ʻUluaki Kalonikali 19:1-19
19 Ki mui ai, naʻe mate ʻa Naasi ko e tuʻi ʻo e kau ʻĀmoní, pea naʻe hoko ʻa hono fohá ko e tuʻi ʻo fetongi ia.+
2 Ko ia naʻe pehē ai ʻe Tēvita: “Te u fakahaaʻi ʻa e ʻofa mateaki+ kia Hanuni ko e foha ʻo Nāsí, koeʻuhí he naʻe fakahaaʻi mai ʻe heʻene tamaí ʻa e ʻofa mateaki kiate au.” Ko ia naʻe fekauʻi atu ʻe Tēvita ha kau talafekau ke nau fai ha fakafiemālie kiate ia ʻi he mole atu ʻene tamaí. Ka ʻi he taimi naʻe aʻu atu ai ʻa e kau sevāniti ʻa Tēvitá ki he fonua ʻo e kau ʻĀmoní+ ke fakafiemālieʻi ʻa Hanuní,
3 naʻe pehē ʻe he houʻeiki ʻo e kau ʻĀmoní kia Hanuni: “ʻOkú ke fakakaukau ʻoku fakalāngilangiʻi ʻe Tēvita ʻa hoʻo tamaí ʻi heʻene fekauʻi mai kiate koe ha kau fakafiemālié? ʻIkai kuo haʻu ʻa ʻene kau sevānití kiate koé koeʻuhí ke nau fai ha fakatotolo fakaʻāuliliki pea ke liua koe pea ke asiasi ʻa e fonuá?”
4 Ko ia naʻe puke ʻe Hanuni ʻa e kau sevāniti ʻa Tēvitá ʻo tele honau kavá+ pea tuʻusi vaeua honau ngaahi kofú ʻi lalo hifo ʻi honau kongalotó pea fekau ke nau ʻalu.
5 ʻI hono fakahā kia Tēvita ʻa e meʻa fekauʻaki mo e kau tangatá, naʻá ne fekauʻi atu leva ha niʻihi ke fakafetaulaki kiate kinautolu, koeʻuhí naʻe mātuʻaki fakamaaʻi ʻa e kau tangatá; pea naʻe tala ʻe he tuʻí kiate kinautolu: “Mou nofo ʻi Sielikō+ kae ʻoua kuo tupu homou kavá, pea mou toki foki mai leva.”
6 ʻI he faai mai ʻa e taimí naʻe sio ʻa e kau ʻĀmoní kuo nau hoko ʻo namukū kia Tēvita, ko ia naʻe ʻoatu ʻe Hanuni mo e kau ʻĀmoní ha talēniti* siliva ʻe 1,000 ke totongi mai ʻaki ha ngaahi saliote mo ha kau tangata heka hoosi mei Mesopotēmia,* ʻĒlama-maaka, pea mo Sopa.+
7 Ko ia naʻa nau totongi mai ai ha saliote ʻe 32,000, fakataha mo e tuʻi ʻo Māká mo hono kakaí. Pea naʻa nau omi ʻo ʻapitanga ʻi muʻa ʻi Metepa.+ Naʻe fakatahataha mai ʻa e kau ʻĀmoní mei honau ngaahi koló pea nau ʻalu atu ki he taú.
8 ʻI he fanongo ʻa Tēvita ʻo fekauʻaki mo iá, naʻá ne fekauʻi atu ʻa Sioape+ pea mo e kau taú fakakātoa, ʻo kau ai ʻene kau tangata tau mālohi tahá.+
9 Pea naʻe ʻalu atu ʻa e kau ʻĀmoní ʻo fakatē tau ʻi he hūʻanga ʻo e koló lolotonga ia ko e ngaahi tuʻi ʻa ia naʻe omí, ko kinautolu pē naʻe ʻi he loto ʻataʻataá.
