Hōsea 6:1-11
6 “Haʻu, pea tuku ke tau foki kia Sihova,He kuó ne haehae kitautolu,+ ka te ne fakamoʻui kitautolu.
Naʻá ne taaʻi kitautolu, ka te ne haʻihaʻi ʻa hotau ngaahi laveá.
2 Te ne fakaake kitautolu ʻi he ʻosi ha ʻaho ʻe ua.
ʻI he ʻaho hono tolú te ne fokotuʻu hake kitautolu,Pea te tau moʻui ʻi hono ʻaó.
3 Te tau ʻiloʻi Ia, te tau kumi tōtōivi ke ʻiloʻi ʻa Sihova.
Ko ʻene hāʻele maí ʻoku papau ʻo hangē ko e mafoa ʻa e atá;Te ne hāʻele mai kiate kitautolu ʻo hangē ko ha ʻuha lōvaí,ʻO hangē ko ha ʻuha ʻi he faʻahitaʻu failaú ʻa ia ʻokú ne fakaviviku ʻa e māmaní.”
4 “Ko e hā ʻa e meʻa te u fai kiate koé, ʻe ʻIfalemi?
Ko e hā ʻa e meʻa te u fai kiate koé, ʻe Siuta?
He ko hoʻomo ʻofa mateakí ʻoku hangē ko e ngaahi ʻao ʻi he pongipongí,Hangē ko e hahau ʻa ia ʻoku vave ʻene mole atú.
5 Ko e ʻuhinga ia te u tuʻusi ai kinautolu fakafou ʻi he kau palōfitá;+Te u tāmateʻi kinautolu ʻaki ʻa e ngaahi lea ʻoku ʻalu atu mei hoku fofongá.+
Pea ko e fakamaau ʻe fai kiate koé ʻe ulo ʻo hangē ko e māmá.+
6 He ʻoku ou leleiʻia ʻi he ʻofa mateakí,* ʻo ʻikai ʻi he feilaulaú,Pea ʻi he ʻilo ki he ʻOtuá, kae ʻikai ʻi he ngaahi feilaulau tutu kakató.+
7 Ka ko kinautolú, ʻi he hangē ko e tangata angahalaʻiá, kuo nau maumauʻi ʻa e fuakavá.+
Kuo nau lavakiʻi au ʻi honau fonuá.
8 Ko Kiliatí ko ha kolo ia ʻo e kau faikovi,+ʻOku fonu ia ʻi he lingitotó.+
9 Ko e kulupu ʻo e kau taulaʻeikí ʻoku nau hangē ko e kau kaihaʻa fakamālohi ʻoku nau toka malumu ki ha tangatá.
ʻOku nau fakapō ʻi he hala ʻi Sīkemí,+He ʻoku nau fai ʻa e tōʻonga fakamā.
10 Kuó u mamata ki ha meʻa fakalilifu ʻi he fale ʻo ʻIsilelí.
ʻOku faifeʻauaki ai ʻa ʻIfalemi;+Kuo ʻuliʻi ʻe ʻIsileli ʻa ia tonu.+
11 ʻIkai ko ia pē, ʻe Siuta, kuo fokotuʻu maʻau ha utu-taʻu,ʻI he taimi te u fakatahatahaʻi mai ai ʻa e kau pōpula ʻi hoku kakaí.”+
Fakamatala ‘i Lalo
^ Pe “ʻi he faimēsí.”
