KO E HĀ ʻa e faʻahinga maluʻanga ʻoku totonu ke tokonaki ʻe ha tangata ki hono uaifí? ʻOku ʻohake ʻa e kakai tokolahi ʻi he tui ko e taumuʻa tefito ʻa ha husepāniti ke tokoniʻi hono fāmilí ke nau maʻu ha maluʻanga fakapaʻanga. Kae kehe, ʻoku maʻu ʻe he ngaahi uaifi ʻe niʻihi ha ngaahi meʻa fakamatelie lahi ka ʻoku nau kei ongoʻi taʻemalu fakaeongo—pea aʻu ʻo feifeitamaki. Ko e fakatātaá, ʻoku pehē ʻe ha fefine Sipeini ko Rosa ʻo fekauʻaki mo e tangata naʻá ne mali mo iá, “ʻI he kakaí ko ha tangata anga-lelei ia, ka ʻi ʻapí ko e tangata anga-kovi.” ʻOku pehē ʻe Joy mei Naisīliá, “ʻI he taimi ʻoku ʻikai te u loto-tatau ai mo hoku husepānití, ʻokú ne pehē mai, ‘Kuo pau ke ke fai ʻa e meʻa kotoa ʻoku ou tala atú koeʻuhi ko ho husepānití au.’”

ʻE lava fēfē ke fakahoko ʻe ha tangata hono ngafa ko e husepānití ʻi he anga-ʻofa? Ko e hā ʻoku fiemaʻu ki ha husepāniti ke ʻai hono ʻapí ko ha maluʻanga, pe “maloloʻanga” ki hono uaifí?—Lute 1:9.

Neongo ʻoku maʻu ʻe he husepānití mo e uaifí ha tuʻunga tatau ʻi he vakai mai ʻa e ʻOtuá, ʻoku tala mai ʻi he Tohi Tapú ʻa e ngafa kehekehe ʻoku maʻu ʻe ha hoa mali ʻi he fāmilí. ʻOku pehē ʻi he Loma 7:2, ko ha fefine kuo mali ʻokú ne ʻi he malumalu ʻo e “lao ʻa hono husepānití.” Hangē pē ko hano fakanofo ʻe ha kautaha ha tokotaha ke ne tokangaʻi ʻenau ngaahi ngāué, ʻoku pehē pē hono fakanofo ʻe he ʻOtuá ʻa e husepānití ke hoko ko e ʻulu ki he uaifí. (1 Kolinitō 11:3) ʻOku totonu ke takimuʻa ʻa e ngaahi husepānití ʻi honau ngaahi fāmilí.

ʻI ho tuʻunga ko e husepāniti, ʻoku totonu ke fēfē hoʻo ngāueʻaki ʻa e mafai kuo ʻoatu ʻe he ʻOtuá? “Hokohoko atu hoʻomou ʻofa ki homou ngaahi uaifí,” ko e lau ia ʻa e Tohi Tapú, “ʻo hangē tofu pē ko e Kalaisí naʻá ne ʻofaʻi foki ʻa e fakatahaʻangá.” (ʻEfesō 5:25) ʻIo, neongo naʻe ʻikai ʻaupito mali ʻa Sīsū, ʻoku lava ʻe heʻene faʻifaʻitakiʻangá ʻo tokoniʻi koe ke ke hoko ko ha husepāniti lelei. Tau sio ange ki aí.

Naʻe feinga ʻa Sīsū ke fakaivifoʻou ʻa e niʻihi kehé mo fakamaʻamaʻa ʻenau kavengá. Naʻe talaʻofa ʻe Sīsū ki he faʻahinga kotoa naʻe lōmekina mo fakamafasiaʻi ʻe he ngaahi palopalema fakafoʻituituí: “Haʻu kiate au, . . . pea te u fakaivifoʻou kimoutolu.” (Mātiu 11:28, 29) Naʻá ne fakafiemālieʻi maʻu pē ʻenau ngaahi faingataʻaʻia fakasinó mo tokonaki kiate kinautolu ha tokoni fakalaumālie fakaivifoʻou. Tāneʻineʻi ke tohoakiʻi ʻa e tokolahi kia Sīsū, ʻi he tuipau te ne fakamaʻamaʻaʻi ʻenau ngaahi kavengá!

 Founga ʻe lava ke faʻifaʻitaki ʻa e ngaahi husepānití kia Sīsū. Kumi ki he ngaahi founga ke fakamaʻamaʻa ai ʻa e fatongia ho uaifí. ʻOku ongoʻi ʻa e ngaahi uaifi ʻe niʻihi ʻo hangē ko Rosa, ʻa ia naʻá ne hanu ʻo pehē: “ʻOku ʻikai haku mahuʻinga ka ko e sevāniti pē au hoku husepānití.” ʻI hono kehe mei he tangata ko Kweku, ʻa ia kuó ne maʻu ha nofo mali lelei, naʻá ne pehē: “ʻOku ou ʻeke maʻu pē ki hoku uaifí ha founga ʻe lava ke ma vahevahe ai ʻa e fatongiá. Koeʻuhi ko ʻeku ʻofa ʻiate iá, ʻoku ou tamuʻomuʻa maʻu pē ke tokoni kiate ia ʻi he ngaahi ngāue fakaʻapí.”

