ʻUluaki Kalonikali 20:1-8
20 ʻI he kamataʻanga ʻo e taʻú,* ʻi he taimi ʻa ia ʻoku ʻalu ai ʻa e ngaahi tuʻí ʻi he ngaahi feingataú, naʻe taki atu ai ʻe Sioape+ ha kau tau ʻo nau fakaʻauha ʻa e fonua ʻo e kau ʻĀmoní; naʻá ne ʻalu atu ʻo ʻākoloʻi ʻa Lapa,+ lolotonga ia naʻe nofo pē ʻa Tēvita ia ʻi Selusalema.+ Naʻe ʻohofi ʻe Sioape ʻa Lapa ʻo ne holoki hifo ia.+
2 Naʻe toʻo leva ʻe Tēvita ʻa e kalauni ʻo Malekamí mei hono ʻulú, pea ʻiloʻi ai ko hono mamafá ko ha talēniti* koula, pea naʻe ʻi ai ʻa e ngaahi maka mahuʻinga; pea naʻe fokotuʻu ia ʻi he ʻulu ʻo Tēvitá. Naʻá ne ʻave foki mei he koló+ ha fuʻu koloa vete* lahi ʻaupito.
3 Pea naʻá ne ʻomi ki tuʻa ʻa e kakai naʻe ʻi loto aí pea ʻai kinautolu ke nau ngāue+ ʻi hono tā ʻa e maká pea ʻi hono ngāueʻaki ʻa e ngaahi meʻangāue ukamea māsilá mo e ngaahi tokí. Ko e meʻa ia naʻe fai ʻe Tēvita ki he ngaahi kolo kotoa ʻo e kau ʻĀmoní. Faai atu pē naʻe foki ʻa Tēvita mo e kau taú kotoa ki Selusalema.
4 ʻI he hili ení, naʻe fai ha tau mo e kau Filisitiá ʻi Kēseli. ʻI he taimi ko iá ko Sipekai+ ko e tangata Husá naʻá ne taaʻi ʻa Sipai, ʻa ia ko ha hako ʻo e kau Lifaimí,+ pea naʻe fakavaivaiʻi kinautolu.
5 Pea naʻe toe fai ha tau mo e kau Filisitiá, pea ko ʻElanani ko e foha ʻo Sailí naʻá ne taaʻi ʻa Laami ko e tokoua ʻo Kolaiate+ ko e tangata Katí, ʻa ia ko ʻene taó naʻe hangē ʻa hono kaú ko e vaʻakau ʻa e kau lalangá.+
6 Naʻe toe fai ha tau ʻi Kati,+ ʻa ia naʻe ʻi ai ha fuʻu tangata lahi anga-kehe,+ naʻe louhiʻinima ʻe 6 ʻa hono nima taki taha pea louhiʻivaʻe ʻe 6 ʻa e vaʻe taki taha, ʻo 24 fakakātoa; pea ko iá foki ko ha hako ʻo e kau Lifaimí.+
7 Naʻá ne hanganaki manuki+ ki ʻIsileli. Ko ia ko Sionatane ko e foha ʻo Simeá,+ ʻa e tokoua ʻo Tēvitá, naʻá ne taaʻi ia.
8 Ko e faʻahingá ni ko e hako kinautolu ʻo e kau Lifaimi+ ʻi Katí,+ pea naʻa nau tō ʻi he nima ʻo Tēvitá pea ʻi he nima ʻo ʻene kau sevānití.
Fakamatala ‘i Lalo
^ ʻA ia, ʻi he faʻahitaʻu failaú.
^ Ko e kilokalami nai ʻe 34.2 (ʻaunise ʻe 1,101). Sio ki he Fakamatala Fakalahi E14.
^ Sio ki he Lea mo Hono ʻUhinga.
