki he kau fakaʻuli kehé, hangē ko e taimi ko ia ʻoku lele ai ʻi he manga-faá ʻa e ngaahi meʻalelé, ke fakapapauʻi ʻoku malu ʻa e tokotaha kotoa pē pea ʻoku hokohoko lelei e lele ʻa e ngaahi meʻalelé.

⁴ Ki he tokolahi ʻo kitautolú, ʻoku ʻikai faingofua ke tau ʻulutukua. Ke tokoniʻi kitautolu, tau lāulea angé ki he tafaʻaki ʻe tolu ʻo e hoko ʻo ʻulutukuá, ʻa ia ko ʻetau fakaueʻilotó, ko ʻetau fakakaukau ki he tuʻunga mafaí pea mo e lahi ʻo e ʻulutukua ʻoku totonu ke tau faí.

Ko e Hā ke ʻUlutukua Aí?

 5. ʻI he malumalu ʻo e Lao ʻa Mōsesé, ko e hā naʻe lava ke ne ueʻi ha pōpula ke ne fili ai ke nofo mo hono pulé?

⁵ Ko ha fakatātā mei he taimi ki muʻa ʻi he Kalisitiané ʻoku fakahangataha ai ki he fakaueʻiloto totonu ke hoko ʻo ʻulutukuá. ʻI he malumalu ʻo e Lao ʻa Mōsesé, ko e kau Hepelū ne nau hoko ko e kau pōpulá naʻe pau ke fakatauʻatāinaʻi kinautolu ʻi he taʻu hono fitu ʻo ʻenau ngāue pōpulá pe ʻi he taʻu Siupelí, ko fē pē ai naʻe muʻomuʻá. Ka naʻe lava ke fili ha pōpula ke ne kei hokohoko atu ai pē ko ha pōpula. (Lau ʻa e Ekisoto 21:5, 6.) Ko e hā ne lava ʻo ne ueʻi ha pōpula ke ne fai ai ení? Naʻe ueʻi ʻe he ʻofá ʻa e pōpulá ke ne hoko atu ai pē ʻi he tuʻunga ko iá, ʻi he malumalu ʻo e mafai ʻa hono pule anga-fakaʻatuʻí.

 6. ʻOku anga-fēfē ʻa e kaunga ʻa e ʻofá ki heʻetau hoko ʻo ʻulutukuá?

⁶ ʻI ha founga meimei tatau, ko ʻetau ʻofa kia Sihová ʻokú ne ueʻi kitautolu ke tau fakatapui ʻetau moʻuí kiate ia pea moʻui leva ʻo fakatatau ki heʻetau fakatapuí. (Loma 14:7, 8) “Ko eni ia ʻa e ʻofa ki he ʻOtua, ʻa ʻetau tauhi ki heʻene ngaahi tuʻutuʻuni. Pea ʻoku ʻikai ke fakamafasia ʻene ngaahi tuʻutuʻuni,” ko e tohi ia ʻa e ʻapositolo ko Sioné. (1 Sione 5:3, 4a) Ko e ʻofa ko ení ʻoku ʻikai te ne kumi ʻene lelei ʻaʻaná. (1 Kol.1Ko 13:4, 5) ʻI heʻetau feangainga mo e niʻihi kehé, ko e ʻofa ki he kaungāʻapí ʻoku ueʻi ai kitautolu ke tau ʻulutukua pea fakamuʻomuʻa ʻenau ngaahi meʻá ʻi haʻatautolú. ʻI he ʻikai siokitá, ʻoku tau fakakaukau ki he lelei ʻa e niʻihi kehé.—Fili. 2:2, 3.

