SIOLOTO ATU ʻoku ʻi ai hao kaumeʻa ʻokú ke saiʻia lahi ai, ka ʻokú ne fai ha meʻa ʻoku ʻikai malava ke ke mahinoʻi. ʻOku fakaangaʻi ʻe he niʻihi ʻene tōʻongá pea fakamāuʻi ʻene fakaueʻilotó, ʻo pehē ko ho kaumeʻá ʻoku anga-fakamamahi. ʻE vave ke ke loto-tatau mo kinautolu, pe te ke tatali ke fanongo ki he meʻa ʻe leaʻaki ʻe ho kaumeʻá? Kapau naʻe ʻikai te ne ʻi ai ke fai ha fakamatala, te ke hoko ʻo anga-kātaki, ʻo ʻoange hano faingamālie?

Ki muʻa ke ke fai ha talí, te ke loto nai ke ʻilo ha meʻa lahi ange. Te ke ʻeke nai, ‘ʻOku lelei fēfē ʻeku ʻilo ki he kaumeʻa ko ení, pea ko e hā ʻa e makatuʻunga ʻoku ou maʻu ke saiʻia ai aí?’ Sai pē ia. Kae fakakaukau: ʻIkai ʻe lava ke tau ngāueʻaki ʻa e tefitoʻi moʻoni tatau ki he fehuʻi ko eni pe ʻoku anga-fakamamahi ʻa e ʻOtuá?

ʻE faingataʻa nai kia koe ke mahinoʻi ʻa e niʻihi ʻo e meʻa kuo fai ʻe he ʻOtuá, pe ʻokú ke puputuʻu nai ʻi ha meʻa kuó ne fakaʻatā ke hoko. ʻOku tokolahi ʻa e kakai te nau tala atu kiate koe ʻoku anga-fakamamahi ʻa e ʻOtuá pea te nau fakaʻaiʻai koe ke fakamāuʻi ʻene ngaahi fakaueʻilotó ʻo hangē ko kinautolú. Te ke ʻoange ha faingamālie kiate ia kae ʻoua kuó ke ʻilo ha meʻa lahi ange? ʻOku fakatuʻunga nai ʻa e talí ʻi he lelei hoʻo ʻiloʻi ʻa e ʻOtuá. ʻEke hifo kiate koe, ‘Kuo anga-fēfē ʻa e fakafeangai mai ʻa e ʻOtuá kiate au ko ha kaumeʻá?’

Kapau ʻoku faingataʻaʻia hoʻo moʻuí, ʻe fakataueleʻi nai koe ke ke pehē kuo ʻikai ʻaupito hoko ʻa e ʻOtuá ko ha kaumeʻa. Kae fakakaukau angé. Te ke tukuakiʻi ʻa e ʻOtuá ki he ngaahi faingataʻa ʻi hoʻo moʻuí—pe ki he ngaahi tāpuakí? Hangē ko ia kuo tau vakai ki aí, ko Sētané “ko e pule ʻo e māmani ko ení,” kae ʻikai ko Sihova. (Sione 12:31) Ko Sētane ia ʻoku tuʻu mei mui ʻi he lahi taha ʻo e mamahi mo e fakamaau taʻetotonu ʻi he māmani ko ení. Pea ʻikai te ke loto-tatau ko ʻetau taʻehaohaoá tonu mo e ngaahi tuʻunga feliliuakí ʻokú na fakatupunga ʻa e lahi ʻo ʻetau ngaahi palopalemá?

ʻI he tafaʻaki ʻe tahá, ko e hā kuo fakatupunga ʻe he ʻOtuá? Fakakaukau angé ki he meʻa ʻoku leaʻaki ʻe he Tohi Tapú: ko e ʻOtuá ʻokú ne “ngaohi ʻa e langi mo e fonua”; ko ʻene ngāué ʻoku kau ai hotau sino fakamatelié, ʻa ia ko e “koto fakaofo pe”; pea ko Sihová “ko e ʻOtua ʻoku ʻi hono nima hoʻo manava.” (Saame 124:8; 139:14; Taniela 5:23) ʻOku ʻuhinga kotoa eni ki he hā?

ʻOku ʻuhinga iá ʻoku tau moʻuaʻaki ʻetau mānavá kotoa, ʻetau ʻi aí, ki hotau Tokotaha-Fakatupú. (Ngāue 17:28) ʻOku ʻuhingá ko e meʻaʻofa ʻo e moʻuí, ko e fakaʻofoʻofa ʻo e māmani takatakai kia kitautolú, ko e fakalata ʻo e ʻofá mo e ngaahi kaungāmeʻá, ko e fiefia ʻi he ʻahiʻahi, ala, ongo, mo e nanamú—ko e ngaahi meʻaʻofá ni kotoa mei he ʻOtuá. (Sēmisi 1:17) ʻIkai te ke loto-tatau ko e ngaahi tāpuaki ko iá ʻoku ʻai ai ia ko ha Kaumeʻa ʻoku taau mo ʻetau fakaʻapaʻapá mo e falalá?

Ko hono moʻoní, ʻe faingataʻa nai kia koe ke falala ki he ʻOtuá. Mahalo ʻokú ke ongoʻi kuo teʻeki ai ke fuʻu feʻunga hoʻo ʻiloʻi iá ke ke falala ai kiate ia. Pea ʻoku ala mahinoʻi ia. ʻI he ngaahi kupu nounou ko ení, ʻoku ʻikai lava ke tau fakamatalaʻi kotoa ʻa e ngaahi ʻuhinga ʻoku fakamāuʻi ai ʻe he niʻihi ʻa e ʻOtuá ʻoku anga-fakamamahí. Kae ʻikai ʻe tuha ke fai ha feinga ke ʻiloʻi lelei ange ʻa e ʻOtuá? * ʻOku mau falala-pau ʻi hoʻo fai peheé, te ke ʻiloʻi ai ʻa e moʻoni fekauʻaki mo e ʻOtuá. ʻOkú ne anga-fakamamahi? ʻIkai ʻaupito: “Ko e ʻOtuá ko e ʻofa.”—1 Sione 4:8.