Tauhi ha Vakai Fakatohitapu ki he Tokangaekina Fakafaitoʻó
Tauhi ha Vakai Fakatohitapu ki he Tokangaekina Fakafaitoʻó
“Ke ofa kia Jihova ko ho Otua aki . . . ho atamai kotoa, mo ho malohi kotoa.”—MK. 12:30, PM.
1. Ko e hā naʻe muʻaki fakataumua ʻe he ʻOtuá ki he faʻahinga ʻo e tangatá?
KO E muʻaki taumuʻa ʻa e ʻOtua ko Sihová ki he ngaahi meʻamoʻui fakaetangatá naʻe ʻikai ke kau ai ʻa e puké mo e maté. Naʻe tuku ʻa ʻĀtama mo ʻIvi ʻi he ngoue ko ʻĪtení, pe ko e palataisi ʻo e fiefia, “ke ngoueʻi mo tauhi ia,” ʻo ʻikai ʻi ha taʻu pē ʻe 70 pe 80, kae taʻengata. (Sen. 2:8, 15; Sāme 90:10) Kapau naʻe faitōnunga ai pē ʻa e ʻuluaki ongo meʻa fakaetangata ko iá kia Sihova pea fakamoʻulaloa ʻi he ʻofa ki hono tuʻunga-haú, naʻe ʻikai ʻaupito ke na mei hokosia ʻa e mahamahakí, vaivaí pea mo e maté.
2, 3. (a) ʻOku anga-fēfē hono fakamatalaʻi ʻo e taʻumotuʻá ʻi he tohi Koheletí? (e) Ko hai naʻe tupu mei ai ʻa e mate tukufakaholo ʻia ʻĀtamá, pea ʻe anga-fēfē hono toʻo atu ʻa hono ngaahi nunuʻá?
2 ʻOku fakamatalaʻi ʻe he Koheleti vahe 12 ha fakatātā mahino ʻo e “ngaahi ʻaho kovi” ʻoku haʻu fakataha mo e taʻumotuʻá ʻi he tuʻunga ʻo e faʻahinga taʻehaohaoa ʻo e tangatá. (Lau ʻa e Koheleti 12:2-7 [12:1-7, “PM”]) ʻOku fakahoa ʻa e ʻulu hinaá ki he matala ʻo e “alamoni.” ʻOku fakatatau ʻa e ongo vaʻé ki he “tuʻunga tangata malohi” ʻoku nau fehapekaki mo ʻalu sēlue he taimi ko ení. Ko e kau fefine ʻoku nau ō ki he matapā sioʻatá ke maʻu ha maama kae kei fakapoʻuli peé, ko ha fakatātā feʻungamālie ia ʻo e ʻalu ke kovi ʻa e sió. Koeʻuhi ko e ngangana ʻa e nifo ʻe niʻihi, kuo “tuku ʻa e ngaue ʻa e kau momosi ko ʻenau tokosiʻi.”
3 Ko e tete ʻa e vaʻé, ʻalu ke kovi e sió, mo e hala ha nifó ʻoku ʻikai moʻoni ko e meʻa ia naʻe muʻaki fakataumuʻa ʻe he ʻOtuá ki he faʻahinga ʻo e tangatá. ʻIkai ko ia pē, ko e mate naʻe maʻu tukufakaholo meia ʻĀtamá ko e taha ia ʻo e “ngaahi ngaue ʻa e Tevolo” ʻa ia ʻe toʻo atu ʻe he ʻAlo ʻo e ʻOtuá fakafou ʻi hono Puleʻanga faka-Mīsaiá. Naʻe tohi ʻe he ʻapositolo ko Sioné: “Ko hono ʻuhinga ia naʻe fakaeʻa ai ʻa e ʻAlo ʻo e ʻOtua, koeʻuhi ke ne holoki ʻa e ngaahi ngaue ʻa e Tevolo.”—1 Sione 3:8.