10 ʻI he sio ʻa Sioape kuo ʻoho mai kiate ia mei muʻa mo mui ʻa e kau taú, naʻá ne fili ʻa e niʻihi ʻo e kau tau lelei taha ʻi ʻIsilelí ʻo nau fakatē tau atu ke fetaulaki mo e kau Sīliá.+
11 Naʻá ne tuku ʻa e toenga ʻo e kau tangatá ke nau ʻi he malumalu ʻo e tuʻutuʻuni ʻa* hono tokoua ko ʻApisaí,+ koeʻuhí ke nau fakatē tau atu ke fetaulaki mo e kau ʻĀmoní.
12 Naʻá ne pehē ange leva: “Kapau ʻe hoko ʻo fuʻu mālohi kiate au ʻa e kau Sīliá,+ kuo pau leva ke ke haʻu ʻo fakahaofi au; ka ʻo kapau ʻe hoko ʻo fuʻu mālohi kiate koe ʻa e kau ʻĀmoní, te u fakahaofi koe.
13 Kuo pau ke tau mālohi mo loto-toʻa+ maʻa hotau kakaí mo e ngaahi kolo ʻa hotau ʻOtuá, pea ʻe fai ʻe Sihova ʻa e meʻa ʻoku lelei ʻi heʻene vakaí.”
14 Naʻe laka atu leva ʻa Sioape mo ʻene kau tangatá ke fetaulaki mo e kau Sīliá ʻi he taú, pea naʻa nau hola mei hono ʻaó.+
15 ʻI he sio ʻa e kau ʻĀmoní kuo hola ʻa e kau Sīliá, naʻa nau hola mo kinautolu foki mei hono tokoua ko ʻApisaí ʻo nau hū ki he koló. ʻI he hili iá, naʻe ʻalu ʻa Sioape ki Selusalema.
16 ʻI he sio ʻa e kau Sīliá kuo ikunaʻi kinautolu ʻe ʻIsilelí, naʻa nau tuku atu ha kau talafekau ke ui mai ʻa e kau Sīlia ʻi he feituʻu ʻo e Vaitafé,*+ pea ko Sōfaki ko e ʻeikitau ʻa Hetatesá naʻá ne taki kinautolú.+
17 ʻI hono fakahaaʻi atu kia Tēvita ʻa e ongoongó, naʻá ne fakatahatahaʻi ʻi he taimi pē ko iá ʻa ʻIsileli kotoa pea nau kolosi ʻi Sioatani ʻo ʻalu atu kiate kinautolu ʻo nau fakatē tau ke tauʻi kinautolu. Naʻe fakatē tau ʻa Tēvita ke fakafetaulaki ki he kau Sīliá, pea naʻa nau tauʻi ia.+
18 Ka naʻe hola ʻa e kau Sīliá mei ʻIsileli; pea naʻe tāmateʻi ʻe Tēvita ʻa e kau heka saliote ʻe toko 7,000 mo e kau sōtia ʻalu lalo ʻa e kau Sīliá ʻe toko 40,000, pea naʻá ne tāmateʻi ʻa Sōfaki ko e ʻeikitaú.
19 ʻI he sio ʻa e kau sevāniti ʻa Hetatesá kuo ikunaʻi kinautolu ʻe ʻIsilelí,+ naʻa nau fakamelino leva mo Tēvita pea nau hoko ko ʻene kau sevāniti;+ pea naʻe ʻikai loto ʻa Sīlia ke toe tokoniʻi ʻa e kau ʻĀmoní.
Fakamatala ‘i Lalo
^ Ko ha talēniti naʻe tatau ia mo e kilokalami ʻe 34.2 (ʻaunise ʻe 1,101). Sio ki he Fakamatala Fakalahi E14.
^ Fakafoʻilea, “ʻĒlami-nahalaimi.”
^ Fakafoʻilea, “ki he nima ʻo.”
^ ʻA ia, ko e Vaitafe ʻIufaletesí.
