Ua Kalonikali 36:1-23
36 Naʻe ʻave leva ʻe he kakai ʻo e fonuá ʻa e foha ʻo Siosaia ko Sihoaasí+ ʻo fakanofo ia ko e tuʻi ʻi Selusalema ke ne fetongi ʻa ʻene tamaí.+
2 Naʻe taʻu 23 ʻa Sihoaasi ʻi heʻene hoko ko e tuʻí, pea naʻá ne pule ʻi he māhina ʻe tolu ʻi Selusalema.
3 Kae kehe, naʻe fakahifo ia mei he taloní ʻi Selusalema ʻe he tuʻi ʻo ʻIsipité pea tuʻutuʻuni ke totongi ʻe he fonuá ha talēniti* siliva ʻe 100 mo ha talēniti koula.+
4 ʻIkai ko ia pē, naʻe fakanofo ʻe he tuʻi ʻo ʻIsipité ʻa e tokoua ʻo Sihoaasi ko ʻIlaiakimí ke ne hoko ko e tuʻi ki Siuta mo Selusalema pea liliu ʻa hono hingoá ko Sihoiakimi; ka naʻe ʻave ʻe Neko+ ʻa hono tokoua ko Sihoaasí ki ʻIsipite.+
5 Naʻe taʻu 25 ʻa Sihoiakimi+ ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema. Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihova ko hono ʻOtuá.+
6 Naʻe haʻu kiate ia ʻa Tuʻi Nepukanesa+ ʻo Pāpiloné koeʻuhí ke haʻi ia ʻaki ʻa e ongo meʻa-haʻi kopa ʻo ʻave ki Pāpilone.+
7 Pea naʻe ʻave ʻe Nepukanesa ha naunau ʻe niʻihi mei he fale ʻo Sihová ki Pāpilone peá ne tuku ia ʻi hono palasí ʻi Pāpilone.+
8 Ko e meʻa ki he toenga ʻo e hisitōlia ʻo Sihoiakimí, mo e ngaahi meʻa fakalielia naʻá ne faí mo e ngaahi kovi naʻe ʻilo fekauʻaki mo iá, kuo hiki ia ʻi he Tohi ʻo e Ngaahi Tuʻi ʻo ʻIsileli mo Siutá; pea naʻe hoko ʻa hono foha ko Sihoiakiní ko e tuʻi ʻo fetongi ia.+
9 Naʻe taʻu 18 ʻa Sihoiakini+ ʻi heʻene hoko ko e tuʻí, pea naʻá ne pule ʻi he māhina ʻe tolu mo e ʻaho ʻe hongofulu ʻi Selusalema; pea naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová.+
10 ʻI he kamataʻanga ʻo e taʻú,* naʻe fekau atu ʻe Tuʻi Nepukanesa ke ʻomi ia ki Pāpilone,+ fakataha mo e ngaahi naunau mahuʻinga ʻo e fale ʻo Sihová.+ Pea naʻá ne fakanofo ʻa Setekaia ko e tokoua ʻo ʻene tamaí ke tuʻi ki Siuta mo Selusalema.+
11 Naʻe taʻu 21 ʻa Setekaia+ ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema.+
12 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihova ko hono ʻOtuá. Naʻe ʻikai te ne fakatōkilaloʻi ia ʻi he ʻao ʻo e palōfita ko Selemaiá,+ ʻa ia naʻe lea ʻi he tuʻutuʻuni ʻa Sihová.
13 Naʻá ne angatuʻu foki kia Tuʻi Nepukanesa,+ ʻa ia naʻá ne ʻai ia ke ne fai ha fuakava ʻi he ʻOtuá, pea naʻá ne ongongataʻa ai pē* mo loto-fefeka peá ne fakafisi ke tafoki kia Sihova ko e ʻOtua ʻo ʻIsilelí.
14 Ko e kotoa ʻo e kau pule ʻo e kau taulaʻeikí pea pehē ki he kakaí naʻa nau mātuʻaki taʻefaitōnunga, ʻo nau fai ʻa e ngaahi meʻa fakalielia kotoa pē ʻa e ngaahi puleʻangá, pea naʻa nau ʻuliʻi ʻa e fale ʻo Sihova+ naʻá ne fakatoputapuʻi ʻi Selusalemá.
