Ezekiyeli 12:1-28
12 Yehova wangulongoro so nani, ndipu wangukamba kuti:
2 “Yiwi mwana wa munthu, uja munyumba yakugaruka. Yiwu ŵe ndi masu ngakuti awone, kweni awona cha, ŵe ndi makutu ngakuti avwiyi, kweni atuvwa cha,+ pakuti yiwu ndi nyumba yakugaruka.+
3 Kweni yiwi mwana wa munthu panganya katundu waku kuti uluti ku ukapolu. Pavuli paki, ndi msana yiwu achilereska, uluti ku ukapolu. Utuwi munyumba yaku ndipu uluti ku ukapolu kumalu kunyaki yiwu achilereska. Panyaki awonengi chinanga kuti yiwu ndi nyumba yakugaruka.
4 Tuzga katundu yo wapanganya ndi msana kuti uluti ku ukapolu yiwu achilereska. Ndipu ndi mazulu yiwu achilereska, unyamuki nge munthu yo watoleke ku ukapolu.+
5 “Utolo zenji pampanda ndipu uporoti penipo ndi katundu waku,+ yiwu achilereska.
6 Nyamuwa katundu waku paphewa yiwu achilereska, ndipu luta nayu kubwalu ku mdima. Benekere chisku chaku kuti uleki kuwona pasi, pakuti nditikuŵika kuja chisimikizu ku nyumba yaku Isirayeli.”+
7 Ndinguchita nge mo wangundilamuliya. Ndi msana ndingutuzga katundu wangu nge munthu yo waluta ku ukapolu, ndipu ndi mazulu ndingutolo zenji pampanda ndi manja. Kwati kwafipa, ndingutuzga katundu wangu, ndipu ndingumunyamuwa paphewa yiwu achilereska.
8 Ndi mlenji Yehova wangulongoro so nani, ndipu wangukamba kuti:
9 “Yiwi mwana wa munthu, kumbi a munyumba yaku Isirayeli, nyumba yakugaruka, angukufumba cha kuti, ‘Uluta pani?’
10 Uŵakambiyi kuti, ‘Yehova, Ambuya Fumu Yikulu wakamba kuti: “Uthenga wacheruzgu uwu ukwaska mulongozgi+ wa mu Yerusalemu ndipuso ŵanthu wosi a munyumba yaku Isirayeli wo ŵe mutawuni iyi.”’
11 “Ukambi kuti, ‘Ini nde chisimikizu kwaku yimwi.+ Vo ini ndachita ndivu viŵachitikiyengi. Yiwu atolekiyengi ku ukapolu, amuja akapolu.+
12 Mulongozgi yo we pakati pawu wazamunyamuwa katundu waki paphewa ndi kunyamuka mu mdima. Iyu wazamutolo zenji pampanda ndipu wazamuporota penipo ndi katundu waki.+ Wazamubenekere chisku chaki kuti waleki kuwona pasi.’
13 Ndazakumutandawuliya chilepa changu, ndipu wazamuwira muchilepa cho.+ Pavuli paki, ndazamuluta nayu ku Babiloni, kucharu cha Akadiya, kweni wakuchiwona cha charu cho; ndipu wamufwiya kweniko.+
14 Wosi wo amuzunguliya, wo atimuwovya kweniso asilikali ŵaki, ndazakuŵambininiskiya muvigaŵa vosi;+ ndipu ndazamusolo lipanga kuti ndiŵaskeri.+
15 Azamuziŵa kuti ini ndini Yehova, asani ndaziŵambininiskiya pakati pa mitundu ya ŵanthu ndipuso asani ndaziŵambininiskiya muvyaru vakupambanapambana.
16 Kweni ndazamutaska ŵanthu amanavi pakati pawu kuti aleki kubayika ndi lipanga, nja ndipuso milili, kuti azikambengi vakukwaskana ndi vinthu vawu vosi vakuseruska pakati pa mitundu yo alutengeku; ndipu azamuziŵa kuti ini ndini Yehova.”
17 Yehova wangulongoro so nani, ndipu wangukamba kuti:
18 “Yiwi mwana wa munthu, yirya chiŵandi chaku uchinjekeme ndipuso yimwa maji ngaku uchisuzgika maŵanaŵanu kweniso kufipa mtima.+
19 Kambiya ŵanthu a mucharu ichi kuti, ‘Yehova, Ambuya Fumu Yikulu wakambiya ŵanthu wo aja mu Yerusalemu, mucharu cha Isirayeli kuti: “Azamufipa mtima achirya chiŵandi chawu ndipuso azamuja ndi mantha achimwa maji ngawu, pakuti charu chawu chazamunangikiya limu+ chifukwa cha chiwawa cha ŵanthu wosi wo aja mwenimo.+
20 Matawuni ngo muja ŵanthu ngazamubwangandulika, charu cho chazamunangika;+ ndipu mwazamuziŵa kuti ini ndini Yehova.”’”+
21 Yehova wangulongoro so nani, ndipu wangukamba kuti:
22 “Yiwi mwana wa munthu, kumbi nthanthi yo mwe nayu mu Isirayeli yo yikamba kuti, ‘Mazuŵa ngaluta, kweni viwona vifiskika cha,’ ying’anamuwanji?+
23 Mwaviyo, uŵakambiyi kuti, ‘Yehova, Ambuya Fumu Yikulu wakamba kuti: “Ndazamuchitiska kuti mazu ngenanga ngamali ndipu azakungagwiriskiya ntchitu nge nthanthi so cha mu Isirayeli.”’ Kweni uŵakambiyi kuti, ‘Mazuŵa nge pafupi,+ ndipu chiwona chechosi chifiskikengi.’
24 Pakuti munyumba yaku Isirayeli mwazamukuŵa viwona vaboza so cha pamwenga ŵanthu akukamba vinthu vaboza vo vichitikengi kunthazi.+
25 ‘“Pakuti ini Yehova, ndilongorongi. Mazu ngosi ngo ndalongoro ngazamufiskika ndipu ngazamuswera cha.+ Mu mazuŵa nginu,+ yimwi a munyumba yakugaruka, ndazamulongoro mazu ndi kuchita vo ndalongoro,” Yehova, Ambuya Fumu Yikulu ndiyu wakamba.’”
26 Yehova wangulongoro so nani, ndipu wangukamba kuti:
27 “Yiwi mwana wa munthu, Ayisirayeli* akamba kuti, “Pajumphengi nyengu yitali kuti chiwona cho wawona chifiskiki, ndipu iyu wakamba uchimi wo ufiskikengi kunthazi ukongwa.’+
28 Mwaviyo uŵakambiyi kuti, ‘Yehova, Ambuya Fumu Yikulu wakamba kuti: “‘Mazu ngangu ngosi ngaswerengi cha kufiskika; chechosi cho ndakamba chazamufiskika,’ Yehova, Ambuya Fumu Yikulu ndiyu wakamba.”’”
Mazu Ngam'mphata
^ Pamwenga kuti, “a munyumba yaku Isirayeli.”
