ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻa e pole mafatukituki kuo fehangahangai mo e kau Kalisitiane ʻe niʻihi hili ʻa e malí, pea ko e hā ʻoku totonu ke nau feinga ke faí?

ʻE fakatokangaʻi nai ʻe ha kau Kalisitiane ʻe niʻihi ʻoku ʻikai ke nau fuʻu faitatau mo honau hoá. ʻI he ʻiloʻi ʻoku ʻikai ko ha solovaʻanga ʻe ala tali ʻa e vete ʻoku ʻikai Fakatohitapú, ʻoku fiemaʻu ke nau ngāue mālohi ke fakatolonga ʻa e nofo malí.—4/15, peesi 17.

• Ko e hā ʻa e ngaahi pole ʻe fehangahangai nai mo ha Kalisitiane ʻi ha ʻapi tauhiʻanga vaivai?

ʻE ʻikai nai te ne maheni mo e fakatahaʻanga ʻi he feituʻu ʻoku tuʻu ai ʻa e ʻapi tauhiʻanga vaivaí. Ko e tokolahi taha ʻi he tauhiʻanga ko iá ʻoku nau maʻu nai ha ngaahi tui kehe pea te nau feinga nai ke fakakau ia ʻi he ngaahi meʻa fakalotú. Ko e kāinga Kalisitiané mo e ngaahi mēmipa ʻo e fakatahaʻanga ʻi he feituʻu ko iá ʻoku totonu ke nau tokanga ki he ngaahi palopalema ko ʻení pea ʻoatu ʻa e poupou mo e tokangaekina.—4/15, peesi 25-27.

• Ko e hā ʻa e ngaahi sitepu ʻe fā ʻe lava ke ne tokoniʻi ha ongo meʻa mali ke solova ʻa e ngaahi palopalemá?

Fokotuʻu ha taimi ke talanoa ai ki he ngaahi meʻa mahuʻingá. (Koh. 3:1, 7) Fakahāhā totonu mo anga-fakaʻapaʻapa ʻa hoʻo fakakaukaú. (Ef. 4:25) Fanongo pea tokaʻi ʻa e ngaahi ongoʻi ʻa ho hoá. (Mt. 7:12) Felotoi ki ha solovaʻanga, pea ngāue fakataha ki ai. (Koh. 4:9, 10)—7/1, peesi 10-12.

• Ko e hā ʻoku totonu ke tau fakavave ai ke fakaleleiʻi ha ngaahi meʻa kapau ʻoku tau ʻita ʻi hotau tokouá?

Mei he vakai ʻa e ʻOtuá, ko hotau vahaʻangatae mo hotau fanga tokouá ko ha konga mahuʻinga ia ʻo e lotu moʻoní. Ko ia ai, naʻe ekinaki ʻa Sīsū ki heʻene kau ākongá ke nau “ʻalu vave ʻo ʻahiʻahi fakamolemole.” (Mt. 5:25) Naʻe tohi ʻe Paula ʻa e meʻa meimei tatau: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.” (Ef. 4:26, 27) Kapau ʻoku totonu pē ʻetau ʻitá, ʻoku totonu ke tau ngāue vave ke fakaleleiʻi ʻa e meʻá koeʻuhi ke ʻoua te tau ʻi ha tuʻunga ʻita ai pē ʻo fakaʻatā ai ke ngāueʻaongaʻaki ia ʻe he Tēvoló kiate kitautolu.—Luke 17:3, 4.—5/15, peesi 6, 7.

• Ko e hā ʻa e ngaahi kōmiti ʻoku ngāue ai ʻa e ngaahi mēmipa ʻo e Kulupu Pulé?

Kōmiti Kouʻotineita; Kōmiti Kau Ngāue; Kōmiti Pulusi; Kōmiti Ngāue; Kōmiti Faiako; Kōmiti Faitohi.—5/15, peesi 29.

• Ko e hā ʻa e “aga [līʻoa] faka-Otua”?

Ko e anga-līʻoá ʻoku kau ki ai ʻa e faivelenga ʻi he fakatapuí mo e mateaki. ʻOku fakamatalaʻi ʻe ha tikisinale Tohi Tapu ʻe taha ʻa e foʻi lea faka-Kalisi ʻoku liliu mei ai ʻa e “aga [līʻoa] faka-Otua” ko e “lehilehiʻi lelei mo koloaʻaki ʻo tauhi maʻu ʻa e manavahē ki he ʻOtuá.”—6/15, peesi 13.

• Naʻe ʻuhinga ʻa e ʻulungāanga ʻoku fakamatalaʻi ʻi he Loma 1:24-32 ki he kau Siú pe ki he kau Senitailé?

ʻE lava pē ke ʻuhinga ʻa e fakamatalá ki ha faʻahinga taha pē ʻi he ongo kakaí, ka naʻe ʻuhinga tautefito ʻa e ʻapositolo ko Paulá ki he kau ʻIsileli ʻo e kuonga muʻá ʻa ia naʻe ʻikai te nau muimui ki he Laó ʻi he laui senituli. Naʻa nau ʻiloʻi ʻa e ngaahi tuʻutuʻuni māʻoniʻoni ʻa e ʻOtuá, ka naʻe ʻikai te nau moʻui ʻo fakatatau ki ai.—6/15, peesi 29.

• Ko hai ʻoku fakatātaaʻi ʻe he fanga manupuna ʻi he talanoa fakatātā ʻa Sīsū ʻoku lēkooti ʻi he Maake 4:4?

Naʻe pehē ʻe Sīsū ko e fanga manupuna ʻo e ʻataá naʻe malava ke nau maʻu ha nofoʻanga ʻi he malumalu ʻo e Puleʻangá. ʻOku fakatātaaʻi ʻe he fanga manupuna ko ʻení ʻa e faʻahinga loto-totonu ʻoku nau kumi ki ha maluʻanga ʻi he fakatahaʻanga Kalisitiané.—7/15, peesi 18.

• Ko e hā ʻe lava ai ʻe he fakatupulekina ʻa e fakakaukau lelei ki he meʻa ʻoku tau ʻamanekiná ʻo fakalahi ʻetau fiefiá?

Kapau te tau feinga ke lavaʻi ha ngaahi taumuʻa faingataʻa ʻo tatau ai pē pe ko e hā, ʻoku tau tuku atu ai kitautolu ki he loto-hohaʻa lahi moʻoni. Neongo ia, ʻoku totonu ke tau tokanga ke ʻoua te tau fuʻu fakafiefiemālie, ʻo ngāueʻaki ʻa hotau ngaahi ngataʻanga ʻoku tau ʻiloʻí ko ha kalofanga ia ke tau fai pē ha meʻa siʻisiʻi ʻi he ngāue fakafaifekaú.—7/15, peesi 29.