Ko Sihová ko e “Fakamoui” Ia Kiate Kitautolu
Ko Sihová ko e “Fakamoui” Ia Kiate Kitautolu
“E tokoni akinautolu e Jihova mo fakamoui.”—SĀME 37:40, PM.
1, 2. Ko e hā ʻa e moʻoni tefito fekauʻaki mo Sihova ko ha matavai ia ʻo e fakafiemālie mo e mālohi kiate kitautolu?
KO E ngaahi ʻata tupu mei he laʻaá ʻoku ʻikai ke tuʻumaʻu ai pē. Hangē ko e ngaʻunu ʻa e foʻi māmaní, ko e ngaahi ʻatá ʻoku ngaʻunu maʻu pē ia mo feliliuaki. Kae kehe, ko e Tokotaha-Fakatupu ʻo e foʻi māmaní mo e laʻaá, ʻoku ʻikai te ne liliu. (Mal. 3:6) “Aia,” ko e lau ia ʻa e Tohi Tapú, “oku ikai i ai ha fetooaki, be koe ata oe feliliuaki.” (Sem. 1:17, PM) Ko e foʻi moʻoni tefito ko eni fekauʻaki mo Sihová ko ha matavai moʻoni ia ʻo e fakafiemālie mo e mālohi kiate kitautolu, tautefito ʻi he taimi ʻoku tau fehangahangai ai mo e ngaahi ʻahiʻahí pea mo e ngaahi pole faingataʻa ʻi he moʻuí. Ko e hā hono ʻuhingá?
2 Hangē ko ia naʻa tau fakatokangaʻi ʻi he kupu ki muʻá, naʻe fakamoʻoniʻi ai ko Sihová ko e tokotaha-tokonaki ʻo e “fakamoui” ʻi he taimi ʻo e Tohi Tapú. (Sāme 70:5, PM) ʻOkú ne taʻefeliliuaki pea fai maʻu pē ki heʻene leá; ko ia ai, ko ʻene kau lotu he ʻaho ní ʻoku nau maʻu ʻa e ʻuhinga ke falala ai te ne ‘tokoni akinautolu mo fakamoui akinautolu.’ (Sāme 37:40, PM) Kuo tokonaki fēfē ʻe Sihova ʻa e fakamoʻui ki heʻene kau sevānití ʻi onopooni? ʻE anga-fēfē nai haʻane fai ia maʻatautolu fakafoʻituitui?
Fakahaofi mei he Kau Fakafepakí
3. Ko e hā ʻoku lava ai ke tau fakapapauʻi heʻikai taʻofi ʻe he kau fakafepakí ʻa e kakai ʻa Sihová mei hono malangaʻi ʻa e ongoongo leleí?
3 ʻOku ʻikai ha fakafepaki lahi fakasētane ʻe faifai ange pea lava ke ne taʻofi ʻa e Kau Fakamoʻoni ʻa Sihová mei heʻenau fai kia Sihova ʻa e lotu maʻatāʻatā ʻoku taau mo iá. ʻOku fakapapauʻi mai ʻe he Folofola ʻa e ʻOtuá: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa; pea ʻilonga ha ʻelelo ʻoku hopo mo koe ʻi he fakamaau, te ke fakahalaia.” (Ai. 54:17) Kuo feinga ʻa e kau fakafepakí kae ʻikai malava ke nau taʻofi ʻa e kakai ʻa e ʻOtuá mei hono fakahoko ʻa e fekau ke nau malangá. Vakai angé ki ha fakatātā ʻe ua.
4, 5. Ko e hā ʻa e fakafepaki naʻe fehangahangai mo e kakai ʻa Sihová ʻi he 1918, pea ko e hā hono olá?
4 ʻI he 1918, naʻe fehangahangai ai ʻa e kakai ʻa Sihová mo ha fakatanga kakaha ko e fakatupunga ʻe he haʻa faifekaú ʻi he fakataumuʻa ke fakasīlongoʻi ʻenau ngāue fakamalangá. ʻI Mē 7, naʻe ʻoatu ai ʻa e tuʻutuʻuni fakapuleʻanga ke puke ʻa J. F. Rutherford, ʻa ia naʻá ne tokangaʻi ʻa e ngāue fakamalanga ʻi māmani lahi ʻi he taimi ko iá, pea mo ha niʻihi kehe ʻi he ʻuluʻi ʻapitangá. Siʻi hifo he māhina ʻe ua, naʻe fakahalaiaʻi taʻetotonu ai ʻa Tokoua Rutherford mo hono kau feohí ki he faʻufaʻufono pea hilifaki mo honau tautea ngāue pōpula ʻi ha taimi lōloa. Naʻe lavameʻa ʻa e kau fakafepakí ʻi hono ngāueʻaki ʻa e ngaahi fakamaauʻangá ke taʻofi ʻaupito ʻa e ngāue fakamalangá? ʻIkai ʻaupito!
