Ezekiyeli 10:1-22
10 Ndichilereska, ndinguwona chinthu chinyaki pachanya pa chinthu chisani cho chenga pachanya pa mitu ya akerubi. Chinthu cho chawonekanga nge mwa wa safiro ndipu chenga nge mpandu waufumu.+
2 Pavuli paki, wangukambiya munthu yo wanguvwala chakuvwala cha salu yamampha kuti:+ “Sere pakati pa vingelengeli,+ kusi kwa akerubi, ndipu uzazi manja ngaku ngosi ngaŵi ndi maka ngamotu+ kutuliya pakati pa akerubi, ndipu ungaponyi patawuni.”+ Mwaviyo, iyu wangusere ini ndichilereska.
3 Munthu yo wachisere, akerubi anguma kumaryi kwa nyumba yakusopiyamu, ndipu mtambu unguzaza mubalaza lamukati la nyumba yo.
4 Unkhankhu waku Yehova+ ungunyamuka kutuwa pa akerubi ndipu unguluta pakhomu la nyumba yakusopiyamu. Kamanakamana, mtambu ungwamba kuzaza munyumba yo,+ ndipu balaza lo linguzaza ndi kuŵala kwa unkhankhu waku Yehova.
5 Ndipu chiwawa cha mapapa nga akerubi chavwikanga mubalaza lakubwalu, nge chiwawa chaku Chiuta Wanthazizosi asani walongoro.+
6 Pavuli paki, wangulamula munthu yo wanguvwala chakuvwala cha salu yamampha kuti: “To motu kutuliya pakati pa vingelengeli, kutuliya pakati pa akerubi,” ndipu iyu wangusere ndi kuma pafupi ndi chingelengeli.
7 Pavuli paki, yumoza mwa akerubi wangutambasuliya janja laki pamotu wo wenga pakati pa akerubi.+ Iyu wangutopu motu ndipu wanguwuŵika mumanja ngosi ngaŵi nga munthu yo wanguvwala chakuvwala cha salu yamampha.+ Munthu yo wanguto motu wo ndi kuluta.
8 Akerubi wo ŵenga ndi vinthu vo vawonekanga nge manja nga munthu kusi kwa mapapa ngawu.+
9 Ndichilereska, ndinguwona vingelengeli vinayi vo venga pafupi ndi akerubi. Pafupi ndi mukerubi weyosi penga chingelengeli chimoza, ndipu vingelengeli vo vaŵalanga nge mwa wa kurusolito.+
10 Vingelengeli vosi vinayi venga vakuyanana, ndipu vawonekanga nge kuti chingelengeli chinyaki che mukati mwa chinyaki.
11 Asani vingelengeli vo vitenda, valutanga kuvigaŵa vosi vinayi kwambula kung’anamuka, chifukwa chakuti valutanga ko mitu ya akerubi yalazga kwambula kung’anamuka.
12 Maliŵavu ngosi nga akerubi, misana yawu, manja ngawu kweniso mapapa ngawu, vinguzaza ndi masu. Vingelengeli vosi vinayi navu vinguzaza ndi masu kuzunguliya.+
13 Ndinguvwa mazu ngachidana vingelengeli kuti, “Yimwi vingelengeli, nyamukani!”
14 Ndipu mukerubi weyosi wenga ndi visku vinayi. Chisku chakwamba chenga cha mukerubi, chisku chachiŵi chenga cha munthu, chisku chachitatu chenga cha nkharamu, ndipu chisku chachinayi chenga cha nombu.+
15 Ndipu akerubi anyamukiyanga muchanya, yiwu ŵenga vamoyu vo ndinguwona pa msinji wa Kebara.+
16 Asani akerubi atenda, vingelengeli navu vayendanga nawu limoza; ndipu asani akerubi wo asoske mapapa ngawu muchanya kutuliya pacharu chapasi, vingelengeli vang’anamukanga cha pamwenga kwenda.+
17 Asani akerubi ŵama, vingelengeli navu vamanga, ndipu asani akerubi akwere muchanya, vingelengeli navu vakweriyanga muchanya, pakuti mzimu wo wagwiranga ntchitu mu vamoyu vo, ndiwu so wenga muvingelengeli.
18 Pavuli paki, unkhankhu waku Yehova+ ungutuwapu pachanya pa khomu la nyumba yakusopiyamu, ndipu unguma pachanya pa akerubi.+
19 Sonu akerubi angusoske muchanya mapapa ngawu ndipu angusoka kutuliya pacharu chapasi ini ndichilereska. Akerubi wo achisoka, vingelengeli navu vingusoke nawu limoza. Akerubi anguma pakhomu la kuvuma la geti la nyumba yaku Yehova, ndipu unkhankhu waku Chiuta waku Isirayeli wenga pachanya pawu.+
20 Venivi venga vamoyu vo ndinguwona kusi kwa mpandu waufumu waku Chiuta waku Isirayeli pa msinji wa Kebara,+ mwaviyo ndinguziŵa kuti ŵenga akerubi.
21 Akerubi wosi anayi ŵenga ndi visku vinayi, mapapa nganayi ndipuso ŵenga ndi vinthu vo vawonekanga nge manja nga munthu kusi kwa mapapa ngawu.+
22 Visku vawu vawonekanga nge visku vo ndinguwona pafupi ndi msinji wa Kebara.+ Akerubi wo alutanga ŵaka kunthazi.+
