ʻUluaki Tuʻi 22:1-53
22 ʻI he taʻu ʻe tolu naʻe ʻikai fai ai ha tau ʻi he vahaʻa ʻo Sīlia pea mo ʻIsilelí.
2 ʻI he taʻu hono tolú naʻe ʻalu hifo ai ʻa Tuʻi Sihosafate+ ʻo Siutá ki he tuʻi ʻo ʻIsilelí.+
3 Pea naʻe pehē ange ʻe he tuʻi ʻo ʻIsilelí ki heʻene kau sevānití: “ʻOku mou ʻiloʻi koā ʻoku ʻatautolu ʻa Lēmoti-kiliati?+ Ka neongo ia ʻoku tau toumoua ke fakafoki mai ia mei he tuʻi ʻo Sīliá.”
4 Naʻá ne pehē ange leva kia Sihosafate: “Te ke ʻalu mo au ke tau ʻi Lēmoti-kiliati?” Naʻe tali ange ʻe Sihosafate ki he tuʻi ʻo ʻIsilelí: “Ko koe mo aú ʻokú ta taha. Ko ho kakaí mo hoku kakaí ʻoku nau taha foki, ʻo kau ai ʻa hoʻo fanga hōsí mo ʻeku fanga hōsí.”+
5 Ka naʻe pehē ange ʻe Sihosafate ki he tuʻi ʻo ʻIsilelí: “ʻUluaki fai muʻa ha fehuʻi+ pe ko e hā ʻa e folofola ʻa Sihová.”+
6 Ko ia naʻe fakatahatahaʻi mai ai ʻe he tuʻi ʻo ʻIsilelí ʻa e kau palōfitá, ko e kau tangata ʻe toko 400 nai, peá ne pehē ange kiate kinautolu: “Te u ʻalu ʻo tauʻi ʻa Lēmoti-kiliati, pe ʻikai?” Naʻa nau pehē: “ʻAlu hake, pea ʻe tuku atu ia ʻe Sihova ki he nima ʻo e tuʻí.”
7 Naʻe pehē ange leva ʻe Sihosafate: “ʻOku ʻikai koā ke ʻi heni ha palōfita ia ʻa Sihova? Tuku ke ta toe fai ha fehuʻi ʻo fakafou ʻiate ia.”+
8 Ko ia naʻe pehē ange ai ʻe he tuʻi ʻo ʻIsilelí kia Sihosafate: “ʻOku kei toe ha tangata ʻe toko taha ʻa ia ʻe lava ke ta fai ha fehuʻi kia Sihova+ ʻo fakafou ʻiate ia; ka ʻoku ou fehiʻa ʻiate ia,+ he ʻoku ʻikai ʻaupito ke ne kikiteʻi ha ngaahi meʻa lelei ʻo fekauʻaki mo au, ko e kovi pē.+ Ko Maikaia ia ko e foha ʻo ʻĪmilá.” Kae kehe, naʻe pehē ange ʻe Sihosafate: “ʻOku ʻikai totonu ke lea pehē ʻa e ʻAfioná.”
9 Ko ia naʻe ui mai ai ʻe he tuʻi ʻo ʻIsilelí ha ʻōfisa ʻo e lotoʻaá peá ne pehē: “ʻOmi fakavave ki heni ʻa Maikaia ko e foha ʻo ʻĪmilá.”+
10 Pea ko e tuʻi ʻo ʻIsilelí mo Sihosafate ko e tuʻi ʻo Siutá naʻá na taki taha nofo ʻi hono taloni, ʻokú na tui hona teunga fakatuʻí, ʻo na ʻi he ʻauʻauʻanga uité ʻi he hūʻanga ʻo e matapā ʻo Samēliá, pea ko e kau palōfitá kotoa naʻa nau kikite ʻi hona ʻaó.+
11 Pea naʻe ngaohi ʻe Setekaia ko e foha ʻo Kenaʻaná maʻana ha ngaahi meʻatui ukamea pea naʻá ne pehē: “Ko e folofola eni ʻa Sihová, ‘Te ke tuiʻi* ʻaki eni ʻa e kau Sīliá kae ʻoua kuó ke fakaʻauha ʻosi kinautolu.’”
12 Ko e kau palōfita kehé kotoa naʻa nau kikiteʻi ʻa e meʻa tatau, ʻo pehē: “ʻAlu hake ki Lēmoti-kiliati pea te ke lavameʻa; ʻe foaki atu ia ʻe Sihova ki he nima ʻo e tuʻí.”