5 Manatuʻi ʻa e palōmesi ʻa Sihová: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa.” ʻI ha liliu fakafokifā ʻa e ngaahi meʻá, ʻi Maʻasi 26, 1919—ko e māhina ia ʻe hiva hili hono tauteaʻi ʻo Tokoua Rutherford mo hono kau feohí—naʻe tukuange mai ai ʻa e fanga tokoua ne tuku pilīsoné ʻi hono totongi maluʻi ki tuʻa. ʻI he taʻu hoko maí, ʻi Mē 5, 1920, naʻe fakataʻeʻaongaʻi ai ʻa e ngaahi tukuakiʻi naʻe fai kiate kinautolú. Naʻe ngāueʻaki ʻe he fanga tokouá ʻenau tauʻatāiná ke hokohoko atu ai ʻi he ngāue ʻo e Puleʻangá. Ko e hā hono olá? ʻĀua, talu mei ai mo e hoko ʻa e tupu lahi fakaʻulia! Ko e lāngilangi kotoa ki he meʻa naʻe hokó ʻoku ʻalu ia ki he tokotaha-tokonaki ʻo e “fakamoui.”—1 Kol. 3:7.
6, 7. (a) Ko e hā ʻa e feingatau naʻe fai ki he Kau Fakamoʻoni ʻa Sihová ʻi Siamane Nasi, pea ko e hā hono olá? (e) Ko e hisitōlia ʻi onopooni ʻo e kakai ʻa Sihová ʻoku fakamoʻoni ai ki he moʻoniʻi meʻa ko e hā?
6 Sai fakakaukau angé ki ha fakatātā hono ua. ʻI he 1934, naʻe fuakava ai ʻa Hitilā te ne fakaʻauha ʻosi ʻa e Kau Fakamoʻoni ʻa Sihova ʻi Siamané. Naʻe ʻikai ko ha fakamanamana noaʻia ia. Naʻe hoko atu ai hono puke pōpula mo e tuku pilīsone ʻo e tokolahi. Naʻe ngaohikovia ʻa e Kau Fakamoʻoni ʻe laui afe; tāmateʻi ʻa e lauingeau ʻi he ngaahi kemi fakamamahí. Naʻe lavameʻa ʻa Hitilā ʻi heʻene feingatau ke fakaʻauha ʻosi ʻa e Kau Fakamoʻoní? Naʻá ne taʻofi kotoa ʻa hono malangaʻi ʻo e ongoongo leleí ʻi Siamané? Halaʻatā! Lolotonga ʻa e fakatangá, naʻe hokohoko fakapulipuli atu pē ʻe hotau fanga tokouá ʻa e ngāue fakamalangá. Hili e tō ʻa e pule faka-Nasí, naʻa nau ngāueʻaki ai ʻenau tauʻatāiná ke hokohoko atu ʻa e malangá. ʻI he ʻahó ni, ʻoku ʻi ai ʻa e kau malanga ʻo e Puleʻangá laka hake he toko 165,000 ʻi Siamane. ʻOku toe fai moʻoni ai ʻa e tokotaha-tokonaki ʻo e “fakamoui” ki heʻene palōmesí: “ʻIlonga ha mahafu ʻoku faʻu ke fai ʻaki ha kovi kiate koe, ʻe ʻikai siaʻa.”
7 Ko e hisitōlia ʻi onopooni ʻo e Kau Fakamoʻoni ʻa Sihová ʻoku ʻomai ai ʻa e fakamoʻoni heʻikai ʻaupito fakaʻatā ʻe Sihova ke fakaʻauha ʻosi ʻa hono kakaí ʻi he tuʻunga ko ha kulupú. (Sāme 116:15) Kae kehe, fēfē leva kitautolu tāutaha? ʻOku anga-fēfē hono tokonaki ʻe Sihova ʻa e fakamoʻui maʻatautolu fakafoʻituitui?
