Nēhumi 1:1-15
1 Ko ha fanongonongo ki Ninive:+ Ko e tohi ʻo e vīsone ʻa Nēhumi* ko e tangata ʻElekosí:
2 Ko Sihová ko ha ʻOtua ʻokú ne fiemaʻu ʻa e anga-līʻoa maʻataʻataá+ pea ʻokú ne faisāuni;ʻOku faisāuni ʻa Sihova pea ʻokú ne mateuteu ke fakahāhā ʻa ʻene tuputāmakí.+
ʻOku faisāuni ʻa Sihova ki hono ngaahi filí,Pea ʻokú ne tuku tauhi ʻa ʻene tuputāmakí ki hono ngaahi filí.
3 ʻOku tuai ʻa Sihova ki he houhaú+ pea ʻoku lahi hono mālohí,+Ka heʻikai ʻaupito ke taʻofi ʻe Sihova ʻa e tautea ʻoku totonu ke fakahokó.+
Ko hono halá ʻoku ʻi he matangi fakaʻauha mo e afā,Pea ko e ngaahi ʻaó ko e efu ia ʻi hono lalo vaʻé.+
4 ʻOkú ne valokiʻi ʻa e tahí,+ pea ʻokú ne fakamātuʻu ia;Pea ʻokú ne ʻai ʻa e kotoa ʻo e ngaahi vaitafé ke mōmoa.+
ʻOku mae+ ʻa Pēsani mo Kāmeli,Pea ʻoku mae ʻa e ngaahi fisi ʻo Lepanoní.
5 ʻOku ngalulu ʻa e ngaahi moʻungá koeʻuhí ko ia,Pea ʻoku vaia+ ʻa e ngaahi foʻi māʻolungá.
Ko e māmaní ʻe tete koeʻuhi ko hono fofongá,Fakataha mo e fonuá pea mo e faʻahinga kotoa ʻoku nofo ʻi aí.+
6 Ko hai ʻe lava ke tuʻu atu ʻi heʻene ʻitá?+
Pea ko hai ʻe lava ke ne matuʻuaki ʻa e kakaha ʻo ʻene houhaú?+
Ko ʻene tuputāmakí ʻe huaʻi atu ʻo hangē ha afí,Pea ko e ngaahi makatuʻú ʻe movete koeʻuhí ko ia.
7 ʻOku lelei+ ʻa Sihova, ko ha hūfangaʻanga ia ʻi he ʻaho ʻo e faingataʻá.+
ʻOkú ne lāuʻilo ki he* faʻahinga ʻoku kumi hūfanga kiate iá.+
8 Te ne fakaʻauha ʻosi ʻa hono feituʻú* ʻaki ha tāfea fakatupu ʻauha,Pea ʻe fehangahangai ʻa hono ngaahi filí mo e fakapoʻuli.
9 Ko e hā hoʻomou faʻufaʻu ʻe fai kia Sihová?
Te ne fakaʻauha ʻosi kimoutolu.
ʻE ʻikai ke toe hoko tuʻo ua+ mai ʻa e faingataʻá.
10 He ʻoku nau fihituʻu ʻo hangē ha ʻakau talatalá,Pea ʻoku nau hangē ko e faʻahinga ʻoku konā ʻi he piá;*Ka ʻe keina kinautolu ʻo hangē ha mohuku mōmoá.
11 ʻE haʻu meiate koe ha tokotaha ʻokú ne faʻufaʻu ha kovi kia Sihova,ʻO ne fai ha faleʻi taʻeʻaonga.
12 Ko e meʻa eni ʻoku folofolaʻaki ʻe Sihová:
“Neongo ʻenau maʻu ʻa e mālohi kakato mo tokolahí,Naʻa mo ia ʻe tuʻusi hifo kinautolu pea te nau mole atu.*
Kuó u tauteaʻi koe,* ka heʻikai te u toe tauteaʻi koe.
13 Pea ko eni te u fesiʻi ʻa ʻene ʻakau haʻamó meiate koe,+Pea te u motuhi ho ngaahi haʻí ke motu-ua.
14 Kuo fai ʻe Sihova ha tuʻutuʻuni ʻo fekauʻaki mo koe,*‘Ko ho hingoá ʻe ʻikai ke toe fakatolonga atu.
Te u fakaʻauha ʻa e ngaahi ʻīmisi kuo tongí mo e ngaahi ʻīmisi mētalé* mei he fale* ʻo ho ngaahi ʻotuá.
Te u ngaohi ha faʻitoka moʻou, koeʻuhi ko hoʻo tōʻonga palakuú.’
15 Vakai! ʻOku ʻi he ngaahi moʻungá ʻa e vaʻe ʻo e tokotaha ʻokú ne ʻomai ʻa e ongoongo leleí,ʻA e tokotaha ʻokú ne fanongonongo ʻa e melinó.+
Fai hoʻo ngaahi kātoangá,+ ʻe Siuta, fai hoʻo ngaahi fuakavá,Koeʻuhí ʻe ʻikai ʻaupito ke toe ʻohofi koe ʻe he kau tangata fulikivanú.
ʻE mātuʻaki fakaʻauha kinautolu.”
Fakamatala ‘i Lalo
^ ʻOku ʻuhingá ko e “Tokotaha-Fakafiemālie.”
^ Pe “tokangaʻi ʻa e.” Fakafoʻilea, “ʻiloʻi ʻa e.”
^ ʻA ia, ko e feituʻu ʻo Ninivé.
^ Pe “pia uité.”
^ Pe ngalingali, “pea te ne fakalaka atu.”
^ ʻA ia, ko Siuta.
^ ʻA ia, ko ʻAsīlia.
^ Pe “ngaahi ʻīmisi mētale kuo haká.”
^ Pe “temipale.”