 7. Ko e hā e kaunga ʻo e ʻulutukuá ʻi heʻetau ngāue fakafaifekaú?

⁷ ʻOku ʻikai totonu ke fakatūkiaʻi ʻi heʻetau leá pe ngāué ʻa e niʻihi kehé. (Ef. 4:29) Ko e moʻoni, ʻe ueʻi kitautolu ʻe he ʻofá ke fakaʻehiʻehi mei hono  fai ha meʻa pē ʻe taʻofi nai ai ʻa e kakai ʻo e puipuituʻa mo e anga fakafonua kehekehé mei heʻenau fakalakalaka ʻi he tauhi kia Sihová. ʻOku faʻa kau ki he meʻá ni ʻetau ʻulutukuá. Ko e fakatātaá, ko e fanga tuofāfine misinale ʻa ia ʻoku nau angaʻaki hono ʻai ʻa e ngaahi meʻa vali matá pe tui ʻa e sitōkeni kilí, ʻoku ʻikai te nau vilitaki ʻi hono ngāueʻaki ia ʻi he ngaahi feituʻu, ʻa ia ʻe fehuʻia nai ai ʻa honau tuʻunga fakaeʻulungāangá pea fakatūkiaʻi ai ʻa e niʻihi kehé.—1 Kol.1Ko 10:31-33.

 8. ʻE lava fēfē ke tokoniʻi kitautolu ʻe he ʻofa ki he ʻOtuá ke tau ʻai kitautolu ko e “jii”?

⁸ Ko ʻetau ʻofa kia Sihová ʻoku tokoni ia ke tau ikuʻi ai ʻa e hīkisiá. Hili ha fekīhiaki ʻi he kau ākongá pe ko hai naʻe lahí, naʻe fokotuʻu ai ʻe Sīsū ha kiʻi tamasiʻi ʻi honau lotolotongá. Naʻá ne fakamatala: “Ko ia ia e maʻu ae tamajii ni i hoku huafa, oku ne maʻu au; bea ko ia ia oku ne maʻu au, oku ne maʻu aia naa ne fekau au: he ko ia oku jii iate kimoutolu kotoabe, ko ia ia e lahi.” (Luke 9:48, PM; Mk. 9:36) ʻI he tuʻunga tāutahá, ʻoku tau ʻiloʻi nai ai ʻoku faingataʻa ke tau ʻai kitautolu ko e “jii.” Ko e taʻehaohaoa tukufakaholó mo ha hehema ke hīkisiá ʻe ueʻi nai ai kitautolu ke tau feinga ke tuʻu-ki-muʻa, ka ko e anga-fakatōkilaló ʻe tokoni ia kia kitautolu ke tau ʻulutukua.—Loma 12:10.

 9. Ke ʻulutukua, ko e hā kuo pau ke tau fakakaukau ki aí?

⁹ Ke ʻulutukua, kuo pau ke tau fakakaukau ki he tuʻunga mafai ʻo kinautolu kuo fokotuʻu ʻe he ʻOtuá. Ko e kau Kalisitiane moʻoni kotoa pē ʻoku nau ʻiloʻi ʻa e tefitoʻi moʻoni mahuʻinga ʻo e tuʻunga-ʻulú. Naʻe fakahaaʻi mahino eni ʻe he ʻapositolo ko Paulá ki he kau Kolinitoó: “ʻOku ou loto ke mou ʻilo, ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.”—1 Kol.1Ko 11:3.

10. Ko ʻetau ʻulutukua ki he tuʻunga mafai ʻo Sihová ʻoku fakahāhā ai ʻa e hā?

¹⁰ Ko e ʻulutukua ki he tuʻunga mafai ʻo e ʻOtuá ʻoku fakahāhā ai ʻetau falala mo e tuipau kiate ia ko ʻetau Tamai ʻofa. ʻOkú ne ʻafioʻi ʻa e meʻa kotoa ʻoku hokó pea ʻe lava ke ne fakapaleʻi kitautolu ʻo fakatatau ki he meʻa ʻoku tau faí. ʻOku ʻaonga ke manatuʻi ʻi he taimi ʻoku ʻikai ke fakaʻapaʻapaʻi ai kitautolu ʻe he niʻihi kehé pe ʻi he taimi ʻoku nau hoko ai ʻo ʻita mo tōlilí. Naʻe tohi ʻe Paula: “Mou nofo melino pe mo e kakai kotoa pe, ʻo kapau ʻe ala lava.” Naʻe fakamamafaʻi ʻe Paula ʻa e faleʻi ko iá ʻaki ʻa e fakahinohino ko ení: “Siʻoku ʻofaʻanga, ʻoua te mou sauni hoʻomou ngaahi meʻa, kae tuku ia ki he Houhau: he kuo tohi, ʻOku aʻaku ʻa e sauni; ko au te u ʻatu hono tuha—ko e folofola e ʻa e ʻEiki.”—Loma 12:18, 19.

