Nōmipa 33:1-56
33 Ko e ngaahi vāʻihala eni ʻo e fononga ʻa e kakai ʻo ʻIsilelí ʻi heʻenau ʻalu atu ʻo fakatatau ki heʻenau ngaahi kulupú*+ mei he fonua ko ʻIsipité+ ʻi he malumalu ʻo e tataki ʻa Mōsese mo ʻĒloné.+
2 Naʻe hanganaki lēkooti ʻe Mōsese ʻa e ngaahi feituʻu naʻa nau mavahe mei aí ʻo fakatatau ki he ngaahi vāʻihala ʻo ʻenau fonongá ʻi he tuʻutuʻuni ʻa Sihová, pea ko honau ngaahi vāʻihalá eni mei he feituʻu ʻe taha naʻa nau mavahe mei aí ki he feituʻu ʻe tahá:+
3 Naʻa nau mavahe mei Lamesisi+ ʻi he ʻuluaki māhiná, ʻi he ʻaho hono 15 ʻo e māhiná.+ ʻI he ʻaho tofu pē ko ia hili ʻa e Pāsová,+ naʻe ʻalu atu ai ʻa e kau ʻIsilelí mo e loto-maʻu* ʻi he ʻao ʻo e kau ʻIsipité kotoa.
4 Lolotonga iá, naʻe tanu ʻe he kau ʻIsipité ʻa e ʻuluaki foha kotoa pē ʻa ia naʻe taaʻi ʻe Sihova ʻi honau lotolotongá,+ he naʻe fakahoko ʻe Sihova ʻa e fakamaau ki honau ngaahi ʻotuá.+
5 Ko ia naʻe mavahe ai ʻa e kau ʻIsilelí mei Lamesisi ʻo ʻapitanga ʻi Sūkote.+
6 Naʻa nau mavahe leva mei Sūkote ʻo ʻapitanga ʻi ʻĒtami,+ ʻa ia ʻoku ʻi he ngataʻanga ʻo e toafá.
7 Ko hono hokó naʻa nau mavahe mei ʻĒtami ʻo nau foki ʻo huʻu ki Piheloti, ʻa ia ʻoku hanga atu ki Pēali-sefoní,+ pea naʻa nau ʻapitanga ʻi muʻa ʻi Mikitoli.+
8 ʻI he hili iá, naʻa nau mavahe mei Piheloti ʻo fou atu ʻi he loto tahí+ ki he toafá+ pea nau hanganaki laka atu ʻi ha fononga ʻaho ʻe tolu ʻi he toafa ʻo ʻĒtamí+ ʻo ʻapitanga ʻi Mala.+
9 Naʻa nau mavahe leva mei Mala ʻo nau aʻu ki ʻĒlimi. Pea ʻi ʻĒlimí naʻe ʻi ai ʻa e ngaahi matavai ʻe 12 mo e ʻulu paame ʻe 70, ko ia naʻa nau ʻapitanga ai.+
10 Ko hono hokó naʻa nau mavahe mei ʻĒlimi ʻo ʻapitanga ʻi he veʻe Tahi Kulokulá.
11 ʻI he hili iá, naʻa nau mavahe mei he Tahi Kulokulá ʻo ʻapitanga ʻi he toafa Siní.+
12 Naʻa nau mavahe leva mei he toafa Siní ʻo ʻapitanga ʻi Tofika.
13 Ki mui ai, naʻa nau mavahe mei Tofika ʻo ʻapitanga ʻi ʻĀlusi.
14 Ko hono hokó naʻa nau mavahe mei ʻĀlusi ʻo ʻapitanga ʻi Lefitimi,+ ʻa ia naʻe ʻikai ke ʻi ai ha vai ke inu ʻe he kakaí.
15 ʻI he hili iá, naʻa nau mavahe mei Lefitimi ʻo ʻapitanga ʻi he toafa Sainaí.+
16 Naʻa nau mavahe mei he toafa Sainaí ʻo ʻapitanga ʻi Kipeloti-hataava.+
17 Naʻa nau mavahe leva mei Kipeloti-hataava ʻo ʻapitanga ʻi Heseloti.+
18 ʻI he hili iá, naʻa nau mavahe mei Heseloti ʻo ʻapitanga ʻi Litima.
