“Ko Hai Ia Koā ʻIate Kimoutolu ʻOku Poto mo ʻIlomeʻa?”

“Ko hai ia koā ʻiate kimoutolu ʻoku poto mo ʻilomeʻa? ʻE, ke ne ʻai ke hā ʻene ngaahi ngaue ʻi he lelei ʻene toʻonga, ʻo fai ʻaki ʻa e angavaivai ʻa poto.”—SEM. 3:13.

1, 2. Ko e hā ʻe lava ke fakamatalaʻiʻaki ʻa e tokolahi ʻoku fai e fakakaukau ʻoku nau potó?

 KO HAI ʻokú ke fakakaukau ʻoku poto moʻoní? Ko hoʻo ongo mātuʻá, ko ha tangata matuʻotuʻa pe ko ha palōfesa nai ʻi ha ʻunivēsiti? Ko e anga hoʻo vakai ki he tokotaha ʻoku potó ʻe tākiekina nai ia ʻe ho puipuituʻá mo ho ngaahi tuʻungá. Kae kehe, ʻoku mahuʻingaʻia tefito ʻa e kau sevāniti ʻa e ʻOtuá ia ʻi he anga ʻEne vakaí.

² ʻOku ʻikai ke poto moʻoni ʻa e faʻahinga kotoa ʻoku lau ʻe he māmaní ʻoku potó ʻi he ʻafio mai ʻa e ʻOtuá. Ko e fakatātaá, naʻe lave ʻa Siope ki he kau tangata ne nau fakakaukau ne nau leaʻaki ʻa e ngaahi lea ʻo e potó, ka naʻá ne fakamulituku: “Koloto ke u maʻu ha poto ʻe taha ʻiate kimoutolu.” (Siope 17:10) ʻI he fekauʻaki mo e faʻahinga naʻa nau talitekeʻi ʻa e ʻilo ʻo e ʻOtuá, naʻe tohi ʻe he ʻapositolo ko Paulá: “Lolotonga ʻenau taukave ʻoku nau poto, naʻa nau hoko ʻo vale.” (Loma 1:22) Pea fakafou ʻi he palōfita ko ʻAiseá, naʻe folofola hangatonu ai ʻa Sihova: “ʻOiaue ʻa kinautolu ʻoku poto ʻi he vakai ʻanautolu.”—Ai. 5:21.

3, 4. Ke te maʻu ʻa e poto moʻoní, ko e hā ʻa e meʻa ʻoku fiemaʻú?

³ ʻOku hā mahino, ʻoku fiemaʻu ke tau fakapapauʻi ʻa e meʻa ʻokú ne ʻai ha taha ke poto moʻoní ʻa ē ʻoku iku atu ai ki heʻene maʻu ʻa e hōifua ʻa e ʻOtuá. ʻOku ʻomai ʻe he Palovepi 9:10 (PM) ʻa e fakamaama ko ʻení: “Koe manavahe kia Jihova koe kamataaga ia oe boto: bea koe ilo oe maonioni koe fakakaukau boto ia.” Ko e potó kuo pau ke ne maʻu ha manavahē totonu ki he ʻOtuá pea tokaʻi ʻa ʻene ngaahi tuʻungá. Kae kehe, ʻoku lahi ange ʻa e meʻa ʻoku fiemaʻú ʻi hono tali fakaefakakaukau pē ʻa e ʻi ai ʻa e ʻOtuá mo ʻene ngaahi tuʻungá. ʻOku langaʻi ʻe he ākonga ko Sēmisí ʻa ʻetau fakakaukau fekauʻaki mo e meʻá ni. (Lau ʻa e Semisi 3:13.) Fakatokangaʻi ange ʻa e lau ko ʻení: “ʻE, ke ne ʻai ke hā ʻene ngaahi ngaue ʻi he lelei ʻene toʻonga.” Ko e poto moʻoní ʻoku totonu ke hā ia ʻi he meʻa ʻokú ke fai mo leaʻaki ʻi he ʻaho kotoa pē.