13 Ko ia ko e talafekau naʻe ʻalu ke ui mai ʻa Maikaiá naʻá ne pehē ange kiate ia: “Vakai! Ko e lea ʻa e kau palōfitá ʻoku taha pē ki he lelei maʻá e tuʻí. Tuku muʻa ke hoko hoʻo leá ʻo hangē ko ʻenau leá, peá ke fai ha lea lelei.”+
14 Ka naʻe pehē ange ʻe Maikaia: “ʻOku ou fuakava ʻia Sihova ko e ʻOtua moʻuí, ko e hā pē ʻa e meʻa ʻe folofolaʻaki ʻe Sihova kiate aú ko e meʻa ia te u leaʻakí.”
15 Pea naʻá ne hū atu ki he tuʻí, pea naʻe ʻeke ange ʻe he tuʻí kiate ia: “Maikaia, te mau ō ʻo tauʻi ʻa Lēmoti-kiliati, pe ʻikai?” ʻI he taimi pē ko iá naʻá ne tali ange: “ʻAlu hake pea te ke lavameʻa; ʻe tuku ia ʻe Sihova ki he nima ʻo e tuʻí.”
16 Ko ia naʻe pehē ange ai ʻe he tuʻí kiate ia: “Kuo tuʻo fiha ʻa e pau ke u fakafuakavaʻi koe ke ʻoua naʻá ke leaʻaki ha meʻa kiate au ka ko e moʻoní pē ʻi he huafa ʻo Sihová?”
17 Ko ia naʻá ne pehē ange: “ʻOku ou sio kuo movete holo ʻa e kau ʻIsilelí kotoa ʻi he ngaahi moʻungá,+ ʻo hangē ha fanga sipi ʻoku ʻikai hanau tauhí. Naʻe folofola ʻa Sihova: ‘Ko e faʻahingá ni ʻoku ʻikai hanau pule. Tuku ke foki ʻa e tokotaha taki taha ki hono falé ʻi he melino.’”
18 Naʻe pehē ange leva ʻe he tuʻi ʻo ʻIsilelí kia Sihosafate: “ʻIkai naʻá ku tala atu kiate koe, ‘ʻE ʻikai te ne kikiteʻi ha ngaahi meʻa lelei ʻo fekauʻaki mo au, ko e kovi pē’?”+
19 Naʻe pehē ange leva ʻe Maikaia: “Ko ia ai, fanongo mai ki he folofola ʻa Sihová: Naʻá ku sio kia Sihova ʻokú ne ʻafio ʻi hono taloní+ pea ko e kau tau kotoa ʻo e langí ʻoku nau tuʻu ʻi hono tafaʻakí, ʻi hono toʻomataʻú pea ʻi hono toʻohemá.+
20 Naʻe folofola leva ʻa Sihova, ‘Ko hai te ne kākaaʻi ʻa ʻĒhapí, koeʻuhi ke ne ʻalu hake ʻo tō ʻi Lēmoti-kiliati?’ Pea naʻe leaʻaki ʻe he tokotaha ʻa e meʻa ʻe taha lolotonga ia naʻe leaʻaki ʻe ha tokotaha ia ʻa e meʻa kehe.
21 Pea naʻe haʻu ki muʻa ha laumālie*+ ʻo ne tuʻu ʻi he ʻao ʻo Sihová ʻo pehē, ‘Te u kākaaʻi ia.’ Naʻe ʻeke ange ʻe Sihova kiate ia, ‘ʻE anga-fēfē hoʻo fai iá?’
22 Naʻá ne tali ange, ‘Te u ʻalu atu ʻo hoko ko ha laumālie kākā ʻi he ngutu ʻo ʻene kau palōfitá kotoa.’+ Ko ia naʻá ne pehē, ‘Te ke kākaaʻi ia, kaeʻumaʻā, te ke lavameʻa. ʻAlu ʻo fai ʻa e meʻa ko iá.’
23 Pea ko eni kuo ʻai ʻe Sihova ha laumālie kākā ki he ngutu ʻo e kau palōfita kotoa ko eni ʻaʻaú,+ ka kuo fakahaaʻi ʻe Sihova ia ʻa e mala kiate koe.”+
24 Ko Setekaia ko e foha ʻo Kenaʻaná naʻá ne fakaofiofi mai he taimi ko ení ʻo hapoʻi ʻa e kouʻahe ʻo Maikaiá peá ne pehē: “Ko e hala fē naʻe fakalaka mai ai ʻiate au ʻa e laumālie ʻo Sihová ke lea atu kiate koé?”+
25 Naʻe tali ange ʻe Maikaia: “Vakai! Te ke sio ki he hala ko iá ʻi he ʻaho te ke hū ai ke toitoi ʻi he loki taupotu taha ki lotó.”
26 Naʻe pehē leva ʻe he tuʻi ʻo ʻIsilelí: “ʻAve ʻa Maikaia pea tuku ia kia ʻĀmone ko e pule ʻo e koló pea kia Sōasi ko e foha ʻo e tuʻí.
