Ko Saimita, * ko ha fefine taʻu 35 ʻi Dhaka, Pengikolotesi, naʻe ʻiloa ia ko ha tokotaha ʻofa mo anga-lelei. Naʻe ʻiloʻi ia ʻe he kakaí ko ha uaifi kei siʻi ngāue mālohi mo fiefia pea loto ke ne tokoniʻi ʻa e niʻihi kehé ʻo kau ki he meʻa naʻá ne ako fekauʻaki mo e ʻOtuá. He ʻohovale ē ko hono fāmilí mo hono ngaahi kaumeʻá ʻi he taimi naʻe puke fakafokifā ai ʻa Saimita pea mate pē ʻi he teʻeki ke ʻosi ha uike!

Ko Sēmisi mo hono uaifí, ko ha ongo meʻa mali kei siʻi ʻi hona taʻu 30 tupú, naʻá na maʻu ʻa e tuʻunga meimei tatau mo Saimita. ʻI he taimi failau ʻe taha, naʻa na ō ai ke ʻaʻahi ki hona ngaahi kaumeʻá ʻi he matāfonua hihifo ʻo e ʻIunaite Seteté. Naʻe ʻikai ʻaupito ke na toe foki ki hona ʻapi ʻi Niu ʻIoké. Lolotonga ʻena kei fonongá, naʻá na mate ʻi ha fakatuʻutāmaki ʻi ha meʻalele, pea naʻe hoko ia ko ha mole lahi ki hona ngaahi ʻofaʻangá mo e ngaahi kaungāngāué.

ʻOku ʻikai fiemaʻu ia ke toe vakai holo ki he fulikivanú mo e faingataʻá he ʻoku hulu fau ia ʻi he ʻahó ni. ʻI he taú ʻoku mate ai ʻa e kau siviliane pea pehē ki he kau sōtia. Ko e faihiá mo e fakamālohí ʻoku maʻukovia ai ʻa e kakai taʻehalaiá. Ko e ngaahi fakatuʻutāmaki fakatupu maté mo e ngaahi puke lahi fakasinó ʻoku hoko ia tatau ai pē pe ko e hā ʻa e taʻumotuʻa ʻo ha taha pe tuʻunga ʻi he moʻuí. Ko e ngaahi fakatamaki fakanatulá ʻokú ne fakaʻauha tavale ʻa e kakaí. Ko e tomuʻa fehiʻá mo e fakamaau taʻetotonú ʻoku mafolalahia. Mahalo kuó ke hokosia tonu ha faingataʻa.

ʻOku anga-maheni pē ke ʻeke ʻa e ngaahi fehuʻi hangē ko ení:

• Ko e hā ʻoku hoko ai ʻa e ngaahi meʻa ʻoku koví ki he kakai leleí?

• ʻOku totonu ke tukuakiʻi ʻa e ʻOtuá ki he ngaahi meʻa ko iá?

• ʻOku hoko noa pē ʻa e ngaahi fakatamakí pe ko e tupu mei he ngaahi ngāue ʻa e tangatá?

• Ko e lao nai ʻa Karma *?

• Kapau ʻoku ʻi ai ha ʻOtua māfimafi-aoniu, ko e hā ʻoku ʻikai ai ke ne maluʻi ʻa e kakai leleí mei he faingataʻá?

• ʻE faifai ange pea tauʻatāina ʻa e moʻuí mei he fulikivanú mo e faingataʻá?

Ke tali ʻa e ngaahi fehuʻi ko iá, ʻoku fiemaʻu ke tau mahinoʻi ʻa e tali ki he ongo fehuʻi tefito ko ení: Ko e hā hono ʻuhinga ʻoku hokolahia ai ʻa e ngaahi meʻa ʻoku koví, pea ko e hā ʻe fai ʻe he ʻOtuá?