Ngaahi Fehuʻi mei he Kau Lautohí

ʻI he Nehemaia 8:10, naʻe tala ai ki he kau Siú ke nau “kai meʻa ngako,” neongo ia naʻe pehē ʻi he Laó ʻi he Livitiko 3:16 (3:17, PM): ‘ʻE ʻikai te mou kai ʻa e ngakó.’ ʻOku lava fēfē ke fehoanakimālie ʻa e ongo fakamatala ko ení?

ʻI he muʻaki leá, ko e lea naʻe liliu ko e “meʻa ngako” ʻi he Nehemaia 8:10 mo e “ngako” ʻi he Livitiko 3:16 ʻoku kehekehe. Ko e foʻi lea faka-Hepelū ko e cheʹlev, naʻe liliu ko e “ngako” ʻi he Livitiko 3:16, ʻoku ʻuhinga ia ki he ngako ʻo e fanga manú pe ko e tangatá. (Liv. 3:3; Fkm. 3:22) Ko e potutohi ʻo e veesi 17 ʻoku fakahaaʻi ai ko e kau ʻIsilelí naʻe ʻikai fiemaʻu ke nau kai ʻa e ngaahi konga ngako takatakai ʻi he ngākau mo e kofuua ʻo e fanga manu ki he feilaulaú pe ko e ngako ʻi he kongalotó koeʻuhi “oku a Jihova ae gako kotoabe.” (Liv. 3:14-16, PM) Ko ia ko e ngako ʻi he sino ʻo e fanga manú naʻe pau ke fai ʻaki ʻa e feilaulau kia Sihová naʻe ʻikai fiemaʻu ke kai.

ʻI he tafaʻaki ʻe tahá, ko e foʻi lea naʻe liliu ko e “meʻa ngako” ʻi he Nehemaia 8:10 ko e mash·man·nimʹ, pea ko e ʻasi pē eni ʻe taha ʻa e foʻi leá ni ʻi he Ngaahi Konga Tohi Tapu Faka-Hepeluú. Ko ʻene haʻú mei he foʻi veape ko e sha·menʹ, ʻa ia ʻoku ʻuhingá ko e “hoko ʻo sino, tupu ʻo sino.” Ko e foʻi fakakaukau tefito ʻo e ngaahi lea ʻoku felāveʻi mo e foʻi veape ko ení ʻoku hā ngali ko e hoko ʻo tuʻumālie mo lelei. (Fakafehoanaki mo e Aisea 25:6.) Ko e taha ʻo e ngaahi foʻi lea anga-maheni taha naʻe haʻu mei he foʻi veape ko ení ko e foʻi nauna ko e sheʹmen, ʻa ia ʻoku faʻa liliu ko e “lolo,” ʻo kau ai ʻa e kupuʻi lea “lolo olive.” (Teu. 8:8; Liv. 24:2) Hangē ko ia naʻe ngāueʻaki ʻi he Nehemaia 8:10, ko e mash·man·nimʹ  ʻoku hā ngali ko e ʻuhinga ia ki he meʻakai kuo teuteuʻi ʻaki ha lolo lahi pea aʻu nai ʻo kau ai ʻa e kakanoʻi manu ʻoku ʻi ai hano ngako ka ʻoku ʻikai ko e kongokonga ngako ʻataʻatā ʻo e monumanú.

Neongo naʻe tapui ʻa e kau ʻIsilelí ke ʻoua te nau kai ʻa e kongokonga ngako ʻo e manú, naʻe lava ke nau kai ʻa e meʻakai naʻe lelei mo ifo. Ko e ngaahi meʻa ʻe niʻihi, hangē ko e keke naʻe ngaohi mei he uité, naʻe haka ia ʻo ʻikai ʻi he ngako ʻo e monumanú, ka ʻi he lolo vesitapolo, ʻo faʻa ngāueʻaki ʻa e lolo ʻōlivé. (Liv. 2:7) Ko ia ʻoku fakamatalaʻi ʻi he Insight on the Scriptures ʻo pehē ko e “meʻa ngako” ʻi heʻene tuʻu ʻi hení “ʻoku ʻuhinga iá ki he ngaahi konga lelei, ko e ngaahi meʻa naʻe ʻikai huihuia pe mōmoa, ka ʻoku huʻohuʻa, ʻo kau ai ʻa e ngaahi meʻakai ifo naʻe ngaohi ʻaki ʻa e lolo vesitapoló.”

Ko ia ai, ko e kau Kalisitiané, ʻoku nau manatuʻi ko hono tapui ʻo e kai ʻo e ngakó ko e konga ia ʻo e Laó. ʻOku ʻikai te nau ʻi he malumalu ʻo e Laó, ʻo kau ai ʻa e ngaahi fiemaʻu felāveʻi mo e ngaahi feilaulau monumanú.—Loma 3:20; 7:4, 6; 10:4; Kol. 2:16, 17.