Nehemaia 4:1-23
4 Pea ʻi he fanongo pē ʻa Sanipalate+ naʻa mau toe langa ʻa e ʻaá, naʻá ne ʻita mo loto-mamahi ʻaupito, ʻo ne hanganaki manumanukiʻi ʻa e kau Siú.
2 Pea naʻá ne pehē ʻi he ʻao ʻo hono fanga tokouá mo e kau tau ʻa Samēliá: “Ko e hā ʻa e meʻa ʻoku fai ʻe he kau Siu vaivaí na? Te nau fai koā ʻe kinautolu pē ʻa e meʻá ni? Te nau fai koā ha ngaahi feilaulau? Te nau fakaʻosi koā ia ʻi ha foʻi ʻaho pē ʻe taha? Te nau toe fakamoʻui mai koā ʻa e ngaahi maka naʻe velá mei he fokotuʻunga efuefu mapakipakiʻi maká?”+
3 Pea naʻe pehē ʻe Tōpaia+ ko e tangata ʻĀmoni,+ ʻa ia naʻe tuʻu ʻi hono tafaʻakí: “Kapau ʻe kaka naʻa mo ha fōkisi ʻi he meʻa ʻoku nau langá, ʻe holo ʻa honau ʻā maká.”
4 Fanongo mai muʻa, ʻe homau ʻOtua, he ʻoku fai homau taʻetokaʻi,+ pea tuku ke foki ʻa ʻenau fakaʻalumá ki honau tumuʻakí,+ pea tuku atu kinautolu ke nau hoko ko e koloa vete* ʻi ha fonua fakapōpula.
5 Pea ke ʻoua naʻa ʻufiʻufi ʻa ʻenau hiá pe tuku ke tāmateʻi ʻa ʻenau angahalá mei ho ʻaó,+ he kuo nau laukovi ki he kau langá.
6 Ko ia naʻa mau hokohoko atu ʻi hono toe langa ʻa e ʻaá mo tātāpuni ʻa e konga ʻo e ʻaá ʻa ia naʻe holó ʻo aʻu ki he vaeua ʻo hono māʻolungá, pea naʻe hokohoko atu ʻa hono lotoʻaki ʻe he kakaí ʻa e ngāué.
7 Pea ʻi he fanongo pē ʻa Sanipalate, Tōpaia,+ ko e kau ʻAlepeá,+ ko e kau ʻĀmoní, pea mo e kau ʻAsitotí+ naʻe laka ki muʻa ʻa hono monomono ʻo e ngaahi ʻā ʻo Selusalemá pea naʻe tātāpuni ʻa e konga ʻo e ʻaá ʻa ia naʻe holó, naʻa nau ʻita lahi ʻaupito.
8 Naʻa nau faʻufaʻu ke omi ʻo tauʻi ʻa Selusalema pea fakatupu ai ha māveuveu.
9 Ka naʻa mau lotu ki homau ʻOtuá pea koeʻuhí ko kinautolu naʻa mau hanganaki fokotuʻu ha tokotaha leʻo ʻi he ʻaho pea mo e pō.
10 Kae kehe, naʻe pehē ʻe he kakai ʻo Siutá: “Kuo hōloa ʻa e ivi ʻo e kau fetuku meʻá,* pea ʻoku fuʻu lahi fau ʻa e mapakipakiʻi maká; ʻe ʻikai ʻaupito te mau lava ke langa ʻa e ʻaá.”
11 Pea naʻe hanganaki pehē ʻe homau ngaahi filí: “Ki muʻa ke nau ʻiloʻi pe sio mai kiate kitautolú, te tau hū atu ki honau lotolotongá ʻo tāmateʻi kinautolu pea taʻofi ʻa e ngāué.”
12 ʻI he taimi pē naʻe haʻu ai ʻa e kau Siu naʻe nofo ofi kiate kinautolú, naʻa nau toutou tala mai:* “Te nau ʻohofi kitautolu mei he tafaʻaki kotoa pē.”