Fēfē ʻa e Maluʻi Fakaesinó?
8, 9. (a) ʻOku anga-fēfē ʻetau ʻiloʻi ʻoku ʻikai fakapapauʻi ʻa hotau maluʻi fakaeinó he taimí ni? (e) Ko e hā kuo pau ke tau lāuʻilo moʻoni ki aí?
8 ʻI he tuʻunga tāutahá, ʻoku tau ʻiloʻi ʻoku ʻikai fakapapauʻi ʻe maluʻi fakaesino kitautolu he taimí ni. ʻOku tau ʻi he tuʻunga naʻe fakahāhā ʻe he kau Hepelū faitōnunga ʻe toko tolu ʻa ia naʻa nau fakafisi ke punou ki he fuʻu ʻīmisi koula ʻa Tuʻi Nepukanesá. Ko e kau talavou manavahē-ʻOtua ko iá naʻe ʻikai te nau ʻamanekina ʻe maluʻi fakaemana kinautolu ʻe Sihova mei he maumau fakaesinó. (Lau ʻa e Taniela 3:17, 18.) Kae hangē ko ia naʻe hokó, naʻe fakahaofi kinautolu ʻe Sihova mei he ulo ʻa e fōnise afí. (Tan. 3:21-27) Kae kehe, naʻa mo e ʻi he taimi ʻo e Tohi Tapú, naʻe tātātaha ai ʻa e fakahaofi fakaemaná. Naʻe mate ʻa e kau sevāniti tokolahi ʻa Sihova ʻi he nima ʻo e kau fakafepakí.—Hep. 11:35-37.
9 Fēfē ʻa e ʻahó ni? ʻI he tuʻunga ko e tokotaha-tokonaki ʻo e “fakamoui,” ʻoku lava moʻoni ke fakahaofi ʻe Sihova ʻa e faʻahinga tāutaha mei he ngaahi tuʻunga fakatuʻutāmakí. ʻE lava ke tau lea papau ne kau pe ʻikai kau mai ʻa Sihova ʻi ha ngaahi tuʻunga makehe? ʻIkai. Neongo ia, ko ha tokotaha kuo hao ʻi ha tuʻunga fakatuʻutāmaki ʻokú ne ongoʻi nai naʻe kau mai ʻa Sihova. Ko ha ʻafungi ia ke fakafepakiʻi ʻe he niʻihi kehé ʻa ʻene ongoʻí. ʻI he taimi tatau, kuo pau ke tau lāuʻilo moʻoni kuo mate ʻa e kau Kalisitiane faitōnunga tokolahi ko e tupu mei he fakatangá, ʻo hangē ko ia naʻe hoko he lolotonga ʻa e kuonga ʻo e kau Nasí. Kuo mate ʻa e niʻihi kehe ʻi he malumalu ʻo e ngaahi tuʻunga fakamamahi. (Koh. 9:11) Te tau ʻeke nai, ‘Naʻe ʻikai lava ke hoko ʻa Sihova ko e tokotaha-tokonaki ʻo e “fakamoui” maʻá e faʻahinga faitōnunga ʻa ia naʻa nau mate mutukiá?’ ʻOku ʻikai lava ke moʻoni ia.
10, 11. Ko e hā ʻoku ʻikai lava ai ʻe he tangatá ʻo taʻofi ʻa ʻene maté, ka ko e hā ʻe lava ʻe Sihova ʻo fai fekauʻaki mo e meʻa ko iá?
10 Fakakaukau angé ki heni: ʻOku ʻikai lava ʻe he tangatá ʻo taʻofi ʻa ʻene maté, he ʻoku ʻikai ha tangata ʻe lava ke ne “hamusi ʻene moʻui mei he puke ʻa hetesi” pe ko Seoli ʻa e faʻitoka anga-maheni ʻo e faʻahinga ʻo e tangatá. (Sāme 89:48) Ko ia ai, fēfē ʻa Sihova? Ko e tuofefine ʻe taha ʻa ia naʻe hao moʻui ʻi he vahaʻa taimi fakalilifu ʻo e kau Nasí ʻokú ne manatu ki he meʻa naʻe tala ange ʻi he taimi ʻe taha ʻe heʻene faʻē Fakamoʻoní ke fakafiemālieʻi ʻaki ia ʻi he mate ʻa e faʻahinga ʻofeina ʻi he ngaahi kemi fakamamahí: “Kapau ʻe lava ʻe he maté ʻo tauhi maʻu ʻi heʻene haʻí ʻa e faʻahinga ʻo e tangatá, ʻe mālohi ange ia ʻi he ʻOtuá, ʻikai ko ia?” Ko e moʻoni, ʻoku ʻikai ʻaupito mālohi ange ʻa e maté ʻi he Matavai mālohi fakaʻaufuli ʻo e moʻuí! (Sāme 36:9) Ko e faʻahinga kotoa ʻi Seoli pe Hētesí, ʻoku nau ʻi he manatu ʻa Sihová, pea te ne tokonaki ʻa e fakamoʻui ki he tokotaha taki taha ʻo kinautolu.—Luke 20:37, 38; Fkh. 20:11-14.
