Ki muʻa ke ke fai ha ngāue, ʻoku fakanatula nai ke ke fifili, ‘Ko e hā ʻene ʻaonga kiate aú?’ Neongo ia, ko ha siokita ia ke tau ʻeke eni fekauʻaki mo e lotú? ʻOku ʻikai ke pehē ia. ʻOku fakanatula pē ʻetau loto ke ʻilo pe ʻoku ʻi ai hano ʻaonga.

ʻI he kupu ki muʻá, kuo tau fakamoʻoniʻi ai ko e lotú ʻoku ʻikai ko ha founga tuʻumaʻu fakalotu pē pe ko ha faʻahinga fakanonga fakaefakakaukau. ʻOku fanongo moʻoni mai ʻa e ʻOtua moʻoní ki he lotú. Kapau te tau lotu ʻi he founga totonú pea ki he meʻa totonú, te ne tokanga mai. Ko hono moʻoní, ʻokú ne kōlenga mai ke tau ʻunuʻunu ofi ange kiate ia. (Sēmisi 4:8) Ko ia, ko e hā ʻoku tau ʻamanekina kapau ʻoku tau ʻai ʻa e lotú ko ha konga ʻetau moʻuí? Tau vakai angé ki ha niʻihi ʻo e ngaahi ʻaongá.

ʻI he hoko ʻa e ngaahi palopalema mo e pole ʻi hoʻo moʻuí, ʻokú ke ongoʻi ʻoku lōmekina koe ʻe he loto-moʻuá? ʻOku fakalototoʻaʻi kitautolu ʻe he Tohi Tapú ke “lotu maʻu pē” ʻi he ngaahi taimi pehení pea ‘ʻai ke ʻilo ʻetau ngaahi kolé ʻe he ʻOtuá.’ (1 Tesalonaika 5:17; Filipai 4:6) ʻOku fakapapauʻi mai ʻe he Tohi Tapú kapau te tau hanga ki he ʻOtuá ʻi he lotu, “ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi [hotau] lotó pea mo [ʻetau] ngaahi mafai fakaefakakaukaú.” (Filipai 4:7) ʻE lava ke tau maʻu ʻa e nonga lahi ʻi hono huaʻi atu ʻetau ngaahi hohaʻá ki heʻetau Tamai fakahēvaní. Ko hono moʻoní, ʻokú ne fakalototoʻaʻi kitautolu ke fai pehē. “Li hoʻo kavenga kia Sihova, he te ne poupou koe ʻe ia,” ko e lau ia ʻa e Saame 55:22.

Kuo hokosia ʻe he kakai taʻefaʻalaua ʻi he māmaní ʻa e nonga ko ení. Ko Hee Ran, mei Kōlea Tonga, ʻokú ne pehē: “Neongo ʻa e mafatukituki ʻeku ngaahi palopalemá, ʻi heʻeku lotu pē fekauʻaki mo iá, naʻá ku ongoʻi kuo matafi atu ʻa e fuʻu kavengá peá u ongoʻi ʻoku ou  maʻu ʻa e mālohi ke kātekina ia.” Ko Cecilia, ʻi he ʻOtu Motu Filipainí, ʻokú ne fakamatala: “ʻI he hoko ko ha faʻē, ʻoku ou hohaʻa lahi fekauʻaki mo hoku ongo ʻofefiné pea mo ʻeku faʻē, ʻa ia ʻoku ʻikai lava ke ne ʻiloʻi au. Ka koeʻuhi ko e lotú, ʻoku malava ai ke u fekuki mo ʻeku moʻui fakaʻahó ʻo ʻikai fuʻu hohaʻa. ʻOku ou ʻiloʻi ʻe tokoniʻi au ʻe Sihova ʻi hono tokangaʻi kinautolú.”

ʻOkú ke fehangahangai mo ha loto-mafasia tōtuʻa, mahalo ko ha tuʻunga ʻokú ne fakamanamanaʻi hoʻo moʻuí pe fakatamaki? Ko e lotu ki he “ʻOtua ʻo e fakafiemālie kotoa pē” ʻe lava ke ne ʻoatu ʻa e nonga lahi. ʻOku pehē ʻi he Tohi Tapú ʻokú ne “fakafiemālieʻi kitautolu ʻi he kotoa ʻo ʻetau mamahí.” (2 Kolinitō 1:3, 4) Ko e fakatātaá, ʻi he taimi ʻe taha naʻe hohaʻa lahi ʻa Sīsū, “peá ne tūʻulutui ʻo ne kamata ke lotu.” Ko e hā hono olá? “Naʻe hā ha ʻāngelo mei he langí kiate ia ʻo ne fakaivimālohiʻi  ia.” (Luke 22:41, 43) Ko e tangata faitōnunga ʻe taha ko Nehemaia, naʻá ne tofanga ʻi he fakamanamana mei ha kakai kovi naʻa nau feinga ke taʻofi ia mei hono fai ʻa e ngāue ʻa e ʻOtuá. Naʻá ne lotu: “Ke ke fakamalohi hoku nima.” Ko e meʻa naʻe hoko ki mui aí ʻoku fakahaaʻi ai naʻe tokoniʻi moʻoni ia ʻe he ʻOtuá ke ikuʻi ʻene manavaheé pea lavameʻa ʻi heʻene ngāué. (Nehemaia 6:9-16, PM) Ko Reginald, ʻi Kana, ʻokú ne fakamatala ki heʻene hokosia ʻi hono fai ʻa e lotú: “ʻI he taimi ʻoku ou lotu aí, tautefito ʻi he taimi faingataʻa fakatupu lōmekiná, ʻoku ou ongoʻi ke tala ʻeku ngaahi palopalemá ki ha taha te ne lava ʻo tokoniʻi au pea fakapapauʻi mai ʻoku ʻikai ha ʻuhinga ke hohaʻa.” ʻIo, ʻe lava ke fakafiemālieʻi kitautolu ʻe he ʻOtuá ʻi he taimi ʻoku tau lotu ai kiate iá.

