Ngaahi Meʻa Mahuʻinga mei he Tohi ki he Kau Kalētiá, ʻEfesoó, Filipaí mo e Kau Kolosé
ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi ki he Kau Kalētiá, ʻEfesoó, Filipaí mo e Kau Kolosé
ʻI HE fanongo ki he afeʻi ʻa e kau Kalisitiane ʻe niʻihi mei he lotu maʻá ʻe he tākiekina ʻa e kau lotu faka-Siú, ʻoku fai ai ʻe he ʻapositolo ko Paulá ha tohi mālohi ki he “ngaahi siasi [pe fakatahaʻanga] ʻo Kaletia.” (Kal. 1:2) ʻI hono hiki ʻi ha taimi lolotonga ʻa e 50-52 T.S., ʻoku maʻu ʻi he tohí ha akonaki fakahangatonu mo ha fakaʻaiʻai mālohi.
ʻI he taʻu nai ʻe hongofulu ki mui ai ʻi he lolotonga ʻene ʻi Loma ko e “bobula a Jisu Kalaisi,” ʻoku tohi ai ʻa Paula ki he ngaahi fakatahaʻanga ʻi ʻEfesoó, ʻi Filipaí mo ia ʻi Kolosé, ʻo ʻoatu kiate kinautolu ʻa e akonaki ʻaonga mo e fakalototoʻa anga-ʻofa. (Ef. 3:1, PM) Ko kitautolu ʻi he ʻaho ní ʻe lava ke tau maʻu ʻaonga mei he tokanga ki he pōpoaki ʻi he tohi Kaletia, Efeso, Filipai mo e tohi Kolosé ʻa ia ko e ngaahi tohi ʻi he Tohi Tapú.—Hep. 4:12.
“FAKATONUHIA”—ANGA-FĒFĒ?
Koeʻuhi ko e feinga olopoto ʻa e kau lotu Siú ke fakaongoongokoviʻi ʻa Paulá, ʻokú ne taukapoʻi ʻa hono tuʻunga ʻapositoló ʻaki ʻene fakamatala ki he ngaahi fakaikiiki pau fekauʻaki mo ʻene moʻuí. (Kal. 1:11–2:14) ʻI he fakafepakiʻi ʻenau ngaahi akonaki loí, ʻoku fokotuʻu ʻe Paula ʻa e poini: “ʻOku ʻikai fakatonuhia ha tangata mei he ngaahi ngaue faka-Lao, kae ngata pe ʻi he tui kia Sisu Kalaisi.”—Kal. 2:16.
Naʻe “huhuʻi ʻa kinautolu ʻoku moʻulaloa ki he Lao” ʻe Kalaisi pea naʻá ne fakatauʻatāinaʻi kinautolu ke nau maʻu ʻa e tauʻatāina faka-Kalisitiané, ko e lau ia ʻa Paulá. ʻOkú ne naʻinaʻi mālohi ki he kau Kalētiá: “Tuʻu maʻu ai, pea ʻoua te mou to e moʻua ʻi he ioke fakapopula.”—Kal. 4:4, 5; 5:1.
Tali ki he Ngaahi Fehuʻi Fakatohitapú:
3:16-18, 28, 29—ʻOku kei ʻaonga pē ʻa e fuakava ʻia ʻĒpalahamé? ʻIo, ʻoku kei pehē pē. Ko e fuakava Laó ko ha tānaki mai ia ki he fuakava ʻa e ʻOtuá mo ʻĒpalahamé ka ʻoku ʻikai ko hano fetongi. Ko ia ai, ʻoku kei ʻaonga pē ʻa e fuakava ʻia ʻĒpalahamé hili hono “fakakaʻanga” ʻa e Laó. (Ef. 2:15) Ko e ngaahi talaʻofa ʻi he fuakava ko iá ʻoku hoko atu ia ki he “hako” totonu ʻo ʻĒpalahamé—ʻa Kalaisi Sīsū ko e tokotaha tefitó, pea mo e faʻahinga ʻa ia ko e ‘konga kinautolu ʻo Kalaisí.’
6:2—Ko e hā ʻa e “lao ʻa Kalaisi”? Ko e lao ko ʻení ʻoku fakatuʻunga ia ʻi he kotoa ʻo e ngaahi meʻa naʻe akoʻi mo fekauʻi ʻe Sīsuú. ʻOku kau tautefito ki ai ʻa e fekau ke “feʻofaʻaki.”—Sione 13:34.