11 Lolotonga iá, ʻoku kau fakahangatonu ʻa Sihova ki he moʻui ʻa ʻene kau lotu faitōnunga he ʻaho ní. Tau lāulea he taimí ni ki he founga ʻe tolu ʻa ia ʻokú ne hoko moʻoni ai ko e tokotaha-tokonaki ʻo e “fakamoui” maʻatautolu.
Maluʻi Fakalaumālie
12, 13. Ko e hā ʻoku mahuʻinga taha ai ʻa e maluʻi fakalaumālié, pea ʻoku anga-fēfē hono tokonaki mai ia ʻe Sihova maʻatautolú?
12 ʻOku ʻomai ʻe Sihova ʻa e maluʻi fakalaumālie kiate kitautolu, ʻa ia ko e maluʻi ia ʻoku mahuʻinga tahá. ʻI he hoko ko e kau Kalisitiane moʻoní, ʻoku tau mahinoʻi ʻoku ʻi ai ʻa e meʻa ʻoku mahuʻinga ange ia ʻi heʻetau moʻui lolotongá. Ko ʻetau koloa mahuʻinga tahá ʻa hotau vahaʻangatae fakafoʻituitui mo Sihová. (Sāme 25:14; 63:3) ʻI he ʻikai ʻa e vahaʻangatae ko iá, ko ʻetau moʻui lolotongá ʻe taʻeʻuhinga pea heʻikai ha ʻamanaki ki heʻetau moʻui ʻi he kahaʻú.
13 Ko e meʻa ke fakamālōʻiá, ʻoku ʻomai ʻe Sihova kiate kitautolu ʻa e tokoni kotoa ʻoku tau fiemaʻú ke tauhi maʻu ai ha vahaʻangatae vāofi mo ia. ʻOku tau maʻu ʻa ʻene Folofolá, ʻa hono laumālie māʻoniʻoní, mo ʻene fakatahaʻanga ʻi māmani lahí ke tokoniʻi kitautolu. ʻE lava fēfē ke tau maʻu ʻa e ʻaonga kakato mei he ngaahi tokonakí ni? ʻI hono ako maʻu pē mo ako tōtōivi ʻa ʻene Folofolá, te tau ʻai ai ke mālohi ʻetau tuí pea mo ʻetau ʻamanakí. (Loma 15:4) ʻI he lotu loto-moʻoni ʻo kole ʻa hono laumālié, te tau maʻu ai ʻa e tokoni ke talitekeʻi ʻa e fakatauele ke kau ʻi he ʻulungāanga ʻoku ala fehuʻia. (Luke 11:13) ʻI he fai ki he fakahinohino ʻoku tokonaki mai ʻe he kalasi tamaioʻeikí fakafou ʻi he ʻū tohi makatuʻunga ʻi he Tohi Tapú pea pehē ki he ngaahi fakatahá, ngaahi ʻasemipilií mo e ngaahi fakataha-lahí, ʻe fafanga ʻaki ai kitautolu ʻa e “meʻakai [fakalaumālié] ʻi hono taimi totonu.” (Mt. 24:45) Ko e ngaahi tokonaki peheé ʻoku maluʻi fakalaumālie ai kitautolu mo tokoniʻi ai kitautolu ke nofo ofi ki he ʻOtuá.—Sem. 4:8.