13 Ko ia naʻá ku hanganaki fokotuʻu ʻa e kau tangata ʻi he tuʻa ʻaá ʻi he ngaahi feituʻu māʻulalo mo ʻatāloá, pea naʻá ku fokotuʻu fakafāmili kinautolu ʻo nau toʻo ʻenau ngaahi heletaá, mo ʻenau ngaahi taó, pea mo ʻenau ngaahi kaufaná.
14 ʻI heʻeku sio ki heʻenau manavaheé, naʻá ku tuʻu hake ʻi he taimi pē ko iá ʻo pehē ki he houʻeikí+ mo e kau tokoni pulé pea mo e toenga ʻo e kakaí: “ʻOua naʻa mou ilifia ʻiate kinautolu.+ Manatuʻi ʻa Sihova, ʻa ia ʻoku lahi mo fakamanavaheé;+ pea ke mou faitau maʻa homou fanga tokouá, ko homou ngaahi fohá mo e ngaahi ʻofefiné, ko homou ngaahi uaifí pea mo homou ngaahi ʻapí.”
15 Pea ʻi he hili ʻa e fanongo ʻa homau ngaahi filí kuo mau ʻiloʻi ʻa e meʻa naʻa nau faí pea kuo veuki ʻe he ʻOtua moʻoní ʻa ʻenau palaní, naʻa mau foki kotoa ke ngāue ʻi he ʻaá.
16 Mei he ʻaho ko iá ʻo faai atu ai, naʻe fai ʻe he vaeua ʻo ʻeku kau tangatá ʻa e ngāué+ pea ko e vaeua naʻa nau toʻo ʻa e ngaahi taó, ko e ngaahi paá, ko e ngaahi kaufaná, pea mo e ngaahi kofu-taú. Pea naʻe tuʻu ʻa e houʻeikí+ ʻo poupou ki he fale kotoa ʻo Siutá
17 ʻa ia naʻa nau langa ʻa e ʻaá. Ko e faʻahinga naʻa nau fua ʻa e kavengá naʻa nau fai nima-taha ʻa e ngāué lolotonga ia naʻa nau toʻo ha meʻatau* ʻi honau nima ʻe tahá.
18 Pea ko e kau langa taki taha naʻe noʻo ha heletā ʻi honau kongalotó lolotonga ʻa e langá, pea ko e tokotaha te ne ifi ʻa e meʻaifí+ naʻá ne tuʻu ʻi hoku tafaʻakí.
19 Naʻá ku pehē ange leva ki he houʻeikí mo e kau tokoni pulé pea mo e toenga ʻo e kakaí: “ʻOku lahi mo hulu fau ʻa e ngāué, pea ʻoku tau mafola atu ʻi he ʻaá ʻo vāmamaʻo.
20 ʻI haʻamou fanongo ki he leʻo ʻo e meʻaifí, mou fakatahataha mai ki he feituʻu ʻoku mau ʻi aí. ʻE faitau ʻa hotau ʻOtuá maʻatautolu.”+
21 Ko ia naʻa mau hanganaki ngāue lolotonga ia naʻe toʻo ʻe he vaeua ʻe tahá ʻa e ngaahi taó, mei he mafoa ʻa e atá ʻo aʻu ki he hopo hake ʻa e ngaahi fetuʻú.
22 ʻI he taimi ko iá naʻá ku pehē ki he kakaí: “Tuku ʻa e kau tangatá ke nau mohe ʻi Selusalema, ʻa e tokotaha taki taha mo ʻene tamaioʻeiki, pea te nau leʻohi kitautolu ʻi he poʻulí pea ngāue ʻi he lolotonga ʻa e ʻahó.”
23 Ko ia ai, ko au pea pehē ki hoku fanga tokouá, ko ʻeku kau tamaioʻeikí+ pea mo e kau kaʻate naʻe muimui ʻiate aú naʻe ʻikai ʻaupito te mau vete ʻa homau kofú, pea ko kimautolu taki taha naʻa mau hanganaki toʻo ʻa ʻene meʻatau ʻi hono nima toʻomataʻú.
Fakamatala ‘i Lalo
^ Sio ki he Lea mo Hono ʻUhinga.
^ Pe “kau ngāue leipá.”
^ Fakafoʻilea, “tala mai tuʻo hongofulu.”
^ Pe “tao.”