6:8—ʻOku anga-fēfē ʻetau “to ʻi he laumalie”? ʻOku tau fai ʻeni ʻaki ʻa e moʻui ʻi ha ʻalunga ʻoku fakaʻatā ai ʻa e laumālie ʻo e ʻOtuá ke ne tākiekina kitautolu. Ko e tō ʻi he laumālié ʻoku kau ki ai ʻa e kau loto-ʻaufuatō ʻi he ngaahi ngāue ʻoku pouaki ai ʻa e ngāue mai ʻa e laumālié.
Ngaahi Lēsoni kia Kitautolu:
1:6-9. ʻOku fiemaʻu ke fai ʻe he kau mātuʻa Kalisitiané ha ngāue taʻetoetoloi ʻi he taimi ʻoku malanga hake ai ha ngaahi palopalema ʻi he fakatahaʻangá. ʻI hono ngāueʻaki ha ngaahi fakaʻuhinga ʻaonga mei he Tohi Tapú, ʻe lava ke vave ai ʻenau fakahalaki ʻa e ngaahi fakaʻuhinga halá.
2:20. Ko e huhuʻí ko ha meʻaʻofa fakafoʻituitui ia ʻa e ʻOtuá maʻa kitautolu. ʻOku totonu ke tau ako ke pehē ʻetau vakai ki aí.—Sione 3:16.
5:7-9. Ko e feohi koví ʻe lava ke ne ‘taʻofi kitautolu mei he talangofua ki he meʻa ʻoku totonú.’ ʻOku fakapotopoto ke tau fakaʻehiʻehi mei ai.
6:1, 2, 5. Ko e “kau fakalaumalie” ʻe lava ke nau tokoniʻi kitautolu ke tau fua ha kavenga, ʻo hangē ko ha meʻa faingataʻa pe mamafa kuo hoko mei hano fai ha fehālaaki tupu mei he taʻeʻiló. Ka ʻi heʻetau fua hotau ngaahi fatongia fakalaumālié, kuo pau ke tau fua pē ia ʻe kitautolu.
“FALUTE ʻA E MEʻA KOTOA PE ʻIA KALAISI”
ʻI hono fakamamafaʻi ʻa e fakakaukau ʻo e fāʻūtaha faka-Kalisitiané ʻi heʻene tohi ki he kau ʻEfesoó, ʻoku lave ai ʻa Paula fekauʻaki mo ha “tuʻutuʻuni ʻi hono finangalo maʻa e akenga ʻa e kuonga fakaʻosi . . . ke falute ʻa e meʻa kotoa pe ʻia Kalaisi, ʻa e ngaahi meʻa ʻoku ʻi langi, mo e ngaahi meʻa ʻoku ʻi mamani.” Kuo tokonaki ʻe Kalaisi ha “ngaahi meʻaʻofa [ʻi he] kau tangata” ke tokoniʻi ai kitautolu ke tau “aʻu kotoa ki he tuʻunga taha ʻi he tuí.”—Ef. 1:10; 4:8, 13, NW.
Ke fakalāngilangiʻi ʻa e ʻOtuá pea pouaki ʻa e fāʻūtahá, ʻoku totonu ki he kau Kalisitiané ke nau “kofuʻaki ʻa e tangata foʻou” pea “feanganofoʻaki ʻi he ʻapasia kia Kalaisi.” ʻOku toe fiemaʻu foki ke nau “tuʻu ki he ngaahi tuʻutuʻuni kākā ʻa e Tevolo” ʻaki hono tui ʻa e teunga tau fakalaumālie kakató.—Ef. 4:24; 5:21; 6:11.
Tali ki he Ngaahi Fehuʻi Fakatohitapú:
1:4-7—Naʻe anga-fēfē hono toka tuʻutuʻuni ʻa e kau Kalisitiane paní fuoloa ki muʻa ʻi hono fanauʻi mai kinautolú? Naʻe toka tuʻutuʻuni kinautolu ʻi he tuʻunga ko ha kulupu, pe kalasi, ʻo ʻikai fai fakatāutaha. Naʻe fai ʻeni ki muʻa ʻi he hoko mai ʻa e māmani angahalaʻia ʻo e faʻahinga ʻo e tangatá. Ko e kikite naʻe hiki ʻi he Senesi 3:15, ʻa ia naʻe talaki ki muʻa ke tuʻituʻiaʻi ha taha ʻi he faʻahinga angahalaʻia ʻo e tangatá, ʻoku kau ai ʻa e taumuʻa ʻa e ʻOtuá ke ʻai ha kau muimui pau ʻo Kalaisi ke nau pule fakataha mo ia ʻi hēvani.—Kal. 3:16, 29.