Fakanatula ʻa e Hohaʻa ʻi he ʻUhinga Leleí
4. Ko e hā ʻoku hohaʻa ai ʻi he ʻuhinga lelei ʻa e kau sevāniti ʻa Sihová ʻo fekauʻaki mo ʻenau moʻui leleí, ka ko e hā ʻoku nau lāuʻilo ki aí?
4 ʻI he lolotonga ní, kuo fehangahangai ai ʻa e niʻihi ʻo e kau sevāniti ʻa Sihová mo e ngaahi palopalema ʻo e mahamahakí mo e hoholo ke motuʻá ʻa ia ʻoku hoko lahi ki he faʻahinga angahalaʻia ʻo e tangatá. Ko e hohaʻa ʻi he ʻuhinga lelei fekauʻaki mo ʻetau moʻui leleí ʻi he ngaahi tuʻunga peheé ʻoku fakanatula pē pea naʻa mo ʻaonga. ʻIkai ʻoku tau loto ke tauhi kia Sihova ʻaki hotau “malohi kotoa”? (Mk. 12:30, PM) Kae kehe, lolotonga ʻa e feinga ʻi ha ʻuhinga lelei ke moʻui lelei ai peé, ʻoku totonu ke tau fakakaukau fakalelei hifo pea mahinoʻi ʻoku siʻi ʻaupito ʻa e meʻa ʻe lava ke tau fai ke fakamāmālieʻiʻaki ʻetau hoholo ke motuʻá pe ko hono kalofi ʻa e mahaki kotoa pē.
5. Ko e hā e lēsoni ʻe lava ke tau maʻu ʻi he founga kuo fekuki ai ʻa e kau sevāniti faitōnunga ʻa e ʻOtuá mo e mahamahakí?
5 Ko e tokolahi ʻo e kau sevāniti faitōnunga ʻa Sihová naʻe pau ke nau fāinga mo e mahamahakí. Ko ʻEpafalataitó ko e taha ia ʻo e faʻahingá ni. (Fili. 2:25-27) Ko e kaumeʻa mateaki ʻo e ʻapositolo ko Paulá ʻa Tīmote naʻá ne toutou puke ʻi he mahaki keté, ʻa ia naʻe faleʻi ai ʻe Paula ke ne inu “ha meʻi uaine.” (1 Tim. 5:23) Ko Paula tonu naʻe pau ke ne fekuki mo ha “tolounua i he kakano,” ko ha palopalema nai ʻi hono matá pe ko ha mahaki fakaesino kehe ʻa ia naʻe ʻikai hano faitoʻo ʻi he taimi ko iá. (2 Kol. 12:7, PM; Kal. 4:15; 6:11) ʻI he fekauʻaki mo e “tolounua i he kakano” naʻá ne maʻú, naʻe fai ʻe Paula ʻa e ngaahi kole tōtōivi kia Sihova. (Lau ʻa e 2 Kolinito 12:8-10.) Naʻe ʻikai ke toʻo fakaemana ʻe he ʻOtuá meia Paula ʻa e “tolounua i he kakano.” ʻI hono kehé, naʻe fakaivimālohiʻi ia ʻe he ʻOtuá ke ne kātekina ia. Ko ia naʻe hoko ai ʻo fakaeʻa ʻa e mālohi ʻo Sihová ʻi he faingataʻa ne hoko kia Paulá. ʻOku lava ke maʻu ha lēsoni kia kitautolu ʻi he meʻa ko iá?
ʻOua ʻe Hohaʻa Tōtuʻa ki he Tokangaekina Fakafaitoʻó
6, 7. Ko e hā ʻoku totonu ai ke tau fakaʻehiʻehi mei he hohaʻa tōtuʻa ki heʻetau moʻui leleí?
