Sonu, nyumba zidu zosi ku Warwick zikwamba kugwira ntchitu. Ndipu kukwambiriya kwa mwezi wa September, ŵanthu akukwana 500 ajanga ku Warwick. Chiŵerengeru ichi chisazgapu ŵanthu wo agwiranga ntchitu ya kuzenga mwakujipereka ndipuso wo agwiranga mazuŵa ngosi wo angutuwa ku Brooklyn.

Munthu wawona matayilosi ngo aŵikengi pa chimati. Chimati ichi che pakhomu lakuselere ku malu ngo ngadanika kuti, “Ŵanthu wo Aziŵika ndi Zina Laku Yehova.” Matayilosi yanga akungapanga munthowa yakuti ngalongongi mo malu ngakali ngawonekiyanga kuti ngakoliyanengi ndi zina la malu ngenanga.

Stephen Lett wa mu Wupu Wakulongozga wa Akaboni aku Yehova, ndiyu wenga cheyamani pa pulogilamu yakwamba ya Kusopa kwa Mulenji yo anguwonesa kutuwa ku Warwick. Pa zuŵa lenili ndi mulenji, Mubali  Lett wangwamba ndi kuŵerenga kalata yakuwonga ŵanthu akujumpha 27,000 wo angujipereka kugwira ntchitu yakuzenga likulu lasonu lenili kweniso wo anguwovya kugwiraku ntchitu iyi munthowa zakupambanapambana.

Kalipentala waŵika vilembu pa chikwangwani. Chikwangwani ichi, chilongozge ku ngamoza mwa malu ngatatu ngo alendu azakungawonanga kwambula munthu wakuŵalongozga. Malu ngenanga ngo ngadanika kuti “Ŵanthu wo Aziŵika ndi Zina Laku Yehova,” ngakonkhoska mbiri ya mazuŵa nganu ya Akaboni aku Yehova kutuwa mu chaka cha 1870 kufika le linu.

Komiti Yakuwonere Ntchitu Yakulemba Mabuku, yikumana ndi wo atovyana nawu ndipuso wo ŵe mu Dipatimenti Yakulemba Nkhani. Ma TV ngakulungakulu ngatiŵawovya kuwona mo nkhani zo akhumba kusindikiza ziwoneke. Kuti akambiskani ndi madipatimenti nganyaki ngo nge mu maofesi nga nthambi, agwiriskiya ntchitu ma TV ngenanga. Thebulu ili ŵanthu akupereka mwakukhumba kwawu, ndipu akulisamusa ku Brooklyn kuluta nalu ku Warwick.

Wakovya Komiti ya kukumaniska limoza ndi wo wagwira nawu ntchitu, wakambiskana ndi anyaki nthowa zo angawovye ŵanthu wo akwaskika ndi Chimphepu Chikulu cho chingunanga nyumba ku Philippines. (Typhoon Haima Lawin) Chipangizu cho ajambuliya vithuzi, chitovya wo ŵe mu madipatimenti ku likulu lidu kuti akambiskanengi mwaliŵiliŵi mo angachitiya asani kwachitika vinthu vamabuchibuchi. Chipangizu ichi chitovya so kuti akambiskanengi ndi wo ŵe mu ma ofesi nga nthambi kuzunguliya pacharu chosi.

Dambu, le pakati pa Nyumba Yakunozgiyamu Vinthu ndi msewu wakuselere ku ofesi ya nthambi. Dambu lenili ndipuso madambu nganyaki ngo nge ku Warwick, akungapanga kuti ngasefengi vimalala kweniso maji ngaheni, ndipu pavuli paki maji ngamampha ngo ato mu dambu ili atingagwiriskiya ntchitu pa kudiliya maluŵa ndi vinthu vinyaki vo ve pa malu ngenanga. Ivi vitovya kuti maji nganandi kujumpha malita 50 ngaleki kusakazika ndipuso kuti aleki kugwiriskiya ntchitu mapayipi nganandi. Kweniso maji ngamampha ngo ngatenda mu timisinji takupambanapambana ngatovya kuti vakume ndipuso vinyama vikuwi umampha.

