NAʻE ʻeke mai ʻe heʻeku fineʻeikí: “Pea ko e hā ʻoku ʻikai ai ke ke lotu ki hoʻo fanga kuí? ʻOkú ke ʻiloʻi ko hoʻo moʻuí koeʻuhí ko kinautolu? ʻOku ʻikai te ke fakahāhā ha houngaʻia ʻiate kinautolu? ʻE lava fēfē ke ke liʻaki ʻa e anga fakafonua kuo tukuʻau mai ʻi he ngaahi toʻutangata? Ko hoʻo fakafisi ke fakalāngilangiʻi ʻetau fanga kuí ʻoku hangē ia haʻo pehē ʻoku kovi ʻetau lotú.” Hili hono leaʻaki eni ʻe heʻeku fineʻeikí, naʻá ne tangi.

ʻI he ngaahi māhina siʻi ki muʻa ai, naʻe tuʻuaki ai ʻe he Kau Fakamoʻoni ʻa Sihová ki heʻeku fineʻeikí ha ako Tohi Tapu. Naʻe ʻikai ke ne loto ke ako, ka ke anga-leleí naʻá ne fokotuʻutuʻu mo kinautolu ke ako mo au. Pea kuó ne ʻita ʻiate au he taimí ni, ʻa ia naʻe hā ngalikehe koeʻuhí he naʻá ku talangofua maʻu pē kiate ia. Kae kehe, koeʻuhí naʻá ku loto ke ʻai ʻa Sihova ke fiefia, naʻe ʻikai lava ʻi he taimi ko ení ke u talangofua kiate ia. Naʻe ʻikai ke faingofua, ka naʻe fakaivimālohiʻi au ʻe Sihova.

Naʻe lotu Puta hoku fāmilí ʻo hangē ko e tokolahi taha ʻo e kakai Siapaní. Ka ʻi he hili ʻa e māhina ʻe ua ʻeku ako mo e Kau Fakamoʻoni ʻa Sihová, naʻá ku tuipau ko e Tohi Tapú ko e moʻoní ia. ʻI he taimi naʻá ku ʻiloʻi ai ʻoku ʻi ai ʻeku Tamai fakahēvaní, naʻá ku fiemaʻu moʻoni ke ʻiloʻi lelei ia. ʻI he ʻuluaki taimí, naʻá ku fiefia mo e fineʻeikí ʻi he talanoa fekauʻaki mo e meʻa naʻá ku akó. Naʻe kamata ke u maʻu ʻa e ngaahi fakataha ʻa e Fakatahaʻangá ʻi he Sāpaté. ʻI he lahi ange ʻeku akó, naʻá ku tala ange ai ki heʻeku fineʻeikí heʻikai te u toe kau ki he ngaahi ouau lotu-Putá. Fakafokifā pē ʻa e liliu ʻene tōʻongá. Naʻá ne pehē, “Ko e meʻa fakamā ia ʻa e ʻi ai ha taha ʻi he fāmilí ʻoku ʻikai ʻofa ʻi heʻetau fanga kuí.” Naʻá ne tala mai ke taʻofi ʻeku ako ʻa e Tohi Tapú mo hono maʻu ʻa e ngaahi fakatahá. Naʻe ʻikai ʻaupito haʻaku fakakaukau ʻe lea pehē mai ʻeku fineʻeikí! Ko ha tokotaha kehe ʻaupito ia.

Naʻe loto-tatau ʻeku tangataʻeikí mo e fineʻeikí. Naʻá ku ako mei he ʻEfesō vahe 6 ʻa e fiemaʻu mai ʻe Sihova ke u talangofua ki heʻeku ongo mātuʻá. Naʻá ku loto ke melino ange hoku fāmilí, pea naʻá ku fakakaukau kapau te u fanongo kia kinaua, ʻe faifai atu pē ʻo na fanongo mai kiate au. ʻI he taimi ko iá, naʻe pau ke u teuteu ai ki he sivi ʻi he ʻapiakó, ko ia naʻá ku loto ai ke talangofua ki heʻeku ongo mātuʻá ʻi he māhina ʻe tolu. Ka naʻá ku palōmesi kia Sihova te u toe maʻu ʻa e ngaahi fakatahá ʻi he hili ʻa e taimi ko iá.