2:2—ʻOku anga-fēfē ʻa e hangē ʻa e laumālie ʻo e māmaní ko e ʻataá, pea ʻoku anga-fēfē ʻene tākiekina ʻa e māmaní? Ko e “laumalie ʻoku ʻo mamani”—ʻa e laumālie ʻo e faʻifaʻitelihá mo e talangataʻá—ʻoku ʻi he feituʻu kotoa pē ia ʻo hangē pē ko e ʻataá. (1 Kol.1Ko 2:12) Ko hono mafaí, pe mālohí, ʻoku makatuʻunga ia ʻi heʻene fakamānakó, taʻeʻunuá mo ʻene taʻehōloá.
2:6—ʻOku lava fēfē ke “ʻi he ngaahi feituʻu ʻo langi” ʻa e kau Kalisitiane paní lolotonga ia ʻenau kei ʻi he māmaní? Ko e kupuʻi lea “ngaahi feituʻu ʻo langi” ʻi heʻene tuʻu hení ʻoku ʻikai ʻuhinga ia ki honau tofiʻa fakahēvani kuo talaʻofá. ʻI hono kehé, ʻokú ne fakaʻilongaʻi ʻa honau tuʻunga hakeakiʻi fakalaumālie mei hono “silaʻi ʻaki ʻa e Laumalie naʻe talaʻofa, ʻa e Laumalie Maʻoniʻoni.”—Ef. 1:13, 14.
Ngaahi Lēsoni kia Kitautolu:
4:8, 11-15. Naʻe “taki popula ha koto popula” ʻe Sīsū Kalaisi, ʻa ia, ko ʻene ʻave ia ha kau tangata mei hono puleʻia ʻe Sētané ke ngāueʻaki kinautolu ko e ngaahi meʻaʻofa ʻi hono langa hake ʻa e fakatahaʻanga Kalisitiané. ʻE lava ke tau “fai ʻaki ʻa e totonu ʻi he ʻofa, ʻo tau tupu hake ʻi heʻetau meʻa kotoa pe ke hokosi . . . ʻa Kalaisi” ʻaki ʻa e talangofua mo anganofo ki he faʻahinga ʻoku nau takimuʻa ʻiate kitautolú pea ngāue fāitaha mo e ngaahi fokotuʻutuʻu ʻa e fakatahaʻangá.—Hep. 13:7, 17.
5:22-24, 33. Tuku kehe ʻa e anganofo ki hono husepānití, ʻoku fiemaʻu ki he uaifí ke ne fakaʻapaʻapa kiate ia. ʻOkú ne fai ʻeni ʻaki ʻa e fakahāhā ʻa e “angava[i]vai mo e angamalū” pea feinga ke fakaongoongoleleiʻi ia mo ngāue ke tokoni ke lavameʻa ʻa ʻene ngaahi filí.—1 Pita 3:3, 4; Tai. 2:3-5.
5:25, 28, 29. Hangē pē ko ʻene “fafanga” ʻa ia tonú, ʻoku totonu ki ha husepāniti ke ne hoko ko ha tokotaha tokonaki lelei maʻa hono uaifí—fakaesino, fakaeongo mo e fakalaumālie. ʻOku totonu ke ne toe fakamahuʻingaʻi ia ʻaki ʻa e fakamoleki ha taimi feʻunga mo ia pea fakafeangai anga-fakaalaala kiate ia ʻi he lea mo e ngāue.
6:10-13. Ke talitekeʻi ʻa e ngaahi kongakau tēmenioó, ʻoku fiemaʻu ke tau kofu loto-ʻaufuatō ʻaki ʻa e teunga tau fakalaumālie mei he ʻOtuá.