19 Ko hono hokó naʻa nau mavahe mei Litima ʻo ʻapitanga ʻi Līmoni-pelesi.
20 Naʻa nau mavahe leva mei Līmoni-pelesi ʻo ʻapitanga ʻi Līpina.
21 Naʻa nau mavahe mei Līpina ʻo ʻapitanga ʻi Lisa.
22 Ko hono hokó naʻa nau mavahe mei Lisa ʻo ʻapitanga ʻi Kehelata.
23 Naʻa nau mavahe leva mei Kehelata ʻo ʻapitanga ʻi Moʻunga Sefeha.
24 ʻI he hili iá, naʻa nau mavahe mei Moʻunga Sefeha ʻo ʻapitanga ʻi Halata.
25 Naʻa nau mavahe leva mei Halata ʻo ʻapitanga ʻi Makaheloti.
26 Ko hono hokó naʻa nau mavahe+ mei Makaheloti ʻo ʻapitanga ʻi Tahati.
27 ʻI he hili iá, naʻa nau mavahe mei Tahati ʻo ʻapitanga ʻi Tela.
28 Naʻa nau mavahe leva mei Tela ʻo ʻapitanga ʻi Miteka.
29 Ki mui ai, naʻa nau mavahe mei Miteka ʻo ʻapitanga ʻi Hasimona.
30 Ko hono hokó naʻa nau mavahe mei Hasimona ʻo ʻapitanga ʻi Moseloti.
31 Naʻa nau mavahe leva mei Moseloti ʻo ʻapitanga ʻi Peni-siakani.+
32 Pea naʻa nau mavahe mei Peni-siakani ʻo ʻapitanga ʻi Hoa-hakitikati.
33 Ko hono hokó naʻa nau mavahe mei Hoa-hakitikati ʻo ʻapitanga ʻi Siotipata.+
34 Ki mui ai, naʻa nau mavahe mei Siotipata ʻo ʻapitanga ʻi ʻApilona.
35 Naʻa nau mavahe leva mei ʻApilona ʻo ʻapitanga ʻi ʻEsioni-kepa.+
36 ʻI he hili iá, naʻa nau mavahe mei ʻEsioni-kepa ʻo ʻapitanga ʻi he toafa Siniá,+ ʻa ia ʻi Kētesi.
37 Ki mui ai, naʻa nau mavahe mei Kētesi ʻo ʻapitanga ʻi Moʻunga Hoa,+ ʻi he kauʻā ʻo e fonua ko ʻĪtomí.
38 Pea ko ʻĒlone ko e taulaʻeikí naʻá ne ʻalu hake ki Moʻunga Hoa ʻi he tuʻutuʻuni ʻa Sihová, ʻo ne mate ai ʻi he taʻu hono 40 hili ʻa e mavahe ʻa e kau ʻIsilelí mei he fonua ko ʻIsipité, ʻi he māhina hono nimá, ʻi he ʻuluaki ʻaho ʻo e māhiná.+
39 Naʻe taʻu 123 ʻa ʻĒlone ʻi heʻene mate ʻi Moʻunga Hoá.
40 Pea ko e tuʻi ʻo ʻĀlatí,+ ʻa e Kēnani ʻa ia naʻe nofo ʻi he feituʻu Nīkepí ʻi he fonua ko Kēnaní, naʻá ne fanongo ʻo fekauʻaki mo e haʻu ʻa e kau ʻIsilelí.
41 ʻI he faai atu ʻa e taimí, naʻa nau mavahe ai mei Moʻunga Hoa+ ʻo ʻapitanga ʻi Salamona.
42 ʻI he hili iá, naʻa nau mavahe mei Salamona ʻo ʻapitanga ʻi Punoni.