11. ʻE lava fēfē ke tau fakahāhā ʻoku tau ʻulutukua ki he tuʻunga ʻulu ʻo Kalaisí?

¹¹ Ko e tuʻunga mafai kuo fokotuʻu fakaʻotuá ko ha toe meʻa tefito ia ke tau ʻulutukua ki ai ʻi he loto fakatahaʻanga Kalisitiané. ʻOku fakatātaaʻi ʻa Kalaisi Sīsū ʻokú ne pukepuke ʻa e ngaahi “fetuʻu” ʻi he fakatahaʻangá ʻi hono nima toʻomataʻú. (Fkh. 1:16, 20) ʻI he ʻuhinga fakalūkufuá, ko e ngaahi “fetuʻu” ko ení ʻoku nau fakafofongaʻi ʻa e kulupu ʻo e kau mātuʻá, pe kau ʻovasia ʻi he ngaahi fakatahaʻangá. Ko e kau ʻovasia ko ia kuo fakanofó ʻoku nau ʻulutukua ki he taki ʻa Kalaisí pea faʻifaʻitaki ki heʻene founga anga-ʻofa ʻo e feangainga mo e niʻihi kehé. Ko e faʻahinga kotoa ʻi he fakatahaʻangá ʻoku nau fakamoʻulaloa ki he fokotuʻutuʻu naʻe fai ʻe Sīsū ke tokonaki mai ʻa e meʻakai fakalaumālié ʻe he “tamaioeiki agatonu mo boto” ʻi he taimi totonu. (Mt. 24:45-47, PM) ʻI he ʻahó ni,  ko ʻetau loto-lelei ke ako pea ngāueʻaki ʻa e fakamatala ko ení ʻoku fakahāhā ai ʻoku tau ʻulutukua fakafoʻituitui ki he tuʻunga ʻulu ʻo Kalaisí, ʻa ia ʻoku pouaki ai ʻa e melino mo e fāʻūtaha.—Loma 14:13, 19.

ʻUlutukua—Lahi Fēfē?

12. Ko e hā ʻoku ʻi ai ai ʻa e ngaahi fakangatangata ʻo e ʻulutukuá?

¹² Kae kehe, ko e ʻulutukuá ʻoku ʻikai ʻuhinga ai iá ʻoku tau fakangaloku ʻetau tuí pe ko ʻetau ngaahi tefitoʻi moʻoni fakaʻotuá. Ko e hā ʻa e tuʻunga ʻo e muʻaki kau Kalisitiané ʻi hono fekauʻi ʻe he kau taki lotú ke tuku ʻenau faiako makatuʻunga he huafa ʻo Sīsuú? Naʻe lea loto-toʻa ʻa Pita mo e kau ʻapositolo kehé: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ng. 4:18-20; 5:28, 29) Ko ia ʻi he ʻahó ni, ʻi he feinga ʻa e ngaahi mafai fakapuleʻangá ke fakamālohiʻi kitautolu ke tuku ʻetau malangaʻi ʻa e ongoongo leleí, ʻoku ʻikai ke tau taʻofi ia, neongo ia te tau feʻunuʻaki nai ʻetau ngaahi foungá koeʻuhi ke fakahoko ʻa e tuʻungá ʻi he fakapotopoto. Kapau ʻoku ʻi ai ha ngaahi fakataputapui ki he ngāue fakafaifekau fale ki he falé, te tau kumi nai ki ha ngaahi founga kehe ke fetuʻutaki ai ki he faʻahinga ʻi he ngaahi ʻapí pea hokohoko atu ʻa e talangofua ki heʻetau fekau kuo ʻomai mei he ʻOtuá. ʻI he founga tatau, ʻi he taimi ʻoku tapui ai ʻe he “ngaahi pule ʻoku maʻolunga” ʻetau ngaahi fakatahá, ʻoku tau fakataha fakapotopoto ʻi he fanga kiʻi kulupu iiki.—Loma 13:1; Hep. 10:24, 25.

