Ako mei he Folofola ʻa e ʻOtuá

ʻE Lava Fēfē Ke Tau Fili ha Ngaahi Kaumeʻa Lelei?

ʻOku lāulea ʻa e kupu ko ení ki he ngaahi fehuʻi kuó ke ʻohake nai pea fakahaaʻi ai ʻa e feituʻu ʻe lava ke ke lau ai ʻa e ngaahi talí ʻi hoʻo Tohi Tapú. ʻE fiefia ʻa e Kau Fakamoʻoni ʻa Sihová ke fetalanoaʻaki mo koe ki he ngaahi tali ko ení.

1. Ko e hā ʻoku totonu ai ke tau filifili fakalelei ʻa e ngaahi kaumeʻá?

Ko e tokolahi taha ʻo e kakaí ʻoku nau saiʻia ke tali kinautolu ʻe he niʻihi kehé. Ko e holi ko ení ʻoku faʻa ʻai ai ke tau faʻifaʻitaki ki he faʻahinga takatakai ʻia kitautolú. Ko ia ko hotau ngaahi kaumeʻá ʻoku nau tākiekina mālohi ʻa e ngaahi fakakaukau ʻoku tupu ʻi hotau lotó. Ko ia ai, ko ʻetau fili ʻo e ngaahi kaumeʻá ʻe lava ke ne tākiekina ʻa e faʻahinga tokotaha te tau hoko ki aí.—Lau ʻa e Palōveepi 4:23; 13:20.

Ko e tokotaha-hiki Tohi Tapu fakamānavaʻi ko Tēvitá naʻá ne filifili fakapotopoto hono ngaahi kaumeʻá. Naʻá ne feohi mo e faʻahinga ko ia naʻa nau tokoniʻi ia ke tauhi maʻu ʻene anga-tonú ʻi he tuʻunga ko ha sevāniti ʻa e ʻOtuá. (Saame 26:4, 5, 11, 12) Ko e fakatātaá, naʻe fiefia ʻa Tēvita he kaumeʻa mo Sionatané koeʻuhi naʻe fakalototoʻaʻi ia ʻe Sionatane ke ne falala kia Sihova.—Lau ʻa e 1 Sāmiuela 23:16-18.

2. ʻE lava fēfē ke ke hoko ko e kaumeʻa ʻo e ʻOtuá?

Neongo ko Sihová ʻoku māfimafi-aoniu, ʻe lava ke tau hoko moʻoni ko hono ngaahi kaumeʻa. Ko e fakatātaá, naʻe hoko ʻa ʻĒpalahame ko ha kaumeʻa ʻo e ʻOtuá. Naʻe falala mo talangofua ʻa ʻĒpalahame kia Sihova, ko ia naʻe vakai ʻa Sihova kiate ia ko hano kaumeʻa. (Sēnesi 22:2, 9-12; Sēmisi 2:21-23) Kapau ʻoku tau falala kia Sihova pea fai ʻa e meʻa ʻokú ne fiemaʻu mai ke tau faí, ʻe lava foki ai ke tau hoko ko e ngaahi kaumeʻa ʻo e ʻOtuá.—Lau ʻa e Saame 15:1, 2.

 3. ʻE lava fēfē ke ke maʻu ʻaonga mei he ngaahi kaumeʻa leleí?

Ko e ngaahi kaumeʻa leleí ʻoku nau mateaki pea tokoniʻi koe ke ke fai ʻa e meʻa ʻoku totonú. (Palōveepi 17:17; 18:24) Ko e fakatātaá, neongo naʻe motuʻa ʻaki ʻe Sionatane ʻia Tēvita e taʻu ʻe 30 nai pea ʻe totonu ke ne ʻea ki he taloni ʻo ʻIsilelí, naʻá ne poupou mateaki kia Tēvita ʻi hono tuʻunga ko e tokotaha kuo fili ʻe he ʻOtuá ke hoko ko e tuʻí. Ko e ngaahi kaumeʻa moʻoní ʻoku nau maʻu ʻa e loto-toʻa ke fakatonutonuʻi koe kapau ʻoku nau sio atu ʻokú ke tōʻonga fakavalevale. (Saame 141:5) Ko e ngaahi kaumeʻa ʻoku ʻofa ki he ʻOtuá te nau tokoniʻi koe ke ke fakatupulekina ʻa e ngaahi tōʻonga lelei.—Lau ʻa e 1 Kolinitō 15:33.