27 Tala kiate kinaua, ‘Ko e meʻa eni ʻoku folofolaʻaki ʻe he tuʻí: “Tuku ʻa e tokotahá ni ki he pilīsoné+ pea fafanga ia ʻaki ha ʻinasi mā mo e vai siʻisiʻi ange kae ʻoua ke u foki mai ʻi he melino.”’”
28 Ka naʻe pehē ange ʻe Maikaia: “Kapau te ke foki mai ʻi he melino, tā kuo ʻikai ke folofola mai ʻa Sihova kiate au.”+ Pea naʻá ne hoko atu: “Mou fanongo mai, ʻa e kakai kotoa ko kimoutolú.”
29 Ko ia naʻe ʻalu hake ai ʻa e tuʻi ʻo ʻIsilelí mo Sihosafate ko e tuʻi ʻo Siutá ki Lēmoti-kiliati.+
30 Pea naʻe pehē ange ʻe he tuʻi ʻo ʻIsilelí kia Sihosafate: “Te u fakapuli au peá u ʻalu atu ki he taú, ka ke tui ʻe koe ho teunga fakatuʻí.” Ko ia naʻe fakapuli+ ʻa e tuʻi ʻo ʻIsilelí peá ne hū atu ki he taú.
31 Pea ko e tuʻi ʻo Sīliá naʻá ne tuʻutuʻuni ki heʻene kau ʻeikitau ʻe toko 32 ʻi he tau salioté:+ “ʻOua naʻa mou tau mo ha faʻahinga taha pē, ʻa e iiki pe lalahi, tuku kehe pē ʻa e tuʻi ʻo ʻIsilelí.”
32 Pea ʻi he sio atu pē ʻa e kau ʻeikitau ʻi he tau salioté kia Sihosafaté, naʻa nau pehē loto pē: “Ko e tuʻi moʻoni eni ʻo ʻIsilelí.” Ko ia naʻa nau hanga hake ʻo tauʻi ia; pea naʻe kamata ke tangi ʻa Sihosafate ki ha tokoni.
33 ʻI he sio ʻa e kau ʻeikitau ʻo e tau salioté naʻe ʻikai ko e tuʻi ia ʻo ʻIsilelí, naʻa nau foki he taimi pē ko iá mei he muimui ʻiate iá.
34 Ka naʻe fanaʻi noa pē* ʻe he tangata ʻe taha ʻa ʻene ngahaú, pea naʻe tau ia ʻi he tuʻi ʻo ʻIsilelí ʻi he vahaʻa ʻo e hokoʻanga ʻo hono kofu-taú. Ko ia naʻe pehē ange ai ʻe he tuʻí ki heʻene tokotaha angi salioté: “Tafoki pea ʻave au mei he taú,* he kuó u kafo lahi.”+
35 Naʻe kakaha ʻa e taú ʻi he ʻaho kotoa ko iá, pea naʻe pau ke pukepuke ʻa e tuʻí ke ne kei tuʻu pē ʻi he salioté, ʻo fakahanga ki he kau Sīliá. Ko e toto mei he kafó naʻe malingi ia ki he loto saliote taú, pea naʻá ne mate ʻi he efiafí.+
36 ʻI he tō nai ʻa e laʻaá naʻe ʻalu atu ha kalanga ʻi he ʻapitangá kotoa, ʻo pehē: “Ke ʻalu ʻa e tokotaha kotoa ki hono kolo! Ke ʻalu ʻa e tokotaha kotoa ki hono fonua!”+
37 Ko ia naʻe mate ai ʻa e tuʻí, pea naʻe ʻomi ia ki Samēlia; naʻa nau tanu ʻa e tuʻí ʻi Samēlia.
38 ʻI heʻenau fufulu ʻa e saliote taú ʻi he veʻe vai ʻo Samēliá, naʻe ʻemo ʻe he fanga kulií ʻa hono totó pea naʻe kaukau ai ʻa e kau feʻauakí,* ʻo fakatatau ki he folofola naʻe folofolaʻaki ʻe Sihová.+
39 Ko e meʻa ki he toenga ʻo e hisitōlia ʻo ʻĒhapí, mo e meʻa kotoa naʻá ne faí pea mo e fale* lei+ naʻá ne langá pea mo e ngaahi kolo kotoa naʻá ne langá, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo ʻIsilelí?
40 Pea naʻe toka ʻa ʻĒhapi ʻo mālōlō fakataha mo ʻene fanga kuí;+ pea naʻe hoko ʻa hono foha ko ʻAhasaiá+ ko e tuʻi ʻo fetongi ia.
41 Ko Sihosafate+ ko e foha ʻo ʻAsá naʻá ne hoko ko e tuʻi ki Siuta ʻi he taʻu hono fā ʻo e pule ʻa Tuʻi ʻĒhapi ʻo ʻIsilelí.