“KE FOU ATU AI PE ʻI HE HALA PE KO IA”
ʻOku fakamamafaʻi ʻa e ʻofá ʻi he kotoa ʻo e tohi ʻa Paula ki he kau Filipaí. “Ko ʻeku lotu ʻeni,” ko ʻene leá ia, “ke to e tupulekina ʻo lahi hake ʻaupito hoʻomou ʻofa, heʻene maʻu ʻa e ʻilo kanokano mo e ongoʻi ʻo e totonu ʻi he meʻa kotoa pe.” ʻI he tokoniʻi kinautolu ke nau fakaʻehiʻehi mei he tauhele ʻo e falala tōtuʻa kiate kitá, ʻokú ne ekinaki: “Ngaue ke lavaʻi homou fakamoʻui ʻomoutolu, ʻo fai ʻapasia pe mo tailiili.”—Fili. 1:9; 2:12.
ʻOku fakalototoʻaʻi ʻe Paula ʻa e faʻahinga ʻoku nau matuʻotuʻá ke nau tuli ‘atu pe ki he ngataʻangá, ke maʻu ʻa e pale ʻo e ui mei ʻolunga ʻe he ʻOtuá.’ ʻOkú ne pehē: “Ko e ha ha meʻa kuo ta aʻu ki ai, kehe ke fou atu ai pe ʻi he hala pe ko ia.”—Fili. 3:14-16.
Tali ki he Ngaahi Fehuʻi Fakatohitapú:
1:23—Ko e hā ʻa e “meʻa ko ia ʻe ua” naʻe faingataʻaʻia ai ʻa Paulá, pea ko e hā ʻa e “tuku folau atu” naʻá ne holi ke faí? Koeʻuhi ko e tuʻunga naʻá ne ʻi aí, naʻe faingataʻaʻia ʻa Paula ʻi he meʻa ʻe ua ʻe ala hoko: ko e moʻui pe ko e mate. (Fili. 1:21) ʻI he ʻikai fakahaaʻi ʻa e meʻa te ne fili ki aí, ʻokú ne ʻai ke ʻiloʻi ʻa e meʻa naʻá ne holi ki aí—“ke tuku folau atu, ʻo nonofo mo Kalaisi.” (Fili. 3:20, 21; 1 Tes. 4:16) Ko e “tuku folau atu” ko ʻeni lolotonga ʻa e ʻi ai ʻa Kalaisí ʻe hoko ai ʻa Paula ʻo ne maʻu ʻa e pale naʻe teuteuʻi ʻe Sihova maʻaná.—Mt. 24:3.
2:12, 13—ʻI he founga fē ʻoku fakatupunga ai ʻe he ʻOtuá ʻiate kitautolu ʻa e “fiefai mo e mafai” ke fai ha meʻa? ʻE lava ke ngāue mai ʻa e laumālie māʻoniʻoni ʻo Sihová ki hotau lotó mo e ʻatamaí ke fakalahi ʻa ʻetau holi ke fai hotau lelei tahá ʻi heʻene ngāué. Ko ia ai, ʻoku ʻikai te tau fai ʻo taʻekau mai ha tokoni ʻi heʻetau ‘ngaue ke lavaʻi hotau fakamoʻuí.’
Ngaahi Lēsoni kia Kitautolu:
1:3-5. Neongo naʻa nau masiva fakamatelie, ʻoku fokotuʻu mai ʻe he kau Filipaí ha faʻifaʻitakiʻanga lelei kia kitautolu ʻi hono fakahāhā ʻa e nima-homó.—2 Kol.2Ko 8:1-6.
2:5-11. Hangē ko ia ʻoku hā mei he faʻifaʻitakiʻanga ʻa Sīsuú, ko e anga-fakatōkilaló ʻoku ʻikai ko ha fakaʻilonga ia ʻo e vaivai ka ko e mālohi fakaeʻulungāanga. ʻIkai ngata aí, ʻoku hakeakiʻi ʻe Sihova ʻa e faʻahinga anga-fakatōkilaló.—Pal. 22:4.
3:13. Ko e “ngaahi meʻa kuo tuku ki mui” ko e ngaahi meʻa nai ia ʻo hangē ko ha ngāue paʻanga lahi, ko e maluʻanga ʻo e haʻu mei ha fāmili tuʻumālie, naʻa mo ha ngaahi angahala mamafa he kuohilí ʻa ia kuo tau fakatomalaʻi pea “fufulu” kitautolu. (1 Kol.1Ko 6:11) ʻOku totonu ke tau fakangaloʻi ʻa e ngaahi meʻa ko ʻení, ʻa ia, ko hono fakangata ʻa e tokanga ki he ngaahi meʻa ko iá, pea “kakapa atu ki he ngaahi meʻa mei muʻa.”
