“ʻOku mau fiefia ʻaupito ʻi he lāulea lolotonga ʻa e efiafi Lotu Fakafāmilí ʻa ia ʻoku faʻa aʻu ia ki he fuoloa ʻa e poʻulí ʻo kapau heʻikai te u taʻofi hoku fāmilí,” ko e lau ia ha tamai ʻi Pelēsila. ʻOku pehē ʻe ha tamai ʻi Siapani, ko hono foha taʻu hongofulú ʻoku ʻikai nai ke ne fakatokangaʻi ʻa e lōloa ʻenau akó pea loto pē ke hokohoko atu. Ko e hā hono ʻuhingá? “ʻOku maongo kiate ia, pea ʻoku tokoni ia ki heʻene fiefiá,” ko e lau ia ʻa e tamaí.

Ko e moʻoni, ʻoku ʻikai ke fiefia ʻa e fānau kotoa ʻi he lotu fakafāmilí. Pea aʻu ʻo ʻikai saiʻia ai ʻa e niʻihi. Ko e hā hono ʻuhingá? Ko ha tamai ʻi Toko ʻokú ne lea mei he hokosia, “Ko e lotu kia Sihová ʻoku ʻikai totonu ke fakapipiko.” Kapau ʻoku fakapipiko ʻa e lotu fakafāmilí, ʻe lava ke ʻuhinga iá ʻoku fiemaʻu ha ngaahi liliu ki he founga ʻoku fakahoko aí. Kuo ʻiloʻi ʻe he ngaahi fāmili lahi ko e lotu fakafāmilí ʻe lava ke “fakafiefia,” ʻo hangē pē ko e ʻaho Sāpaté ki he niʻihi ʻo e kau ʻIsilelí.—ʻAi. 58:13, 14.

ʻOku totonu ke fakapapauʻi ʻe he ngaahi tamai Kalisitiané ʻoku ongoʻi nonga honau fāmilí lolotonga ʻa e lotu fakafāmilí. Kapau ʻe fai eni ʻe he ngaahi tamaí, ʻe toe fiefia lahi ange ai ʻa e fāmilí. Ko Ralf, ʻoku ʻi ai hono ʻofefine ʻe toko tolu mo e foha ʻe taha, ʻokú ne pehē ko ʻenau lotu fakafāmilí ʻoku meimei hangē ia ko ha fetalanoaʻakí ʻi ha ako. Anga-fēfē? ʻOku kau ʻa e tokotaha kotoa ʻi he lāuleá. Ka, ko hono ʻai ke fiefia ʻa e tokotaha kotoa pea kau ʻi he akó ʻe faingataʻa nai ʻi ha ngaahi taimi. ʻOku pehē ʻe ha faʻē ʻe taha, “ʻOku ʻikai maʻu pē ke u maʻu ʻa e ivi ke ʻai ʻa e lotu fakafāmilí ke fakafiefia ʻo hangē ko ia ʻoku ou loto ki aí.” ʻE lava ke ke ʻai hoʻo lotu fakafāmilí ke fakafiefia ange?

“Kuo pau ke ma hoko ʻo ngaofengofua,” ko e lau ia ha tamai ʻa ha toko ua ʻi Siamane. ʻOku pehē ʻe Natalia, ko ha faʻē ʻa ha toko ua, “Ko e meʻa ʻoku mahuʻinga taha ki homau fāmilí ko e ʻai ke kehekehe, kehekehe, kehekehe.” ʻOku vahevahe ʻe he ngaahi fāmili lahi ʻenau lotu fakafāmilí ki he ngaahi konga kehekehe. ʻOku fakamatala ʻa Cleiton, ko ha tamai ʻa ha ongo toʻutupu ʻi Pelēsila, ko hono fai ení, ʻe hoko ai ʻa e akó ʻo fakafiefia lahi  ange “pea ʻai ke kau ai ʻa e tokotaha kotoa ʻi he fāmilí.” Kapau ʻoku ʻi ai ha fuʻu kehekehe ʻi he taʻu ʻo e fānaú, ʻe lava ke tokangataha ʻa e ngaahi mātuʻá ki he fiemaʻu ʻa e kiʻi tama taki taha ʻaki hono vahevahe ʻa e taimi akó. Pehē foki, ʻe lava ke hoko ʻa e ngaahi mātuʻá ʻo ngaofengofua ʻi he fili ʻa e ʻū tohi ʻe ako ai ʻa e fāmilí mo e founga te nau ako ai iá.