6 Hangē ko ia ʻokú ke ʻiló, ʻoku tali ʻe he Kau Fakamoʻoni ʻa Sihová ʻa e tokoni fakafaitoʻó pea mo e ngaahi founga fakafaitoʻo kehekehe. Ko ʻetau pepa ko e ʻĀ Hake! ʻoku faʻa ʻi ai ʻa e ngaahi kupu ki he ngaahi meʻa fekauʻaki mo e moʻui leleí. Pea neongo ʻoku ʻikai ke tau teke mālohi ʻi hono pouaki ha faʻahinga faitoʻo pau, ʻoku tau fakahoungaʻi ʻa e tokoni mo e ngaahi ngāue fāitaha ʻa e kau palōfesinale ki hono tokangaʻi ʻo e moʻuí. Ko e moʻoni, ʻoku tau lāuʻilo ko e moʻui lelei haohaoá ʻoku teʻeki ai lava ke maʻu. Ko ia ai, ʻoku tau ʻiloʻi ʻoku fakapotopoto ke fakaʻehiʻehi mei hono tuku ke tau nōfoʻi pe tokangataha pē ʻi he taimi kotoa ki heʻetau moʻui leleí. ʻOku totonu ke kehe ʻa ʻetau fakakaukaú mei he fakakaukau ʻa e faʻahinga ʻoku nau “taʻe-ha-ʻamanaki-lelei,” ʻa ia ʻoku nau fakakaukau ko e moʻuí pē eni pea te nau kumi ai ki ha faʻahinga faitoʻo pē ʻi ha feinga ke fakamoʻui honau ngaahi alangamahakí. (Ef. 2:2, 12) ʻOku tau fakapapauʻi ke ʻoua ʻe fakamoleki ʻa e hōifua ʻa Sihová ʻi ha feinga ke fakahaofi ʻetau moʻui lolotongá, he ʻoku tau tuipau kapau te tau faitōnunga ai pē ki he ʻOtuá, te tau “puke ki he moʻui moʻoni,” ʻa e moʻui taʻengata ʻi he fokotuʻutuʻu foʻou kuó ne talaʻofá.—1 Tim. 6:12, 19; 2 Pita 3:13.
7 ʻOku tau fakaʻehiʻehi mei he hohaʻa tōtuʻa ki heʻetau moʻui leleí ʻi ha toe ʻuhinga ʻe taha. Ko e hohaʻa anga-kehe fekauʻaki mo ʻetau moʻui leleí ʻoku lava ke iku ia ki heʻetau hoko ʻo siokita. Naʻe fakatokanga mai ʻa Paula ʻo fekauʻaki mo e fakatuʻutāmaki ko ení ʻi heʻene ekinaki ki he kau Filipaí ke “ʻoua naʻa taki taha tokanga ki he meʻa [ʻanautolú] pe, ka ki he meʻa ʻa e kakai kehe foki.” (Fili. 2:4) ʻOku totonu ke tokanga ʻi ha ʻuhinga lelei kia kitautolu, ka ko e mahuʻingaʻia moʻoni ʻoku tau fakahāhā ki hotau fanga tokouá pea ki he kakai ʻoku tau ʻoatu ki ai ʻa e “ongoongolelei ko eni ʻo e puleʻanga” ʻe taʻofi ai kitautolu mei he nōfoʻi pē ki heʻetau lelei fakaesinó.—Mt. 24:14.