13. Ko e hā ne leaʻaki ʻe Sīsū fekauʻaki mo e ʻulutukua ki he faʻahinga ʻi he tuʻunga mafaí?

¹³ ʻI heʻene Malanga ʻi he Moʻungá, naʻe fakahaaʻi ai ʻe Sīsū ʻa e fiemaʻu ke ʻulutukua ki he tuʻunga mafaí: “Ka loto ha taha ke mo hopo, pea ke ne maʻu ho sote; tuku kiate ia mo ho pulupulu. Pea ka fakafatongia koe ʻe ha talafekau ke ke ʻave ia ʻi ha maile ʻe taha, pea mole mo ia ʻo maile ua.” (Mt. 5:40, 41) b Ko e fakakaukau ki he niʻihi kehé pea mo ha holi ke tokoniʻi kinautolú ʻoku toe ueʻi ai kitautolu hangē ko e laú, ke ʻalu mo kinautolu ʻi ha toe maile ʻe taha.—1 Kol.1Ko 13:5; Tai. 3:1, 2.

14. Ko e hā ʻoku ʻikai totonu ai ke tau ʻulutukua ki he tafoki mei he moʻoní?

¹⁴ Kae kehe, ʻoku ʻikai ʻaupito totonu ke tataki kitautolu ʻe heʻetau holi ke ʻulutukuá ke tau fakangaloku ki he kau tafoki mei he moʻoní. Ko ʻetau tuʻu mālohi mahino ʻo fekauʻaki mo ení ʻoku fiemaʻu ia ke tauhi maʻu ai ʻa e tuʻunga maʻa ʻo e moʻoní mo e fāʻūtaha ʻa e fakatahaʻangá. ʻI he fekauʻaki mo e fanga tokoua “loi,” naʻe tohi ʻe Paula: “Naʻe ʻikai te mau momoʻi ʻunua ki ai ʻi ha houa ʻe taha, ke fai ʻa e fakavaivai naʻa nau tangi ki ai; koeʻuhi ke nofo maʻu kiate kimoutolu ʻa e totonu ʻo e Kosipeli.” (Kal. 2:4, 5) ʻI he tuʻunga tātātaha ʻoku hā ai ʻa e tafoki mei he moʻoní, ko e kau Kalisitiane līʻoá te nau tuʻu mālohi ai pē ki he meʻa ʻoku totonú.

Fiemaʻu ke ʻUlutukua ʻa e Kau ʻOvasiá

15. ʻI he founga fē ʻoku lava ke ʻulutukua ai ʻa e kau ʻovasia Kalisitiané ʻi heʻenau fakatahá?

