Nōmipa 15:1-41
15 Naʻe toe folofola ʻa Sihova kia Mōsese, ʻo pehē:
2 “Lea ki he kau ʻIsilelí ʻo tala kiate kinautolu, ‘ʻI he taimi ʻe faifai ai pea mou hū ki he fonua ʻoku ou foaki atu kiate kimoutolu ke mou nofo aí+
3 pea mou fai ha feilaulau ʻaki ʻa e afi kia Sihova mei he fanga pulú pe mei he fanga sipí—pe ko ha feilaulau tutu+ ia pe ko ha feilaulau ke fakahoko ha fuakava makehe pe ko ha feilaulau loto-tauʻatāina+ pe ko ha feilaulau lolotonga hoʻomou ngaahi kātoanga fakafaʻahitaʻú,+ koeʻuhi ke ʻai ke ʻi ai ha ngangatu fakahōifua* kia Sihova+—
4 ko e tokotaha ʻokú ne ʻoatu ʻa ʻene feilaulaú kuo pau ke ne toe ʻoatu kia Sihova ha feilaulau meʻakai ko e mahoaʻa lelei,+ ko ha vahe hongofulu ia ʻe taha ʻo ha efa,* kuo fio mo ha vahe fā ʻe taha ʻo ha hini* ʻo e lolo.
5 ʻOku totonu foki ke ke ʻoatu ha uaine ko ha feilaulau inu, ko ha vahe fā ia ʻe taha ʻo ha hini, fakataha mo e feilaulau tutú+ pe ki he feilaulau ʻo e lami tangata taki taha.
6 Pe ki ha sipi tangata, ʻoku totonu ke ke ngaohi ki ai ha feilaulau meʻakai ko e vahe hongofulu ʻe ua ʻo ha fua efa ʻo e mahoaʻa lelei kuo fio mo ha vahe tolu ʻe taha ʻo ha hini ʻo e lolo.
7 Pea ʻoku totonu ke ke ʻoatu ha uaine ko ha feilaulau inu, ko ha vahe tolu ia ʻe taha ʻo ha hini, ko ha ngangatu fakahōifua* kia Sihova.
8 “‘Ka ʻo kapau te ke ʻoatu ha pulu tangata mei he tākangá ko ha feilaulau tutu+ pe ko ha feilaulau ke fakahoko ʻaki ha fuakava makehe+ pe ko ha ngaahi feilaulau feʻinasiʻaki kia Sihova,+
9 ʻoku totonu foki ke ke ʻoatu fakataha mo e pulu tangata ʻo e tākangá ha feilaulau meʻakai+ ko e vahe hongofulu ʻe tolu ʻo ha fua efa ʻo e mahoaʻa lelei kuo fio mo ha vaeuaʻi hini ʻo e lolo.
10 ʻOku totonu foki ke ke ʻoatu ha uaine ko ha feilaulau inu,+ ko e vaeua ia ʻo ha hini, ko ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.
11 Ko e meʻa eni ʻoku totonu ke fai ki he pulu tangata taki taha pe ki he sipi tangata taki taha pe ki he lami pe ko e kosi tangata taki taha.
12 Ko e hā pē nai ʻa e tokolahi ʻo e fanga manu ʻoku mou foakí, ko e meʻa ia ʻoku totonu ke mou fai ki he manu taki taha, ʻo fakatatau ki honau tokolahí.
13 Ko e founga eni ʻoku totonu ke ʻoatu ai ʻe he tupuʻi ʻIsileli kotoa pē ha feilaulau ʻoku fai ʻaki ʻa e afi, ko ha ngangatu fakahōifua* kia Sihova.
14 “‘Kapau foki ʻe fai ʻe ha muli ʻa ia ʻoku nofo mo kimoutolu pe ko ha taha kuó ne ʻi homou lotolotongá ʻi ha ngaahi toʻutangata lahi ha feilaulau ʻoku fai ʻaki ʻa e afi, ko ha ngangatu fakahōifua* kia Sihova, ʻoku totonu ke ne fai ʻo hangē tofu pē ko e meʻa ʻoku mou faí.+
15 ʻE taha pē ʻa e tuʻutuʻuni kiate kimoutolu ʻi he fakatahaʻangá pea mo e muli ʻoku nofo mo kimoutolú. ʻE hoko ia ko ha tuʻutuʻuni taʻengata ki he kotoa homou ngaahi toʻutangatá. ʻOku totonu ke tatau pē ʻa e mulí mo kimoutolu ʻi he ʻao ʻo Sihová.+
16 ʻOku totonu ke taha pē ʻa e lao mo e tuʻutuʻuni fakaefakamāú kiate kimoutolu pea ki he muli ʻoku nofo mo kimoutolú.’”