8. Ko e hā nai ʻe tataki kitautolu ke tau fai ʻi he hohaʻa fakavalevale ki heʻetau moʻui leleí?
8 Ko e fakatuʻutāmaki ʻoku hoko aí he ʻe lava ke tuku ʻe ha Kalisitiane ʻa e hohaʻa ki he tokangaekina fakafaitoʻó ke ne tekeʻi ki mui ʻa e ngaahi meʻa ʻo e Puleʻangá. Ko e nōfoʻi taha pē ki he tokangaekina fakafaitoʻó ʻe toe lava ke ne tataki kitautolu ke tau feinga ke kounaʻi ki he niʻihi kehé ʻa ʻetau ngaahi fakakaukau fakafoʻituitui ʻo fekauʻaki mo e mahuʻinga ʻo ha faʻahinga meʻakai pau ke maʻu, faitoʻo pe foʻiʻakau fakatupu ivi. ʻI he meʻá ni, fakakaukau ki he tefitoʻi moʻoni naʻe fakahaaʻi ʻi he lea ʻa Paulá: “Mou sivi ʻo ʻilo ʻa e ngaahi meʻa ʻoku lelei lahi [pe mahuʻinga angé], ka mou nofo hangataha mo taʻemele, ʻo aʻu ki he ʻAho ʻo Kalaisi.”—Fili. 1:10.
Ko e Hā e Meʻa ʻOku Mahuʻinga Angé?
9. Ko e hā e taha ʻo e ngaahi meʻa mahuʻinga ange ʻoku ʻikai totonu ke tau liʻakí, pea ko e hā hono ʻuhingá?
9 Kapau ʻoku tau sivi ʻo ʻilo ʻa e ngaahi meʻa ʻoku mahuʻinga angé, te tau kau longomoʻui ʻi he ngāue fakaefakamoʻui fakalaumālié. ʻOku fakahoko ia ʻaki hono malangaʻi mo hono akoʻi ʻa e Folofola ʻa e ʻOtuá. Ko e ngāue fakafiefia ko ení ʻoku tau maʻu ʻaonga mei ai pea mo e faʻahinga ʻoku tau akoʻí. (Pal. 17:22; 1 Tim. 4:15, 16) Ko e makasini Taua Leʻo mo e ʻĀ Hake! ʻoku faʻa ʻi ai ʻa e ngaahi kupu fekauʻaki mo hotau fanga tokoua mo e fanga tuofāfine fakalaumālie ʻoku nau puke lahí. Ko e ngaahi fakamatalá ni ʻokú ne fakahaaʻi ʻi he taimi ʻe niʻihi ʻa e anga ʻo e fekuki ʻa e faʻahinga tāutaha ko iá mo ʻenau ngaahi palopalemá pe aʻu ʻo toʻo fakataimi ʻenau fakakaukaú mei honau puké ʻaki ʻenau feinga ke tokoniʻi ʻa e niʻihi kehé ke nau ʻiloʻi ʻa Sihova mo ʻene ngaahi talaʻofa fisifisimuʻá. a
10. Ko e hā ʻoku mahuʻinga ai ʻetau fili ʻo e ngaahi faitoʻó?
10 ʻI he fehangahangai mo ha mahaki fakaesino, ko e tokotaha lahi Kalisitiane taki taha kuo pau ke ne “fua ʻene kavenga aʻana” ʻo e fatongia ʻi hono fili ʻo e faitoʻó. (Kal. 6:5) Ka ʻoku totonu ke tau manatuʻi ko ʻetau fili ʻo e ngaahi faitoʻó ʻoku mahuʻinga ia kia Sihova. Hangē pē ko hono ueʻi kitautolu ʻe he fakaʻapaʻapa ki he ngaahi tefitoʻi moʻoni Fakatohitapú ke tau ‘fakaʻehiʻehi mei he totó,’ ko ʻetau tokanga lahi ki he Folofola ʻa e ʻOtuá ʻoku totonu ke ueʻi ai kitautolu ke tau fakaʻehiʻehi mei he hanga ki he ngaahi faitoʻo ʻa ia ʻe lava ke ne maumauʻi hotau tuʻunga fakalaumālié pe uesia hotau vahaʻangatae mo Sihová. (Ng. 15:20) Ko e ngaahi founga sivi mo e faitoʻo ʻe niʻihi ʻoku hā ngali meimei tatau ʻaupito ia mo e ngāueʻaki ʻo e fakahaʻele faʻahikehé. Naʻe ʻikai hōifua ʻa Sihova ki he kau ʻIsileli tafoki mei he moʻoní, ʻa ia naʻa nau hanga ki he ngaahi tōʻonga fakahaʻele faʻahikehé. Naʻá ne talaki: “ʻOua toe ʻomi ngeʻesi meaʻofa: ko e tutu inisenisi ko e meʻa fakalielia, ia kiate au; ʻa e fakamahinafoʻou mo e fakasapate, ʻa e fanongonongo katoanga—ʻoku ʻikai te u makataki ʻa e ō ʻa e kovi [pe “ngāueʻaki ʻa e mālohi fakafaʻahikehé ʻe he,” NW] fuʻu fakataha.” (Ai. 1:13) Ko ha vahaʻa taimi ʻo e puké ʻoku ʻikai moʻoni ko e taimi ia ke fai ai ha meʻa ʻa ia te ne taʻofi nai ʻa ʻetau ngaahi lotú pea ʻai ke ʻi ha tuʻunga fakatuʻutāmaki ʻa hotau vahaʻangatae mo e ʻOtuá.—Tangi. 3:44.
