Kuó U Sio Ai ʻi Heʻene Tupu ʻi Kōleá

FAKAMATALA FAI ʻE MILTON HAMILTON

“ʻOku mau loto-mamahi ke fakahaaʻi atu kuo fakataʻeʻaongaʻi ʻe he puleʻanga Lepupilika ʻo Kōleá ʻa e visa kotoa ʻa kimoutolu kau misinalé pea kuo fakahaaʻi mai ʻoku ʻikai ke fiemaʻu kimoutolu ʻi he fonuá. . . . ʻI he fakakaukau ki he meʻa ko eni ʻoku hokó, ʻoku vaheʻi fakataimi ai kimoutolu ki Siapani.”

ʻI HE konga ki mui ʻo e 1954, naʻá ku maʻu ai mo hoku uaifí ʻa e pōpoaki ʻi ʻolungá mei Brooklyn, Niu ʻIoke, ʻAmelika. ʻI he konga ki muʻa ʻo e taʻu ko iá, naʻá ma maʻu tohi fakamoʻoni ako ai mei he kalasi hono 23 ʻo e Akoʻanga Kiliatí ʻi he fakatokelau ʻo Niu ʻIoké. ʻI heʻema maʻu ʻa e tohí, naʻá ma kei ngāue fakataimi ai ʻi Indianapolis, Indiana.

Ko au mo hoku uaifí ko Liz (ko Liz Semock ia ki muʻa), naʻá ma kalasi fakataha ʻi he ako māʻolungá. Naʻá ma mali ki mui ai ʻi he 1948. Naʻá ne manako ʻi he ngāue fakafaifekau taimi-kakató ka naʻá ne toumoua fekauʻaki mo e mavahe mei ʻAmelika ke ngāue ʻi ha fonua mulí. Ko e hā ne liliu ai ʻene fakakaukaú?

Naʻe loto-lelei ʻa Liz ke ʻalu mo au ki ha fakataha maʻá e faʻahinga naʻa nau loto ke hoko ko e kau ako ʻi Kiliatí. Naʻe fai ʻa e fakataha ko iá lolotonga ʻa e fakataha-lahi fakavahaʻapuleʻanga ʻi he Yankee Stadium, Niu ʻIoke, ʻi he faʻahitaʻu māfana ʻo e 1953. Hili ʻa e fakataha fakalototoʻa ko iá, naʻá ma fakafonu ai ʻa e tohi kole ke ako ʻi Kiliati. ʻI heʻema ʻohovalé, naʻe fakaafeʻi kimaua ke ma kau ki he kalasi hono hokó, ʻe kamata ʻi Fepueli 1954.

Naʻe vaheʻi kimaua ki Kōlea, neongo ko e toki ʻosi pē ia ʻa e tau he taʻu ʻe tolu ʻi he faʻahitaʻu māfana ʻo e 1953, ʻo haveki ai ʻa e fonua ko iá. Hangē ko ia ne fakahaaʻi ʻi he tohi ne hiki ʻi ʻolungá, naʻá ma ʻuluaki ō ki Siapani. Hili ha folau tahi ʻaho ʻe 20, naʻá ma tūʻuta ai ʻi Sanuali 1955 fakataha mo e kaungā misinale ʻe toko ono ʻa ia ne vaheʻi foki mo kinautolu ki Kōlea. Ko Lloyd Barry, ʻa e ʻovasia ʻo e vaʻa ʻi Siapaní he taimi ko iá, naʻá ne feʻiloaki mo kimautolu ʻi he uafú he 6:00 pongipongi. Naʻa mau mavahe leva mei ai ki he ʻapi misinale ʻi Yokohama. Ki mui ʻi he ʻaho tatau, naʻa mau ō ai ʻi he ngāue fakafaifekaú.