ʻE lava ke ke feʻiloaki mo e kakai ʻoku nau kau fakataha ʻi hoʻo ʻofa ki he meʻa ʻoku totonú ʻi he Fale Fakatahaʻanga ʻo e Kau Fakamoʻoni ʻa Sihová. Te ke maʻu ai ʻa e ngaahi kaumeʻa te nau fakalototoʻaʻi koe ʻi hoʻo ngaahi feinga ke fakahōifuaʻi ʻa e ʻOtuá.—Lau ʻa e Hepelū 10:24, 25.

Kae kehe, naʻa mo e ngaahi kaumeʻa ʻoku ʻofa ki he ʻOtuá te nau ʻai nai he taimi ʻe niʻihi ke siva ʻetau ʻamanakí. ʻOua ʻe ʻitangofua ʻi heʻenau ngaahi fehālākí. (Koheleti 7:9, 20-22) Manatuʻi, ʻoku ʻikai ha kaumeʻa ʻe haohaoa pea ko e ngaahi kaumeʻa ʻoku nau ʻofa ki he ʻOtuá ʻoku nau mahuʻinga kia kitautolu. ʻOku fakaʻaiʻai kitautolu ʻe he Folofola ʻa e ʻOtuá ke tau tukunoaʻi e ngaahi hala ʻa hotau ngaahi kaungā-Kalisitiané.—Lau ʻa e Kolose 3:13.

4. Fēfē kapau ʻoku fakafepakiʻi koe ʻe he “ngaahi kaumeʻá”?

ʻOku ʻiloʻi ʻe he kakai tokolahi ko e taimi ko ē ʻoku nau kamata maʻu ai ʻa e tokoni ke mahinoʻi ʻa e Folofola ʻa e ʻOtuá, ʻoku fakafepakiʻi kinautolu ʻe he niʻihi ʻo honau ngaahi kaumeʻa ki muʻá. Mahalo pē ko e ngaahi kaumeʻa ko iá ʻoku ʻikai te nau mahinoʻi ʻa e akonaki ʻaonga pe ko e ʻamanaki papau kuó ke maʻu ʻi he Tohi Tapú. Mahalo pē ʻe lava ke ke tokoniʻi kinautolu.—Lau ʻa e Kolose 4:6.

ʻI he ngaahi tuʻunga kehé, ʻe manukiʻi nai ʻe he “ngaahi kaumeʻá” ʻa e ongoongo lelei ʻoku ʻomai ʻi he Folofola ʻa e ʻOtuá. (2 Pita 3:3, 4) ʻE manukiʻi nai ʻe he niʻihi hoʻo ngaahi feinga ke fai ʻa e meʻa ʻoku totonú. (1 Pita 4:4) Kapau ʻe hoko ia kiate koe, ʻe pau nai ke ke fili pe ko e hoko ko honau kaumeʻa pe ko e hoko ko e kaumeʻa ʻo e ʻOtuá. Kapau te ke fili ke hoko ko ha kaumeʻa ʻo e ʻOtuá, kuó ke fili ai ʻa e kaumeʻa lelei taha ʻe lava ke maʻu ʻe ha taha pē.—Lau ʻa e Sēmisi 4:4, 8.

Ki ha fakamatala lahi ange, sio ki he vahe 12 mo e 19 ʻo e tohi ko ení, Ko e Hā ʻOku Lava ke Akoʻi Mai ʻe he Tohi Tapú?, ko e pulusi ʻe he Kau Fakamoʻoni ʻa Sihová.