Fakamaau 10:1-18
10 ʻI he hili ʻa ʻApimelekí, ko Tola ko e foha ʻo Puá, ko e foha ʻo Toto, ko ha tangata ʻĪsaka, naʻá ne tuʻu hake ke fakahaofi ʻa ʻIsileli.+ Naʻá ne nofo ʻi Samili ʻi he feituʻu moʻungaʻia ʻo ʻIfalemí.
2 Naʻá ne fakamaau ʻi ʻIsileli ʻi he taʻu ʻe 23. Pea naʻá ne mate pea naʻe tanu ia ʻi Samili.
3 ʻI he hili ʻa Tolá naʻe tuʻu hake ʻa Saili ko e tangata Kiliati ʻo ne fakamaau ʻi ʻIsileli ʻi he taʻu ʻe 22.
4 Naʻe ʻi ai hono ngaahi foha ʻe toko 30 ʻa ia naʻa nau heka ʻi he fanga ʻasi ʻe 30, pea naʻe ʻi ai honau ngaahi kolo ʻe 30, ʻa ia ʻoku ui ko Havoti-saili+ ʻo aʻu mai ki he ʻahó ni; ʻoku ʻi he fonua ia ko Kiliatí.
5 ʻI he hili iá, naʻe mate ʻa Saili pea naʻe tanu ia ʻi Kamoni.
6 Naʻe toe fai ʻe he kau ʻIsilelí ʻa e meʻa naʻe kovi ʻi he vakai mai ʻa Sihová,+ pea naʻe kamata ke nau tauhi ki he ngaahi Pēalí,+ ko e ngaahi ʻīmisi ʻAsitelotí, ko e ngaahi ʻotua ʻo ʻĒlamí,* ko e ngaahi ʻotua ʻo Saitoní, ko e ngaahi ʻotua ʻo Mōapé,+ ko e ngaahi ʻotua ʻo e kau ʻĀmoní,+ pea mo e ngaahi ʻotua ʻo e kau Filisitiá.+ Naʻa nau liʻaki ʻa Sihova pea ʻikai te nau tauhi kiate ia.
7 Naʻe kakaha leva ʻa e houhau ʻa Sihová ki ʻIsileli, pea naʻá ne fakatau atu kinautolu ki he nima ʻo e kau Filisitiá pea mo e kau ʻĀmoní.+
8 Ko ia naʻa nau laiki mo lōmekina lahi ʻa e kau ʻIsilelí ʻi he taʻu ko iá—naʻe feʻunga mo e taʻu ʻe 18 ʻa ʻenau lōmekina ʻa e kau ʻIsilelí kotoa ʻi he tafaʻaki ʻo Sioatani ʻa ia naʻe hoko ko e fonua ʻo e kau ʻĀmolí ʻi Kiliatí.
9 Naʻe kolosi atu foki ʻa e kau ʻĀmoní ʻi Sioatani ke tauʻi ʻa Siuta mo Penisimani pea mo e fale ʻo ʻIfalemí; pea naʻe faingataʻaʻia lahi ʻa ʻIsileli.
10 Naʻe ui tokoni+ leva ʻa e kau ʻIsilelí kia Sihova, ʻo pehē: “Kuo mau faiangahala kiate koe, he kuo mau liʻaki ʻa homau ʻOtuá pea tauhi ki he ngaahi Pēalí.”+
11 Ka naʻe folofola ʻa Sihova ki he kau ʻIsilelí: “ʻIkai naʻá ku fakahaofi kimoutolu mei ʻIsipite+ pea mei he kau ʻĀmolí,+ ko e kau ʻĀmoní, ko e kau Filisitiá,+
12 ko e kau Saitoní, ʻAmaleki, pea mo Mitiani, ʻi he taimi naʻa nau lōmekina ai kimoutolú? ʻI hoʻomou tangi mai kiate aú, naʻá ku fakahaofi kimoutolu mei honau nimá.
13 Ka naʻa mou liʻaki au pea tauhi ki he ngaahi ʻotua kehé.+ Ko e ʻuhinga ia heʻikai ai te u toe fakahaofi kimoutolú.+
14 Mou ō ki he ngaahi ʻotua kuo mou filí pea ui tokoni+ ki ai. Tuku ke nau fakahaofi kimoutolu ʻi he taimi ʻo hoʻomou faingataʻaʻiá.”+
15 Ka naʻe pehē ʻe he kau ʻIsilelí kia Sihova: “Kuo mau faiangahala. Fai mai kiate kimautolu ha meʻa pē ʻokú ke hōifua ki aí. Ko e meʻá pē ke ke fakahaofi muʻa kimautolu ʻi he ʻahó ni.”
16 Pea naʻa nau toʻo ʻa e ngaahi ʻotua mulí mei honau lotolotongá pea tauhi kia Sihova,+ ko ia naʻe ʻikai ai kei lava ke ne makātakiʻi ʻa e mamahi ʻa ʻIsilelí.+
17 ʻI he faai atu ʻa e taimí naʻe ui ʻa e kau ʻĀmoní+ ke nau fakatahataha mai, pea naʻa nau fokotuʻu ʻapitanga ʻi Kiliati. Ko ia naʻe fakatahataha ai ʻa e kau ʻIsilelí pea nau fokotuʻu ʻapitanga ʻi Misipā.
18 Naʻe fepehēʻaki ʻe he kakai mo e houʻeiki ʻo Kiliatí: “Ko hai ʻe takimuʻa ʻi hono tauʻi ʻa e kau ʻĀmoní?+ Tuku ia ke ne hoko ko e ʻeiki ki he kakai kotoa ʻo Kiliatí.”
Fakamatala ‘i Lalo
^ Pe “Sīliá.”