⁴ Ko e poto moʻoní ʻoku kau ki ai ʻa hono ngāueʻaki ʻa e fakafuofua leleí mo hono ngāueʻaki ʻa e ʻiló mo e mahinó ʻi ha founga lavameʻa. Ko e hā ʻa e ngaahi tōʻonga ʻe fakaeʻa ai ʻoku tau maʻu ʻa e poto ko iá? ʻOku fakahokohoko mai ʻe Sēmisi ha ngaahi meʻa ʻa ia ʻe hā maeʻeeʻa ia ʻi he ngaahi tōʻonga ʻa e faʻahinga ʻoku potó. a Ko e hā e meʻa naʻá ne pehē ʻe lava ke ne tokoniʻi kitautolu ke tau maʻu ha vahaʻangatae lelei mo e kaungātuí, pea pehē ki he faʻahinga ʻi tuʻa ʻi he fakatahaʻangá?

Fakahaaʻi ʻe he Tōʻongá ʻa e Poto Moʻoní

 5. ʻE fēfē ʻa e ʻulungāanga ʻo ha taha ʻoku poto moʻoni?

⁵ ʻIo, naʻe fakafehokotaki ʻe Sēmisi ʻa e potó ki he ʻulungāanga leleí. Koeʻuhi ko e manavahē kia Sihová ʻa e kamataʻanga ʻo e potó, ʻoku feinga ha tokotaha poto ke ʻai hono ʻulungāangá ke fehoanaki mo e ngaahi founga mo e tuʻunga ʻa e ʻOtuá. ʻOku ʻikai fanauʻi mai kitautolu mo e poto fakaʻotuá. Kae kehe, ʻe lava ke tau maʻu ia fakafou ʻi he ako mo e fakalaulauloto tuʻumaʻu ki he Tohi Tapú. ʻE tokoniʻi kitautolu ʻe he meʻá ni ke tau fai ʻa e meʻa ʻoku ekinaki mai ʻi he Efeso 4:32e (Ef 5:1, PM): “Mou hoko muʻa ko e kau faʻifaʻitaki ki he ʻOtua.” Ko e lahi ange ʻetau ʻai hotau ʻulungāangá ke fehoanaki mo e ʻulungāanga ʻo e ʻOtuá, ko e lahi ange ia ʻa e hā atu ʻa e potó ʻi heʻetau ngaahi tōʻongá. ʻOku māʻolunga ange fau ʻa e ngaahi founga ʻa Sihová ʻi he ngaahi founga ʻa e tangatá. (Ai. 55:8, 9) Ko ia ʻi heʻetau faʻifaʻitaki ki he ngaahi founga fai ʻa Sihová, ʻe sio mai ai ʻa e kakai ʻo tuaʻaá ʻoku tau makehe kitautolu.

 6. Ko e hā ko e fakamoʻoni ai ʻo e anga-fakaʻotuá ʻa e anga-vaivaí, pea ko e hā ʻoku kau ki he ʻulungāanga ko ʻení?

⁶ ʻOku fakahaaʻi ʻe Sēmisi ko e founga ʻe taha ke  hoko ai ʻo tatau mo Sihová ko hono maʻu ʻa e “angavaivai ʻa poto.” Neongo ʻoku kau ki he anga-vaivaí ʻa e anga-fakaalaalá, ʻi he taimi tatau ʻe lava ke maʻu ʻe ha Kalisitiane ʻa e loto-papau ʻa ia ʻoku tokoniʻi ai ia ke ne mafamafatatau ʻi heʻene tōʻongá. Neongo ʻokú ne maʻu ʻa e mālohi taʻefakangatangata, ʻoku anga-vaivai ʻa e ʻOtuá pea ʻoku ʻikai ke tau ilifia ke ʻunuʻunu ofi kiate ia. Naʻe tapua lelei ʻaupito ʻe he ʻAlo ʻo e ʻOtuá ʻa e anga-vaivai ʻa ʻene Tamaí ʻo lava ai ke ne pehē: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu. ʻAi ʻeku ioke kiate kimoutolu, pea mou ako ʻiate au: he ʻoku ou faʻa kataki [pe anga-vaivai] mo angafākatuʻa, pea te mou ʻilo ha mālōlō ʻi homou laumalie.”—Mt. 11:28, 29; Fili. 2:5-8.

