Nōmipa 27:1-23
27 Naʻe fakaofiofi mai leva ʻa e ngaahi ʻofefine ʻo Silofehati,+ ko e foha ʻo Hēfeli, ko e foha ʻo Kiliati, ko e foha ʻo Mākili, ko e foha ʻo Manase, mei he ngaahi fāmili ʻo Manase ko e foha ʻo Siosifá. Ko e hingoa ʻo hono ngaahi ʻofefiné ko Mahala, Noa, Hokela, Milika, pea mo Tilisa.
2 Naʻa nau tuʻu ʻi he ʻao ʻo Mōsesé, mo ʻEliesa ko e taulaʻeikí, mo e ngaahi ʻeikí,+ pea mo e kotoa ʻo e fuʻu fakatahá ʻi he hūʻanga ʻo e tēniti feʻiloakiʻangá ʻo nau pehē:
3 “Naʻe mate ʻemau tamaí ʻi he toafá, ka naʻe ʻikai te ne ʻi he lotolotonga ʻo e kulupu naʻa nau kau fakataha ʻo fakafepaki kia Sihová, ʻa e kau poupou ʻo Kolá,+ ka naʻá ne mate koeʻuhí ko ʻene angahala pē ʻaʻana pea naʻe ʻikai hano ngaahi foha.
4 Ko e hā ke mole ai ʻa e hingoa ʻo ʻemau tamaí mei hono fāmilí koeʻuhi ko e ʻikai hano fohá? ʻOmai hamau tofiʻa ʻi he lotolotonga ʻo e fanga tokoua ʻo ʻemau tamaí.”
5 Ko ia naʻe ʻoatu ʻe Mōsese ʻenau meʻá ki he ʻao ʻo Sihová.+
6 Naʻe folofolaʻaki leva eni ʻe Sihova kia Mōsese:
7 “ʻOku tonu ʻa e ngaahi ʻofefine ʻo Silofehatí. ʻOku totonu ke ke mātuʻaki ʻoange kiate kinautolu ʻa e kelekelé ko hanau tofiʻa ʻi he lotolotonga ʻo e fanga tokoua ʻo ʻenau tamaí pea ʻoange ʻa e tofiʻa ʻo ʻenau tamaí kiate kinautolu.+
8 Pea tala ki he kau ʻIsilelí, ‘Kapau ʻe mate ha tangata ʻo ʻikai hano foha, kuo pau leva ke mou ʻai ʻa hono tofiʻá ke ʻalu ia ki hono ʻofefiné.
9 Pea kapau ʻoku ʻikai hano ʻofefine, te mou ʻoange hono tofiʻá ki hono fanga tokouá.
10 Pea kapau ʻoku ʻikai hano fanga tokoua, te mou ʻoange hono tofiʻá ki he fanga tokoua ʻo ʻene tamaí.
11 Pea kapau ko ʻene tamaí ʻoku ʻikai hano fanga tokoua, te mou ʻoange hono tofiʻá ki he kāinga ofi taha ʻi he toto ʻi hono fāmilí, pea te ne maʻu ia. ʻE hoko ʻa e tuʻutuʻuni fakaefakamaau ko ení ko ha lao ki he kau ʻIsilelí, ʻo hangē tofu pē ko e tuʻutuʻuni ʻa Sihova kia Mōsesé.’”
12 Naʻe folofola leva ʻa Sihova kia Mōsese: “ʻAlu hake ki he moʻunga ko eni ʻo ʻApalemí+ ʻo vakai atu ki he fonua te u foaki ki he kau ʻIsilelí.+
13 ʻI he hili hoʻo mamata ki aí, ʻe fakatahaʻi atu foki mo koe ki ho kakaí,*+ ʻo hangē pē ko ho tokoua ko ʻĒloné,+
14 koeʻuhí ʻi he taimi naʻe fakakē ai kiate au ʻi he toafa Siniá ʻa e fuʻu fakatahá, naʻá mo angatuʻu ki heʻeku tuʻutuʻuni ke fakamāʻoniʻoniʻi au ʻi honau ʻaó ʻi he fekauʻaki mo e vaí.+ Ko e vai eni ʻo Mēlipá+ ʻi Kētesi+ ʻi he toafa Siniá.”+
15 Naʻe pehē ange leva ʻe Mōsese kia Sihova:
16 “Tuku kia Sihova, ko e ʻOtua ʻo e laumālie ʻo e kakai kotoa pē,* ke ne fakanofo ki he fuʻu fakatahá ha tangata
17 ʻa ia te ne ʻalu atu mo haʻu ʻi honau ʻaó pea te ne taki atu kinautolu mo ʻomai, koeʻuhi ke ʻoua naʻa hoko ʻa e fuʻu fakataha ʻa Sihová ʻo hangē ha fanga sipi ʻoku ʻikai hanau tauhí.”
18 Ko ia naʻe folofola ai ʻa Sihova kia Mōsese: “ʻAve ʻa Siosiua ko e foha ʻo Nuní, ko ha tangata ʻoku ʻi ai ʻa e tūkunga fakaefakakaukau makehe, pea hilifaki ho nimá ʻiate ia.+
19 Pea fokotuʻu leva ia ʻi he ʻao ʻo ʻEliesa ko e taulaʻeikí pea ʻi he ʻao ʻo e fuʻu fakatahá kotoa, pea kuo pau ke ke fakanofo ia ʻi honau ʻaó.+
20 Te ke ʻoange kiate ia+ ha konga ʻo ho mafaí,* koeʻuhí ke fanongo kiate ia+ ʻa e fuʻu fakataha kotoa ʻo e kau ʻIsilelí.
21 Te ne tuʻu ʻi he ʻao ʻo ʻEliesa ko e taulaʻeikí, ʻa ia te ne fakaʻeke maʻana ʻi he ʻao ʻo Sihová fakafou ʻi he fakamaau ʻa e ʻŪlimí.+ ʻI heʻene tuʻutuʻuní te nau ʻalu atu pea ʻi heʻene tuʻutuʻuní te nau haʻu, ʻa ia mo e kau ʻIsileli kotoa ʻiate iá mo e fuʻu fakatahá kotoa.”
22 Ko ia naʻe fai ʻe Mōsese ʻa e meʻa tofu pē naʻe tuʻutuʻuni ʻe Sihova kiate iá. Naʻá ne ʻave ʻa Siosiua ʻo ne fokotuʻu ia ʻi he ʻao ʻo ʻEliesa ko e taulaʻeikí pea ʻi he ʻao ʻo e fuʻu fakatahá kotoa,
23 peá ne hilifaki hono nimá ʻiate ia ʻo ne fakanofo ia,+ ʻo hangē tofu pē ko e folofola ʻa Sihova fakafou ʻia Mōsesé.+
Fakamatala ‘i Lalo
^ Ko ha kupuʻi lea fakaemaau eni ki he maté.
^ Fakafoʻilea, “ʻo e ngaahi laumālie ʻo e kakano kotoa pē.”
^ Pe “ngeiá.”