43 Ko hono hokó naʻa nau mavahe mei Punoni ʻo ʻapitanga ʻi ʻŌpote.+
44 Naʻa nau mavahe leva mei ʻŌpote ʻo ʻapitanga ʻi Iʻi-ʻapalemi ʻi he kauʻāfonua ʻo Mōapé.+
45 Ki mui ai, naʻa nau mavahe mei Imi* ʻo ʻapitanga ʻi Tīponi-kata.+
46 ʻI he hili iá, naʻa nau mavahe mei Tīponi-kata ʻo ʻapitanga ʻi ʻAlamoni-tipilataimi.
47 Naʻa nau mavahe leva mei ʻAlamoni-tipilataimi ʻo ʻapitanga ʻi he ngaahi moʻunga ʻo ʻApalemí+ ʻi muʻa ʻi Nipo.+
48 Fakaʻosí, naʻa nau mavahe mei he ngaahi moʻunga ʻo ʻApalemí ʻo ʻapitanga ʻi he toafa ʻo Mōapé ʻi he veʻe Sioataní, ofi ki Sielikō.+
49 Naʻe hokohoko atu ʻenau ʻapitanga ʻi he veʻe Sioataní, mei Pete-sisimoti ʻo aʻu ki ʻĒpeli-sitimi+ ʻi he toafa ʻo Mōapé.
50 Naʻe folofola ʻa Sihova kia Mōsese ʻi he toafa ʻo Mōapé ʻi he veʻe Sioataní, ofi ki Sielikō, ʻo pehē:
51 “Lea ki he kau ʻIsilelí ʻo tala kiate kinautolu, ‘Te mou kolosi ʻi Sioatani ki he fonua ko Kēnaní.+
52 Kuo pau ke mou kapusi ʻa e kakai kotoa ʻo e fonuá mei homou ʻaó pea fakaʻauha ʻenau ngaahi tā tongitongi maká+ kotoa mo ʻenau ngaahi ʻīmisi mētalé*+ kotoa, pea ʻoku totonu ke mou fakaʻauha ʻa ʻenau ngaahi potu māʻolunga toputapú kotoa.+
53 Pea te mou maʻu ʻa e fonuá pea nofo ai, he ko e moʻoni te u foaki atu maʻamoutolu ʻa e fonuá ke mou maʻu ia.+
54 Kuo pau ke mou vahe ʻa e fonuá ʻaki hono fai ha lulu+ ki ai ke hoko ko ha tofiʻa ʻi he lotolotonga homou ngaahi fāmilí. Ki he kulupu ʻoku tokolahi angé ʻoku totonu ke mou fakalahi hono tofiʻá, pea ki he kulupu ʻoku tokosiʻi angé ʻoku totonu ke mou fakasiʻisiʻi hono tofiʻá.+ Ko e tofiʻa ʻo e tokotaha kotoa ʻe ʻi he feituʻu ʻe tō ki ai ʻa ʻene lulú. Te mou maʻu homou kelekelé ko ha tofiʻa ʻo fakatatau ki he ngaahi matakali ʻo hoʻomou ngaahi tamaí.+
55 “‘Kae kehe, kapau heʻikai te mou kapusi ʻa e kakai ʻo e fonuá mei homou ʻaó,+ ko e faʻahinga ko ia te mou fakaʻatā ke toé te nau hoko ʻo hangē ko ha lalave ki homou matá mo e talatala ki homou vakavaká, pea te nau fakahohaʻasi kimoutolu ʻi he fonua ʻa ia te mou nofo aí.+
56 Pea te u fai kiate kimoutolu ʻa e meʻa naʻá ku fakataumuʻa ke fai kiate kinautolú.’”+
Fakamatala ‘i Lalo
^ Fakafoʻilea, “ʻo fakatatau ki heʻenau ngaahi kongakaú.”
^ Fakafoʻilea, “mo e nima kuo hiki hake.”
^ Ngalingali ko ha fakanounou ia ʻo e Iʻi-ʻapalemí.
^ Pe “ngaahi ʻīmisi mētale kuo haká.”