Ko e ngaahi fili ʻe niʻihi ʻoku tau fai ʻe lava ke ne uesia tuʻuloa kitautolu mo hotau ngaahi ʻofaʻangá. ʻE lava fēfē ke tau fai ʻa e ngaahi fili fakapotopotó? ʻOku pehē ʻe he Tohi Tapú: “Kapau ʻoku ʻi ai ha taha ʻo kimoutolu ʻoku masiva ʻi he potó [tautefito ʻi he fekuki mo e ʻahiʻahí], tuku ke ne hanganaki kole ki he ʻOtuá, he ʻokú ne foaki nima-homo ki he faʻahinga kotoa ʻo ʻikai te ne ʻoatu mo e lau; pea ʻe foaki ia kiate ia.” (Sēmisi 1:5) Kapau te tau lotu ki ha poto, ʻe lava ke ngāueʻaki ʻe he ʻOtuá hono laumālie māʻoniʻoní ke tataki kitautolu ke fai ʻa e ngaahi fili fakapotopotó. Ko hono moʻoní, ʻe lava ke tau kole tonu hono laumālie māʻoniʻoní koeʻuhí ʻoku fakapapauʻi mai ʻe Sīsū ko e “Tamai ʻi hēvaní [te ne] foaki ʻa e laumālie māʻoniʻoní ki he faʻahinga ʻoku kole kiate iá!”—Luke 11:13.

Naʻa mo Sīsū naʻá ne ʻiloʻi ʻa e fiemaʻu ke kole ki heʻene Tamaí ha tokoni ki hono fai ʻa e ngaahi fili mahuʻingá. ʻOku tala mai ʻe he Tohi Tapú ʻi he taimi naʻá ne loto ai ke fili ʻa e kau tangata ʻe toko 12 ke hoko ko ʻene kau ʻapositoló, “naʻá ne hokohoko atu ʻi he pō kakato ʻene lotu ki he ʻOtuá.”—Luke 6:12.

Hangē ko Sīsuú, ko e tokolahi ʻi he ʻahó ni kuo nau fakamoʻoniʻi eni ʻi heʻenau sio ki he anga hono tali ʻe he ʻOtuá ʻenau kole ki ha tokoni ʻi hono fai ʻa e ngaahi fili fakapotopotó. Ko Regina, ʻi he ʻOtu Motu Filipainí, ʻokú ne fakamatala ki he palopalema kehekehe kuó ne fehangahangai mo iá, hangē ko ʻene tauhi hono fāmilí hili e mate hono husepānití, mole ʻene ngāué pea hokosia ʻa e faingataʻa hono ʻohake ʻa e fānaú. Ko e hā kuó ne tokoniʻi ia ke fai ʻa e ngaahi fili fakapotopotó? ʻOkú ne pehē, “ʻOku ou falala ki he tokoni ʻa Sihova fakafou ʻi he lotú.” ʻOku fakamatala ʻa Kwabena mei Kana ki he ʻuhinga ʻene kole tokoni ki he ʻOtuá, “Naʻe mole ʻeku ngāue totongi lelei ʻi he langá.” ʻI he fakakaukau ki heʻene filí, ʻokú ne pehē, “Naʻá ku toutou lotu ki he tataki ʻa Sihová ki hono fai ʻa e fili totonú.” ʻOkú ne toe pehē, “Kuó u ongoʻi moʻoni hono tokoniʻi au ʻe Sihova ke fili ha ngāue ʻoku malava ai ke u tokanga ki heʻeku fiemaʻu fakalaumālié mo fakaesinó.” ʻE lava foki mo koe ke ke hokosia ʻa e tataki ʻa e ʻOtuá ʻaki hoʻo lotu fekauʻaki mo e ngaahi meʻa ʻe lava ke ne uesia ho vahaʻangatae mo iá.

Kuo tau lave ki he ngaahi ʻaonga pē ʻe niʻihi ʻo e lotú. (Ki ha fakatātā lahi ange, sio ki he puha “ ʻAonga ʻo e Lotú.”) Ka, ke ke maʻu ʻa e ngaahi ʻaonga ko ení, ʻoku fiemaʻu ke ke ʻuluaki ʻiloʻi ʻa e ʻOtuá mo hono finangaló. Kapau ko e meʻa ia ʻokú ke fiemaʻú, ʻoku mau fakalototoʻaʻi atu koe ke kole ki he Kau Fakamoʻoni ʻa Sihová ke nau tokoniʻi koe ʻi hono ako ʻa e Tohi Tapú. a Ko e ʻuluaki sitepu eni ʻe lava ke ke ʻunuʻunu ofi ange ai ki he Tokotaha “tali lotu.”—Saame 65:2.