¹⁵ Ko e taha ʻo e ngaahi tuʻunga taau ki he faʻahinga kuo fakanofo ke nau hoko ko e kau ʻovasiá ʻoku kau ki ai ʻa e loto-lelei ke ʻulutukua. Naʻe tohi ʻe Paula: “Ko ia ko hono tonu ʻo e ʻovasiá ke . . . fakaʻatuʻi [“ʻulutukua,” lalo.].” (1 Tim. 3:2, 3, NW) ʻOku tautefito ʻene mahuʻinga ení ʻi he taimi ʻoku fakataha ai ʻa e kau tangata kuo fakanofó ke lāulea ki he ngaahi meʻa ʻa e fakatahaʻangá. Ki muʻa ke fai ha filí, ʻoku ʻatā ki he tokotaha kotoa ʻi aí ke ne fakahaaʻi lelei ʻene fakakaukaú, neongo ʻoku ʻikai fiemaʻu ke fai kotoa ʻe he kau mātuʻá ha fakamatala. Lolotonga ha fetalanoaʻaki, ʻe liliu nai ai ʻa e fakakaukau ʻa ha tokotaha ʻi heʻene fanongo ki hono fakahanga ʻe he niʻihi kehé ʻa e tokangá ki he ngaahi tefitoʻi moʻoni Fakatohitapu ʻoku kaunga ki aí. ʻI he ʻikai talitekeʻi ʻa e niʻihi kehé pea vilitaki heʻene fakakaukau fakafoʻituituí, ko ha mātuʻa matuʻotuʻa ʻokú ne ʻulutukua. ʻI he kamatá, ne ʻi ai nai ha ngaahi fekehekeheʻaki ʻi he fakakaukaú, ka ko e fakakaukauloto fakataha mo e lotú ʻoku pouaki ai ʻa e fāʻūtaha ʻi he haʻohaʻonga ʻo e kau mātuʻa fakanānā mo ʻulutukuá.—1 Kol. 1:10; Lau ʻa e Efeso 4:1-3.

16. Ko e hā ʻa e laumālie ʻoku totonu ke fakahāhā ʻe ha ʻovasia Kalisitiane?

¹⁶ ʻI heʻene ngāué kotoa, ʻoku totonu ki ha mātuʻa Kalisitiane ke ne feinga ke pouaki ʻa e maau fakateokalatí. Ko e laumālie ko iá ʻoku totonu ke ngāueʻaki ʻi heʻene tauhi ʻa e tākangá, ʻo tokoniʻi ai ia ke ne fakahāhā ʻa e fakaʻatuʻi mo e fakaalaala ki he niʻihi kehé. “ʻE, mou fei mo tauhi ʻa e fanga sipi ʻa e ʻOtua ʻoku ʻiate kimoutolu,” ko e tohi ia ʻa Pitá, “ʻo ʻoua naʻa fai fakakoloto hono leʻohi,  ka ʻi he loto fiefai ʻi he funga ʻo e finangalo ʻo e ʻOtua; ʻo ʻikai ko e sio paʻanga ʻuli, ka ʻi he ʻofa ki he ngaue.”—1 Pita 5:2.

17. ʻOku lava fēfē ke fakahāhā ʻe he tokotaha kotoa ʻi he fakatahaʻangá ha laumālie ʻulutukua ʻi he feangainga mo e niʻihi kehé?

¹⁷ Ko e kau mēmipa taʻumotuʻa ʻo e fakatahaʻangá ʻoku nau houngaʻia ʻi he tokoni mahuʻinga ʻa e faʻahinga taʻu siʻi angé pea fakafeangai kiate kinautolu ʻi he fakangeingeia. ʻI he tafaʻaki ʻe tahá, ʻoku fakaʻapaʻapaʻi ʻe he kau talavoú ʻa e faʻahinga taʻumotuʻa ʻoku nau maʻu ʻa e taukei ʻi he ngāue kia Sihová ʻi ha ngaahi taʻu. (1 Tim. 5:1, 2) Ko e kau mātuʻa Kalisitiané ʻoku nau kumi ki he kau tangata taau ʻa ia ʻe lava ke nau tuku ki ai ʻa e ngaahi fatongia pau, ʻi hono akoʻi kinautolu ke nau tokoni ki hono tokangaʻi ʻa e fanga sipi ʻa e ʻOtuá. (2 Tim. 2:1, 2) Ko e Kalisitiane taki taha ʻoku totonu ke ne fakamahuʻingaʻi ʻa e faleʻi fakamānavaʻi ʻa Paulá: “Mou tuitala ki he kau tuʻukimuʻa ʻomoutolu, pea fakavaivai [pe ʻulutukua] kiate kinautolu; he ko kinautolu ia ʻoku nau ʻā ke leʻohi homou laumalie, he ko kinautolu te nau fakamatala kimoutolu ʻamui; koeʻuhiā ke nau fai fiefia ʻenau ngaue ko ia, ʻo ʻikai fai mo e toʻe: he ʻe taeʻaonga ia kiate kimoutolu.”—Hep. 13:17.