14. Fakamatala ki ha hokosia ʻoku fakamamafaʻi ai ʻa e maluʻi fakalaumālié.
14 Ke fakamamafaʻi ʻa e maluʻi fakalaumālie peheé, manatuʻi ʻa e ongo mātuʻa naʻe lave ki ai ʻi he kamata ʻo e kupu ki muʻá. ʻI ha ngaahi ʻaho siʻi mei hono līpooti ʻo e pulia ʻa ʻena taʻahiné, ko Theresa, naʻá na maʻu ai ʻa e ongoongo fakamamahi: Naʻe fakapoongi ia. a ʻOku manatu ʻa e tamaí: “Naʻá ku lotu kia Sihova ʻo kole ke ne maluʻi ia. ʻI hono maʻu ia kuo fakapōngí, kuo pau ke u fakahaaʻi naʻá ku muʻaki fifili ki he ʻuhinga naʻe ʻikai tali ai ʻeku ngaahi lotú. Ko e moʻoni, ʻoku ou ʻiloʻi ʻoku ʻikai fakapapauʻi mai ʻe Sihova ha maluʻi fakaemana maʻa hono kakaí tāutaha. Naʻá ku hokohoko lotu ke u maʻu ʻa e mahinó. Naʻe fakafiemālieʻi au ʻi he ʻiloʻi ʻoku maluʻi fakalaumālie ʻe Sihova ʻa hono kakaí—ʻa ia ʻokú ne tokonaki mai ʻa e meʻa ʻoku tau fiemaʻú koeʻuhi ke maluʻi ai hotau vahaʻangatae mo iá. Ko e faʻahinga maluʻi ko iá ʻoku mahuʻinga tahá, he ʻe lava ke kaunga ia ki hotau kahaʻu taʻengatá. ʻI he ʻuhinga ko iá, naʻe maluʻi moʻoni ʻe Sihova ʻa Theresa; naʻá ne tauhi faitōnunga kiate ia ʻi he taimi ʻo ʻene maté. Kuó u maʻu ʻa e nonga ʻi he ʻiloʻi ko ʻene ʻamanaki ki he moʻui ʻi he kahaʻú ʻoku ʻi hono toʻukupu ʻofá.”
Fakaivimālohiʻi ʻi he Puké
15. ʻI he ngaahi founga fē ʻe tokoniʻi nai ai kitautolu ʻe Sihova ʻi he uesia kitautolu ʻe he puké?
15 ʻOku lava ke fakaivimālohiʻi ʻe Sihova kitautolu “i he tokotoaga fakamamahi,” ʻo hangē ko ia naʻá ne fai kia Tēvitá. (Sāme 41:3, PM) Neongo ʻoku ʻikai ʻomai ʻe Sihova ha haoʻanga ʻi hotau taimí ʻi he tuʻunga ʻo e fakamoʻui fakaemaná, ʻokú ne tokoniʻi kitautolu. Anga-fēfē? Ko e ngaahi tefitoʻi moʻoni ʻoku maʻu ʻi heʻene Folofolá ʻe tokoniʻi nai ai kitautolu ʻi hono fai ʻa e ngaahi fili fakapotopoto fekauʻaki mo e faitoʻó pea mo e ngaahi meʻa kehé. (Pal. 2:6) Te tau maʻu nai ʻa e fakamatala ʻaonga mo mahuʻinga mei he ngaahi kupu ʻoku pulusi ʻi he Taua Leʻo mo e ʻĀ Hake! ʻa ia ʻoku lāulea ai ki hotau palopalema tefito ʻi he moʻui leleí. Fakafou ʻi hono laumālié, ʻe ʻomai nai ʻe Sihova kiate kitautolu ʻa e “makehe atu ʻo e mafai” ke fekuki ai mo hotau tuʻungá pea ke tauhi maʻu ai ʻetau anga-tonú, ʻo tatau ai pē pe ko e hā nai ʻe hokó. (2 Kol.2Ko 4:7) ʻI he tokoni ko iá, ʻe lava ke tau fakaʻehiʻehi ai mei he mātuʻaki lōmekina ʻe he puké ʻo mole ai ʻetau tokanga fakalaumālié.
