Nōmipa 8:1-26
8 Naʻe folofola ʻa Sihova kia Mōsese, ʻo pehē:
2 “Lea kia ʻĒlone ʻo tala kiate ia, ‘ʻI he taimi te ke tutu ai ʻa e ngaahi māmá, ʻoku totonu ke ulo ʻa e maama ʻe fitú ki he feituʻu ʻi muʻa ʻi he tuʻunga-māmá.’”+
3 Ko ia naʻe fai ʻe ʻĒlone ʻa e meʻa ko ení: Ko hono ngaahi māmá naʻá ne tutu ia ke ulo ki he feituʻu ʻi muʻa ʻi he tuʻunga-māmá,+ ʻo hangē tofu pē ko e tuʻutuʻuni ʻa Sihova kia Mōsesé.
4 Ko e founga eni ʻo hono ngaohi ʻo e tuʻunga-māmá: Ko e koula ia kuo tuki; mei hono sinó ki hono ngaahi lauʻimatalá, naʻe tuki ia.+ Naʻe ngaohi ʻa e tuʻunga-māmá ʻo fakatatau ki he vīsone+ naʻe ʻai ʻe Sihova ke hā kia Mōsesé.
5 Naʻe toe folofola ʻa Sihova kia Mōsese, ʻo pehē:
6 “ʻAve ʻa e kau Līvaí mei he lotolotonga ʻo e kau ʻIsilelí, pea fakamaʻa kinautolu.+
7 Ko e founga eni ʻoku totonu ke ke fakamaʻa ai kinautolú: Afuhi ʻiate kinautolu ʻa e vai fakamaʻa angahalá, pea kuo pau ke nau tele honau sinó kotoa ʻaki ha tele, fō honau ngaahi kofú, pea fakamaʻa kinautolu.+
8 Te nau toʻo leva ha kiʻi pulu tangata+ mo hono feilaulau meʻakai+ ko e mahoaʻa lelei kuo fio mo e loló, pea te ke toʻo mo ha kiʻi pulu tangata ʻe taha ki ha feilaulau angahala.+
9 Pea te ke ʻomai leva ʻa e kau Līvaí ki muʻa ki he tēniti feʻiloakiʻangá pea fakatahatahaʻi mai ʻa e fuʻu fakataha kotoa ʻo e kau ʻIsilelí.+
10 ʻI hoʻo ʻomai ʻa e kau Līvaí ki he ʻao ʻo Sihová, ʻe hilifaki ʻe he kau ʻIsilelí ʻa honau nimá ʻi he kau Līvaí.+
11 Pea kuo pau ke foaki* ʻe ʻĒlone ʻa e kau Līvaí ʻi he ʻao ʻo Sihová ko ha feilaulau hapai+ mei he kau ʻIsilelí, pea te nau fakahoko ʻa e ngāue ʻa Sihová.+
12 “ʻE hilifaki leva ʻe he kau Līvaí ʻa honau nimá ʻi he ʻulu ʻo e ongo pulu tangatá.+ Hili iá, foaki ʻa e taha ko ha feilaulau angahala pea ko e taha ko ha feilaulau tutu kia Sihova ke faiʻaki ʻa e feilaulau ʻufiʻufi angahala+ maʻá e kau Līvaí.
13 Pea te ke ʻai ʻa e kau Līvaí ke nau tuʻu ʻi he ʻao ʻo ʻĒlone mo hono ngaahi fohá pea foaki atu* kinautolu ko ha feilaulau hapai kia Sihova.
14 Kuo pau ke ke fakamavaheʻi ʻa e kau Līvaí mei he lotolotonga ʻo e kau ʻIsilelí, pea ʻe hoko ʻo ʻaʻaku ʻa e kau Līvaí.+
15 ʻI he hili iá, ʻe haʻu ʻa e kau Līvaí ke ngāue ʻi he tēniti feʻiloakiʻangá. Ko e founga eni ʻoku totonu ke ke fakamaʻa ʻaki kinautolú pea foaki atu* kinautolu ko ha feilaulau hapai.