 7. Ko e hā ʻe lava ke tau sio ai kia Mōsese ko ha faʻifaʻitakiʻanga lelei ia ʻo e anga-vaivaí?

⁷ ʻOku talanoa ʻa e Tohi Tapú ki he faʻahinga ne nau tuʻu-ki-muʻa ʻi he anga-vaivaí, pe anga-maluú. Ko e taha ʻo kinautolu ko Mōsese. Naʻá ne maʻu ha fatongia lahi, ka ʻoku fakamatalaʻi ia ʻo pehē “nae agavaivai ia, o lahi hake i he kau tagata kotoabe nae i he fuga o mamani.” (Nom. 11:29; 12:3, PM) Pea manatuʻi ʻa e mālohi naʻe ʻoange ʻe Sihova kia Mōsese ke fakahokoʻaki Hono finangaló. Naʻe fiefia ʻa Sihova ke ngāueʻaki ʻa e faʻahinga anga-vaivaí ke nau fakahoko ʻene taumuʻá.

 8. ʻOku lava fēfē ke fakahāhā ʻe he kakai taʻehaohaoá ʻa e “angavaivai ʻa poto”?

⁸ ʻOku mahino mai, ʻoku malava ʻe he faʻahinga taʻehaohaoa ʻo e tangatá ke nau fakahāhā ʻa e “angavaivai ʻa poto.” Fēfē nai kitautolu? ʻE lava fēfē ke tau ʻai ke lelei ange ʻetau fakahāhā atu ʻa e ʻulungāanga ko ʻení? Ko e anga-vaivaí ko e taha ia ʻo e ngaahi fua ʻo e laumālie māʻoniʻoni ʻo Sihová. (Kal. 5:22, 23, PM) ʻE lava ke tau lotu ʻo kole hono laumālié pea fai ha feinga papau ke fakahāhā hono fuá, ʻo falala ʻe tokoniʻi kitautolu ʻe he ʻOtuá ke lelei ange ʻa ʻetau fakahāhā ʻa e anga-vaivaí. ʻOku tau maʻu ʻa e fakaueʻiloto fefeka ke fai pehē ʻi he fakapapauʻi mai ʻe he tokotaha-tohi-sāmé: “Ko e angavaivai te ne ako ki ai [ʻe he ʻOtuá] hono hala oʻona.”—Sāme 25:9.

9, 10. Ko e hā ʻa e feinga ʻoku fiemaʻu kiate kitautolu ke fakahāhā ai ʻa e anga-vaivai fakaʻotuá, pea ko e hā hono ʻuhingá?