Faifai Pē ʻo Ma Aʻu ki Kōlea

Naʻe faai atu pē ʻo ma maʻu ha visa ke hū ai ki he Lepupilika ʻo Kōleá. ʻI Maʻasi 7, 1955, ne ma puna ai he vakapuná mei he Malaʻe Vakapuna Fakavahaʻapuleʻanga Haneda ʻi Tōkiō ʻi he puna houa ʻe tolu ki he Malaʻe Vakapuna Yoido ʻi Seoul. Ko e Kau Fakamoʻoni Kōlea laka hake he toko 200 naʻa nau talitali lelei kimautolu, pea naʻá ma tō loʻimata ai ʻi he fiefia. Naʻe toko 1,000 pē ʻa e Kau Fakamoʻoní ʻi he kotoa ʻo Kōleá he taimi ko iá. ʻI he hangē pē ko e faʻahinga tokolahi kehe mei he Hihifó, ne ma fakakaukau ʻoku tatau ai pē pe ko e hā ʻa e fonua naʻa nau tupu aí, ko e kakai kotoa ʻi he Hahaké ʻoku nau fōtunga tatau mo tōʻonga tatau. Ne ʻikai fuoloa kuó ma ʻiloʻi ʻa e kehekehé. Ko e kau Kōleá ʻoku ʻikai ngata pē ʻi he ʻi ai ʻenau lea mo e ʻalafapeti pē ʻanautolú ka ʻoku toe ʻi ai foki mo ʻenau founga feimeʻatokoni, ko e fōtunga, mo e vala fakafonua pē  ʻonautolu, pea pehē ki he ngaahi meʻa makehe ʻanautolu pē, hangē ko e sīpinga ʻo honau ngaahi falé.

Ko ʻema ʻuluaki pole lahi tahá ko hono ako ko ia ʻo e leá. Naʻe ʻikai ha tohi te ma ala maʻu ke ako ai ʻa e lea faka-Kōleá. Naʻe vave ʻema ʻiloʻi naʻe faingataʻa ke puʻaki tatau ʻa e ngaahi ongo ʻo e lea faka-Kōleá tonu ʻo ngāueʻaki ʻa e ngaahi ongo pē ʻo e lea faka-Pilitāniá. ʻE toki lava pē ke ako ʻe ha taha ʻa e puʻaki totonú ʻi hono ako ʻa e ʻalafapeti faka-Kōleá.

Ne ʻi ai ʻema ngaahi fehālaaki. Ko e fakatātaá, naʻe ʻeke ʻe Liz ki ha tokotaha-ʻapi pe ʻoku ʻi ai haʻane Tohi Tapu. Naʻe faikehe e mata ʻo e tokotaha-ʻapí ʻi heʻene mavahe ʻo ne foki mai mo ha masi. Naʻe ʻeke ʻe Liz ʻa e sungnyang (masi) kae ʻikai ko e sungkyung, ko e foʻi lea ia ki he “Tohi Tapú.”

Hili ha ngaahi māhina siʻi, naʻe vaheʻi mai ai ke ma fokotuʻu ha ʻapi misinale ʻi Pusan, ko ha kolo taulanga ʻi he tafaʻaki fakatongá. Ne ma malava ai ke totongi ha fanga kiʻi loki ʻe tolu maʻamaua mo e ongo tuofāfine naʻe vaheʻi ki ai fakataha mo kimauá. Naʻe ʻikai ha tepi vai he ngaahi lokí pea naʻe ʻikai ha fale mālōlō lomi. Ko e taimi poʻulí pē naʻe mālohi feʻunga ai e lele ʻa e vaí ke ne tekeʻi ʻa e vaí ʻi ha housi ki he fungavaka uá. Ko ia naʻa mau taufetongi ai ʻi he tuʻu hake he taimi hengihengí ʻo ʻutu ʻa e vaí ki ha ngaahi ʻaiʻanga vai. Naʻe pau ke mau haka ʻa e vaí pe ʻai ki ai ʻa e faitoʻo ke feʻunga ki he inú.