16 He ko e faʻahinga kinautolu kuo foaki, kuo ʻomi kiate au mei he lotolotonga ʻo e kau ʻIsilelí. Te u toʻo kinautolu maʻaku ko e fetongi ʻo e faʻahinga kotoa ʻa ia ko e ʻuluaki foha* ʻo e kau ʻIsilelí.+
17 He ko e ʻuluaki foha kotoa pē ʻi he lotolotonga ʻo e kau ʻIsilelí ʻoku ʻaʻaku ia, fakatouʻosi ʻa e tangata mo e manu.+ Naʻá ku fakatapui kinautolu maʻaku ʻi he ʻaho naʻá ku taaʻi ai ʻa e ʻuluaki foha kotoa pē ʻi he fonua ko ʻIsipité.+
18 Te u toʻo ʻa e kau Līvaí ko e fetongi ʻo e ʻuluaki foha kotoa pē ʻi he lotolotonga ʻo e kau ʻIsilelí.
19 Te u foaki ʻa e kau Līvaí ko e faʻahinga kuo foaki kia ʻĒlone mo hono ngaahi fohá mei he lotolotonga ʻo e kau ʻIsilelí, ke nau fakahoko ʻa e ngāue maʻá e kau ʻIsilelí ʻi he tēniti feʻiloakiʻangá+ pea ke fai ʻa e feilaulau ʻufiʻufi angahala maʻá e kau ʻIsilelí, koeʻuhi ke ʻoua naʻa hoko ha mala ʻi he lotolotonga ʻo e kau ʻIsilelí+ koeʻuhí ko e haʻu ʻa e kakai ʻo ʻIsilelí ʻo ofi ki he potu toputapú.”
20 Ko Mōsese mo ʻĒlone mo e fuʻu fakataha kotoa ʻo e kau ʻIsilelí naʻa nau fai eni ki he kau Līvaí. ʻI he fakatatau ki he meʻa kotoa naʻe tuʻutuʻuni ʻe Sihova kia Mōsese ʻo fekauʻaki mo e kau Līvaí, ko e meʻa ia naʻe fai ʻe he kau ʻIsilelí kiate kinautolú.
21 Ko ia naʻe fakamaʻa ʻe he kau Līvaí kinautolu pea fō honau ngaahi kofú,+ hili iá naʻe foaki atu* kinautolu ʻe ʻĒlone ko ha feilaulau hapai ʻi he ʻao ʻo Sihová.+ Pea naʻe fai leva ʻe ʻĒlone ʻa e feilaulau ʻufiʻufi angahala maʻanautolu ke fakamaʻa kinautolu.+
22 ʻI he hili iá, naʻe hū atu ʻa e kau Līvaí ke fakahoko ʻenau ngāue ʻi he tēniti feʻiloakiʻangá ʻi he ʻao ʻo ʻĒlone mo hono ngaahi fohá. Hangē tofu pē ko e tuʻutuʻuni ʻa Sihova kia Mōsese fekauʻaki mo e kau Līvaí, naʻa nau fai pehē kiate kinautolu.
23 Naʻe folofola leva ʻa Sihova kia Mōsese, ʻo pehē:
24 “Ko e meʻa eni ʻe ngāueʻaki ki he kau Līvaí: Mei he taʻu 25 ʻo faai ki ʻolunga, ʻe kau ha tangata ʻi he faʻahinga ko ia ʻoku ngāue ʻi he tēniti feʻiloakiʻangá.
25 Ka ʻi he hili ʻa hono taʻu 50, te ne mālōlō ai mei he faʻahinga ʻoku ngāué ʻo ʻikai te ne kei ngāue.
26 ʻE lava ke ne ngāue maʻa hono fanga tokoua ʻoku nau tokangaʻi ʻa e ngaahi fatongia ʻi he tēniti feʻiloakiʻangá, ka kuo pau ke ʻoua te ne fai ʻa e ngāué ʻi ai. Ko e meʻa eni te ke fai ʻo fekauʻaki mo e kau Līvaí mo honau ngaahi fatongiá.”+
Fakamatala ‘i Lalo
^ Fakafoʻilea, “hapai,” ʻa ia, ko hono ʻai ki tafaʻaki mo tafaʻaki.
^ Fakafoʻilea, “hapai,” ʻa ia, ko hono ʻai ki tafaʻaki mo tafaʻaki.
^ Fakafoʻilea, “hapai,” ʻa ia, ko hono ʻai ki tafaʻaki mo tafaʻaki.
^ Pe “ʻuluaki foha kotoa pē ʻokú ne fakaava ʻa e manava.”
^ Fakafoʻilea, “hapai,” ʻa ia, ko hono ʻai ki tafaʻaki mo tafaʻaki.