⁹ Kae kehe, ʻe fiemaʻu nai ʻa e feinga lahi ke hoko ʻo lelei ange ʻi he tafaʻaki ko ʻení. Koeʻuhi ko hotau puipuituʻá, ko e niʻihi nai ʻo kitautolu ʻe ʻikai te tau hehema ke anga-vaivai. ʻIkai ko ia pē, ʻe fakaʻaiʻai nai ʻe he kakai takatakai ʻiate kitautolú ha fakakaukau fehangahangai mo ia, ʻi he pehē kuo pau ki ha tokotaha ke ne “tauʻi ʻa e afí ʻaki ʻa e afi.” Ka ʻoku fakapotopoto moʻoni nai ʻeni? Kapau ʻe kamata totolo ha vela ʻi ho ʻapí, te ke tāmateʻi ia ʻaki ʻa e lolo pe ko e vai momoko? Ko hono pī ʻaki ʻa e loló te ne ʻai ʻe ia ke toe kovi ange, lolotonga iá ko hono pī ʻaki ʻa e vai momokó ʻoku ngalingali ʻe iku ai ki he meʻa te ke loto ki aí. ʻI he tuʻunga meimei tatau, ʻoku akonaki mai ʻa e Tohi Tapú: “Ko e tali malū ʻoku lolou ai ʻa e houhau: Ka ko e lea masila ʻoku ne langaʻi ʻa e ʻita.” (Pal. 15:1, 18) ʻE lava ke tau sio ki he founga ʻe malava ai ke tau fakahāhā ʻa e poto moʻoní ʻaki ʻa e fakafeangai ʻi ha founga anga-vaivai, ʻi he taimi hono hoko ʻe malanga hake ai ha fetēleni ʻi loto pe ʻi tuʻa ʻi he fakatahaʻangá?—2 Tim. 2:24.

¹⁰ Hangē ko ia kuo fai e lave ki aí, ko e tokolahi ʻoku tākiekina ʻe he laumālie ʻo e māmaní ʻoku nau mamaʻo kinautolu mei he anga-fakaalaalá, melinó mo e nongá. ʻI hono kehé, ʻoku tokolahi ʻa e kakai ʻoku nau anga-fefeka mo hīkisiá. Naʻe lāuʻilo ʻa Sēmisi ki he meʻá ni, pea naʻá ne ʻomi ha ngaahi fakatokanga koeʻuhi ke lava ʻo fakaʻehiʻehi ai ʻa e faʻahinga ʻi he fakatahaʻangá mei hono fakameleʻi ʻe he laumālie ko iá. Ko e hā ha toe meʻa ʻe lava ke tau ako mei he akonaki naʻá ne faí?

Ngaahi ʻUlungāanga ʻo e Valé

11. Ko e hā ʻa e ngaahi ʻulungāanga ʻoku fepaki mo e poto fakaʻotuá?

¹¹ Naʻe tohi faitotonu ʻaupito ʻa Sēmisi ʻo fekauʻaki mo e ngaahi ʻulungāanga ʻoku fepaki tonu mo e poto fakaʻotuá. (Lau ʻa e Semisi 3:14.) Ko e meheká mo e fekeʻikeʻí ko e ngaahi tōʻonga fakakakano ia, ʻo ʻikai ko e ngaahi tōʻonga fakalaumālie. Fakakaukau atu ki he meʻa ʻoku hokó ʻi he taimi ʻoku failahia ai ʻa e fakakaukau fakakakanó. ʻOku puleʻi ʻe ha kulupu ʻe ono ʻoku taku ko e kau Kalisitiane ʻa e ngaahi vaʻa ʻo e Siasi ʻo e Faʻitoka Māʻoniʻoní ʻi Selusalema, ʻa ia ʻoku fakahuʻunga tokua naʻe langa ʻi he feituʻu naʻe fakapoongi pea telio ai ʻa Sīsuú. Ko e vā ʻo e ngaahi kulupú ni ko e koto fekeʻikeʻi pē. ʻI he 2006, naʻe fakamatala ai ʻa e makasini Time ʻo fekauʻaki mo ha tuʻunga naʻe hoko ʻa ia ko e kau mōnike ʻi aí ne nau “kē longoaʻa ʻo laulaui houa, . . . ʻo nau tau tā ʻaki ʻa e ngaahi fuʻu tuʻuʻanga teʻelangó.” Naʻe lahi ʻaupito ʻenau fetaʻefalalaʻakí  ʻo nau iku ʻave ai ʻa e kī ki he fale lotú ke tauhi ʻe ha tokotaha Mosilemi.

12. ʻI he taimi ʻoku ʻikai maʻu ai ʻa e potó, ko e hā ʻe lava ke hokó?