Ŵanthu asisa makatoni pa nyumba yo alondiyaku mabuku. Pafupifupi ŵanthu 80, anguwovya abali wo asamanga kutuwa ku Brooklyn kuluta ku malu ngasonu nga ku Warwick.

Ŵanthu wo agwira ntchitu yakubika, akhutuwa fulawu wakukasa kutuwa muchiyaŵi cho akasiya. Chifukwa chakuti fulawu wenuwu uja wakuzita umampha ndi makilogiramu ngakujumpha 45, vichitiska kuti ntchitu yakubika mabuledi yije yipusu ndipuso kuti yiyendengi liŵi. Nyumba yo abikiyaku mabuledi ku Warwick, ye ndi chipangizu chakufufumisiya. Chipangizu chenichi, atichithya kuti chifufumisengi fulawu wakukasa mwaliŵiliŵi pamwenga kamanakamana. Ivi vitovya kuti ntchitu yileki kuja yakufyo ukongwa ndipuso kuti abikengi buledi munandi sabata yeyosi..

Abali wo ŵe mudipatimenti yakutowesa malu, anyamuwa ma bini nga vimalala ndipu atuwanangu mu Nyumba Yakunozgiyamu Vinthu. Mwakupambana ndi nyumba zo ze ku Brooklyn, nyumba zinyaki zo ze ku Warwick ze ndi timitanthu to titizigumatizga ndipu ivi vitovya kuti paje ŵanthu ndipuso magalimotu ngamana ngo nganyamuwa ndi kutaya ma bini ndipuso vinthu vinyaki vo angachivigwiriskiya so ntchitu.

Munthu wafayiya bulawuzi ndi maji kuti lileki kuja ndi mankhwinya ndipu waliŵika pa makina ngo nganyolo malaya. Pa avereji yeyosi, Dipatimenti yo yichapa vakuvwala ku Warwick, yichapa malaya ndipuso salu zakujumpha makilogiramu 5,000 sabata yeyosi. Kuti vakuvwala ndipuso salu vileki kusoŵa, ŵanthu wo agwira ntchitu ku dipatimenti yeniyi, ativipaska manambala. Manambala ngenanga ngatiŵawovya kuziŵa kuti vakuvwala vosi vilipu ndipuso kuti vaperekeka ku vipinda pamwenga ku dipatimenti yakwenere..

Munthu wanozga galimotu yo anyamuliya katundu yo atimusunga mu nyumba ya magesi. Ntchitu yakunozga galimotu yitovya kuti galimotu yijengi nyengu yitali kwambula kunangika ndipuso kuti nyengu zosi yijengi yakutowa.

Munthu wanozga kompyuta yo awonesiyapu fundu zakudumuwa za mo “Akaboni aku Yehova Angulongore Chivwanu.”

Makalipentala nganozga njinga yo yikupangika mu 1903 kuti yikaje ku malu ngo ngadanika kuti, “Ŵanthu wo Aziŵika ndi Zina Laku Yehova.” Njinga iyi yo ŵanthu anguyipereka mwakukhumba kwawu, yingunozgeka so ndi ŵanthu wo agwira ntchitu ku Warwick ndipu atiyigwiriskiya ntchitu pakulongo phamphu ndipuso kujipereka ko Akusambira Bayibolu (wo pavuli paki angudanika kuti Akaboni aku Yehova) angulongo mwakugwiriskiya ntchitu njinga pakupharazga uthenga wa m’Bayibolu.

Kalipentala waŵika gilasi lakuwonesiyapu vinthu vo ve mu “Seŵeru la Vithuzi va Chilengedu.” Seŵeru ili lenga la vithuzi vo vakonkhoskanga nkhani za m’Bayibolu ndipu lenga lakwamba kuwoneseka mu 1914. Ŵanthu akukwana 9 miliyoni anguwonere seŵeru lenili m’chaka chenichi.

Ŵanthu anozga Bayibolu la Zurich Latin la nambala 1544 kuti akaliŵiki ku malu ngo ngadanika kuti, “Zina Laku Chiuta mu Bayibolu.” Kanthu kayela ko kawoneka mu Bayibolu ili kalongo po pe zina laku Chiuta lakuti Yehova. Ŵanthu ŵenaŵa achita vosi vo angafiska kuti avikiriyi ma Bayibolu ngo nganganangika mwambula kusuzga. Mwakuyeruziyapu, yiwu awonesesa kuti mapeji ngaleki kukolana ndipu achita ivi mwa kuŵika timapepala pakati pa mapeji ndipuso kuti nyumba yo awonesiyaku mabuku mwe mphepu zamampha. Awonesesa so kuti mwe ukweru wakwenere wo ungaleka kunanga mapepala.

