Ki he Kau Loma 16:1-27
16 ʻOku ou fakafeʻiloaki* atu kiate kimoutolu ʻa Fīpē, ko hotau tuofefiné, ʻa ia ʻoku faifatongia ʻi he fakatahaʻanga ʻoku ʻi Senikeleá,+
2 koeʻuhi ke mou talitali lelei ia ʻi he ʻEikí ʻi ha founga ʻoku tuha mo e kakai tapú pea ʻoange kiate ia ha faʻahinga tokoni pē te ne fiemaʻu,+ he kuó ne hoko foki ko e tokoni ki he tokolahi ʻo kau ai mo au.
3 Tala hoku ʻofa kia Pīsila mo ʻAkuila+ ko hoku ongo kaungāngāue ʻia Kalaisi Sīsū,
4 ʻa ia kuó na tuku atu ʻena moʻuí*+ ke ʻi ha tuʻunga fakatuʻutāmaki koeʻuhiā ko au pea ʻoku ʻikai ngata pē ʻiate au ʻeku ʻoatu ʻa e fakamālō kiate kinauá kae toe pehē foki ki he ngaahi fakatahaʻanga kotoa ʻo e ngaahi puleʻangá.
5 ʻOfa atu foki ki he fakatahaʻanga ʻa ia ʻoku ʻi hona ʻapí.+ ʻOfa atu ki hoku kaungāmeʻa ʻofeina ko ʻĪpenitusí, ʻa ia ko ha ʻuluaki fua ia ʻo ʻĒsia maʻa Kalaisi.
6 ʻOfa atu kia Mele, ʻa ia kuó ne ngāue mālohi maʻamoutolú.
7 ʻOfa atu kia ʻAnitalonaika mo Sūnia ko hoku kāinga+ mo hoku kaungā-nofo pilīsoné, ʻa ia ko e ongo tangata ʻoku ʻiloʻi lelei ʻe he kau ʻapositoló pea kuó na fāʻūtaha mo Kalaisi ʻo fuoloa ange ia ʻiate au.
8 Tala hoku ʻofa kia ʻAmipeleasi ko hoku kaungāmeʻa ʻofeina ʻi he ʻEikí.
9 ʻOfa atu kia ʻUapane ko hotau kaungāngāue ʻia Kalaisi, pea mo hoku kaungāmeʻa ʻofeina ko Sītakí.
10 ʻOfa atu kia ʻĀpeli, ko e tokotaha anga-tonu ʻia Kalaisí. ʻOfa atu ki he faʻahinga ʻi he fale ʻo ʻAlisitopuló.
11 ʻOfa atu kia Helotioni ko hoku kāingá. ʻOfa atu ki he faʻahinga ʻi he fale ʻo Nāsisó ʻa ia ʻoku ʻi he ʻEikí.
12 ʻOfa atu kia Talaifina mo Talaifosa, ko e ongo fefine ʻokú na ngāue mālohi ʻi he ʻEikí. ʻOfa atu kia Pēsisi ko hotau kaungāmeʻa ʻofeiná, he kuó ne ngāue mālohi ʻi he ʻEikí.
13 ʻOfa atu kia Lūfusi ko e sevāniti kuo fili ʻa e ʻEikí, pea mo ʻene faʻeé ʻa ia ko siʻeku faʻē foki.
14 ʻOfa atu kia ʻAsinikalaito, Felekoni, Heamesi, Patalopa, Heamasi, pea mo e fanga tokoua ʻoku ʻiate kinautolú.
15 ʻOfa atu kia Filoloko mo Sūlia, Nīlio mo hono tuofefiné, pea mo ʻOlimipā, pea mo e kotoa ʻo e kakai tapu ʻoku ʻiate kinautolú.
16 Mou fefaiʻaki hoʻomou feʻiloakí ʻaki ha ʻuma māʻoniʻoni.* Ko e kotoa ʻo e ngaahi fakatahaʻanga ʻa e Kalaisí ʻoku nau ʻofa atu kiate kimoutolu.