¹² Ko e faʻahinga fakahāhā tōtuʻa pehē ʻo e fekeʻikeʻí ʻoku ʻikai ʻaupito totonu ke hā ia ʻi he fakatahaʻanga ʻo e kau Kalisitiane moʻoní. Kae kehe, ʻi he taimi ʻe niʻihi kuo ʻai ai ʻe he taʻehaohaoá ha niʻihi ke nau fakahāhā ʻa e taʻefieauna ʻi heʻenau fakakaukaú tonu. ʻE lava ke taki atu ia ki ha tuʻunga ʻo e fekīhiaki mo e fetuʻusi. Naʻe fakatokangaʻi ʻeni ʻe he ʻapositolo ko Paulá ʻi he fakatahaʻanga ʻi Kolinitoó, ko ia naʻá ne tohi ai: “Kapau leva ʻoku ʻiate kimoutolu ʻa e meheka mo e fetuʻusi, ʻikai ʻoku mou fakakakano, pea laka fakaetangata pe?” (1 Kol.1Ko 3:3) Ko e tuʻunga fakamamahi ko iá naʻe hoko ia ʻi ha vahaʻa taimi ʻi he fakatahaʻanga ko ʻeni ʻi he ʻuluaki senitulí. Ko ia ai, ʻoku fiemaʻu ke tau tokanga ke ʻoua ʻe hūhū mai ha faʻahinga laumālie pehē ki he fakatahaʻangá he ʻahó ni.

13, 14. ʻOmai ha ongo fakatātā ʻo e founga ʻe hā nai ai ha laumālie fakakakano.

¹³ ʻE lava fēfē ke hūhū mai ha faʻahinga laumālie pehē? ʻE lava ke kamata ia ʻi ha fanga kiʻi meʻa iiki. Ko e fakatātaá, ʻi he taimi ʻoku langa ai ha Fale Fakatahaʻanga, ʻe malanga hake nai ai ha ngaahi faikehekehe ʻi he fakakaukaú ʻi he felāveʻi mo e founga ʻoku totonu ke faiʻaki ʻa e ngāué. ʻE lava ke fakakikihi ha tokoua ʻe taha kapau ʻoku ʻikai tali ʻa ʻene fokotuʻú, ʻo iku nai ʻo ne tuʻukāivi ʻi hono fakaangaʻi ʻa e ngaahi fili kuo faí. ʻE aʻu nai ʻo ne fakafisi ke fai ha meʻa ʻe taha ʻi he ngāué! Ko ha taha ʻoku tōʻonga pehē, ʻoku ngalo ʻiate ia ko hono fakahoko ha ngāue ʻa e fakatahaʻangá ʻoku faʻa fakatuʻunga lahi ange ia ʻi he laumālie melino ʻo e fakatahaʻangá kae ʻikai ko e founga ngāue ʻoku fakahokoʻakí. Ko ha laumālie anga-vaivai ko e meʻa ia ʻe tāpuakiʻi ʻe Sihová, kae ʻikai ko e fekīhiakí.—1 Tim. 6:4, 5.

¹⁴ Ko ha toe fakatātā ʻe taha ko hano fakatokangaʻi nai ʻe he kau mātuʻa ʻi he fakatahaʻangá ha mātuʻa ʻe taha, neongo kuó ne faifatongia mai ʻeni he ngaahi taʻu, ʻoku hā mahino mai ʻoku ʻikai te ne taau mo e ngaahi fiemaʻu ʻa e Tohi Tapú. ʻI hono ʻiloʻi kuo ʻosi ʻoange ki he tokouá ha faleʻi pau ʻi he kuohilí ka kuo teʻeki ai pē ke ne fakaleleiʻí, ko e ʻovasia ʻaʻahi fakasēketí ʻoku loto-tatau peá ne kau ʻi hono fakahā ʻoku totonu ke tuku hifo ia mei he tuʻunga ko e mātuʻá. ʻE fēfē ʻene vakai ki aí? Te ne tali nai ʻa e fakamulituku loto-taha ʻa e kau mātuʻá pea mo e akonaki Fakatohitapú ʻi ha laumālie fakatōkilalo mo e anga-vaivai pea fakapapauʻi ke ne aʻusia ʻa e ngaahi tuʻunga ʻa e Tohi Tapú kae lava ke ne toe maʻu ʻa e fatongia ko iá? Pe te ne tukulotoa ʻe ia ʻa e loto-mamahí mo e meheká ʻi he ʻikai ke ne kei maʻu ʻa e monū ko ia naʻá ne maʻu ki muʻá? Ko e hā ke fakangalingali ai ha tokoua ʻokú ne taau ʻi he tuʻunga ko ha tangata matuʻotuʻa ange, lolotonga iá ʻoku ʻikai moʻoni ke ne pehē? He fakapotopoto ange ē ke fakahāhā ʻa e anga-fakatōkilaló mo e mahinó!