Alendu awona malu ngidu ngakutowa ukongwa ku Warwick ndipu malu ngenanga kutuwa pasi kufika pachanya pe mtunda wa mamita 23. Ŵanthu angwamba kuwona malu ku Warwick pa April 3, 2017. Wosi wo akhumba kuchiwona malu angapempha mwakugwiriskiya ntchitu webusayiti yidu pachigaŵa chakuti VAKUKWASKANA NDI ISI > ZANI MUZIWONI MAOFESI NGIDU.

Munthu waŵika Bayibolu lakwamba la King James Version lo likulembeka mu 1611. Malu ngenanga ngangunozgeka ndi ŵanthu wo agwira ntchitu ku Warwick.

Munthukazi yo we ndi lusu la kujambula vithuzi, waŵika chisoti pa malu ngakuwonesiyapu vinthu. Chisoti chenichi ntchaku Joseph F. Rutherford, yo wenga mulongozgi wa Akaboni aku Yehova, vyaka 100 vo vajumpha. Vithuzi ivi, vilongo chigaŵa cha malu ngo ngadanika kuti, “Ŵanthu wo Aziŵika ndi Zina Laku Yehova.” Vilongo so mo Akaboni aku Yehova a munyengu yakwambiriya anguchitiya kuti apharazgi uthenga wamampha wa Ufumu.

Abali wo agwira ntchitu ku situdiyo ajambula mazu ngo munthu waŵerenga ngo ngakamba za malu ngo alendu atingawona kwambula munthu wakuŵalongozga ngo ngadanika kuti, “Zina Laku Chiuta mu Bayibolu.” Pati pajumpha sabata yimoza ŵati amaliza ŵaka kujambula, situdiyo yo ayigwiriskiyanga ntchitu ku Brooklyn ndipuso vipangizu vinyaki vo avigwiriskiyanga ntchitu, anguvituzgaku ku Brooklyn ndi kuvisamusiya ku Warwick. Situdiyo iyi (yo ye ku Patterson ko kuchitikiya masukulu nga gulu laku Yehova, njikulu ukongwa chifukwa ndiyu) atiyigwiriskiya so ntchitu pa kujambula Bayibolu la New World Translation, magazini nga Chigongwi cha Alinda ndi Jani Masu!, nkhani zo zisanirika pa webusayiti ya jw.org ndipuso vinthu vinyaki vakuvwisiya.

Munthu yo watovya kugwira ntchitu yakupenta, wapenta mumphepeti mwathabwa kuti waŵikepu chithuzi. Chithuzi ichi cho ntchigaŵa cha malu ngo ngadanika kuti, “Ŵanthu wo Aziŵika ndi Zina Laku Yehova,” chilongo Akusambira Bayibolu a mu vyaka va m’ma 1800.

Munthu wapenta Kalebi yo wawoneka mu mavidiyo ngamakatuni nga Jani Bwezi Laku Yehova. Kalebi mwenuyu, wamuwonekanga mu vithuzi vo vilongo mwakudumuwa vidya ndipuso mapulogiramu ngo Akaboni aku Yehova akujalikiska kuti ngawovyi ŵana.

Kalipentala wacheketa vithuzi ndipuso vikwangwani vo vamuŵikika ku malu ngo ngadanika kuti, “Ŵanthu wo Aziŵika ndi Zina Laku Yehova.” Ŵanthu akujumpha 250 kusazgapu makalipentala, wo apanga mapulogilamu nga pa kompyuta, akunozga vinthu, wo agwira ntchitu za magesi, wo aŵika ma tayilosi, wo ajambula mavidiyo ndipuso wo alemba nkhani, angugwiraku ntchitu yakunozga malu ngatatu ngenanga ngo awonesiyaku vinthu vakali kutuwa pakwamba mpaka pakumaliya.