Naʻe hala ʻeku filí ʻi he ʻuhinga ʻe ua. ʻUluakí, naʻá ku fakakaukau ko e ʻosi ʻa e māhina ʻe tolú te u kei maʻu pē ha holi mālohi ke tauhi ai kia Sihova. Ka, naʻe kamata ke vaivai ʻaupito hoku vahaʻangatae mo iá. Uá, naʻe toe mālohi ange ʻa e feinga ʻeku  fineʻeikí mo e tangataʻeikí ʻi hono fakalotoʻi au ke tuku ʻeku tauhi kia Sihová.

ʻI he Fale Fakatahaʻangá, naʻá ku fetaulaki ai mo e fanga tokoua tokolahi ʻa ia naʻe fakafepakiʻi kinautolu ʻe honau ngaahi fāmilí. Naʻa nau fakapapauʻi mai ʻe fakaivimālohiʻi au ʻe Sihova. (Māt. 10:34-37) Naʻa nau fakamatala mai kapau te u kei faitōnunga ai pē, ʻe lava ke ako hoku fāmilí fekauʻaki mo Sihova. Naʻá ku loto ke u falala kia Sihova, ko ia naʻe kamata ke u lotu fakamātoato.

Naʻe fakafepakiʻi au ʻe hoku fāmilí ʻi he ngaahi founga kehekehe. Naʻe kōlenga mai ʻeku fineʻeikí ke tuku ʻeku akó pea feinga ke ne fakaʻuhinga mo au. ʻI he taimi lahi, naʻá ku fakalongolongo pē. ʻI he taimi naʻá ku leaʻaki ai ha meʻa, naʻá ma faʻa fakakikihi koeʻuhí he naʻá ma taki taha feinga ke fakamoʻoniʻi ʻema totonú. ʻOku ou ʻiloʻi he taimi ko ení kapau naʻá ku toe fakaʻapaʻapaʻi lahi ange ʻa e ngaahi ongoʻi mo e tui ʻa e fineʻeikí, naʻe mei lelei ange. Naʻe ʻomai ʻe heʻeku ongo mātuʻá ʻa e ngāue lahi ange ke u nofo maʻu pē ʻi ʻapi. ʻI he taimi ʻe niʻihi, naʻá na lokaʻi au ʻi tuʻa pe naʻe ʻikai ke na tuku mai haʻaku meʻakai.

Naʻe kole tokoni ʻa e fineʻeikí ki ha niʻihi ke nau fakalotoʻi au. Naʻá ne talanoa ki heʻeku faiakó ka naʻe ʻikai ha ola. Naʻe ʻave au ʻe heʻeku fineʻeikí ki heʻene pule ngāué koeʻuhí ke ne fakalotoʻi au ʻo pehē ʻoku taʻeʻaonga ʻa e lotu kotoa pē. Naʻá ne toe telefoni ki homau ngaahi kāingá ʻo tangi mo kōlenga kia kinautolu ke nau tokoni ange. Naʻe ʻai au ʻe he meʻá ni ke u ʻita lahi ʻaupito. Ka ʻi he ngaahi fakatahá, naʻe fakamanatu mai ʻe he kau mātuʻá ko e taimi naʻe talanoa ai ʻa e fineʻeikí ki he niʻihi kehé ʻo fekauʻaki mo homau tuʻungá, ʻokú ne faifakamoʻoni tonu ai kiate kinautolu.

Naʻe loto ʻeku ongo mātuʻá ke u hū ki he ʻunivēsití koeʻuhi ke u lava ʻo maʻu ai ha ngāue lelei.  Naʻa mau fuʻu ʻita lahi ke talanoa fekauʻaki mo e meʻá ni ʻi ha founga melino, ko ia naʻá ku toutou faitohi kia kinaua ʻo fakamatalaʻi ai ʻeku ngaahi taumuʻá. Naʻe ʻita lahi ʻeku tangataʻeikí peá ne pehē mai: “Kapau ʻokú ke fakakaukau te ke lava ʻo maʻu ha ngāue, feinga ke maʻu ia ʻapongipongi pe ko hoʻo mavahe mei ʻapí ni.” Naʻá ku lotu ʻo kole kia Sihova ke ne tokoniʻi au. ʻI he ʻaho pē hono hokó, lolotonga ʻeku ʻi he ngāue fakamalangá naʻe tuʻuaki mai ai ʻe ha ongo tuofāfine ha ngāue ko hono akoʻi ʻena fānaú. Naʻe ʻikai fiefia ʻeku tangataʻeikí ʻi he meá ni ko ia naʻe ʻikai toe lea mai pea kamata ke ne tukunoaʻi au. Naʻe pehē ʻe he fineʻeikí naʻe mei lelei ange ʻeku hoko ko ha tokotaha faihia ʻi he hoko ko ha taha ʻo e Kau Fakamoʻoni ʻa Sihová.