Naʻe fakaʻatuʻi mo kaungāongoʻi ʻa Sīsū. Naʻe faingataʻaʻia ha fefine masiva ʻi ha mahaki fakamamahi ʻo feʻunga mo e taʻu ʻe 12. ʻI heʻene fanongo fekauʻaki mo e mālohi fakaemana ʻa Sīsuú, “naʻá ne toutou pehē: ‘Kapau pē te u kiʻi ala ki hono kofu tuʻá, te u sai.’” Naʻá ne moʻoni. Naʻá ne fakaofiofi kia Sīsū ʻo ne ala ki he tapa hono kofú, pea naʻe fakamoʻui he taimi pē ko iá. Ko e niʻihi ʻo e kau mamatá, ngalingali naʻa nau fakaʻosiʻaki ko e fefine ko ení naʻe taʻetotonu ʻene fai peheé, ka naʻe ʻiloʻi ʻe Sīsū naʻe fuʻu faingataʻaʻia ʻa e fefiné. * Naʻe lea anga-ʻofa ange ʻa Sīsū: ‘ʻOfefine, kuó ke moʻui lelei mei ho mahaki fakamamahí.’ Naʻe ʻikai ngata pē ʻi he fakaʻehiʻehi ʻa Sīsū mei hono fakamaaʻi pe tafuluʻi ʻa e fefiné ka naʻá ne lāuʻilo ki hono puké. Naʻe fakahaaʻi leva ai ko ha tangata ia—ʻo e kaungāongoʻi.—Maʻake 5:25-34.

 Founga ʻe lava ke faʻifaʻitaki ʻa e ngaahi husepānití kia Sīsū. ʻI he taimi ʻoku ʻikai ongoʻi lelei ai ho uaifí, fakahāhā kiate ia ha tokanga makehe pea hoko ʻo anga-kātaki. Feinga ke vakai mei he anga ʻene fakakaukaú pea mahinoʻi ʻene ngaahi fakafeangaí. Ko e fakatātaá, ʻoku fakamatala ʻa Ricardo, “ʻI he taimi ʻoku ou ʻiloʻi ai ʻoku ʻitangofua hoku uaifí, ʻoku ou fai ha feinga makehe ke fakaʻehiʻehi mei hono leaʻaki ha ngaahi meʻa ʻe lava ke toe lahi ange ai ʻene ʻitá.”

Naʻe fetuʻutaki ʻa Sīsū mo ʻene kau ākongá. Naʻe talanoa ʻa Sīsū mo hono ngaahi kaumeʻá ki ha ngaahi meʻa lahi. Naʻá ne pehē: “Ko e ngaahi meʻa kotoa pē kuó u fanongo ai mei heʻeku Tamaí kuó u fakahaaʻi ia kiate kimoutolu.” (Sione 15:15) Ko e moʻoni naʻe loto ʻa Sīsū ʻi he taimi ʻe niʻihi ke nofo tokotaha ʻo fakalaulauloto mo lotu. Ka naʻá ne faʻa vahevahe ʻene ngaahi ongoʻi lolotó mo ʻene kau ākongá. ʻI he pō ki muʻa ke ne pekia ʻi hono fakahalaiaʻi ko ha tokotaha faihiá, naʻá ne tala kiate kinautolu ʻokú ne “mamahi lahi.” (Mātiu 26:38) Naʻa mo e taimi naʻe loto-mamahi ai ʻi he tōʻonga hono ngaahi kaumeʻá, naʻe ʻikai ʻaupito taʻofi ʻe Sīsū ʻene talanoa mo kinautolú.—Mātiu 26:40, 41.

Founga ʻe lava ke faʻifaʻitaki ʻa e ngaahi husepānití kia Sīsū. Talanoa—mo ho uaifí ki he anga hoʻo fakakaukaú mo hoʻo ongoʻí. ʻE lāunga nai ha fefine ʻi he ʻikai ha palopalema hono husepānití he talanoa mo e kakaí ka ʻi ʻapí ʻokú ne fakalongolongo maʻu pē. ʻI he tafaʻaki ʻe tahá, fakatokangaʻi ʻa e anga ʻo e ongoʻi ʻa Ana fekauʻaki mo e talanoa tauʻatāina kiate ia hono husepānití. “ʻOku ou ʻiloʻi ʻokú ne ʻofa moʻoni ʻiate au,” ʻokú ne toe pehē, “pea ʻoku ou ongoʻi ofi ange kiate ia.”

Talitekeʻi hono ngāueʻaki ʻa e fakalongolongó ko ha meʻatau ia ke tauteaʻi ho uaifí. ʻOku pehē ʻe ha fefine ʻe taha, “ʻI he taimi ʻoku ʻita ai hoku husepānití ʻiate aú, ʻokú ne fakalongolongoʻi au ʻi ha ngaahi ʻaho. ʻOkú ne ʻai ke u ongoʻi halaia mo taʻetokaʻi.” Kae kehe, ʻoku feinga ʻa Edwin ke faʻifaʻitaki ki he faʻifaʻitakiʻanga ʻa Sīsuú. “ʻI he taimi ʻoku ou ʻita aí, ʻoku ʻikai teu fakafeangai pē he taimi ko iá, ka ʻoku ou tali ki ha taimi lelei ke ma talanoa ai ki he palopalemá.”

Ko Joy naʻe lave ki ai ʻi he kamataʻangá, kuó ne sio ki he ngaahi liliu ʻi hono husepānití talu ʻene kamata ako ʻa e Tohi Tapú mo e Kau Fakamoʻoni ʻa Sihová. ʻOku pehē ʻe Joy, “Kuó ne hoko ʻo fakalakalaka mo feinga mālohi ʻi he faʻifaʻitaki kia Sīsū ke hoko ko ha husepāniti ʻoku anga-ʻofa angé.” ʻOku maʻu ʻaonga e laui miliona ʻo e ngaahi hoa mali mei he fakahinohino Fakatohitapu tatau. Te ke saiʻia ke kau fakataha mo kinautolu? ʻE lava ke ke kole ki ha taha ʻo e Kau Fakamoʻoni ʻa Sihová ki ha ako Tohi Tapu taʻetotongi.