Taaʻi ʻe ha Fakatamaki ʻa e ʻOtu Motu Solomoné

ʻI he Mōnite, ʻEpeleli 2, 2007, ko ha mofuike ko hono mālohí ko e 8.1 naʻá ne luluʻi ʻa e ngaahi feituʻu ʻo e ʻOtu Motu Solomoné, ko ha fanga kiʻi ʻotu motu māfana ʻi he tokelau-hahake ʻo ʻAositelēliá. ʻI ha laui miniti, naʻe laiki ai ʻe ha fuʻu vai, ʻoku fakamatala ʻo pehē naʻe mita ʻe 10 ʻa hono māʻolungá ʻa e ʻotu motu ʻi he Vahefonua Hihifó, ʻo mate ai ʻa e kakai ʻe toko 52 pea iku ai ʻa e toko 6,000 ʻo ʻikai ha ʻapi ke nau nofo ai.

Naʻe kau ʻi he feituʻu naʻe uesia lahi tahá ʻa Gizo, ko ha kolo matāfonua ʻo e kakai ʻe toko 7,000 nai ʻi he Motu ko Ghizo, ʻoku kilomita pē ʻe 45 mei he uhouhonga ʻo e mofuiké. Naʻe hanga atu ha kiʻi fakatahaʻanga ʻa e Kau Fakamoʻoni ʻa Sihová ʻi Gizo ke kātoangaʻi ʻa e Fakamanatu fakataʻu ʻo e pekia ʻa Sīsuú ʻi he efiafi ko iá. (1 Kolinito 11:23–26) Naʻe kamata anga-maheni pē ʻa e ʻahó ʻi he hopo fakaholomamata ʻa e laʻaá pea nonga mo e tahí. Pea ʻi he 7:39 pongipongi leva, naʻe hoko ai ʻa e mofuiké.

Mofuike!

Ko Ron Parkinson, ko ha mātuʻa ʻi ha fakatahaʻanga, mo hono uaifí ko Dorothy, naʻá na teuteu ʻa e kai pongipongí ʻi he taimi naʻe hoko ai ʻa e mofuiké. “Naʻe sēlue homa motuʻi falé ʻo hangē ha fuʻu niú ka naʻe kei tuʻu pē,” ko e lau ia ʻa Ron. “Ko e longoaʻá naʻe ʻikai kei ongo telinga. Ko e ʻū kōpaté, naunau falé, ʻū meʻa ngaahi kaí, ko ha fuʻu piano, mo e ngaahi meʻa kehe naʻe ala ngaué naʻe haʻaki ki he falikí. Naʻá ma feinga lahi ʻo hū ki tuʻa. Naʻe mahifi e vaʻe ʻo Dorothy ʻi ha konga sioʻata.”

Ko e ongo misinale ko Tony mo Christine Shaw, ʻa ia ʻokú na nofo ofi ai, naʻá na toe fakavave mo kinaua ki tuʻa. “Naʻe ngalulu lahi fakaʻulia ʻa e kelekelé ʻou tō ki lalo pea ʻikai lava ke u tuʻu hake,” ko e lau ia ʻa Christine. “ʻI he tafaʻaki ki tahí, naʻe tētē mai ai ʻa e ngaahi falé ʻi he vaí. Naʻe taʻaki ʻe ha fuʻu tuʻoni peau ʻa e ngaahi falé mei honau tuʻuʻangá. Naʻe ʻaʻalo fāivavale holo ʻa e kakaí ʻi he fanga kiʻi vaka ʻi he lotolotonga ʻo e ngaahi fale kuo moveté ʻi heʻenau kumi ki ha faʻahinga ʻoku moʻui. Naʻe toe hoko leva ai ha fuʻu mofuike ʻe taha—pea toe hoko mai mo e taha. Naʻe hokohoko atu ʻa e mofuiké ʻi he ʻaho ʻe nima. He meʻa fakalilifu moʻoni ia!”

Hoko Mai Leva ʻa e Peau Kula

Ko Patson Baea naʻá ne ʻi hono ʻapí ʻi he motu ko Sepo Hite, ʻoku kilomita ʻe ono nai mei Gizo, ʻi he taimi naʻe patō ai ʻa e mofuiké. Naʻe fēfē ʻa Patson mo hono fāmilí lolotonga ʻa e fakatamakí?