Fiemaʻu ʻa e “Aga Fakabotoboto”
11, 12. ʻOku anga-fēfē ʻa e kaunga ʻa e “aga fakabotoboto” ki he taimi ʻoku tau fili ai ha faʻahinga tokangaekina fakafaitoʻo?
11 ʻI he taimi ʻoku tau puke aí, heʻikai lava ke tau ʻamanekina ʻe fakamoʻui fakaemana kitautolu ʻe Sihova, ka ʻe lava ke tau lotu ki ha poto ʻi hono fili ʻo e faitoʻó. ʻOku totonu ke tau feinga ke tataki kitautolu ʻi heʻetau filí ʻaki ʻa e ngaahi tefitoʻi moʻoni Fakatohitapú pea mo e fakakaukau fakapotopotó. ʻI he mafatukituki ʻa e tuʻungá, ʻe fakapotopoto nai ke kumi faleʻi ki ha kau mataotao tokolahi ange ʻo kapau ʻe ala lava, ʻo fehoanaki mo e fakakaukau ʻoku fakahaaʻi ʻi he Palovepi 15:22, ʻa ia ʻoku pehē ai: “ʻOku maumau fakakaukau ʻa e ʻikai fai ha alea: Ka ʻoku tuʻu ʻo ka tokolahi ʻa e faleʻi.” Naʻe ekinaki ʻa e ʻapositolo ko Paulá ki hono kaungātuí ke nau “moui aga fakabotoboto, mo maonioni, mo aga faka-Otua, i he mamani.”—Tai. 2:12, PM.
12 Ko e tokolahi ʻoku nau ʻi ha tuʻunga meimei tatau mo e fefine ko ia naʻe puke ʻi he taimi ʻo Sīsuú. ʻI he Maake 5:25, 26, ʻoku tau lau ai: “Naʻe ai ha fefine ʻe taha, kuo ʻau toto ʻo taʻu hongofulu mā ua, pea lahi ʻa e faitoʻo fakamamahi kuo fai kiate ia ʻe he kau faitoʻo tokolahi, pea kuo ʻosi atu siʻene koloa kotoa, kae ʻikai ʻaupito te ne ʻaonga ki ha meʻa, kaekehe naʻa ne fakaaʻau ki mui.” Naʻe fakamoʻui ʻe Sīsū ʻi he manavaʻofa ʻa e fefine ko iá. (Mk. 5:27-34) ʻI he siva e ʻamanakí, kuo fakataueleʻi ai ʻa e kau Kalisitiane ʻe niʻihi ke nau fili ha ngaahi founga sivi pe faitoʻo ʻa ia ʻoku fepaki mo e ngaahi tefitoʻi moʻoni ʻo e lotu maʻá.