17 Naʻe hoko atu ʻa Sihova ʻo ne folofola kia Mōsese:
18 “Lea ki he kau ʻIsilelí ʻo tala kiate kinautolu, ‘ʻI he taimi te mou hū ai ki he fonua ʻoku ou ʻomi kimoutolu ki aí
19 pea mou kai ha mā* pē ʻo e fonuá,+ ʻoku totonu ke mou foaki ha meʻaʻofa kia Sihova.
20 ʻOku totonu ke mou foaki ha meʻaʻofa mei he ʻuluaki fua+ ʻo hoʻomou uité ko e ngaahi foʻi mā fuo hangē ha foʻi mamá. ʻI he hangē ko e meʻaʻofa mei he ʻauʻauʻanga uité ʻoku totonu ke pehē ʻa e founga ʻo hoʻomou meʻaʻofaʻaki iá.
21 ʻOku totonu ke mou foaki ha konga ʻo e ʻuluaki fua ʻo hoʻomou uité ko ha meʻaʻofa kia Sihova ʻi he kotoa homou ngaahi toʻutangatá.
22 “‘Ko eni kapau te mou fai ha fehālaaki pea ʻikai lava ke mou tauhi ʻa e ngaahi fekau kotoa ko eni kuo folofolaʻaki ʻe Sihova kia Mōsesé,
23 ʻa e meʻa kotoa kuo fekau ʻe Sihova kiate kimoutolu fakafou ʻia Mōsesé mei he ʻaho naʻe fai atu ai ʻe Sihova ʻa e fekaú ʻo hokohoko atu ai ki homou ngaahi toʻutangatá,
24 pea kapau naʻe fai ia ʻi ha fehālaaki pea ʻikai ʻilo ki ai ʻa e fuʻu fakatahá, ko e fuʻu fakatahá fakakātoa kuo pau ke nau ʻoatu ha kiʻi pulu tangata ʻe taha ko ha feilaulau tutu, ki ha ngangatu fakahōifua* kia Sihova, fakataha mo hono feilaulau meʻakaí mo hono feilaulau inú ʻo fakatatau ki he founga anga-mahení,+ pea mo ha kosi mui ʻe taha ko ha feilaulau angahala.+
25 ʻE fai ʻe he taulaʻeikí ha feilaulau ʻufiʻufi angahala maʻá e fuʻu fakataha fakakātoa ʻo e kau ʻIsilelí, pea ʻe fakamolemoleʻi kinautolu,+ koeʻuhí ko ha fehālaaki ia, pea naʻa nau ʻomi ko ʻenau feilaulau ha feilaulau ʻoku fai ʻaki ʻa e afi kia Sihova pea mo ʻenau feilaulau angahala ʻi he ʻao ʻo Sihová koeʻuhi ko ʻenau fehālaakí.
26 ʻE fakamolemoleʻi ʻa e fuʻu fakataha fakakātoa ʻo e kau ʻIsilelí pea mo e muli ʻa ia ʻoku nofo ʻi honau lotolotongá, koeʻuhí he ko e fehālaaki ia ʻa e kakaí kotoa.
27 “‘Kapau ʻe fai ʻe ha taha ʻi ha fehālaaki ha angahala, kuo pau leva ke ne ʻoatu ha kosi fefine ʻi hono ʻuluaki taʻú ko ha feilaulau angahala.+
28 Pea ʻe fai ʻe he taulaʻeikí ha feilaulau ʻufiʻufi angahala maʻá e tokotaha naʻá ne fai ha fehālaaki ʻi ha angahala fāinoa ʻi he ʻao ʻo Sihová, ke fai ai ha feilaulau ʻufiʻufi angahala koeʻuhi ko e meʻa ko iá, pea ʻe fakamolemoleʻi ia.+
29 Ka ki he kau tupuʻi fonua ʻi he lotolotonga ʻo e kau ʻIsilelí pea mo e muli ʻoku nofo ʻi honau lotolotongá, ʻoku totonu ke taha pē ʻa e laó kiate kimoutolu ʻi he fekauʻaki mo hono fakahoko fāinoa ha meʻa.+
30 “‘Ka ko e tokotaha ʻokú ne fai ʻosi fakakaukauʻi ha meʻá,+ pe ko ha tupuʻi fonua pe ko ha muli, ʻoku laukovi ia kia Sihova pea kuo pau ke tuʻusi ia mei he lotolotonga ʻo hono kakaí.*
31 Koeʻuhi kuó ne taʻetokaʻi ʻa e folofola ʻa Sihová pea maumauʻi ʻa ʻene fekaú, ko e tokotaha ko iá ʻoku totonu ke mātuʻaki tuʻusi ia.+ Te ne fua ʻa e nunuʻa ʻo ʻene faihalá.’”+
32 Lolotonga ʻa e ʻi he toafá ʻa e kau ʻIsilelí, naʻa nau maʻu ai ha tangata ʻoku tufi fefie ʻi he ʻaho Sāpaté.*+
33 Ko e faʻahinga ko ia naʻa nau maʻu ia ʻoku tufi fefié naʻa nau ʻomi ia kia Mōsese mo ʻĒlone pea mo e fuʻu fakatahá fakakātoa.
