Ngāue ʻa e Kau ʻApositolo 4:1-37
4 ʻI he lolotonga ko ia ʻena lea ki he kakaí, naʻe omi kiate kinaua ʻa e kau taulaʻeikí, kapiteni ʻo e kau leʻo ʻo e temipalé, pea mo e kau Sātusí.+
2 Naʻe ʻita ʻa e faʻahingá ni koeʻuhi ko e akoʻi ʻe he ongo ʻapositoló ʻa e kakaí mo ʻena talaki fakahāhā ʻa e toetuʻu ko ia ʻa Sīsū mei he maté.+
3 Ko ia naʻa nau puke kinaua ʻo tuku pōpula+ kae ʻoua ke aʻu ki he ʻaho ʻe tahá, he naʻe ʻosi efiafi.
4 Kae kehe, ko e tokolahi ʻo e faʻahinga naʻa nau fanongo ki heʻena leá naʻa nau tui, pea ko e tokolahi ʻo e kakai tangatá naʻe toko 5,000 nai.+
5 ʻI he ʻaho hono hokó, naʻe fakatahataha ai ʻa honau kau pulé, kau mātuʻá, pea mo e kau sikalaipé ʻi Selusalema,
6 fakataha mo ʻĀnasi+ ko e ʻeiki taulaʻeikí, Kaiafasi,+ Sione, ʻĀlekisānita, pea mo e kāinga kotoa ʻo e ʻeiki taulaʻeikí.
7 Naʻa nau fokotuʻu ʻa Pita mo Sione ʻi honau lotolotongá ʻo kamata fakafehuʻi: “ʻI he mafai fē pe ko e hingoa ʻo hai naʻá mo fai ai ʻa e meʻá ni?”
8 Pea ko Pita, ʻi heʻene fonu ʻi he laumālie māʻoniʻoní,+ naʻá ne pehē ange kiate kinautolu:
“ʻA e kau pule ʻo e kakaí pea mo e kau mātuʻá,
9 kapau ʻoku fakaʻeke kimaua ʻi he ʻahó ni ʻo fekauʻaki mo ha ngāue lelei ki ha tangata heke,+ pea ʻoku mou loto ke ʻilo pe ko hai naʻá ne ʻai ʻa e tangatá ni ʻo saí,
10 tuku ke ʻilo ʻe kimoutolu kotoa pea pehē ki he kakai kotoa ʻo ʻIsilelí, ko e huafa ʻo Sīsū Kalaisi ko e Nāsaletí,+ ʻa ia naʻa mou tautau ʻi he ʻakaú+ ka naʻe fokotuʻu hake ʻe he ʻOtuá mei he maté,+ ʻoku fakafou ʻiate ia ʻa e tuʻu heni ʻa e tangatá ni kuo moʻui lelei ʻi homou haʻohaʻongá.
11 Ko eni ia ‘ʻa e maka naʻe ʻikai fakamahuʻingaʻi ʻe kimoutolu kau tufungá kuo hoko ia ko e maka-tuliki tefitó.’*+
12 Pehē foki, ʻoku ʻikai ha fakamoʻui ʻi ha toe taha kehe, he ʻoku ʻikai mo ha toe hingoa+ ʻi he lalo langí kuo tuku mai ki he haʻohaʻonga ʻo e tangatá ʻa ia kuo pau ke tau maʻu ai ʻa e moʻuí.”+
13 Pea ʻi heʻenau sio ko ia ki he lea hangatonu* ʻa Pita mo Sioné, mo ʻilo ko e ongo tangata taʻeako* mo lāuvale kinauá,+ naʻa nau fakatumutumu. Pea naʻe kamata ke nau ʻiloʻi naʻá na faʻa ʻia Sīsū.+
14 ʻI heʻenau mamata ki he tangata kuo fakamoʻuí ʻoku tuʻu mai mo kinauá,+ naʻe ʻikai haʻanau toe tali ʻe fai ki he meʻá ni.+
15 Ko ia naʻa nau fekauʻi kinaua ke na hū ki tuʻa mei he holo Sanetalimí,* pea naʻa nau kamata fealēleaʻaki,
16 ʻo pehē: “Ko e hā te tau fai ki he ongo tangatá ni?+ He ko hono moʻoní, kuo hoko fakafou ʻiate kinaua ha mana fakaofo, ko e maná kuo hā mahino atu ki he kau nofo Selusalema kotoa pē,+ pea ʻoku ʻikai lava ke tau fakaʻikaiʻi ia.
