Akaboni aku Yehova atingatumbika ukongwa maboma kweniso vinthu vo vimiya maboma ngo. Tiziŵa kuti ŵanthu anyaki angasankha kulapizga kuti ajengi akugomezgeka ku charu chawu, kugwadiya mbendera pamwenga kumba sumu ya fuku.

 Kweni isi Akaboni aku Yehova tikusankha kuti tichitengeku cha midawuku yeniyi chifukwa tigomezga kuti yikoliyana cha ndi vo Bayibolu lisambiza. Nasi tikondwa ukongwa asani ŵanthu anyaki atumbika vo tigomezga nge mo nasi titumbikiya vo yiwu agomezga.

Mu nkhani iyi, tikambiskanengi mafumbu yanga

•  Kumbi ndi fundu za m’Bayibolu nizi zo zikwaskana ndi nkhani yeniyi?

•  Wuli asani dangu likamba kuti weyosi wachitengeku midawuku yeniyi?

•  Kumbi Akaboni aku Yehova aŵikiya kuvuli gulu linyaki la ŵanthu pamwenga chipani chinyaki?

 Fundu za m’Bayibolu ziŵi izi ndizu zititiwovya asani tisankha vakuchita:

•   Titenere kusopa Chiuta pe. Bayibolu likamba kuti: “Yehova Chiuta waku ndiyu utenere kumusopa, ndipu iyu pe ndiyu utenere kumuchitiya uteŵeti wakupaturika.” (Luka 4:8) Asani ŵanthu alapizga kuti ajengi akugomezgeka ku charu chawu ndipuso asani atumba sumu ya fuku, kanandi akamba mazu ngakulayizga kuti ajengi akujipereka ku charu chawu kuluska chinthu chinyaki chechosi. Mwaviyo, Akaboni aku Yehova awona kuti mphakwenere cha kuchitaku midawuku nge yeniyi.

   Akaboni aku Yehova awona so kuti kugwadiya mbendera naku so nkhusopa pamwenga kuti kusopa angoza, ndipu Bayibolu likaniza kuchita venivi. (1 Akorinto 10:14) Ŵanthu anyaki wo asanda mbiri, nawu azomereza kuti mbendera za charu ntchigaŵa chakusopa. Carlton J. H. Hayes yo walemba mbiri wakulemba kuti: “Kwanja ukongwa charu chaku, kwe nge chisopa ndipu chizindikiru chaki cho atichigwiriskiya ntchitu pakusopa ndi mbendera.” a Pakukonkhoska vakukwaskana ndi Akhristu akwambiriya, Daniel P. Mannix yo walemba mabuku wakukamba kuti: “Akhristu angukana . . . kupereka sembi ku fumu [ya Aroma]. Vo anguchita viyanana waka ndi kukana kugwadiya mbendera mazuŵa nganu.” b

  Chinanga kuti isi Akaboni aku Yehova tikana kugwadiya mbendera, kweni titiyinanga cha, titiyiwotcha cha pamwenga so kuyichitiya vinthu mwambula ulemu, chinanga ntchinthu chechosi cho chimiya charu.

•   Chiuta wawona kuti ŵanthu wosi ayanana waka. (Machitidu 10:34, 35) Bayibolu likamba kuti “kutuliya mu munthu yumoza [Chiuta] wakupanga mitundu yosi ya ŵanthu.” (Machitidu 17:26) Pa chifukwa chenichi, isi Akaboni aku Yehova tigomezga kuti nkhunanga kukankhuska fuku linyaki lelosi kuphara linyaki pamwenga charu chinyaki kuphara chinyaki. Titumbika ŵanthu wosi, kwali atuliya pani pamwenga aja pani.—1 Peturo 2:17.

 Akaboni aku Yehova atingasuska cha maboma. Tigomezga kuti maboma ntchigaŵa cha “ndondomeku yaku Chiuta” yo watiyizomereza kuti yiŵepu. (Aroma 13:1-7) Tigomezga so kuti Akhristu akhumbika kuvwiya ŵaraŵara a boma.—Luka 20:25.

 Kweni wuli asani marangu nga boma ngasuskana ndi marangu ngaku Chiuta? Nyengu zinyaki, vingachitika kupempha boma mwakugwiriskiya ntchitu marangu kuti lisinthi marangu nganyaki. c Kweni asani boma lingasintha cha, Akaboni aku Yehova asankha mwaulemu kuti atenere “kuvwiya Chiuta nge wakulamuliya kuluska ŵanthu.”—Machitidu 5:29.

 Awa. Akaboni aku Yehova aseleriyamu cha mu vakuchitika vacharu pamwenga vandali. Asani tikana kulapizga kuti tijengi akugomezgeka ku charu chidu, kugwadiya mbendera pamwenga kumba sumu ya fuku, ting’anamuwa kuti tiŵikiya kuvuli chipani chinyaki cha pamwenga gulu linyaki la ŵanthu. Mumalu mwaki, tilondo vo Bayibolu likamba pa nkhani yakukwaskana ndi midawuku yeniyi.