13, 14. (a) ʻE lava fēfē ke ngāueʻaki ʻe Sētane ʻa ʻetau fili ʻo e ngaahi faitoʻó ke ne maumauʻi ʻetau anga-tonú? (e) Ko e hā ʻoku totonu ai ke tau fakamamaʻo mei ha meʻa pē ʻoku fekauʻaki vāofi mo e faimaná?
13 ʻE ngāueʻaki ʻe Sētane ha faʻahinga founga pē ke ofeʻi ai kitautolu mei he lotu moʻoní. Hangē pē ko ʻene ngāueʻaki ʻa e ʻulungāanga taʻetaau fakaefehokotaki fakasinó mo e tuli ki he meʻa fakamatelié ke ne fakatupunga ke tūkia ha niʻihi, ʻokú ne feinga ke maumauʻi ʻa e anga-tonu ʻa e niʻihi kehé fakafou ʻi he ngaahi faitoʻo ʻoku ala fehuʻia ʻa ia ʻoku ngāueʻaki moʻoni ai ʻa e ngaahi mālohi fakafaimaná mo e fakahaʻele faʻahikehé. ʻOku tau lotu kia Sihova ke fakahaofi kitautolu mei he “Fili” pea mei he “maumau lao kotoa.” Ko ia ʻoku ʻikai totonu ke tau tuku atu kitautolu ki he nima ʻo Sētané ʻaki hono fakaeʻa atu kitautolu ki ha faʻahinga meʻa pē ʻoku fekauʻaki vāofi mo e fakahaʻele faʻahikehé pea mo e faimaná.—Mt. 6:13; Tai. 2:14.
14 Naʻe tapui ʻe Sihova ʻa e kau ʻIsilelí mei he fai tongafisí mo e fakalouʻakaú. (Teu. 18:10-12) ʻOku fakahokohoko ʻe Paula ʻa e “fai fakahaʻele faʻahikehé” ʻi he “ngaahi ngāue ʻa e kakanó.” (Kal. 5:19, 20, NW) ʻIkai ko ia pē, ko e “faʻahinga ko ia ʻoku nau fai fakahaʻele faʻahikehé” heʻikai te nau kau ʻi he fokotuʻutuʻu foʻou ʻa Sihová. (Fkh. 21:8, NW) ʻOku hā mahino leva, ko ha meʻa pē ʻoku ʻi ai haʻane pīkinga ki he fakahaʻele faʻahikehé ʻoku fakalielia ia kia Sihova.
‘Tuku ke ʻIlo Hoʻomou Anga-Fakaʻatuʻí’
15, 16. Ko e hā ʻoku tau fiemaʻu ai ʻa e potó ʻi he fili ko ia ki ha faʻahinga tokangaekina fakafaitoʻo, pea ko e hā ʻa e akonaki fakapotopoto naʻe fai ʻe he kulupu pule ʻo e ʻuluaki senitulí?
15 ʻI he vakai ki he meʻa naʻe lave ki ai ki muʻá, kapau ʻoku tau veiveiua fekauʻaki mo ha founga sivi pe faitoʻo, ʻe fakapotopoto ke tau talitekeʻi ia. Ko e moʻoni, ko e moʻoniʻi meʻa ko ia ʻo e ʻikai ke tau lava fakafoʻituitui ke fakamatalaʻi ʻa e anga ʻo e ngāue ʻa ha founga faitoʻo ʻoku ʻikai ʻuhinga ai iá ʻoku kau ki ai ha founga fakahaʻele faʻahikehe. Ko hono tauhi ha vakai Fakatohitapu fekauʻaki mo e tokangaekina fakafaitoʻó ʻoku fiemaʻu ki ai ʻa e poto fakaʻotuá pea pehē ki he fakafuofua leleí ʻi heʻetau tafaʻakí. ʻI he Palovepi vahe 3, ʻoku tau maʻu ai ʻa e ekinaki ko ení: “Falala kia Jihova aki ho loto kotoa; bea oua naa ke faaki ki ho boto oou. Ke ke fakaogoogo kiate ia i ho hala kotoabe, bea e fakatonutonu eia ho gaahi aluaga. . . . Tauhi ke mau ae boto mooni moe iloilo. Bea e hoko ai ia koe moui ki ho laumalie.”—Pal. 3:5, 6, 21, 22, PM.