Ko e manatu eni ʻa Patson ki he meʻa fakamamahi naʻe hokó: “Naʻá ku lele ʻi he veʻe matātahí ki hoku uaifí ko Naomi mo ʻema fānau ʻe toko fā. Ne nau tō ki lalo ka naʻa nau hao pē. Naʻe tetetete ʻa e fānaú, pea fetāngihi ʻa e niʻihi. Naʻá ku hanga leva mo Naomi ʻo fakafiemālieʻi kinautolu.

“Naʻá ku fakatokangaʻi naʻe ngaue anga-kehe ʻa e tahí. Ne hā mahino ʻe hoko ha peau kula. Ko homau kiʻi motú naʻe hangehangē ka ngotó. Ko ʻeku faʻeé, ko Evalyn, ʻa ia naʻe nofo ʻi ha kiʻi motu ofi mai, naʻá ne toe ʻi he tuʻunga fakatuʻutāmaki. Naʻá ku fekauʻi fakavave homau fāmilí ke mau heka ki heʻemau vaka mīsini ʻo mau ō ke fakahaofi ia.”

 “ʻI heʻemau mavahe siʻí atu pē, naʻe ʻalu hake ha fuʻu foʻi peau lahi ʻi lalo ʻi heʻemau vaká. Naʻe hou lahi ʻaupito ʻa e tahí. ʻI heʻemau aʻu atu ki heʻeku faʻeé, naʻá ne moʻutāfuʻua mo puputuʻu pea fuʻu ilifia ke haʻu ki tahi. Naʻe tūʻulu hifo ʻa Naomi mo homa foha taʻu 15 ko Jeremy ki tahi ʻa ia naʻe mālohi ai ʻa e ʻaú ʻo tokoniʻi ia ke ne kakau mai ki he vaká. ʻI hono tuku hake leva ki he ʻosi tahá ʻa e mīsiní, naʻa mau lele ki he moaná.

“ʻI he taimi ko ení naʻe matuku hifo ʻa e tahí ki ha tuʻunga mamaha taʻehanotatau, ʻo eʻa mai ai ʻa e ngaahi hakau takatakai ʻi he motú. Fakafokifā pē, naʻe vilo atu ha fuʻu peau lahi faufaua, ʻo lōmakiʻi fakatouʻosi ʻa e ongo motú. Ko homau fale nofo totongi ʻi he matātahí naʻe taʻaki mei hono tuʻuʻangá ʻo laiki ʻo aʻu ki he taʻeʻaongá. Naʻe hū e vaí ʻi homau fale nofoʻangá, ʻo maumauʻi ʻemau ngaahi ngaʻotoʻotá. ʻI he holo hifo ʻa e tahí, naʻa mau tufi ʻa e ngaahi Tohi Tapú mo e ʻū tohi hivá mei homau fale kuo havekí pea mau ō ki Gizo.”

Naʻe lahi e meʻa naʻe ʻauha ʻi he matāfonuá pea mo e kakai naʻe maté. Ko e tafaʻaki fakahihifo ʻo e Motu ko Ghizo naʻe maumau lahi tahá. Naʻe tafiʻi ʻa e fanga kiʻi kolo ʻikai siʻi hifo he 13 ʻe ha vai ʻoku līpooti ʻo pehē naʻe mita ʻe 5 hono māʻolungá!

ʻI he pō ko iá, naʻe fakatahataha ai ʻa e toko 22 ʻi he Fale Fakatahaʻanga ʻo e Kau Fakamoʻoni ʻa Sihova ʻi Gizo ke kātoangaʻi ʻa e Fakamanatu ʻo e pekia ʻa Sīsuú. Ko e meʻa fakafiefiá, naʻe ʻikai ha taha ʻi he faʻahinga ko ení ʻe lavea lahi ʻi he fakatamakí. “Naʻe ʻikai ha ʻuhila, pea naʻe maumau ʻemau maama kalasiní,” ko e lau ia ʻa Ron, naʻe lave ki ai ki muʻá. “Ko ia naʻe fai ai ʻe Tokoua Shaw ʻa e malangá ʻaki ha kasa. ʻI he fakapoʻulí, naʻa mau hiva leʻo-lahi fakafaʻafaʻahi ai ʻi he fakamālō kia Sihová.”

