Dotoronome 11:1-32
11 “Muyanjengi Yehova Chiuta winu,+ nyengu zosi muchitengi vo wakhumba ndipuso mulondongi marangu ngaki, vyeruzgu vaki kweniso ulongozgi waki.
2 Muziŵa kuti msanawale ndilongoro ndi yimwi, ndilongoro ndi ŵana ŵinu cha, wo akuziŵapu cha pamwenga kuwonapu chilangu chaku Yehova Chiuta winu,+ ukulu waki,+ janja laki lanthazi+ ndipuso janja laki lakutambasuka.
3 Yiwu anguviwona cha visimikizu vaki kweniso ntchitu zaki zo wanguchita mucharu cha Ijipiti kwaku Farawo, fumu ya ku Ijipiti kweniso charu chaki chosi;+
4 pamwenga vo wanguchitiya asilikali a ku Ijipiti, mahachi ngaku Farawo ndi magaleta ngaki ngankhondu, ngo ngangubira mumaji nga mu Nyanja Yiyera pa nyengu yo akutchimbizaningi, Yehova wanguŵananga kamoza pe ndipu akumaliya limu.*+
5 Ŵana ŵinu anguviwona cha vo wangukuchitiyani* muchipululu mpaka po mwafikiya pamalu nganu,
6 pamwenga vo wanguchitiya Datani ndi Abiramu wo ŵenga ŵana anthulumi aku Eliyabu mwana munthulumi waku Rubeni, pa nyengu yo charu chingujulika ndi kuŵameza limoza ndi mabanja ngawu, mahema ngawu kweniso chamoyu chechosi cho chinguŵalondo. Ivi vinguchitika pa masu pa Ayisirayeli wosi.+
7 Masu nginu ngawona ntchitu zosi zikulu zo Yehova wakuchita.
8 “Musungengi marangu ngosi ngo nditikupaskani msanawale kuti muje ŵanthu anthazi, muyambukiyi mucharu cho mwakuchito kuja chinu,
9 kweniso kuti muzije ndi umoyu utali+ mucharu cho Yehova wakulapizga kuti wachiperekengi kwa apapi ŵinu akali kweniso ku mphapu* yawu,+ charu chakwenda mkaka ndi uchi.+
10 “Charu cho mwamuto kuti chije chinu chiyanana cha ndi charu cha Ijipiti cho mukutuwaku, kweniko mwapandanga mbewu kweniso kuzidiriya maji ndi maphazi nginu,* nge munda wa mphangwi.
11 Kweni charu cho mwe pafupi kuyambukiyamu ndi kuchito kuja chinu, ntcharu cho che ndi mapiri kweniso vidika.+ Charu cho chitumwa maji ngo ngatuwa kutuliya kuchanya;+
12 ntcharu cho Yehova Chiuta winu watichiphwere. Masu ngaku Yehova Chiuta winu nge pacharu cho nyengu zosi, kutuliya kukwamba kwa chaka mpaka kukumaliya kwa chaka.
13 “Ndipu asani muvwiyengi ndi mtima wosi marangu ngangu ngo nditikulamulani msanawale, ndipuso asani muyanjengi Yehova Chiuta winu ndi kumuteŵete ndi mtima winu wosi kweniso umoyu winu wosi,+
14 ndazakukupaskani vuwa mucharu chinu pa nyengu yaki yakuŵikika, vuwa yakwamba kweniso vuwa yakumaliya, ndipu mwazamuvuna mbewu zinu, kweniso mwazamuja ndi vinyu winu wasonu ndipuso mafuta nginu.+
15 Ndazakukupaskani so vakume muminda yinu kuti viŵetu vinu viziryengi, ndipu yimwi mwazamukurya chakurya ndi kuguta.+
16 Muziphwere ukongwa kuti mitima yinu yizileki kunyengeka kuti mulandi ndi kwamba kusopa achiuta anyaki kweniso kuŵasindamiya.+
17 Asani mwazichita venivi, Yehova wazakukukwiyiyani ukongwa. Iyu wazamujala kuchanya ndipu kwazamuŵavi vuwa,+ charu chazamupasa cha vipasu vaki ndipu mwazamumala liŵi mucharu chamampha cho Yehova watikupaskani.+
18 “Musungengi mazu ngangu ngenanga mumitima yinu kweniso mumaŵanaŵanu nginu. Mungamangengi nge chikumbusu pajanja linu ndipuso ngajengi nge kamubambi* pachisku chinu.*+
19 Mungasambizengi ku ŵana ŵinu, mungakambengi asani mwaja pasi munyumba zinu, asani mutenda munthowa, asani mugona ndipuso asani muyuka.+
20 Mungalembengi pamafulemu nga nyumba zinu ndipuso pamageti nga tawuni yinu,
21 kuti yimwi ndi ŵana ŵinu muzije nyengu yitali+ mucharu cho Yehova wakulapizga kwa apapi ŵinu akali,+ nyengu yosi yo kuchanya kujaliyengi pachanya pa charu chapasi.
