ʻI he fanongo ki he ongoongo ʻi māmaní, ʻokú ke fakatokangaʻi nai ai ko e taimi ʻe niʻihi ko e ngaahi meʻa ʻoku koví ʻoku fai ia ʻe ha lotu. ʻOku ʻikai ko e tupuʻanga ʻo e ngaahi lotu kotoa pē mei he ʻOtua moʻoní. (Mātiu 7:15) Ko hono moʻoní, ko e tokolahi taha ʻo e tangatá kuo takihalaʻi.—Lau ʻa e 1 Sione 5:19.

Kae kehe, ʻoku ʻafioʻi ʻe he ʻOtuá ʻa e kakai loto-moʻoni ʻoku nau ʻofa ki he meʻa ʻoku lelei mo moʻoní. (Sione 4:23) ʻOku fakaafeʻi ʻe he ʻOtuá ʻa e kakai peheé ke nau ako ki he moʻoni mei heʻene Folofolá, ʻa e Tohi Tapú.—Lau ʻa e 1 Tīmote 2:3-5.

ʻOku fakafāʻūtahaʻi ʻe he ʻOtuá ʻa e kakaí mei he ngaahi puipuituʻa fakalotu kehekehe ʻi hono akoʻi kinautolu ʻaki ʻa e moʻoní mo akoʻi ke nau feʻofaʻaki. (Maika 4:2, 3) Ko ia, ʻoku lava ke ke fakatokangaʻi ʻa e faʻahinga ʻoku nau fai ʻa e ngaahi tōʻonga ʻo e lotu moʻoní ʻi he anga ʻo ʻenau fetokangaʻakí.—Lau ʻa e Sione 13:35.

Ko e kau lotu moʻoní ʻoku makatuʻunga ʻenau tuí mo ʻenau founga moʻuí ʻi he Tohi Tapú. (2 Tīmote 3:16) ʻOku nau toe fakalāngilangiʻi ʻa e huafa ʻo e ʻOtuá. (Saame 83:18) Pea ʻoku nau taukapoʻi ʻa e Puleʻanga ʻo e ʻOtuá ko e ʻamanaki pē ia ʻe taha ki he faʻahinga ʻo e tangatá. (Taniela 2:44) ʻOku nau faʻifaʻitaki kia Sīsū ʻaki ʻa e tuku ʻenau “māmá ke ulo,” atu ʻi he failelei ki honau ngaahi kaungāʻapí. (Mātiu 5:16) Ko ia ai, ko e kau Kalisitiane moʻoní ʻoku lava ke ʻiloʻi kinautolu ʻi heʻenau ngaahi ʻaʻahi fakakaumeʻa ki he ngaahi ʻapi ʻo e kakaí mo e taumuʻa ke vahevahe ʻa e ongoongo lelei ʻo e Puleʻanga ʻo e ʻOtuá.—Lau ʻa e Mātiu 24:14; Ngāue 5:42; 20:20.