“FAKATUUMAU I HE TUI”
ʻI heʻene tohi ki he kau Kolosé, ʻoku fakahalaki ai ʻe Paula ʻa e ngaahi fakakaukau hala ʻa e kau faiako loí. ʻOku fakatuʻunga ʻa e fakamoʻuí, ko ʻene fakaʻuhingá ia, ʻo ʻikai ʻi he ngaahi fiemaʻu ʻa e Laó, ka ʻoku fakatuʻunga ia ʻi he “tuu mau i he tui.” ʻOku fakalototoʻaʻi ʻe Paula ʻa e kau Kolosé ke nau ‘aeva ʻia Kalaisi, ʻo aka mo laga hake iate ia, bea fakatuumau i he tuí.’ ʻOku totonu ke fēfē hono ueʻi kinautolu ʻe he tuʻumaʻu ko iá?—Kol. 1:23; 2:6, 7, PM.
“Pea mou kofutuʻaʻaki ʻa e ngaahi meʻa ko ia katoa ʻa e ʻofa,” ko e tohi ia ʻe Paulá, “ʻa ia ko e fakamaʻu ʻo e haohaoa. Pea tuku ʻa e fakamelino ʻa Kalaisi ke fakamāu ʻi homou loto.” ʻOku tala ange ʻe he ʻapositoló kia kinautolu: “ʻIlonga ha meʻa te mou fai, ngaue fie ngaue ki ai, he ko e ngaue ki he ʻEiki, ʻo ʻikai ki he kakai.” ʻI he fekauʻaki mo e faʻahinga ʻi tuʻa mei he fakatahaʻangá, ʻokú ne pehē: “Ke fakapotopoto hoʻomou fakafeangai” kiate kinautolú.—Kol. 3:14, 15, 23; 4:5.
Tali ki he Ngaahi Fehuʻi Fakatohitapú:
2:8—Ko e hā ʻa e ‘ngaahi elemeniti fakamaama’ pe fakaemāmani naʻe fakatokanga ʻa Paula ʻo fekauʻaki mo iá? Ko e ngaahi ʻelemēniti ʻeni ʻo e māmani ʻa Sētané—ʻa e ngaahi meʻa tefito pe ngaahi tefitoʻi moʻoni ʻokú ne faʻu, tataki, pe ueʻi ʻa e māmaní. (1 Sione 2:16) ʻOku kau ʻi he ngaahi meʻá ni ʻa e filōsofiá, tuli ki he meʻa fakamatelié, mo e ngaahi lotu loi ʻo e māmani ko ʻení.
4:16—Ko e hā ʻoku ʻikai ko ha konga ai ʻo e Tohi Tapú ʻa e tohi ki he kau Leotisiá? ʻE lava nai ke pehē koeʻuhí ko e tohí naʻe ʻikai ha meʻa ia ai ʻe kaungatonu ki he ʻahó ni. Pe ko hono ʻuhingá nai ko ʻene toe fakamatala pē ai ki he ngaahi poini mei he ngaahi tohi kehe ʻoku kau moʻoni ʻi he Tohi Tapú.
Ngaahi Lēsoni kia Kitautolu:
1:2, 20. Ko e huhuʻí, ʻa ia ko ha tokonaki mai ia ʻe he ʻOtuá tupu mei heʻene ʻofa maʻataʻataá, ʻe lava ke ne fakamaʻa ʻa hotau konisēnisi halaiá pea ʻomi kiate kitautolu ʻa e nonga ʻi loto.
2:18, 23. Ko e “‘fakavaivai’ tokua”—ko hano ʻai fakangalingali ia ʻo e anga-fakatōkilaló ke hā lelei ki he niʻihi kehé, ʻaki nai ʻa hono taʻetali ha ngaahi meʻa fakamatelie pe ko hono ngaohikoviʻi ʻa e sinó—ko ha fakahāhā ia ʻo e ‘fakafuofuolahi ko e meʻa ʻi he ʻatamai fakakakanó.’