34 Naʻa nau tuku tauhi+ ia koeʻuhí he naʻe teʻeki ai ke fakahaaʻi mahino ʻa e meʻa ʻoku totonu ke fai kiate iá.
35 Pea naʻe folofola ʻa Sihova kia Mōsese: “ʻOku totonu ke mātuʻaki tāmateʻi+ ʻa e tangatá, pea ko e fuʻu fakatahá fakakātoa ʻoku totonu ke nau tolomakaʻi ia ʻi he tuʻa ʻapitangá.”+
36 Ko ia naʻe ʻomi ia ʻe he fuʻu fakatahá fakakātoa ki he tuʻa ʻapitangá pea tolomakaʻi ia ʻo ne mate ai, hangē tofu pē ko e tuʻutuʻuni ʻa Sihova kia Mōsesé.
37 Naʻe hoko atu ʻa Sihova ʻo ne folofola ʻaki eni kia Mōsese:
38 “Lea ki he kau ʻIsilelí ʻo tala kiate kinautolu kuo pau ke nau ngaohi maʻanautolu ha pao ʻi he tapa ki lalo ʻo honau kofú ʻi he kotoa ʻo honau ngaahi toʻutangatá, pea ke nau ʻai ha afo pulū ʻi ʻolunga ʻi he pao ʻo e tapa ki lalo ʻo e kofú.+
39 ‘Kuo pau ke mou ʻai ʻa e pao ko ení koeʻuhi ke mou sio ki ai pea manatuʻi ʻa e ngaahi fekau kotoa ʻa Sihová pea tauhi ia.+ Kuo pau ke ʻoua naʻa mou muimui ki homou lotó mo homou matá, ʻa ia ʻokú na tataki kimoutolu ki he faifeʻauaki fakalaumālié.+
40 ʻE tokoniʻi kimoutolu ʻe he meʻá ni ke mou manatuʻi, pea te mou tauhi ai ʻa ʻeku ngaahi fekaú kotoa pea mou hoko ai ʻo māʻoniʻoni ki homou ʻOtuá.+
41 Ko au Sihova ko homou ʻOtuá, ʻa ia naʻá ku ʻomi kimoutolu mei he fonua ko ʻIsipité koeʻuhí ke fakamoʻoniʻi ai ko homou ʻOtuá au.+ Ko au Sihova ko homou ʻOtuá.’”+
Fakamatala ‘i Lalo
^ Pe “fakalolou; fakafiemālie.” Fakafoʻilea, “fakanonga.”
^ Ko ha vahe hongofulu ʻo ha efa naʻe tatau ia mo e lita ʻe 2.2 (kuata ʻe 2 ʻi he fua mōmoá). Sio ki he Fakamatala Fakalahi E14.
^ Ko ha hini naʻe tatau ia mo e lita ʻe 3.67 (painite ʻe 7.75). Sio ki he Fakamatala Fakalahi E14.
^ Pe “fakalolou; fakafiemālie.” Fakafoʻilea, “fakanonga.”
^ Pe “fakalolou; fakafiemālie.” Fakafoʻilea, “fakanonga.”
^ Pe “fakalolou; fakafiemālie.” Fakafoʻilea, “fakanonga.”
^ Pe “fakalolou; fakafiemālie.” Fakafoʻilea, “fakanonga.”
^ Pe “meʻakai.”
^ Pe “fakalolou; fakafiemālie.” Fakafoʻilea, “fakanonga.”
^ Pe “tāmateʻi ia.”
^ Sio ki he Lea mo Hono ʻUhinga.