Ko e hā ʻoku fai ʻe he ngaahi fāmili ʻe niʻihi ke ʻai ke kehekehe ange ai ʻenau lotu fakafāmilí? ʻOku kamataʻaki ʻe he niʻihi ʻenau lotu fakafāmilí ʻa hono hivaʻi ʻa e hiva kia Sihová. “ʻOkú ne fakatupulekina ai ha ʻatimosifia lelei pea teuʻi fakaeʻatamai kimautolu ki he fakamatalá,” ko e lau ia ʻa Juan ʻi Mekisikou. ʻOku fili ʻe hono fāmilí ʻa e ngaahi hiva ʻoku fekauʻaki mo e fakamatala te nau ako ʻi he efiafi ko iá.

ʻOku lau fakataha ʻe he ngaahi fāmili lahi ha konga ʻo e Tohi Tapú. Ke kehekehé, ʻoku lau ʻe he mēmipa taki taha ʻo e fāmilí ʻa e konga ʻo e faʻahinga ʻoku kau ʻi he talanoá. ʻI he kamataʻangá, naʻe ʻikai ke ongo fakanatula eni ki ha tamai ʻi Siapani, ʻa ia naʻá ne pehē “naʻe ʻikai anga-maheni ke lau ʻi he founga ko iá.” Ka naʻe fiefia hono ongo fohá ke sio ki heʻena ongo mātuʻá ʻokú na fiefia ʻi he lotu fakafāmili mo kinauá. Ko e ngaahi fāmili ʻe niʻihi ʻoku aʻu ʻo nau fakatātaaʻi ʻa e ngaahi talanoa Fakatohitapú. ʻOku pehē ʻe Roger, ko ha tamai ʻa ha ongo tamaiki tangata ʻi ʻAfilika Tonga, ko e fānaú ʻoku nau “faʻa sio ʻo ʻilo ʻa e ngaahi meʻa ʻi ha talanoa Fakatohitapu ʻa ia naʻe ngalo ʻia kimaua mātuʻá.”

Ko e meʻa ʻe taha ʻe lava ke fai ʻe ha fāmili ke kehekehe aí ko e ngāue fakataha ʻi ha poloseki, hangē ko hano langa ha sīpinga ʻo e ʻaʻake ʻo Noá pe ko e temipale ʻo Solomoné. Ko hono fai ha fekumi fekauʻaki mo e ngaahi poloseki ko ení ʻe lava ke fakafiefia. Ko e fakatātaá, naʻe fai pehē ha kiʻi taʻahine taʻu nima mo ʻene ongo mātuʻá pea mo ʻene kui fefiné. ʻI honau loto-falé, naʻa nau ngāue fakataha kotoa ke faʻu ha kiʻi papa vaʻinga ʻo makatuʻunga ʻi he fononga fakamisinale ʻa e ʻapositolo ko Paulá. Ko e ngaahi fāmili ʻe niʻihi kuo nau faʻu ha papa vaʻinga makatuʻunga ʻi he ngaahi talanoa mei he tohi ʻEkisotó. Ko e ʻai ke kehekehé “ʻokú ne ʻomai ha moʻui foʻou ki heʻemau lotu fakafāmilí pea ki homau fāmilí tonu,” ko e lau ia ʻa e taʻu 19 ko Donald ʻi Toko. ʻE lava ke ke fakakaukau ki ha poloseki te ne ʻai hoʻo lotu fakafāmilí ke fakafiefia ange?