ʻI he taimi ʻe niʻihi naʻe ʻikai ke u fakapapauʻi pe ʻoku finangalo ʻa Sihova ke u talitekeʻi lahi ʻeku ongo mātuʻá. Ko ia naʻá ku lotu kia Sihova pea fakalaulauloto ki he meʻa ʻoku leaʻaki ʻi he Tohi Tapú ʻo fekauʻaki mo ʻene ʻofá. Naʻe tokoni eni ke toe papau ange ʻeku fakakaukaú mo mahinoʻi ko hono fakafepakiʻi au ʻe heʻeku ongo mātuʻá koeʻuhí ko ʻena tokanga mai kiate aú. Naʻe tokoniʻi au ʻe Sihova ke fakatonutonu ʻeku fakakaukaú mo ʻiloʻi ʻa e meʻa ke faí. ʻIkai ko ia pē, ko e lahi ange ʻeku ʻalu ʻi he ngāue fakafaifekaú ko e lahi ange ia ʻeku fiefia aí. Ko e moʻoni, naʻá ku loto ke u tāimuʻa.

ʻI he taimi naʻe fanongo ai ʻa e fanga tuofāfine ʻe niʻihi ki heʻeku loto ke tāimuʻá, naʻa nau tala mai ʻoku totonu ke u tatali kae ʻoua ke loto-lelei ʻeku ongo mātuʻá. Naʻá ku lotu ki ha poto, fai ha fekumi, fakakaukau ki he ʻuhinga ʻoku ou loto ai ke tāimuʻá pea talanoa ki he fanga tokoua mo e fanga tuofāfine taukeí. Naʻá ku fakamulituku leva ʻoku ou loto ke ʻai ʻa Sihova ke fiefia. Naʻá ku toe mahinoʻi kapau te u toe tatali ʻi ha kiʻi vahaʻa taimi ki muʻa ke kamata tāimuʻá, mahalo ʻe kei fakafepakiʻi pē au ʻe heʻeku ongo mātuʻá.

Naʻá ku kamata tāimuʻa lolotonga hoku taʻu fakaʻosi ʻi he kolisí. ʻI he hili atu ha vahaʻa taimi, naʻá ku loto ke u ʻalu ki he feituʻu naʻe lahi ange ai ʻa e fiemaʻú. Ka naʻe ʻikai loto ʻeku tangataʻeikí mo e fineʻeikí ke u mavahe mei ʻapi. Ko ia, naʻá ku tatali kae ʻoua ke u taʻu 20. Naʻá ku kole leva ki he ʻōfisi vaʻá ha vāhenga-ngāue ʻoku ofi ki hoku kāingá ʻi he fakatonga ʻo Siapaní koeʻuhí ke ʻoua ʻe fuʻu hohaʻa ʻeku fineʻeikí.

Lolotonga ʻeku ʻi he vāhenga-ngāue ko iá, naʻá ku fiefia ʻi he sio ki he papitaiso ʻa e niʻihi ʻo ʻeku kau ako Tohi Tapú. Naʻe kamata ke u ako ʻa e lea faka-Pilitāniá koeʻuhí naʻá ku loto ke u fai ha meʻa lahi ange ʻi heʻeku ngāue fakamalangá. ʻI heʻeku sio ki he faivelenga ʻa e ongo tāimuʻa makehe ʻi heʻeku fakatahaʻangá mo e founga ʻena tokoniʻi ʻa e niʻihi kehé, naʻá ku loto ai ke hoko foki ko ha tāimuʻa makehe. Lolotonga ʻa e taimi ko ení, naʻe tuʻo ua ʻa e puke lahi ʻeku fineʻeikí pea tuʻo ua ai pē ʻeku foki ʻo tokoni kiate iá. Naʻá ne ʻohovale heni pea naʻe kamata ke ne kiʻi anga-ʻofa ange.