16. Kuo anga-fēfē ʻa e malava ʻa e tokoua ʻe taha ke fekuki mo e mahakí?
16 Fakakaukau angé ki he talavou naʻe lave ki ai ʻi he kamataʻanga ʻo e kupu ki muʻá. ʻI he 1998, naʻe sivi ai ʻo ʻilo ʻokú ne maʻu ʻa e mahaki mamatea amyotrophic lateral sclerosis, pe ALS, ʻa ia naʻe iku ʻo ne mamatea fakaʻaufili ai. b Naʻe anga-fēfē ʻene fekuki mo hono mahakí? ʻOkú ne fakamatala: “Kuó u maʻu ʻa e ngaahi mōmeniti ʻo e langa mo e ongoʻi feifeitamaki ʻi heʻeku ongoʻi ko e maté pē ʻa e founga ke ʻosi ai ʻa e mamahí. ʻI he taimi pē naʻá ku ongoʻi lōmekina aí, naʻá ku lotu ʻo kole kia Sihova ke ne ʻomai kiate au ʻa e meʻa ʻe tolu: ko ha loto nonga, ʻūkuma pea mo e kātaki. ʻOku ou ongoʻi kuo tali ʻe Sihova ʻa e ngaahi lotu ko iá. Ko ha loto nonga ʻokú ne ʻai au ke u fakakaukauloto ki he ngaahi fakakaukau fakafiemālie, hangē ko e meʻa ko ia ʻe ʻi ai ʻi he māmani foʻoú ʻi he taimi te u malava ai ke luelue, ifoʻia ʻi he meʻakaí, mo toe talanoa ai mo hoku fāmilí. ʻOku tokoniʻi au ʻe he ʻūkumá ke u kātekina ʻa e ngaahi tuʻunga faingatāmaki mo e ngaahi palopalema ʻo e mamateá. ʻOku tokoniʻi au ʻe he kātakí ke u malava ʻo hanganaki faitōnunga pea ʻikai mole ʻa ʻeku mafamafatatau fakalaumālié. ʻOku lava moʻoni ke u ʻi he tuʻunga tatau mo e tokotaha-tohi-sāme ko Tēvitá, he ʻoku ou ongoʻi kuo tokoniʻi au ʻe Sihova ʻi hoku tokotoʻanga fakamamahí.”—Ai. 35:5, 6.
Tokonaki ʻa e Meʻakai
17. Ko e hā kuo palōmesi ʻa Sihova ke fai maʻatautolú, pea ko e hā ʻoku ʻuhinga ki ai ʻa e palōmesi ko ení?
17 ʻOku palōmesi ʻa Sihova te ne tokangaʻi fakamatelie kitautolu. (Lau ʻa e Mātiu 6:33, 34 mo e Hepelu 13:5, 6.) ʻOku ʻikai ʻuhinga iá ʻe lava ke tau tuku ʻa hono tokonaki ʻo e ngaahi fiemaʻu fakamatelié ke toki hoko fakaemana mai pē pe ʻoku totonu ke tau fakafisi ke ngāue. (2 Tes. 3:10) Ko e meʻa eni ʻoku ʻuhinga ki ai ʻa e palōmesi ko iá: Kapau ʻoku tau fuofua kumi ki he Puleʻanga ʻo e ʻOtuá ʻi heʻetau moʻuí pea loto-lelei ke ngāue ke maʻu ha moʻui, ʻe lava ke tau falala ʻe tokoniʻi kitautolu ʻe Sihova ke maʻu ʻa e ngaahi meʻa ʻoku fiemaʻu ki he moʻuí. (1 Tes. 4:11, 12; 1 Tim. 5:8) ʻE lava ke ne tokonaki mai ʻa e meʻa ʻoku tau fiemaʻú ʻi he ngaahi founga heʻikai nai ke tau ʻamanekina, mahalo pē fakafou ʻi ha kaungālotu ʻokú ne tokoniʻi kitautolu pe ʻomai ha ngāue kiate kitautolu.