17 Koeʻuhi ke ʻoua naʻa toe mafola lahi atu eni ki he kakaí, tuku ke tau fakamanamanaʻi kinaua pea tala ange ke ʻoua te na toe lea ki ha taha ʻi he huafa ko ení.”+
18 ʻI he meʻa ko iá naʻa nau ui kinaua pea nau tuʻutuʻuni ange ke ʻoua ʻaupito te na toe lea pe faiako ʻi he huafa ʻo Sīsuú.
19 Ka ʻi he tali ki aí, naʻe pehē ange ʻe Pita mo Sione kiate kinautolu: “Tatau ai pē pe ʻoku totonu ʻi he vakai ʻa e ʻOtuá ke ma fanongo kiate kimoutolu kae ʻikai ki he ʻOtuá, fai haʻamou fakamaau.
20 Ka kiate kimaua, ʻe ʻikai lava ke tuku ʻema lea ʻo fekauʻaki mo e ngaahi meʻa kuó ma mamata mo fanongo ki aí.”+
21 Ko ia ʻi he hili haʻanau toe fakamanamanaʻi kinaua, naʻa nau tuku ange kinaua, he naʻe ʻikai te nau ʻilo ha makatuʻunga ke tautea ai kinaua pea koeʻuhi ko e kakaí,+ he naʻa nau fakalāngilangiʻi kotoa ʻa e ʻOtuá ʻi he meʻa kuo hokó.
22 He ko e tangata naʻe fakahoko ai ʻa e mana ʻo e fakamoʻui ko ení naʻe taʻu 40 tupu.
23 ʻI he hili hono tuku ange kinauá, naʻá na ʻalu atu ki hona kakaí ʻo fakamatala ʻa e meʻa naʻe leaʻaki kiate kinaua ʻe he houʻeiki taulaʻeikí mo e kau mātuʻá.
24 ʻI heʻenau fanongo ki he meʻá ni, naʻa nau hiki fakataha hake honau leʻó ki he ʻOtuá ʻo pehē:
“ʻEiki Hau, ko koe ʻa e Tokotaha naʻá ke ngaohi ʻa e langí mo e māmaní mo e tahí pea mo e ngaahi meʻa kotoa ʻoku ʻi aí,+
25 pea naʻá ke folofola fakafou ʻi he laumālie māʻoniʻoní ʻi he ngutu ʻo ʻemau kui ko Tēvitá,+ ko hoʻo sevānití: ‘Ko e hā naʻe hoko ai ʻo hohaʻatuʻu ʻa e ngaahi puleʻangá pea fakakaukauloto ʻa e ngaahi kakaí ki he ngaahi meʻa taʻeʻaongá?