Naʻe ʻi ai mo e ngaahi pole kehe. Naʻe mātuʻaki fakangatangata ʻa e mālohi ʻo e ʻuhilá ʻo ʻikai lava ai ke mau ngāueʻaki ha mīsini fō pe ko ha haiane. Ko homau loki kaí ʻa e hala vahaʻa lokí, pea ko e naunau pē aí ko ha sitou kalasini. Naʻe vave ʻemau taki taha ako ke teuteu ha meʻakai ʻi homau ʻaho feimeʻatokoni naʻe vaheʻí. ʻI he taʻu ʻe tolu hili ʻemau tūʻuta ki aí, naʻá ma fakatou puke ai mo Liz ʻi he ʻate pupulá. Ko e tokolahi ʻo e kau misinale he ngaahi taʻu ko iá ne nau puke ʻi he mahakí ni. Naʻe laui māhina peá ma toki fakaakeake, pea naʻe hoko kia kimaua ʻa e ngaahi mahamahaki kehe.

Tokoniʻi ke Ikuʻi ʻa e Ngaahi Fakafaingataʻaʻiaʻangá

ʻI he taʻu ʻe 55 kuohilí, ko e taha ʻo e ngaahi feituʻu taʻemanonga fakapolitikale ʻo ʻĒsiá ko e konga fonua muitolotolo ʻo Kōleá. Ko e feituʻu kuo tapui ai e ngāue fakakautaú, ʻokú ne ʻā vahevahe ʻa e konga fonua muitolotolo ko iá. ʻOku kilomita ia ʻe 55 ki he tokelau ʻo Seoul, ko e kolomuʻa ʻo e Lepupilika ʻo Kōleá. ʻI he 1971, naʻe ʻaʻahi ki ai ʻa Frederick Franz mei he ʻuluʻi ʻapitanga ʻi Brooklyn. Naʻá ku fakafeʻao ia ki he feituʻu naʻe tapui ai ʻa e ngāue fakakautaú, ʻa e kauʻāfonua ʻoku malu taha ʻi he māmaní. Kuo faʻa fakataha ai ʻi he faai mai ʻa e ngaahi taʻú, a e kau ʻōfisa ʻo e Ngaahi Puleʻanga Fakatahatahá mo e kau fakafofonga ʻo e ongo puleʻangá.

Ko e moʻoni, ʻoku mau tuʻu-ʻatā ai pē ʻi he fekauʻaki mo e ngaahi meʻa fakapolitikale ʻo e māmani ko ení, ʻo kau ai ʻa e tuʻunga ʻi he konga fonua muitolotolo Kōleá. (Sione 17:14) Koeʻuhi ko ʻenau fakafisi  ke kau ʻi he tau mo honau kaungā faʻahinga ʻo e tangatá, kuo ngāueʻi ai ʻe ha Kau Fakamoʻoni Kōlea laka hake he toko 13,000 ʻa e ngaahi taʻu fakakātoa ʻe 26,000 ʻi he pilīsoné. (2 Kol.2Ko 10:3, 4) ʻOku lāuʻilo ʻa e fanga tokoua kei talavou kotoa ʻi he fonua ko iá te nau fehangahangai mo e ʻīsiu ko ení, ka ʻoku ʻikai te nau ilifia. ʻOku fakamamahi hono ui ʻe he puleʻangá ko e “kau faihia” ʻa e kau faifekau Kalisitiané ʻa ia ko ʻenau “hia” pē ʻoku faí ko ʻenau fakafisi ko ia ke fakangaloku ʻa ʻenau tuʻu-ʻatā faka-Kalisitiané.

