Dotoronome 19:1-21
19 “Asani Yehova Chiuta winu wazinanga mitundu yo Yehova Chiuta winu watikupaskani charu chawu, ndipu mwazilonda charu cho ndi kwamba kuja mumatawuni ngawu kweniso munyumba zawu,+
2 muzipatuwi matawuni ngatatu mucharu cho Yehova Chiuta winu watikupaskani kuti chije chinu.+
3 Charu cho Yehova Chiuta winu watikupaskani muzichigaŵi patatu, ndipu muzinozgi nthowa kuti munthu yo wabaya munyaki, wazithaŵiyengi ku yimoza mwa matawuni ngenanga.
4 “Asani munthu yo wabaya munyaki wathaŵiya kumatawuni ngenanga kuti waje ndi umoyu, muchitengi ivi: Asani wabaya munyaki mwangozi, kweni wamutinkhanga cha,+
5 panyaki waluta kudondu ndi munyaki kuchideŵa nkhuni, ndipu wasoske mbavi muchanya kuti wacheketi chimiti, mbwenu mbavi yo yakhweruka ndi kupweteka munyaki ndipu wafwa, yo wabaya munyaki wathaŵiyengi ku yimoza mwa matawuni ngenanga kuti waje ndi umoyu.+
6 Asani wangaleka, wakuweze ndopa,+ chifukwa cha ukali wo we nawu,* wangatchimbiza munthu yo wabaya munyaki ndipu asani wamusaniya wangamubaya, chifukwa chakuti tawuni yakuthaŵiyaku yenga kutali ukongwa. Kweni munthu yo wabaya munyaki mwangozi wenga wakwenere cha kufwa chifukwa chakuti wamutinkhanga cha munyaki.+
7 Ndichu chifukwa chaki nditikulamulani kuti: ‘Mukapatuwi matawuni ngatatu.’
8 “Asani Yehova Chiuta winu wazikuzga chigaŵa chinu nge mo wakulapizgiya kwa apapi ŵinu akali,+ ndipu wakupaskani charu chosi cho wangulayizga kuti wachiperekengi kwa apapi ŵinu akali,+
9 mbwenu pa matawuni ngatatu ngenanga muzisazgiyepu nganyaki ngatatu,+ chikulu musunga mwakugomezgeka marangu ngosi ngo nditikupaskani msanawale, kung’anamuwa kwanja Yehova Chiuta winu ndi kwenda mu nthowa zaki nyengu zosi.+
10 Asani mwazichita venivi, mwazamubaya cha munthu wambula kunanga*+ mucharu cho Yehova Chiuta winu watikupaskani nge chihara, ndipu mwazamuŵavi mulandu wa ndopa.+
11 “Kweni asani munthu watinkhanga munyaki+ ndipu wangumukhaza panthowa kuti wamuyukiyi, wamupweteka ukongwa mpaka kufwa, ndipu munthu yo wabaya munyaki wathaŵiya ku yimoza mwa matawuni ngenanga,
12 ŵara a mutawuni yaki amudanisi kutuliya kutawuni yo wathaŵiya ndipu amupereki mu manja mwa wakuweze ndopa kuti wamubayi.+
13 Mungamuchitiyanga* lisungu cha ndipu mutenere kutuzgapu mulandu wakubaya munthu wambula kunanga* pakati pa Ayisirayeli,+ kuti vinthu vikuyendiyeningi umampha.
14 “Asani mwazilonde chihara chinu mucharu cho Yehova Chiuta winu wakupaskeningi kuti chije chinu, mungazinderezanga cha mphaka ya munyinu+ pamalu po apapi ŵinu anguyiŵika.
15 “Ukaboni wa munthu yumoza ngwakukwana cha kusimikiziya kuti munthu wananga pamwenga wabuda.+ Nkhani yisimikizikengi asani pe ukaboni* wa ŵanthu ŵaŵi pamwenga atatu.+
16 Asani munthu yo wakhumba kunanga mbiri ya munyaki wapereka ukaboni waboza wakuti munyaki yo wabuda,+
17 ŵanthu ŵaŵi wo ayambana amengi pa masu paku Yehova ndipuso pa masu pa asembi ndi akweruzga wo ateŵete pa nyengu yo.+
18 Akweruzga afufuzengi mwakuphwere nkhani yo,+ ndipu asani asaniya kuti munthu yo, wapereka ukaboni waboza kweniso kuti wamumba mulandu waboza mubali waki,
19 mumuchitiyi vo iyu wangunozga kuti vichitikiyi mubali waki,+ ndipu mutenere kutuzgapu chinthu chiheni pakati pinu.+
20 Ŵanthu anyaki wosi avwengi ndi kuchita mantha ndipu achitengi so cha chinthu chechosi chiheni cha nge chenichi pakati pinu.+
21 Mungamuchitiyanga* lisungu cha.+ Kweni vo vichitikengi ndi ivi: Umoyu kulipa umoyu, jisu kulipa jisu, jinu kulipa jinu, janja kulipa janja, kweniso phazi kulipa phazi.+
Mazu Ngam'mphata
^ Mazu ngaki chayingu, “chifukwa chakuti wafya mtima.”
^ Mazu ngaki chayingu, “mwazamudira cha ndopa zambula kunanga.”
^ Mazu ngaki chayingu, “Jisu linu lingamuchitiyanga.”
^ Mazu ngaki chayingu, “mulandu wakudira ndopa zambula kunanga.”
^ Mazu ngaki chayingu, “yisimikizikengi pa mulomu.”
^ Mazu ngaki chayingu, “Jisu linu lingamuchitiyanga.”