Neongo ʻoku ʻai ʻe he kehekehé mo e ngaofengofuá ke fakafiefia ʻa e lotu fakafāmilí, ʻoku fiemaʻu ʻa e meʻa lahi ange ke maʻu ʻaonga ai ʻa e tokotaha kotoa. ʻOku fiemaʻu ke teuteu ʻa e tokotaha kotoa. ʻE faingataʻa nai ki he fānaú ke tangutu pea ako ʻi ha taimi lōloa, ko ia kuo pau ke filifili lelei ʻe ha tamai ʻa e fakamatala ʻe fakamānako ki he fānaú. Pea kuo pau leva ke ne fakamoleki ha taimi ke teuteu lelei. ʻOku pehē ʻe ha tamai ʻe taha, “ʻI he taimi ʻoku ou mateuteu aí, ʻoku mohu ʻuhinga ange ai ʻa e taimi akó ki he tokotaha kotoa.” ʻOku tala ange ʻe ha tamai ʻi Siamane ki hono fāmilí ʻa e meʻa te nau ako lolotonga ʻa e lotu fāmili ki he māhina hono hokó. Ko e fāmili ʻe taha ʻoku ʻi ai ʻa e fānau ʻe toko ono ʻi Pēnini ʻoku nau faʻa sio ʻi he taha ʻo e ngaahi DVD ʻa e kautahá ko ha konga ʻenau lotu fakafāmilí. ʻOku anga-fēfē ʻa e teuteu ʻa e fāmilí? ʻOku tomuʻa ʻoange ʻe he tamaí kia kinautolu ha lisi ʻo e ngaahi fehuʻi. Ko e teuteú ʻokú ne ʻai moʻoni ke ʻi ha tuʻunga lelei ʻa e lotu fakafāmilí.

ʻI he taimi ʻoku tomuʻa ʻiloʻi ai ʻe he fāmilí ʻa e meʻa ʻe fai e lāulea ki aí, ʻe lava ke nau talanoa ki ai lolotonga ʻa e uiké. Pea te nau fakatuʻotuʻa atu leva mo e loto-māfana ki he akó. Pea kapau ʻoku ʻi ai ha konga ʻa e tokotaha kotoa ʻi he fāmilí, ʻe ongoʻi ai ʻe he tokotaha kotoa ko ʻene lotu fakafāmili ia.

ʻOku ʻiloʻi ʻe he ngaahi fāmili lahi ʻoku faingataʻa ke fai tuʻumaʻu ʻenau lotu fakafāmilí. Ko e hā hono ʻuhingá?

Kuo pau ki he ngaahi mātuʻa ʻe niʻihi ke ngāue ʻi he ngaahi houa lahi ke fafanga pē honau fāmilí. Ko e fakatātaá, ko ha tamai ʻi Mekisikou ʻokú ne mavahe mei ʻapi ʻi he ono pongipongí pea toki foki pē ʻi he valu efiafí. Pe ʻoku ʻi ai nai ʻa e taimi ʻe fiemaʻu ki he niʻihi ke liliu ʻa e ʻaho ʻo ʻenau lotu fakafāmilí koeʻuhí ko ha meʻa fakalaumālie kehe, hangē ko ha ʻaʻahi ʻa e ʻovasia sēketí pe ko ha fakataha-lahi.

Neongo ʻa e ngaahi faingataʻá, ʻoku fiemaʻu ke tau fakapapauʻi ke fai tuʻumaʻu ʻa e lotu fakafāmilí. ʻOku fakamatala ʻa e taʻu 11 ko Loïs ʻi Toko ki he mahuʻinga ʻo e meʻá ni ki hono fāmilí. “Neongo kuo pau ke kamata tuai he taimi ʻe niʻihi ʻemau lotu fakafāmilí koeʻuhi ko ha meʻa naʻe hoko lolotonga ʻa e ʻahó, ʻoku mau fai maʻu pē ʻemau lotu fakafāmilí.” Ko ia ko ha fakakaukau lelei ia ke fakataimitēpileʻi hoʻo lotu fakafāmilí ki muʻa ʻi he uiké. Ko e hā hono ʻuhingá? Koeʻuhí kapau ʻe hoko taʻeʻamanekina ha meʻa, ʻe lava ke ke toki fai ʻa e lotu fakafāmilí ʻi ha ʻaho ʻamui ange he uike ko iá.

Ko e hā ʻoku tau ui ai ia ko e lotu fakafāmilí? Koeʻuhí ko e konga ia ʻetau lotu kia Sihová. Fakataha ʻi he tuʻunga ko ha fāmilí, ʻe lava ke tau fai ha feilaulau ʻo e “fanga pulu,” ʻa ia, ko e fakahīkihiki kia Sihova. (Hōs. 14:2) ʻOfa ke fiefia ʻa e tokotaha kotoa ʻo e fāmilí ʻi he lotu fakafāmilí, koeʻuhí “koe fiefia a Jihova ko ho mou malohi.”—Neh. 8:9, 10, PM.