18. Fakamatala ki ha hokosia ʻoku fakahaaʻi ai ʻe tokonaki mai nai maʻatautolu ʻi he ngaahi taimi faingataʻá.
18 Manatuʻi ʻa e faʻē teʻeki mali naʻe lave ki ai ʻi he talateu ʻo e kupu ki muʻá. ʻI he taimi naʻá ne hiki ai mo ʻene kiʻi taʻahiné ki ha feituʻu foʻou, naʻá ne faingataʻaʻia ʻi he kumi ngāué. ʻOkú ne fakamatala: “Naʻá ku ʻalu ʻi he ngāue fakamalangá ʻi he pongipongí, pea fakamoleki ʻa e hoʻatā efiafi kotoa pē ʻi he kumi ngāué. ʻOku ou manatuʻi ʻa e ʻaho ʻe taha naʻá ku ʻalu ai ki he falekoloá ke fakatau mai ha huʻakau. Naʻá ku tuʻu ʻo sio ki he vesitapoló, ka naʻe ʻikai haʻaku paʻanga feʻunga ke fakatau mai ʻaki. Kuo teʻeki ai ke u ongoʻi loto-mafasia lahi ʻaupito ʻi heʻeku moʻuí. ʻI heʻeku foki ki ʻapi mei he falekoloá ʻi he ʻaho ko iá, naʻe fonu hoku falefakatolo ki muí ʻi he ngaahi milemila vesitapolo kehekehe. Naʻe ʻi ai ʻa e meʻakai feʻunga ke ma kai ʻi ha ngaahi māhina. Naʻá ku tangi pē, mo fakamālō kia Sihova.” Naʻe toki ʻiloʻi ʻe he tuofefiné ni ko e ngaahi milemilá naʻe tuku mai ia ʻe ha tuongaʻane ʻi he fakatahaʻangá ʻa ia naʻá ne tō vesitapolo. Naʻá ne tohi ki mui ai kiate ia: “Neongo naʻá ku fakamālō lahi atu ʻi he ʻaho ko iá, naʻá ku toe fakamālō kia Sihova ʻi hono ngāueʻaki ʻa hoʻo anga-leleí ke fakamanatu mai ai kiate au ʻa ʻene ʻofá.”—Pal. 19:17.
19. ʻI he mamahi lahí, ʻe maʻu ai ʻe he kau sevāniti ʻa Sihová ʻa e falala ki he hā, pea ko e hā ʻoku totonu ke tau fakapapauʻi ke fai he taimi ní?
19 ʻOku hā mahino, ko e meʻa kuo fai ʻe Sihova ʻi he taimi ʻo e Tohi Tapú pea pehē ki hotau taimí ʻoku ʻomai ai ʻa e ʻuhinga ke falala ai kiate ia ko hotau Tokoni. Vavé ni mai, ʻi he hoko ʻa e mamahi lahí ki he māmani ʻo Sētané, te tau fiemaʻu lahi ai ʻa e tokoni ʻa Sihová ʻi ha toe taimi ki muʻa. Neongo ia, ko e kau sevāniti ʻa Sihová te nau malava ke hanga kiate ia fakataha mo e falala kakato. Te nau malava ke hiki hake honau ʻulú pea fiefia, ʻi he ʻiloʻi ʻoku ofi honau fakahaofí. (Luke 21:28) ʻI he lolotonga ní, tatau ai pē pe ko e hā ʻa e ngaahi ʻahiʻahi ʻe hoko mai nai kiate kitautolú, tau fakapapauʻi ke tuku ʻetau falalá kia Sihova, ʻo falala kakato ko hotau ʻOtua taʻefeliliuakí ko e moʻoni ko hotau tokotaha-tokonaki ia ʻo e “fakamoui.”
[Fakamatala ʻi lalo]
a Sio ki he kupu “Fekuki mo ha Meʻa Fakamamahi Fakalilifu,” ʻi he Awake! ʻo Siulai 22, 2001, peesi 19-23.
b Sio ki he kupu “Fakaivimālohiʻi ʻe Heʻeku Tuí—Moʻui Fakataha mo e ALS,” ʻi he Awake! ʻo Sanuali 2006, peesi 25-29.
ʻOkú Ke Manatuʻi?
• ʻE lava fēfē ke tokonaki mai ʻe Sihova ʻa e fakamoʻui ki he faʻahinga kuo mate mutukiá?
• Ko e hā ʻoku mahuʻinga taha ai ʻa e maluʻi fakalaumālié?
• ʻOku ʻuhinga ki he hā ʻa e palōmesi ʻa Sihova te ne tokangaʻi fakamatelie kitautolú?
[Fehuʻi ki he Ako]
[Fakatātā ʻi he peesi 8]
ʻI hono puke ʻi he 1918, ko Tokoua Rutherford mo hono kau feohí naʻe tukuange kinautolu ki mui, pea naʻe fakataʻeʻaongaʻi ai ʻa e ngaahi tukuakiʻi naʻe fai kiate kinautolú
[Fakatātā ʻi he peesi 10]
ʻE lava ke fakaivimālohiʻi kitautolu ʻe Sihova ʻi he “tokotoaga fakamamahi”