17 ʻOku ou enginaki atu leva kiate kimoutolu, fanga tokoua, ke mou siofi maʻu pē ʻa e faʻahinga ʻoku nau fakatupunga ʻa e māvahevahé mo fakatupunga ʻa e tūkiá ʻa ia ʻoku ʻalu kehe ia mei he akonaki kuo mou ʻosi akó, pea fakaʻehiʻehi meiate kinautolu.+
18 He ko e kau tangata peheé ko e kau pōpula kinautolu, ʻo ʻikai maʻa hotau ʻEiki ko Kalaisí, ka ki heʻenau ngaahi holi pē ʻa kinautolú,* pea ʻi he lea momole-ʻolunga mo e lea fakahekeheké ʻoku nau kākaaʻi ai ʻa e loto ʻo e faʻahinga ʻoku loto-maʻá.
19 Ko hoʻomou talangofuá kuo fakatokangaʻi ia ʻe he tokotaha kotoa, pea ko ia ʻoku ou fiefia ʻiate kimoutolu. Ka ʻoku ou loto ke mou poto ʻi he fekauʻaki mo e meʻa ʻoku leleí, kae taʻehalaia ʻi he fekauʻaki mo e meʻa ʻoku koví.+
20 Pea ko e ʻOtuá ʻa ia ʻokú ne foaki ʻa e melinó kuo vavé ni ke ne laiki ʻa Sētane+ ʻi homou lalo vaʻé. Fakatauange ke ʻiate kimoutolu ʻa e ʻofa maʻataʻatā ʻa hotau ʻEiki ko Sīsuú.
21 ʻOku ʻofa atu hoku kaungāngāue ko Tīmoté kiate kimoutolu, pea ʻoku ʻofa atu foki mo hoku kāinga+ ko Lusiō, Sēsoni mo Sosipetá.
22 Ko au, Teasio, ʻa ia kuó u fai ʻa e tohí ni, ʻoku ou ʻofa atu ʻi he ʻEikí kiate kimoutolu.
23 Ko Keio,+ ʻa ia kuó ne talitali lelei au ki hono ʻapí pea mo e kotoa ʻo e fakatahaʻangá, ʻokú ne ʻofa atu kiate kimoutolu. Ko ʻElasito ko e tauhi paʻanga* ʻa e koló ʻokú ne ʻofa atu kiate kimoutolu, pea ʻoku ʻofa atu foki mo Kuato ko hono tokouá.
24 *——
25 Pea ke fakahīkihikiʻi ʻa e ʻOtuá ʻa ia ʻoku malava ke ne ʻai kimoutolu ke mou tuʻu maʻu ʻo fakatatau ki he ongoongo lelei ʻoku ou talakí pea mo hono malangaʻi ʻo Sīsū Kalaisí, ʻo fakatatau ki hono fakaeʻa ʻo e fakalilolilo toputapu+ ʻa ia ne fuoloa hono tuku fufū
26 ka ko eni kuo fakaeʻa* pea kuo ʻai ʻo ʻiloʻi ʻi he lotolotonga ʻo e ngaahi puleʻangá kotoa fakafou ʻi he Folofola fakaekikité ʻo fakatatau ki he fekau ʻa e ʻOtua taʻengatá ke pouaki ʻa e talangofua ʻi he tuí;
27 ʻio, ki he ʻOtuá, ʻa ia toko taha pē ʻoku potó,+ ke ʻaʻana ʻa e lāngilangí ʻo taʻengata fakafou ʻia Sīsū Kalaisi. ʻĒmeni.
Fakamatala ‘i Lalo
^ Pe “fakaongoongoleleiʻi.”
^ Fakafoʻilea, “hona kiá.”
^ Pe “ha fakafeʻiloaki māfana.”
^ Pe “ki honau kete pē ʻo kinautolú.”
^ Pe “sētuata.”
^ Sio ki he Fakamatala Fakalahi A3.
^ Pe “fakahā.”