42 Naʻe taʻu 35 ʻa Sihosafate ʻi heʻene hoko ko e tuʻí, pea naʻá ne pule ʻi he taʻu ʻe 25 ʻi Selusalema. Ko e hingoa ʻo ʻene faʻeé ko ʻĀsupa ko e ʻofefine ʻo Silihi.
43 Naʻá ne hanganaki ʻaʻeva ʻi he ʻalunga kotoa ʻo ʻene tamai ko ʻAsá.+ Naʻe ʻikai te ne afe mei ai, pea naʻá ne fai ʻa e meʻa naʻe totonu ʻi he vakai mai ʻa Sihová.+ Kae kehe, naʻe ʻikai ke toʻo ʻa e ngaahi potu māʻolungá, pea naʻe kei faifeilaulau pē ʻa e kakaí mo fai ʻa e feilaulau fakakohu ʻi he ngaahi potu māʻolungá.+
44 Naʻe tauhi ʻe Sihosafate ha ngaahi vahaʻangatae melino mo e tuʻi ʻo ʻIsilelí.+
45 Ko e meʻa ki he toenga ʻo e hisitōlia ʻo Sihosafaté, mo ʻene ngaahi ngāue kāfakafá mo e anga ʻo ʻene faitaú, ʻikai kuo hiki ia ʻi he tohi ʻo e hisitōlia ʻo e taimi ʻo e ngaahi tuʻi ʻo Siutá?
46 Naʻá ne toe fakamaʻa foki mei he fonuá ʻa e toenga ʻo e kau tangata feʻauaki ʻi he temipalé+ ʻa ia naʻe toe mei he ngaahi ʻaho ʻo ʻAsa ko ʻene tamaí.+
47 Naʻe ʻikai leva ha tuʻi ʻi ʻĪtomi;+ ko ha kōvana fakavahefonua naʻe leʻoleʻo ko e tuʻí.+
48 Naʻe faʻu foki ʻe Sihosafate ʻa e ngaahi vaka Tāsisi* ke tukufolau ki ʻŌfeli ke ʻomi ha koula,+ ka naʻe ʻikai te nau tukufolau koeʻuhí naʻe ʻauha ʻa e ngaahi vaká ʻi ʻEsioni-kepa.+
49 ʻI he taimi ko iá naʻe pehē ange ai ʻe ʻAhasaia ko e foha ʻo ʻĒhapí kia Sihosafate: “Tuku ke ʻalu ʻa ʻeku kau sevānití mo hoʻo kau sevānití ʻi he ngaahi vaká,” ka naʻe ʻikai ke loto ki ai ʻa Sihosafate.
50 Pea naʻe toka ʻa Sihosafate ʻo mālōlō fakataha mo ʻene fanga kuí+ pea naʻe tanu ia fakataha mo ʻene fanga kuí ʻi he Kolo-ʻo-Tēvita ko ʻene kuí; pea naʻe hoko ʻa hono foha ko Siholamé+ ko e tuʻi ʻo fetongi ia.
51 Ko ʻAhasaia+ ko e foha ʻo ʻĒhapí naʻá ne hoko ko e tuʻi ki ʻIsileli ʻi Samēlia ʻi he taʻu hono 17 ʻo e pule ʻa Tuʻi Sihosafate ʻo Siutá, pea naʻá ne pule ki ʻIsileli ʻi he taʻu ʻe ua.
52 Pea naʻá ne hanganaki fai ʻa e meʻa naʻe kovi ʻi he vakai mai ʻa Sihová peá ne ʻaʻeva ʻi he ʻalunga ʻo ʻene tamaí+ mo ʻene faʻeé+ pea ʻi he ʻalunga ʻo Selopoame ko e foha ʻo Nīpatí, ʻa ia naʻá ne fakatupunga ke faiangahala ʻa ʻIsilelí.+
53 Naʻe hokohoko atu ʻene tauhi kia Pēalí+ mo ʻene punou kiate iá pea mo ʻene hanganaki fakalotomamahiʻi ʻa Sihova ko e ʻOtua ʻo ʻIsilelí,+ ʻo hangē pē ko e meʻa naʻe fai ʻe heʻene tamaí.
Fakamatala ‘i Lalo
^ Pe “tekeʻi.”
^ Pe “ha ʻāngelo.”
^ Fakafoʻilea, “ʻapitangá.”
^ Pe “ʻo ʻikai ʻi he taumuʻa kovi.”
^ Pe ngalingali, “pea ʻi he feituʻu naʻe kaukau ai ʻa e kau feʻauakí, naʻe ʻemo ai ʻe he fanga kulií ʻa hono totó.”
^ Pe “palasi.”
^ Sio ki he Lea mo Hono ʻUhinga.