ʻI he taʻu ʻe fitu ki mui aí, naʻe faitohi mai ʻa Atushi, ko e taha ʻi he ongo tāimuʻa makehe naʻá ku lave ki ai ki muʻá. Naʻá ne loto ke ma mali peá ne fifili pe ko e hā ʻeku ongoʻi kiate iá. Naʻe teʻeki ke ʻi ai haʻaku ongoʻi fakaemanako ʻia Atushi, pea naʻe ʻikai haʻaku fakakaukau naʻe manako ʻiate au. Hili ʻa e māhina ʻe taha, naʻá ku tala ange ʻoku ou loto ke hoko ʻo ʻiloʻi lelei ange ia. Naʻá ma ʻiloʻi naʻá ma maʻu ʻa e taumuʻa tatau. Naʻá ma fiemaʻu ke hokohoko atu ʻi he ngāue taimi-kakató pea loto-lelei ke tali ha faʻahinga vāhenga-ngāue pē. Faifai atu pē ʻo ma mali. Naʻá ku fiefia lahi ʻi he haʻu ʻa e fineʻeikí mo e tangataʻeikí pea mo e ngaahi kāingá ki heʻema malí.

Taimi nounou mei he lolotonga ʻema ngāue ko ha tāimuʻa tuʻumaʻú, naʻe fakanofo ʻa Atushi  ko ha ʻovasia sēketi fetongi. Ki mui ai, naʻe vaheʻi kimaua ko ha ongo tāimuʻa makehe pea hoko atu leva ki he ngāue fakasēketí. ʻI he fuofua taimi naʻá ma ʻosiki ai ʻema ʻaʻahi holo ki he ngaahi fakatahaʻanga kotoa ʻi homa sēketí, naʻe telefoni mai ʻa e ʻōfisi vaʻá. Naʻa nau kole mai pe ʻokú ma loto-lelei ke hiki ʻo hokohoko atu ʻema ngāue sēketí ʻi Nepolo.

Naʻá ku hohaʻa ki he anga ʻo e ongoʻi ʻeku ongo mātuʻá fekauʻaki mo ʻeku hiki ki ha feituʻu mamaʻo ʻaupito. ʻI he taimi naʻá ku telefoni ai kia kinauá, ko e tali eni ʻeku tangataʻeikí, “Te ke ʻalu ki ha feituʻu fakaʻofoʻofa.” ʻI he uike ki muʻa aí, naʻe ʻoange ʻe he taha ʻo hono ngaahi kaumeʻá ha tohi fekauʻaki mo Nepolo pea naʻe fakakaukau ai ʻa e tangataʻeikí ko ha feituʻu fakaʻofoʻofa ia ke ʻeveʻeva ki ai.

Naʻá ma fiefia ke ʻi he haʻohaʻonga ʻo e kakai anga-fakakaumeʻa ʻo Nepoló. Ki mui ai, naʻe kau mai mo Pengikolotesi ki heʻema ngāue fakasēketí. Neongo ʻene ofi ki Nepoló naʻe kehe ʻaupito ia. Naʻá ma maʻu ʻa e ngaahi hokosia kehekehe ʻi he ngāue fakamalangá. ʻI he ʻosi ʻa e taʻu ʻe nima, naʻe vaheʻi ai ke ma toe foki ki Siapani, ʻa ia ʻokú ma fiefia ai ʻi he ngāue fakasēketí he ʻahó ni.

Naʻe lahi ʻa e meʻa naʻá ku ako fekauʻaki mo Sihová lolotonga ʻa e ngāue ʻi Siapani, Nepolo mo Pengikolotesi. Ko e kakai ʻi he ngaahi fonua ko ení ʻoku kehekehe honau anga fakafonuá mo e tōʻongá. Pea ʻoku makehe ʻa e tokotaha taki taha. Kuó u sio ʻi he anga hono tokangaʻi fakafoʻituitui ʻe Sihova ʻa e kakaí, talitali kinautolu, tokoniʻi mo tāpuakiʻi kinautolu.

ʻOku lahi ʻaupito ʻa e ngaahi meʻa ke u fakamālō ai kia Sihová. Kuó ne fakaʻatā au ke u ʻiloʻi ia mo fai ʻene ngāué pea kuó ne ʻomai kiate au ha husepāniti Kalisitiane fakaʻofoʻofa. Kuo tokoniʻi au ʻe he ʻOtuá ke u fai ʻa e ngaahi fili leleí, pea ʻi he taimí ni kuó u maʻu ai ha vahaʻangatae lelei mo ia mo hoku fāmilí. ʻOku ou fakamālō kia Sihova ʻi heʻeku toe kaumeʻa lelei mo e fineʻeikí. ʻOku ou houngaʻia loloto ʻi heʻeku maʻu ʻa e melino mo e ʻOtuá mo ʻeku fineʻeikí.