ʻUlutukua ʻi he Hoko ko e Ngaahi Mēmipa ʻi he Fāmilí

18. Ko e hā ʻoku feʻungamālie ai ke ʻi ai ha laumālie ʻulutukua ʻi he fāmilí?

¹⁸ ʻOku fiemaʻu foki ha laumālie ʻulutukua ʻi he fokotuʻutuʻu fakafāmilí. (Lau ʻa e Kolose 3:18-21.) ʻOku fakahaaʻi ʻe he Tohi Tapú ʻa e ngaahi ngafa pau ʻo e ngaahi mēmipa kehekehe ʻo ha fāmili Kalisitiane. Ko e tamaí ko e ʻulu ia ʻo hono uaifí pea ko e tokotaha ia ʻoku fakafatongia tefito ki hono fakahinohinoʻi ʻo e fānaú. Ko e uaifí ʻoku totonu ke ne ʻiloʻi ʻa e tuʻunga mafai ʻo hono hoá, pea ʻoku totonu ke feinga ʻa e fānaú ke nau talangofua, ko ha ʻalunga ʻa ia ʻoku fakahōifua ki he ʻEikí. Ko e mēmipa taki taha ʻo e fāmilí ʻoku lava ke ne pouaki ʻa e fāʻūtaha mo e melino ʻa e fāmilí ʻaki ʻene ʻulutukua ʻi ha founga totonu mo mafamafatatau. ʻOku ʻi he Tohi Tapú ʻa e ngaahi faʻifaʻitakiʻanga ʻoku tokoni ke fakatātaaʻi ʻa e poiní.

19, 20. (a) ʻOmai ʻa e faikehekehe ʻi he fakatātā fekauʻaki mo ʻĪlai pea mo Sihova ʻi he ʻulutukuá. (e) Ko e hā e lēsoni ʻoku lava ke ako ʻe he ngaahi mātuʻá mei he ongo fakatātā ko ení?

¹⁹ ʻI he kei tamasiʻi ʻa Sāmiuelá naʻe ngāue ai ʻa ʻĪlai ko e taulaʻeiki lahi ʻi ʻIsileli. Kae kehe, ko e ongo foha ʻo ʻĪlaí, ʻa Hofinai mo Fineasi, ‘koe fānau agakovi’ naʻe ʻikai te na “ilo a Jihova.” Naʻe fanongo ʻa ʻĪlai ki he ongoongo kovi ʻo fekauʻaki mo kinaua, ʻo kau ai ʻa e meʻa moʻoni ko ʻena fai feʻauaki mo e kakai fefine naʻa nau ngāue ʻi he hūʻanga ʻo e tēniti feʻiloakiʻangá. Naʻe anga-fēfē ʻene fakafeangai ki aí? Naʻe tala ange ʻe ʻĪlai kia kinaua kapau ko ʻena angahalá naʻe fai kia Sihova, heʻikai lotu ha taha maʻanaua. Ka naʻe ʻikai te ne fakatonutonu mo akonakiʻi kinaua. Ko hono olá, naʻe hokohoko atu ʻa e ongo foha ʻo ʻĪlaí ʻi hona  ʻalunga koví. Faifai atu pē, naʻe fakapapauʻi totonu ʻe Sihova kuó na tuha mo e tautea mate. ʻI he fanongo ki he ongoongo fekauʻaki mo ʻena maté, naʻe mate ai foki mo ʻĪlai. Ko ha nunuʻa fakamamahi moʻoni ia! ʻOku hā mahino, ko e ʻulutukua taʻetotonu ʻa ʻĪlai ki heʻena ngaahi tōʻonga fulikivanú—ʻi heʻene fakaʻatā kinaua ke na hokohoko atú—naʻe ʻikai totonu.—1 Sam. 2:12-17, 22-25, 34, 35, PM; 1Sa 4:17, 18.