16 Lolotonga ʻa e feinga ke nofoʻaki moʻui lelei ʻi he lelei taha ʻe ala lavá, kuo pau ke tau tokanga ke ʻoua ʻe mole e hōifua ʻa e ʻOtuá ʻi heʻetau feinga ke fekuki mo e mahamahakí pe ko e hoholo ke motuʻá. ʻI he tokangaekina fakafaitoʻó, hangē ko ia ʻi he ngaahi meʻa kehé, ʻoku totonu ke ‘tuku ke ʻilo ʻe he kakai kotoa pē ʻetau anga-fakaʻatuʻí’ ʻaki ʻetau moʻui ʻo fakatatau ki he ngaahi tefitoʻi moʻoni Fakatohitapú. (Fili. 4:5, NW) ʻI ha tohi mātuʻaki mahuʻinga, naʻe fakahinohinoʻi ai ʻe he kulupu pule ʻi he ʻuluaki senitulí ʻa e kau Kalisitiané ke nau fakaʻehiʻehi mei he tauhi ʻaitolí, totó pea mo e feʻauakí. Naʻe kau ʻi he tohi ko iá ʻa e fakapapau: “Kapau te mou tauhi kimoutolu mei he ngaahi meʻa ko ia, te mou lelei.” (Ng. 15:28, 29) ʻI he founga fē?
Tokanga Feʻunga mo e Vakai Atu ki he Moʻui Lelei Haohaoa
17. Kuo anga-fēfē ʻetau maʻu ʻaonga fakaesino mei heʻetau pipiki ki he ngaahi tefitoʻi moʻoni Fakatohitapú?
17 ʻOku lelei ke tau ʻeke hifo kiate kitautolu taki taha, ‘ʻOku ou houngaʻia ʻi he lelei fakafoʻituitui kuó u maʻu koeʻuhi ko ʻeku tauhi fakamātoato ki he ngaahi tefitoʻi moʻoni Fakatohitapu fekauʻaki mo e totó pea mo e feʻauakí?’ Fakakaukau atu foki, ki he ngaahi lelei kuo hoko kiate kitautolu tupu mei heʻetau ngaahi feinga ke “fakamaʻa kitautolu mei he ʻuli kotoa pe ʻo e kakano mo e loto.” (2 Kol. 6:19 [2Ko 7:1, PM]) ʻI he pipiki ki he ngaahi tuʻunga Fakatohitapu fekauʻaki mo e haisini fakafoʻituituí, ʻoku tau hao ai mei he ngaahi mahaki fakaesino lahi. ʻOku tau lakalakaimonū koeʻuhi ko e fakaʻehiʻehi mei he ʻuli fakalaumālie mo e fakaesino ʻi hono ngāueʻaki ʻo e tapaká mo e ngaahi faitoʻo kona tapú. Toe fakakaukau atu foki ki he ngaahi ʻaonga ki he moʻui leleí ʻoku tupu mei he kai mo e inu fakafuofuá. (Lau ʻa e Palovepi 23:20; Taitusi 2:2, 3.) Neongo ko e ngaahi meʻa tefito pehē hangē ko e mālōloó mo e fakamālohisinó ʻe tokoni nai ia ki heʻetau leleí fakalūkufua, ʻoku tautefito ʻetau lakalakaimonū fakaesino mo fakalaumālié koeʻuhi ko ʻetau tali ʻa e tataki Fakatohitapú.
18. Ko e hā ʻoku totonu ke hoko ko e meʻa ia ke tau tokanga tefito ki aí, pea ko e fakahoko ʻo e kikite fē ʻo fekauʻaki mo e moʻui leleí ʻe lava ke tau fakatuʻotuʻa atu ki aí?