Ngāue Tokoni

ʻI he taimi naʻe aʻu ai ʻa e ongoongo fekauʻaki mo e fakatamakí ki Honialá, ʻa e kolomuʻa ʻo e fonuá, naʻe fakavave ʻa e ʻōfisi vaʻa ʻo e Kau Fakamoʻoni ʻa Sihová ʻo tokonaki ʻa e tokoni fakavavevave. Naʻe vave ʻa e ngaahi tā telefoni ke fakapapauʻi ʻoku malu ʻa e tokolahi taha ʻo e Kau Fakamoʻoní ʻi he ngaahi feituʻu naʻe uesiá. Naʻe fekau atu ha faʻahinga falalaʻanga ke nau kumi ki ha Fakamoʻoni naʻe nofo mamaʻo ʻi he Motu ko Choiseul. Naʻe faifai pē ʻo maʻu atu ʻokú ne malu mo ʻi he tuʻunga lelei. Naʻe toe ʻave ʻa e paʻanga ki Gizo ke fakatau mai ʻaki ʻa e ngaahi meʻa naʻe fiemaʻu fakavavevavé.

Naʻe tūʻuta ʻi Gizo ha ongo fakafofonga mei he vaʻá ʻi he Tuʻapulelulú ʻi he ʻuluaki puna naʻe fai ki aí. “Naʻá ma haʻu mo e ngaahi puha ʻo e koloa tokoni,” ko e fakamatala ia ʻa Craig Tucker, ko ha mēmipa ʻo e Kōmiti Vaʻá. “Ko e kau pāsese kehé naʻe tuku ʻenau utá koeʻuhi ko e fakangatangata ʻa e mamafa ʻo e utá, ka naʻá ma fiefia ʻi he aʻu lelei kotoa mai ʻema ʻū puhá. Naʻe kau ia ʻi he ngaahi fuofua uta tokoni ke aʻu ki he feituʻu fakatamakí. Naʻe aʻu mai ha toe ngaahi meʻangāue ʻi he ʻaho ʻe ua ki mui ai ʻi he vaka tahí.”

ʻI he taimi ko ení, naʻe ʻalu vaka ai ʻi he houa ʻe ua ʻa Tony Shaw mo Patson Baea, fakataha mo e Kau Fakamoʻoni kehe mei Gizo ke tokoniʻi ʻa e Kau Fakamoʻoni naʻe nofo mavahe ʻi he motu ko Ranongga. Naʻe hikiʻi ʻe he mālohi ʻo e mofuiké ʻa e kiʻi motú ni, ʻa ia ʻoku kilomita ʻe 32 hono lōloá pea kilomita ʻe 8 hono fālahí, ʻi he māʻolunga ko e mita ʻe 2 mei he tahí! Ko e ngaue fakafokifā ʻa e tahi takatakai ʻi he kiʻi motú ʻoku hā mahino naʻe tupu mei ai ʻa e peau kula naʻá ne taaʻi ʻa e fanga kiʻi motu takatakaí.

“Naʻe fiefia lahi ʻa e kau mēmipa ʻo e fakatahaʻangá ʻi he sio mai kiate kimautolú,” ko e lau ia ʻa Tony. “Naʻa nau malu mo hao ʻo nau nofo ʻi tuʻa koeʻuhi ko e ilifia naʻa toe hoko ha mofuike. Ko homau vaká ʻa e fuofua vaka tokoní. Ki muʻa ke mau mavahé, naʻa mau kau fakataha ʻi ha lotu loto-moʻoni ʻo fakamālō kia Sihova.”

ʻOku pehē ʻe Patson: “ʻI ha ngaahi ʻaho ki mui ai, naʻa mau toe foki ki Ranongga ke ʻave ha toe ngaahi tokoni pea ke kumi ki ha fāmili Fakamoʻoni naʻa nau nofo mamaʻo ʻi he ngataʻanga ʻo e motú. Naʻe faifai pē ʻo mau maʻu ʻa Matthew Itu mo hono fāmilí ʻoku nau kemi mamaʻo ʻi he loto vaó. Naʻa nau fakatō loʻimata fiefia, ʻi he ʻiloʻi ne ʻikai ngalo kinautolú! Naʻe fakaʻauha ʻe he mofuiké ʻa honau ʻapí fakataha mo e meimei fale kotoa pē ʻi honau koló. Kae kehe, ko e meʻa tefito naʻa nau tokanga ki aí ke fetongi taki taha ʻenau ngaahi Tohi Tapú, ʻa ia naʻe mole ʻi he fakatamakí.”

