Faingata‘a ‘Oku Iku ki he ‘Amanaki

“Ka hokosia ‘a e kuonga fakamui, ‘e ai ha ngaahi taimi faingata‘a.”—2 TIMOTE 3:1.

KUÓ KE fanongo—pe sio tonu—‘i ha taha ‘o e ngaahi me‘a fakamamahi ko ení?

● Ko ha mahaki fakatupu mate ‘okú ne to‘o ‘a e mo‘ui ‘a e tokolahi.

● Ko ha honge ‘okú ne ‘ave ki fa‘itoka ‘a e lauingeau.

● Ko ha mofuike ‘okú ne tāmate‘i ‘a e laui afe pea mole ai ‘a e ‘api ‘o e tokolahi.

‘I he ngaahi peesi hokó, te ke vakai ai ki ha ngaahi mo‘oni‘i me‘a te ke fakakaukau fakamātoato ai fekau‘aki mo e ngaahi me‘a ‘oku hoko hangē ko ení. Te ke toe ‘ilo‘i ai na‘e tomu‘a tala ‘e he Tohi Tapú ‘e hoko ‘a e ngaahi tu‘unga peheé ‘i he vaha‘a taimi ‘oku ui ko e “kuonga fakamui.”

Kae kehe, ko e taumu‘a ‘o e ngaahi kupu ko ení, ‘oku ‘ikai ko e ‘aí ke fakatuipau‘i koe ‘oku tau mo‘ui ‘i ha māmani faingata‘a. Ngalingali kuó ke sio tonu ‘i he faingata‘a ko ení. ‘I hono kehé, ‘oku fa‘ufa‘u iá ke ‘oatu ai kiate koe ‘a e ‘amanaki. ‘E fakahaa‘i atu ai ko e fakahoko ‘o e kikite ko eni ‘e onó ‘oku ‘uhinga iá kuo vavé ni ke ngata ‘a e “kuonga fakamui.” ‘E toe lāulea ‘i he kupu hokohoko ko ení ki ha ngaahi fakafepaki anga-maheni ki he fakamo‘oni ko ení pea ‘e ‘omai ai ‘a e ‘uhinga lelei ke tui ‘oku toka mai pē mei mu‘a ha me‘a ‘oku lelei ange.