ʻI he 1944, lolotonga ʻa e Tau II ʻa Māmaní, naʻá ku fakafisi foki ai mo au ke kau ki he ngāue fakakautaú pea naʻe pau ai ke u fakamoleki ʻa e taʻu ʻe ua mo e konga ʻi he pilīsone ʻAmelika ʻi Lewisburg, Pennsylvania. Ko ia neongo kuo fehangahangai homau fanga tokoua Kōleá mo ha taimi ʻoku toe faingataʻa ange ʻi he pilīsoné, ʻoku ou maheni mo e meʻa kuo hokosia ʻe he kau talavou Fakamoʻoni ko ení. Naʻe fakalototoʻa ki he tokolahi ʻa e ʻiloʻi naʻe hokosia ʻe he niʻihi ʻo kimautolu kau misinale ʻi Kōleá ʻa e meʻa meimei tatau.—Ai. 2:4.

Fehangahangai mo ha Pole

Ko ʻemau tuʻu-ʻataá tonu naʻe kau ki ai ha ʻīsiu naʻe malanga hake ʻi he 1977. Naʻe fakakaukau e kau ʻōfisá kuo mau tākiekina ʻa e kau talavou Kōleá ke nau fakafisi ke kau ki he ngaahi ngāue fakakautaú mo ngāueʻaki ʻa e meʻataú. Ko ia naʻe fili ai ʻe he puleʻangá ke ʻoua ʻe tali ʻa e ngaahi ngofua ke toe hū mai ha kau misinale kuo nau mavahe ʻi ha faʻahinga ʻuhinga pē mei he fonuá. Ko e fakangatangata ko ení naʻe lele ia mei he 1977 ʻo ngata ʻi he 1987. Kapau naʻa mau mavahe mei Kōlea he lolotonga ʻa e ngaahi taʻu ko iá, ne mei ʻikai fakaʻatā ke mau toe foki ki ai. Ko ia ai ne ʻikai ʻaupito te mau ō ki homau fonuá naʻa mo haʻamau ʻaʻahi ki ai ʻi he lolotonga ʻo e ngaahi taʻu ko iá.

Naʻa mau fakataha ʻi he taimi lahi mo e kau ʻōfisa fakapuleʻanga pea fakamatalaʻi ki ai ʻa ʻemau tuʻu-ʻatā ʻi he tuʻunga ko e kau muimui ʻo Kalaisí. Faifai atu pē, naʻa nau ʻiloʻi heʻikai te mau ilifia, ko ia naʻe faifai atu pē ʻo ngata ʻa e tapuí—ʻi he hili ia e taʻu ʻe hongofulu. Lolotonga ʻa e ngaahi taʻu ko iá ko e kau misinale tokosiʻi pē naʻe pau ke nau mavahe mei he fonuá ʻi he ngaahi ʻuhinga hangē ko e tuʻunga moʻui leleí, ka ko e toenga ʻo kimautolú naʻa mau nofo ai pē, pea ʻoku mau fiefia ʻi heʻemau fai peheé.

Lolotonga ʻa e kongaloto ʻo e 1980 tupú, naʻe tukuakiʻi loi ai ʻe he kau fakafepaki ki heʻemau ngāue fakafaifekaú ʻa e kau talēkita ʻo ʻemau kautaha fakalaó ki hono akoʻi ki he kau talavoú ke nau fakaʻehiʻehi mei he hū ʻo kau ki he kau taú. Naʻe ui mai ai ʻe he puleʻangá kimautolu taki taha ke fakafehuʻi. ʻI Sanuali 22, 1987, naʻe ʻilo ai ʻe he ʻōfisi talatalaakí naʻe ʻikai ha makatuʻunga ʻo e ngaahi tukuakiʻi naʻe faí. Naʻe tokoni ai e meʻá ni ke fakatonutonu ha ngaahi maʻuhala ʻi he kahaʻú.