26 Naʻe tuʻu mai ʻa e ngaahi tuʻi ʻo e māmaní pea fakatahataha ʻa e kau pulé ke fakafepaki kia Sihova* mo ʻene tokotaha paní.’*+
27 He ko e moʻoni ko Hēlota mo Ponitō Pailato+ fakataha mo e kau tangata ʻo e ngaahi puleʻangá pea mo e kakai ʻo ʻIsilelí naʻa nau fakatahataha ʻi he koló ni ʻo fakafepaki ki hoʻo sevāniti tapu ko Sīsuú, ʻa ia naʻá ke paní,+
28 ke nau fai ʻa e meʻa naʻe tomuʻa fakapapauʻi ʻe ho toʻukupú pea mo ho finangaló ke hokó.+
29 Pea ko eni, Sihova,* tokanga ki heʻenau ngaahi fakamanamaná, pea tuku ki hoʻo kau tamaioʻeikí ke nau hanganaki lea loto-toʻa ʻaki ʻa hoʻo folofolá,
30 lolotonga ia hoʻo mafao atu ho toʻukupú ke faifakamoʻui pea ʻi he lolotonga ia ʻa e hoko ʻa e ngaahi mana mo e ngaahi meʻa fakaofo+ fakafou ʻi he huafa ʻo hoʻo sevāniti tapu ko Sīsuú.”+
31 Pea ʻi he hili ʻenau fai ʻa e hū tōtōakí,* naʻe ngalulululu ʻa e feituʻu naʻa nau fakatahataha aí, pea naʻe fakafonu kotoa kinautolu ʻaki ʻa e laumālie māʻoniʻoní+ pea nau lea loto-toʻa ʻaki ʻa e folofola ʻa e ʻOtuá.+
32 ʻIkai ngata aí, ko e fuʻu tokolahi ʻo e faʻahinga ko ia naʻe tuí naʻa nau loto-taha mo fakakaukau taha pē, pea naʻe ʻikai naʻa mo ha taha ʻo kinautolu naʻá ne pehē, ko ha meʻa pē ʻokú ne maʻu ko e meʻa pē ia ʻaʻana, ka naʻa nau fevahevaheʻaki ʻa e meʻa kotoa pē.+
33 Pea ʻi ha fuʻu mālohi lahi, naʻe hokohoko atu ai ʻa e faifakamoʻoni ʻa e kau ʻapositoló ʻo fekauʻaki mo e toetuʻu ʻa e ʻEiki ko Sīsuú,+ pea naʻe ʻiate kinautolu kotoa ʻa e ʻofa maʻataʻatā ʻa e ʻOtuá ʻo lahi ʻaupito.
34 Ko hono moʻoní, naʻe ʻikai ha taha ʻiate kinautolu naʻe masiva ʻi ha meʻa,+ he ko e faʻahinga kotoa naʻe ʻi ai honau ngaahi ʻapi pe ngaahi falé naʻa nau fakatau atu ia pea ʻomi ʻa e mahuʻinga ʻo e meʻa naʻe fakatau atú,
35 ʻo nau tuku atu ki he vaʻe ʻo e kau ʻapositoló.+ Ko ia naʻe vahevahe atu ia ki he tokotaha taki taha ʻo fakatatau ki heʻene fiemaʻú.+
36 Ko ia ko Siosifa, ʻa ē naʻe toe ui ʻe he kau ʻapositoló ko Panepasá+ (ʻa ia ʻoku ʻuhingá, ʻi hono liliú, ko e “Foha ʻo e Fakafiemālié”), ko ha Līvai ia, ko ha tupuʻi Saipalo,
37 naʻe ʻi ai hono konga kelekele, pea naʻá ne fakatau atu ia peá ne ʻomai ʻa e paʻangá ʻo ne tuku atu ki he vaʻe ʻo e kau ʻapositoló.+
Fakamatala ‘i Lalo
^ Fakafoʻilea, “ko e ʻulu ʻo e maka-tulikí.”
^ Pe “ki he loto-toʻa.”
^ ʻA ia, ko e ʻikai ako ʻi he ngaahi ʻapiako fakalāpaí; ʻoku ʻikai ʻuhingá naʻá na vale he lautohí mo e tohí.
^ Sio ki he Lea mo Hono ʻUhinga.
^ Sio ki he Fakamatala Fakalahi A5.
^ Pe “ʻene Kalaisí.”
^ Sio ki he Fakamatala Fakalahi A5.
^ Pe “ʻa e lotu fakamātoató.”