15. Ko e hā te ke pehē ai ʻoku mahuʻinga ʻaupito ʻa e akonaki fakamānavaʻi ʻi he Semisi 3:15, 16?

¹⁵ Ko e moʻoni, ʻoku ʻi ai ʻa e ngaahi tuʻunga kehe ʻa ia ʻe lava ke hā ai ha fakakaukau meimei tatau. Kae tatau ai pē pe ko e hā ʻa e tuʻunga ʻoku hokó, kuo pau ke tau ngāue ke fakaʻehiʻehi mei he ngaahi ʻulungāanga ko iá. (Lau ʻa e Semisi 3:15, 16.) Naʻe ui ʻe he ākonga ko Sēmisí ʻa e ngaahi ʻulungāanga peheé ʻoku “taka fakaemamani” koeʻuhí ʻoku fakakakano, kae ʻikai fakalaumālie. ʻOku “taka fakaʻatamai” pe anga-fakamanu ʻa e ngaahi ʻulungāanga ko iá he ko ʻenau tupu mei he ngaahi hehema fakakakano, ʻo meimei tatau mo e tōʻonga ʻo e ngaahi meʻamoʻui taʻefakakaukau ko iá. Ko e faʻahinga tōʻonga ko iá ʻoku “taka fakatevolo,” he ʻoku nau tapua mai ʻa e ngaahi tōʻonga ʻo e ngaahi  meʻamoʻui laumālie ko e fili ʻo e ʻOtuá. He taʻefeʻunga moʻoni ē ke fakahāhā ʻe ha Kalisitiane ʻa e faʻahinga ʻulungāanga ko iá!

16. Ko e hā ʻa e ngaahi fengaʻunuʻaki ʻe fiemaʻu nai ke tau faí, pea ʻe lava fēfē ke tau lavameʻa ʻi hono fai iá?

¹⁶ Ko e mēmipa taki taha ʻi he fakatahaʻangá ʻoku lelei ke ne fai ha sivisiviʻi-kita pea ngāue ke toʻo atu ʻa e ngaahi tōʻonga ko iá. ʻI he tuʻunga ko e kau fai akonaki ʻi he fakatahaʻangá, ʻoku totonu ke lāuʻilo ʻa e kau ʻovasiá ki he fiemaʻu ke toʻo atu meiate kinautolu ʻa e ngaahi tōʻonga ʻikai leleí. ʻOku ʻikai faingofua ke lavaʻi ʻeni koeʻuhí ko ʻetau taʻehaohaoá pea mo e tākiekina ʻa e māmani ko ʻení. Ko e fai peheé ʻe lava ke fakatatau ia ki ha feinga ke kaka ʻi ha foʻi tahake ʻoku pelepela mo hekeheke. Ka ʻikai ha meʻa ke piki ki ai, ko ʻetau heheke fakaholomui pē. Kae kehe, ʻi he piki maʻu ki he akonaki ʻoku maʻu ʻi he Tohi Tapú, pea pehē ki he tokoni ʻoku tokonaki mai ʻe he fakatahaʻanga ʻa e ʻOtuá ʻi māmani lahí, ʻe lava ke tau ngaʻunu ai ki muʻa.—Sāme 73:23, 24.