Tāpuakiʻi ʻe he ʻOtuá ʻEmau Ngāué

ʻI Kōlea, naʻe fakalalahi ai ʻa e fakafepaki ki heʻemau ngāue fakamalangá ʻi he faai mai ʻa e ngaahi taʻú koeʻuhi ko ʻemau tuʻu-ʻataá. ʻI he meʻá ni, naʻe hoko ʻo toe faingataʻa ange ai ke maʻu ha ngaahi feituʻu feʻungamālie ki heʻemau ngaahi ʻasemipilī lalahi angé. Ko ia ai, naʻe fai ʻe he Kau Fakamoʻoní e meʻa ʻo langa ha Holo ʻAsemipilī ʻi Pusan, ko e fuofua holo ia ʻi he Hahaké. Naʻá ku maʻu ʻa e monū ke fai ʻa e malanga fakatapuí ʻi ʻEpeleli 5, 1976, ki ha kau fanongo ko e toko 1,300.

Talu mei he 1950, mo e vaheʻi ʻa e kau tangata ko e kau sōtia fakakautau  ʻe laui mano mei ʻAmelika ke nau ngāue ʻi Kōlea. ʻI heʻenau foki ki ʻAmeliká, kuo hoko ai ʻa e tokolahi ko e Kau Fakamoʻoni longomoʻui. ʻOkú ma faʻa maʻu ʻa e ngaahi tohi meia kinautolu, pea ʻokú ma lau ko ha tāpuaki ʻa hono tokoniʻi fakalaumālie kinautolú.

Ko e meʻa fakamamahí, ne mole ʻi he maté ʻa hoku kaumeʻa ʻofeina ko Liz, ʻi Sepitema 26, 2006. ʻOku ou ongoʻi lahi ʻaupito ʻa ʻene pulí. Lolotonga ʻa hono taʻu ʻe 51 hení, naʻá ne tali fiefia ha vāhenga-ngāue pē ʻo ʻikai ʻaupito haʻane lāunga. Naʻe ʻikai ʻaupito haʻane fokotuʻu mai pe kiʻi lave pē ā ki ha foki ki ʻAmelika, ʻa e fonua naʻá ne pehē ki muʻa ʻoku ʻikai ʻaupito loto ke mavahe mei aí!

ʻOku ou hokohoko atu e ngāue ko ha mēmipa ʻo e fāmili Pēteli ʻi Kōleá. Kuo tupu ʻa e fāmilí mei ha kiʻi falukunga kakai ʻi he muʻaki ngaahi taʻú ki he toko 250 nai he ʻahó ni. Ko hoku monū ia ke ngāue fakataha mo e Kōmiti Vaʻa ʻo e kau tangata ʻe toko fitu ʻoku nau tokangaʻi ʻa e ngāue hení.

Lolotonga naʻe masiva ʻaupito ʻa Kōlea heʻema fuofua tūʻuta atu ki aí, ʻi he taimí ni ko e taha ia ʻo e ngaahi fonua fakalakalaka taha ʻi he māmaní. ʻOku ʻi ai ʻa e Kau Fakamoʻoni laka hake he toko 95,000 ʻi Kōlea, ko e meimei peseti ʻe 40 ʻo kinautolu ʻoku nau ngāue ko e kau tāimuʻa tuʻumaʻu pe tāimuʻa tokoni. ʻOku fakalahi atu ʻa e meʻá ni kotoa ki he ngaahi ʻuhinga kuó u houngaʻia ai ʻi he malava ke tauhi ki he ʻOtuá ʻi heni pea sio ai ki he tupu ʻa e tākanga ʻa e ʻOtuá.

[Fakatātā ʻi he peesi 24]

Tūʻuta ʻi Kōlea mo ha kaungā misinale

[Fakatātā ʻi he peesi 24, 25]

Ngāue ʻi Pusan

[Fakatātā ʻi he peesi 25]

Mo Tokoua Franz ʻi he feituʻu tapuí, 1971

[Fakatātā ʻi he peesi 26]

Ko au mo Liz ʻi he taimi nounou ki muʻa peá ne maté

[Fakatātā ʻi he peesi 26]

Vaʻa ʻi Kōleá ʻa ia ʻoku hokohoko atu ai ʻeku ngāue ko ha mēmipa ʻo e fāmili Pētelí