Kalata Yakuluta kwa Aroma 5:1-21
5 Mwaviyo, pakuti sonu takambika kuti te arunji chifukwa cha chivwanu,+ tiyeni tije pa chimangu* ndi Chiuta kuporote mwa Ambuyafwi Yesu Khristu.+
2 Pakuti kuziya mwaku iyu talonde wezi ukulu, wo tilimu chifukwa cha chivwanu,+ sonu tiyeni tikondwi* chifukwa cha chilindizga cha unkhankhu waku Chiuta.
3 Ndi venivi pe cha, kweni tiyeni tikondwengi* asani tisuzgika,+ chifukwa tiziŵa kuti masuzgu ngachitiska kuti tikunthiyepu,+
4 kukunthiyapu kuchitiska kuti tije akuzomerezeka,+ kuja akuzomerezeka kuchitiska kuti tije ndi chilindizga,+
5 ndipu chilindizga chiguŵiska cha+ chifukwa chanju chaku Chiuta chapungulikiya mumitima yidu mwakugwiriskiya ntchitu mzimu wakupaturika wo tikupaskika.+
6 Chifukwa kukamba uneneska, po tenga teche akulopwa,+ Khristu wangufwiya ŵanthu ambula kopa Chiuta pa nyengu yakuŵikikiya limu.
7 Pakuti mphakusuzga kuti munthu wafwiyi munthu murunji, kweni panyaki munthu wangachita chiganga kufwiya munthu wamampha.
8 Kweni Chiuta walongo chanju chaki kwaku isi mwakuti po tenga teche akubuda, Khristu wangutifwiya.+
9 Chinthu chakukhumbika ukongwa ntchakuti tazamutaskika ku ukali waku Chiuta kuporote mwaku iyu,+ pakuti takambika kuti te arunji chifukwa cha ndopa zaki.+
10 Pakuti asani pa nyengu yo tenga arwani ŵaki ndipu tinguyanjanisika kwaku Chiuta+ chifukwa cha nyifwa ya Mwana waki, ndikuti sonu po tayanjanisika kwaku Chiuta ndipu wazakutichitiya vikulu. Tazamutaskika chifukwa cha umoyu waki.
11 Ndi venivi pe cha, kweni tikondwa so mwaku Chiuta chifukwa cha Ambuyafwi Yesu Khristu, mweniyo kuporote mwaku iyu tayanjanisika so kwaku Chiuta.+
12 Ndichu chifukwa chaki nge mo ubudi ukuselere mucharu kuziya mwa munthu yumoza, ndi nyifwa chifukwa cha ubudi,+ nyifwa nayu yikusapaliya ku ŵanthu wosi chifukwa wosi akubuda+ . . .
13 Chifukwa ubudi ndiwu ungudankha mucharu Dangu* lechendaŵeku, kweni asani palivi dangu, munthu wangayeruzgika cha kuti ngwakubuda.+
14 Kweni nyifwa yalamuliyanga nge fumu kutuliya mu nyengu yaku Adamu kuzifika mu nyengu yaku Mozesi. Yalamuliyanga so pa ŵanthu wo anguchita ubudi nge mo Adamu wanguchitiya cha, yo wayanana ndi mweniyo wazanga.+
15 Kweni mphasu yeniyi yiyanana cha ndi ubudi, pakuti asani kuziya mu ubudi wa munthu yumoza ŵanthu anandi akufwa, ndikuti wezi ukulu waku Chiuta kweniso mphasu yawezi vikusapaliya* ku ŵanthu anandi+ chifukwa cha wezi ukulu wa munthu yumoza,+ Yesu Khristu.
16 Ndipuso mphasu yawezi yeniyi, yiyanana cha ndi mo vinthu vingwende munthu yumoza wati wachita ubudi.+ Chifukwa cha ubudi umoza, ŵanthu anguyeruzgika kuti mbakunanga,+ kweni mphasu yo yinguperekeka pavuli pa maubudi nganandi, yinguchitiska kuti ŵanthu anandi akambiki kuti mbarunji.+
17 Asani chifukwa cha ubudi wa munthu yumoza nyifwa yingulamuliya nge fumu kuporote mwaku iyu,+ kwe wuli ŵanthu wo azamulonde wezi ukulu ukongwa kweniso mphasu yawezi ya urunji!+ Yiwu azamuja ndi umoyu ndipu azamulamuliya nge mafumu+ chifukwa cha munthu yumoza, Yesu Khristu.+
18 Sonu nge mo ubudi umoza ukuchitiskiya kuti ŵanthu wosi ayeruzgiki kuti mbakunanga,+ ndimu so kuchita chinthu chimoza chaurunji kuchitiskiya kuti ŵanthu amitundu yosi+ akambiki kuti mbarunji kuti alonde umoyu.+
19 Pakuti nge mo kuleka kuvwiya kwa munthu yumoza kukuchitiskiya kuti ŵanthu anandi aje akubuda,+ ndimu so kuvwiya kwa munthu yumoza kwazamuchitiskiya kuti ŵanthu anandi aje arunji.+
20 Sonu Dangu* linguza kuti ubudi usazgikiyeku ukongwa.+ Kweni maubudi ngati ngaŵa nganandi, wezi ukulu ungusazgikiyaku so ukongwa.
21 Chifukwa wuli? Kuti nge mo ubudi ungulamuliya nge fumu limoza ndi nyifwa,+ ndimu so wezi ukulu ulamuliyengi nge fumu chifukwa cha urunji wo ulongozge ku umoyu wamuyaya kuporote mwaku Yesu Khristu, Ambuyafwi.+
Mazu Ngam'mphata
^ Yapa pangafwatulikiya so kuti, “te pa chimangu.”
^ Yapa pangafwatulikiya so kuti, “sonu tikondwa.”
^ Yapa pangafwatulikiya so kuti, “kweni tikondwa.”
^ Wonani Mazu ngo Ngakonkhoskeka.
^ Pamwenga kuti, “vikufwapukiya.”
^ Wonani Mazu ngo Ngakonkhoskeka.