Ngaahi ʻUlungāanga ʻOku Kumi e Potó ke Fakahāhaá

17. ʻOku anga-fēfē ʻa e faʻa fakafeangai ʻa e potó ʻi he taimi ʻoku fetaulaki ai mo e koví?

¹⁷ Lau ʻa e Semisi 3:17. ʻE lava ke tau maʻu ʻaonga mei he fakakaukau ki he niʻihi ʻo e ngaahi ʻulungāanga ʻoku haʻu mei hono fakahāhā ʻa e “poto ʻoku mei ʻolunga.” ʻOku kau ki he maʻá ʻa e hoko ʻo taʻemele mo taʻeʻuliʻi ʻi heʻetau ngaahi tōʻongá mo e fakaueʻilotó. ʻOku fiemaʻu ke tau talitekeʻi leva ʻa e ngaahi meʻa ʻoku koví. Ko hono fai iá ʻoku totonu ke hoko ia ko ha meʻa ʻoku ʻotomētiki pē ʻene hokó. Tau pehē pē ʻoku ngāueʻaki ʻe hoʻo toketaá ha kiʻi hāmala ʻo tātaaʻi ʻi he foʻi uoua ʻi lalo siʻi pē ʻi ho foʻi tuí. ʻOku fakafokifā pē ʻa e ʻaka hangatonu ʻa ho vaʻé ʻiate ia pē. ʻOku ʻotomētiki pē ʻene peheé; ʻoku ʻikai fiemaʻu ia ke ke toe fakakaukau ki ai. ʻOku totonu ke pehē pē ʻa e taimi ʻoku fakataueleʻi ai kitautolu ke tau fai ha meʻa ʻoku kovi. Ko ʻetau anga-maʻá mo hotau konisēnisi kuo akoʻiʻaki ʻa e Tohi Tapú ʻoku totonu ke ʻotomētiki pē ʻene ueʻi kitautolu ke tau talitekeʻi ʻa e meʻa ʻoku koví. (Loma 12:9) ʻOku ʻomai ʻe he Tohi Tapú ʻa e ngaahi faʻifaʻitakiʻanga ʻo e faʻahinga ne nau fakafeangai peheni, ʻo hangē ko Siosefa mo Sīsuú.—Sen. 39:7-9; Mt. 4:8-10.

18. ʻOku ʻuhinga ki he hā ʻa e (a) fakamelinó? (e) fakatupu melinó?

¹⁸ Ko e poto fakaʻotuá ʻoku fiemaʻu mai ai ke tau hoko foki ʻo fakamelino. ʻOku kau ki ai ʻa e fakaʻehiʻehi mei he fakaaoaó, tōʻonga fakafetaú, pe ngaahi tōʻonga te ne veuki ʻa e melinó. ʻOku toe fakamatala lahi ange ʻa Sēmisi ki he poini ko ʻení ʻi heʻene pehē: “Ko e fua ko e maʻoniʻoni, ko hono to ʻoku fai ʻi he melino ʻe kinautolu ʻoku fakatupu melino.” (Sem. 3:18) Fakatokangaʻi ʻa e kupuʻi lea ko ia ko e “fakatupu melino.” ʻI he fakatahaʻangá, ʻoku tau ʻiloa ko e kau fakatupu melino pe ko e kau fakatupu kē? ʻOku tau fetōkehekeheʻaki pe taʻefelotoi maʻu pē mo e niʻihi kehé, ʻo ʻitangofua pe fakatupu ʻita ki he niʻihi kehé? ʻOku tau tuʻukāivi nai ke tali kitautolu ʻe he niʻihi kehé, pe ʻoku tau ngāue fakatōkilalo ke toʻo atu ʻa e ngaahi tōʻonga fakafoʻitangata  ʻe fakatupu ʻita nai ki he niʻihi kehé? ʻOku tau ʻiloa ko e faʻahinga ʻoku feinga ke pouaki ʻa e melinó, ʻo fakavave ke fakamolemoleʻi pea tuku ki mui ʻa e faihala mai ʻa e niʻihi kehé? Ko e sivisiviʻi-kita faitotonú ʻe lava ke ne tokoniʻi kitautolu ke tau sio pe ʻoku fiemaʻu ke tau fakaleleiʻi hono fakahāhā ʻa e poto fakaʻotuá ʻi he fekauʻaki mo e meʻá ni.