²⁰ ʻI he kehe mei aí, fakakaukau angé ki he ngaahi feangainga ʻa e ʻOtuá mo hono ngaahi foha ko e kau ʻāngeló. Ko e palōfita ko Maikaiá naʻá ne maʻu ha vīsone fakaofo fekauʻaki mo ha fakataha ʻa Sihova mo ʻEne kau ʻāngeló. Naʻe ʻeke ʻe Sihova pe ko hai ʻi he kau ʻāngeló ʻe lava ke ne kākaaʻi ʻa Tuʻi ʻĒhapi ʻo ʻIsilelí ke hoko ai ʻo tō ʻa e tuʻi fulikivanu ko ení. Naʻe fanongo ʻa Sihova ki he ngaahi fokotuʻu ʻa e ngaahi foha fakalaumālie kehekehe. Naʻe fakahaaʻi ange leva ʻe he ʻāngelo ʻe taha te ne fai ia. Naʻe ʻeke ange ʻe Sihova ʻa e founga te ne fai ai iá. ʻI heʻene finangalo lelei ki aí, naʻe fekauʻi ʻe Sihova ʻa e ʻāngeló ke ne fakahoko ia. (1 Tuʻi 22:19-23) ʻI he tuʻunga ʻo e tangatá, ʻikai ʻoku lava ke ako ʻa e ngaahi mēmipa ʻo e fāmilí mei he lēsoni ko ia fekauʻaki mo e ʻulutukuá? Ko ha husepāniti Kalisitiane pea ko ha tamai ʻoku lelei ke ne vakai ki he ngaahi fakakaukau mo e fokotuʻu ʻa hono uaifí mo e fānaú. ʻI he tafaʻaki ʻe tahá, ko e ngaahi uaifí mo e fānaú ʻoku totonu ke nau ʻiloʻi kapau kuo nau ʻoatu ha fakakaukau pe ko ʻenau manakó, ʻe fiemaʻu leva ke nau ʻulutukua fekauʻaki mo e tataki ʻa e tokotaha kuo fakamafaiʻi Fakatohitapu ke ne fai ʻa e filí.

21. Ko e hā ʻe lāulea ki ai ʻi he kupu hoko maí?

²¹ He houngaʻia moʻoni ko kitautolu ʻi he ngaahi fakamanatu ʻofa mo fakapotopoto ʻa Sihova ke tau ʻulutukuá! (Sāme 119:99) Ko ʻetau kupu hoko maí ʻe lāulea ai ki he tokoni ʻa e ʻulutukua ʻi ha founga mafamafatataú ki hono maʻu ʻa e fiefia ʻi he nofo malí.

[Fakamatala ʻi lalo]

ʻE Fēfē Haʻo Tali?

• Ko e hā ʻa e fua lelei ʻe lava ke ʻomai ʻe he ʻulutukuá?

• ʻOku lava fēfē ke fakahāhā ʻe he kau ʻovasiá ha laumālie ʻulutukua?

• Ko e hā ʻoku mahuʻinga ai ha laumālie ʻulutukua ʻi he moʻui fakafāmilí?

[Fehuʻi ki he Ako]

[Fakatātā ʻi he peesi 4]

ʻOku faʻifaʻitaki ʻa e kau mātuʻá ki he founga anga-lelei ʻa Kalaisi ʻi heʻene feangainga mo e niʻihi kehé

[Fakatātā ʻi he peesi 6]

ʻI he fakataha ʻa e kau mātuʻa Kalisitiané, ko ha fakakaukauloto ʻi he lotu mo ha laumālie ʻulutukua ʻoku pouaki ai ʻa e fāʻūtahá