Fakaongoongolelei mei he Kakaí

Ko e ʻofa faka-Kalisitiane peheé naʻe ʻikai ke taʻefakatokangaʻi ia ʻe he niʻihi kehé. “Ko e faiongoongo ʻe taha ʻa ia naʻe fakaanga ki he ngāue  tokoni fakafeituʻú naʻá ne ʻohovale pea maongo kiate ia ʻene ʻilo naʻe tokonaki ʻe he Kau Fakamoʻoni ʻa Sihová ki honau kau mēmipá ʻa e meʻakai, tapoleni, mo e ngaahi meʻa kehe naʻe fiemaʻú ʻi ha ngaahi ʻaho siʻi pē mei he mofuiké,” ko e lau ia ʻa Craig Tucker. “Ko e kakai ʻi he kolo ko Ranongga naʻa nau fakaongoongoleleiʻi ʻa e vave ʻo ʻemau ngāue tokoní pea lāunga ʻi he siʻi ʻa e tokoni mei honau siasí tonu,” ko e hoko atu ia e fakamatala ʻa Patson. Naʻe fakahaaʻi ʻe he fefine ʻe taha, “Naʻe vave ʻaupito ʻa e tokoni ʻa hoʻomou kautahá!”

Naʻe toe ala atu ʻa e Kau Fakamoʻoní ʻo tokoniʻi ʻa honau ngaahi kaungāʻapí. “Lolotonga ʻa e ʻaʻahi ki he falemahaki fakataimi ʻi Gizo, naʻá ma sio ai ki ha ongo meʻa naʻa mau fetaulaki ʻi ha ngaahi ʻaho siʻi ki muʻa,” ko e fakamatala ia ʻa Christine Shaw. “Naʻá na fakatou kafo mo lavea lahi. Ko e mokopuna ʻo e fefiné naʻe homo meiate ia ʻi he peau kulá ʻo ne melemo. Naʻá ma foki fakavave ki ʻapi ʻo ʻomai kiate kinaua ʻa e meʻakai mo e vala naʻe fiemaʻú. Naʻá na houngaʻia ʻaupito.”

Ko e moʻoni, ko e faʻahinga ʻoku maʻukovia ʻe he ngaahi fakatamaki fakanatulá ʻoku nau fiemaʻu ʻa e meʻa lahi ange ʻi he tokoni fakamatelié pē. ʻOku nau fiemaʻu tautefito ʻa e fakafiemālie ʻa ia ko e Folofola pē ʻa e ʻOtuá, ʻa e Tohi Tapú ʻe lava ke ne ʻomaí. “Ko e kau faifekau ʻe niʻihi ʻi he ngaahi lotú naʻa nau pehē ko hono tauteaʻi ia ʻe he ʻOtuá ʻa e kakaí koeʻuhi ko ʻenau ngaahi angahalá,” ko e lau ia ʻa Ron. “Ka naʻa mau fakahaaʻi kiate kinautolu mei he Tohi Tapú ko e ʻOtuá ʻoku ʻikai ʻaupito ko e tupuʻanga ia ʻo e koví. Naʻe fakamālō mai ʻa e tokolahi kiate kimautolu ʻi hono vahevahe ange kiate kinautolu ʻa e fakafiemālie fakalaumālie ko ení.”— 2 Kolinito 1:3, 4; Semisi 1:13. a

[Fakamatala ʻi lalo]

[Taiakalami/Mape ʻi he peesi 13]

(Ki he konga tohi kuo fokotuʻu kakato, sio ki he tohi)

Choiseul

Ghizo

Gizo

Ranongga

HONIALA

ʻAOSITELĒLIA

[Fakatātā ʻi he peesi 15]

Fāmili ʻo Baea ʻi heʻenau vaka mīsiní

[Fakatātā ʻi he peesi 15]

Maumau mei he peau kulá ʻi Gizo

[Fakatātā ʻi he peesi 15]

Ko e Fale Fakatahaʻanga ko ení ʻa e fale pē taha naʻe kei tuʻu ʻi Lale ʻi he Motu ko Ranongga