15 Naʻe hanganaki fakatokanga ʻa Sihova ko e ʻOtua ʻo ʻenau fanga kuí kiate kinautolu ʻo fakafou ʻi heʻene kau talafekaú, ʻo toutou fakatokanga, koeʻuhí naʻá ne ongoʻi manavaʻofa ki hono kakaí pea ki hono ʻafioʻangá.
16 Ka naʻa nau hanganaki lumaʻi ʻa e kau talafekau ʻa e ʻOtua moʻoní,+ pea nau taʻetokaʻi ʻene folofolá+ mo manukiʻi ʻa ʻene kau palōfitá,+ kae ʻoua ke hoko mai ʻa e houhau ʻa Sihová ki hono kakaí,+ pea aʻu ʻo ʻikai lava ke fakamoʻui kinautolu.
17 Ko ia naʻá ne ʻomi kiate kinautolu ʻa e tuʻi ʻo e kau Kalitiá,+ ʻa ia naʻá ne tāmateʻi ʻenau kau talavoú ʻaki ʻa e heletā+ ʻi honau feituʻu toputapú;+ naʻe ʻikai te ne ongoʻi manavaʻofa ki ha talavou pe finemui, motuʻa pe vaivai.+ Naʻe tuku ʻe he ʻOtuá ʻa e meʻa kotoa ki hono nimá.+
18 Ko e kotoa ʻo e ngaahi naunau ʻo e fale ʻo e ʻOtua moʻoní, lalahi mo e iiki, pea pehē ki he ngaahi koloa ʻo e fale ʻo Sihová mo e ngaahi koloa ʻa e tuʻí mo ʻene kau houʻeikí, ʻa e meʻa kotoa, naʻá ne ʻave ia ki Pāpilone.+
19 Naʻá ne tutu ʻa e fale ʻo e ʻOtua moʻoní,+ holoki ʻa e ʻā ʻo Selusalemá,+ tutu ʻa hono ngaahi taua fakakolotaú kotoa, pea fakaʻauha ʻa e meʻa kotoa pē naʻe mahuʻingá.+
20 Naʻá ne taki pōpula ki Pāpilone ʻa e faʻahinga naʻe hao ʻi he heletaá,+ pea naʻa nau hoko ko e kau sevāniti kiate ia+ mo hono ngaahi fohá ʻo aʻu ki he kamata ke pule ʻa e puleʻanga* ʻo Pēsiá,+
21 ke fakahoko ai ʻa e folofola ʻa Sihova fakafou ʻia Selemaiá,+ kae ʻoua kuo totongi ʻe he fonuá ʻa hono ngaahi Sāpaté.+ Ko e ngaahi ʻaho kotoa naʻe maomaonganoa aí naʻe tauhi Sāpate ai ʻa e fonuá, ke kakato ʻa e taʻu ʻe 70.+
22 ʻI he ʻuluaki taʻu ʻo e pule ʻa Tuʻi Kōlesi+ ʻo Pēsiá, pea koeʻuhí ke fakahoko ʻa e folofola ʻa Sihova fakafou ʻia Selemaiá,+ naʻe ueʻi ai ʻe Sihova ʻa e laumālie ʻo Tuʻi Kōlesi ʻo Pēsiá ke ne fai ha fanongonongo ʻi he kotoa ʻo hono puleʻangá, ʻa ia naʻá ne toe hiki foki,+ ʻo pehē:
23 “Ko e folofola eni ʻa Tuʻi Kōlesi ʻo Pēsiá, ‘Kuo foaki kiate au ʻe Sihova ko e ʻOtua ʻo e langí ʻa e puleʻanga kotoa pē ʻo e māmaní,+ pea kuó ne fekau au ke u langa moʻona ha fale ʻi Selusalema, ʻa ia ʻoku ʻi Siutá.+ ʻIlonga ʻa kimoutolu ʻoku ʻi he lotolotonga ʻo hono kakaí kotoa, ʻofa ke ʻiate ia ʻa Sihova ko hono ʻOtuá, pea tuku ke ne ʻalu hake.’”+
Fakamatala ‘i Lalo
^ Ko ha talēniti naʻe tatau ia mo e kilokalami ʻe 34.2 (ʻaunise ʻe 1,101). Sio ki he Fakamatala Fakalahi E14.
^ Ngalingali ʻi he faʻahitaʻu failaú.
^ Fakafoʻilea, “naʻá ne fakakekeva hono kiá.”
^ Pe “haʻa tuʻi.”