19. ʻOku lava-fēfē ke hoko ʻo ʻiloa ko ha tokotaha ʻoku anga-fakaʻatuʻi?

¹⁹ Naʻe fakakau ʻe Sēmisi ʻa e fakaʻatuʻí ʻi hono fakamatalaʻi ʻa e meʻa ʻokú ne tapua mai ʻa e poto mei ʻolungá. ʻOku ʻiloa kitautolu ʻoku tau hehema ke ʻulutukua ki he niʻihi kehé ʻi he taimi ʻoku ʻikai kaunga ai ki ai ha tefitoʻi moʻoni Fakatohitapu, ʻo ʻikai fakavave ke tuʻukāivi ke fai ki heʻetau ngaahi tuʻunga fakafoʻituituí tonu? ʻOku tau maʻu ha ongoongo ʻi he hoko ʻo anga-ʻofa mo anga-ngofua ʻi he talanoá? ʻOku fakahāhaaʻi ʻe he ngaahi meʻá ni ʻa e fiemaʻu ke tau ako ke fakaʻatuʻí.

20. Ko e hā ʻe iku ki aí ʻi heʻetau fakahāhā ʻa e ngaahi ʻulungāanga fakaʻotua naʻa tau toki lāulea ki aí?

²⁰ He ngaahi tuʻunga fakafiefia ē ʻe lava ke hoko ʻi ha fakatahaʻanga ʻi hano fakahāhā tōtōivi ʻi he taimi kotoa pē ʻe he fanga tokouá mo e fanga tuofāfiné ʻa e ngaahi ʻulungāanga fakaʻotua naʻe tohi ʻa Sēmisi ʻo fekauʻaki mo iá! (Sāme 133:1-3) ʻI he feangavaivaiʻakí, fefakamelinoʻakí, mo e fefakaʻatuʻiʻakí, ʻe iku moʻoni ia ki he vahaʻangatae lelei ange pea ʻe hā mahino ai ʻoku tau maʻu ʻa e “poto ʻoku mei ʻolunga.” Te tau vakai ʻi he ako hono hokó ki he founga ʻe lava ke tokoniʻi ai kitautolu ʻi he ako ke vakai ki he niʻihi kehé ʻo hangē ko e vakai ʻa Sihová ʻi he fekauʻaki mo e meʻá ni.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā e meʻa ʻokú ne ʻai ha Kalisitiane ke ne maʻu ʻa e poto moʻoní?

• ʻE lava fēfē ke tau ʻai ke lelei ange hono fakahāhā ʻa e poto fakaʻotuá?

• Ko e hā ʻa e ngaahi ʻulungāanga ʻoku hā ʻi he faʻahinga ʻoku ʻikai te nau fakahāhā ʻa e “poto ʻoku mei ʻolunga”?

• Ko e hā ʻa e ngaahi ʻulungāanga ʻokú ke fakapapauʻi ke fakatupulekina lahi angé?

[Fehuʻi ki he Ako]

[Fakatātā ʻi he peesi 23]

ʻE lava fēfē ke hūhū mai ʻa e fetuʻusí ʻi he ʻahó ni?

[Fakatātā ʻi he peesi 24]

ʻOku ʻotomētiki pē ʻa hoʻo talitekeʻi ʻa e koví?