Dotoronome 34:1-12
34 Pavuli paki, Mozesi wangutuwamu muvidika* va Mowabu ndipu wangukwera pa Phiri la Nebo,+ pachanya pa Pisiga,+ yo walereskana ndi Yeriko.+ Ndipu Yehova wangumulongo charu chosi kutuwa ku Giliyadi mpaka ku Dani,+
2 Nafutali yosi, charu cha Efurayemu ndi Manasi, charu chosi cha Yuda mpaka kunyanja ya kuzambwi,*+
3 chigaŵa cha Negebu+ kweniso Chigaŵa cha Yorodani+ ndi chidika cha Yeriko, tawuni ya vimiti va kantchindi, mpaka ku Zowari.+
4 Pavuli paki, Yehova wangumukambiya kuti: “Ichi ntcharu cho ndingulapizga kwaku Abrahamu, Isaki ndi Yakobe kuti, ‘Ndichiperekengi ku mphapu* yaku.’+ Ndakuzomereza kuti uchiwoni ndi masu ngaku, kweni yiwi uyambukiyengeku cha.”+
5 Pavuli paki, Mozesi mteŵeti waku Yehova wangufwiya penipo mucharu cha Mowabu nge mo Yehova wangukambiya.+
6 Wangumuŵika mudambu mucharu cha Mowabu, mwakulereskana ndi Beti-peyori, ndipu palivi yo waziŵa po pe muwunda waki mpaka msanawale.+
7 Mozesi wenga ndi vyaka 120 pa nyengu yo wafwiyanga.+ Pa nyengu iyi, masu ngaki ngenga ngeche kuwona umampha kweniso wenga weche ndi nthazi.
8 Ayisirayeli anguliya nyifwa yaku Mozesi muvidika va Mowabu kwa mazuŵa 30.+ Pavuli paki, mazuŵa ngakuliriya ndi kutenjere Mozesi ngangumala.
9 Yoswa mwana waku Nuni wanguzazika ndi mzimu wa zeru, chifukwa Mozesi wanguŵika janja laki paku iyu+ ndipu Ayisirayeli angwamba kumuvwiya. Yiwu anguchita nge mo Yehova wangulamuliya Mozesi.+
10 Kweni mu Isirayeli mukuyukapu so mchimi munyaki cha wa nge Mozesi,+ yo Yehova wamuziŵanga masu ndi masu.+
11 Iyu wanguchita visimikizu vosi kweniso vakuziziswa vo Yehova wangumutuma kuti wakachiti mucharu cha Ijipiti kwaku Farawo, ateŵeti ŵaki wosi kweniso charu chaki chosi,+
12 limoza ndi janja lanthazi ndipuso nthazi zakuziziswa zo Mozesi wangulongo pa masu pa Ayisirayeli wosi.+
Mazu Ngam'mphata
^ Mazu ngaki chayingu, “muvidika vachipalamba.”
^ Pamwenga kuti, “ya ko kuselere lumwi”; kung’anamuwa Nyanja Yikulu, Nyanja ya Meditereniyani.
^ Mazu ngaki chayingu. “mbewu.”