22 “Asani musungengi mwakuphwere dangu ili lo nditikupaskani ndipuso asani mulilondongi, kung’anamuwa kwanja Yehova Chiuta winu,+ kwenda mu nthowa zaki zosi kweniso kumudemetere,+
23 Yehova wadikisengi mitundu yosi iyi pa masu pinu,+ ndipu mulondengi charu cha mitundu yikulu kweniso yo ye ndi ŵanthu anandi kuluska yimwi.+
24 Malu ngosi ngo mwakandapu phazi linu ngazamuja nginu.+ Mphaka yinu yazamukwambiya kuchipululu mpaka ku Lebanoni kweniso kwambiya ku Msinji, wo ndi msinji wa Yufureti, mpaka kunyanja ya kuzambwi.*+
25 Palivi yo wazamumaku kwaku yimwi.+ Yehova Chiuta winu wazamuchitiska kuti charu chosi cho mwayendaku chichiti mantha kweniso chikuwopeni,+ nge mo wakukulayizgiyani.
26 “Awonani, msanawale ndiŵika thembu ndi thumbiku pa masu pinu:+
27 mutumbikikengi asani muvwiyengi marangu ngaku Yehova Chiuta winu, ngo nditikulamulani msanawale,+
28 ndipu mutembekengi asani mulekengi kuvwiya marangu ngaku Yehova Chiuta winu,+ asani mulekengi kwenda pa nthowa yo nditikulamulani msanawale kuti muyendengepu ndipuso asani mulondongi achiuta anyaki wo muleka kuŵaziŵa.
29 “Asani Yehova Chiuta winu wazikuserezani mucharu cho mwamuto kuti chije chinu, muzikambiyi* ŵanthu vitumbiku pa Phiri la Gerizimu ndipuso muzikambiyi ŵanthu matembu pa Phiri la Ebala.+
30 Asi mapiri yanga nge kusirya linyaki la Yorodani chakuzambwi,* mucharu cha Akanani wo aja ku Araba, mwakulereskana ndi Giligala, pafupi ndi vimiti vikuluvikulu va ku More?+
31 Pakuti muyambukengi Yorodani kuti mukasere ndi kuto charu cho Yehova Chiuta winu watikupaskani.+ Asani mwachito charu cho ndi kwamba kujamu,
32 muziwonesesengi kuti mulondo fundu zosi kweniso vyeruzgu vo ndiŵika pa masu pinu msanawale.+
Mazu Ngam'mphata
^ Pamwenga kuti, “kamoza pe mpaka msanawale.”
^ Pamwenga kuti, “vo wanguchita kwaku yimwi.”
^ Mazu ngaki chayingu, “mbewu.”
^ Kung’amuwa kugwiriskiya ntchitu maphazi pakudiriya mbewu, kwali nkhutchova chipangizu chakuneŵe maji pamwenga kupanga ndi kujula migelu yakwendamu maji mwakugwiriskiya ntchitu maphazi.
^ Mazu ngaki chayingu, “pakati pa masu nginu.”
^ Kasalu kakumanga mumutu.
^ Kung’anamuwa Nyanja Yikulu, Nyanja ya Meditereniyani.
^ Pamwenga kuti, “muzipaski.”
^ Pamwenga kuti, “cha ko kuselere lumwi.”