18 Hiliō he meʻa kotoa, ʻoku totonu ke tau tokangaʻi ʻetau moʻui lelei fakalaumālié pea ʻai ke mālohi ʻa hotau vahaʻangatae mahuʻinga mo ʻetau Tamai fakahēvaní, ʻa e Matavai ʻo ʻetau “moʻui ko eni, pea mo ia ka hoko mai” ʻi heʻene māmani foʻou kuo talaʻofá. (1 Tim. 4:8; Sāme 36:9) ʻI he māmani foʻou ʻa e ʻOtuá, ʻe fakahoko ai ʻa e fakamoʻui fakalaumālie mo e fakaesino kakato fakafou ʻi he fakamolemole ʻo e angahalá makatuʻunga ʻi he feilaulau huhuʻi ʻa Sīsuú. Ko e Lami ʻa e ʻOtuá, ʻa Sīsū Kalaisi, te ne tataki kitautolu ki he “gaahi matavai moui,” pea ʻe holoholo ʻe he ʻOtuá ʻa e loʻimata kotoa pē mei hotau matá. (Fkh. 7:14-17, PM; Fkh. 22:1, 2) Pea te tau hokosia ai foki ʻa e fakahoko ʻo e kikite fakafiefia: “ʻOku ʻikai ha nofo ai te ne pehe, ʻOku ou mahaki.”—Ai. 33:24.
19. Lolotonga ʻa e tokanga feʻunga ki heʻetau moʻui leleí, ko e hā ʻe lava ke tau fakapapauʻí?
19 ʻOku tau tuipau ʻoku ofi hotau fakahaofí, pea ʻoku tau tatali vēkeveke ki he ʻaho ʻa ia ʻe toʻo ʻosi ai ʻe Sihova ʻa e puke mo e mate ʻa e tangatá. Lolotonga iá, ʻoku tau fakapapauʻi ko ʻetau Tamai ʻofá te ne tokoniʻi kitautolu ke tau kātakiʻi ʻa e mafasia ʻi heʻetau mamahí mo e mahamahakí koeʻuhi ‘ʻokú ne mamahiʻi kitautolu.’ (1 Pita 5:7) Ko ia ai, tau tokangaʻi ʻetau moʻui leleí kae muimui maʻu pē ki he ngaahi tataki mahino ʻoku ʻi he Folofola fakamānavaʻi ʻa e ʻOtuá!
[Fakamatala ʻi lalo]
a Ko ha lisi ʻo e ngaahi kupu pehē ʻe niʻihi ʻoku hā ia ʻi he puha ʻi he peesi 17 ʻo e Taua Leʻo ʻo Sepitema 1, 2003.
Fakamanatu
• Ko hai ʻoku tupu mei ai ʻa e mahamahakí, pea ko hai te ne fakaʻatā kitautolu mei he ngaahi nunuʻa ʻo e angahalá?
• Neongo ʻoku fakanatula pē ke tau hohaʻa fekauʻaki mo ʻetau moʻui leleí, ko e hā ʻoku totonu ke tau fakaʻehiʻehi mei aí?
• Ko e hā ʻoku mahuʻinga ai kia Sihova ʻetau fili ʻo e ngaahi faitoʻó?
• ʻI he fekauʻaki mo ʻetau moʻui leleí, ʻe lava fēfē ke tau maʻu ʻaonga mei he pipiki ki he ngaahi tefitoʻi moʻoni Fakatohitapú?
[Fehuʻi ki he Ako]
[Fakatātā ʻi he peesi 23]
Naʻe ʻikai fakatupu ʻa e tangatá ke ne hokosia ʻa e puké mo e taʻumotuʻá
[Fakatātā ʻi he peesi 25]
Neongo ʻa e mahamahakí, ʻoku maʻu ʻe he kakai ʻa Sihová ʻa e fiefia ʻi he ngāue fakafaifekaú