Ezekiyeli 21:1-32
21 Yehova wangulongoro so nani, ndipu wangukamba kuti:
2 “Yiwi mwana wa munthu, lazga chisku chaku ku Yerusalemu, ndipu kamba uthenga wakukwaskana ndi malu ngakupaturika, kweniso kamba uchimi wakukwaskana ndi charu cha Isirayeli.
3 Kambiya charu cha Isirayeli kuti, ‘Yehova wakamba kuti: “Ndilimbanengi nawi ndipu ndisolongi lipanga langu muchakuŵikamu chaki+ ndi kubaya ŵanthu arunji kweniso aheni pakati paku.
4 Pakuti ndibayengi ŵanthu arunji kweniso aheni pakati paku, ndisolongi lipanga langu muchakuŵikamu chaki ndi kubaya ŵanthu wosi, kwambiya kumwera mpaka kunkhondi.*
5 Ŵanthu wosi aziŵengi kuti ini Yehova ndasolo lipanga langu muchakuŵikamu chaki. Ndiliweziyengemu so cha.”’+
6 “Ndipu yiwi mwana wa munthu, tamantha uchinjekeme,* tamantha mwakupwetekeka mtima pa masu pawu.+
7 Ndipu asani atikufumba kuti, ‘Ntchifukwa wuli utamantha?’ umuki kuti, ‘Chifukwa cha uthenga wo utuza.’ Pakuti uzengi nadi ndipu mtima wewosi wazamusongonoka chifukwa cha mantha, janja lelosi lazamulombotoka, munthu weyosi wazamuguŵa ndipuso gongonu lelosi lazamunthonya maji.*+ ‘Awonani! uthenga uzengi nadi, ndipu ufiskikengi,’ Yehova, Ambuya Fumu Yikulu ndiyu wakamba.”
8 Yehova wangulongoro so nani, ndipu wangukamba kuti:
9 “Yiwi mwana wa munthu, kamba uchimi, ndipu ukambi kuti, ‘Yehova wakamba kuti: “Kamba kuti, ‘Lipanga! Lipanga+ lanoreka kweniso lapuputika.
10 Lanoreka kuti libayi ŵanthu anandi; lapuputika kuti ling’animi nge limphezi.’”’”
“Kumbi titenere cha kukondwa?”
“‘Kumbi lipanga lo* likanengi nthonga ya mwana wangu,+ nge mo likaniya chimiti chechosi?
11 “‘Laperekeka kuti lipuputiki ndi kunyamulika ndi janja kuti ligwiri ntchitu. Lipanga lenili lanoreka ndi kupuputika kuti liŵikiki mujanja la wakubaya.+
12 “‘Liya ndi kutenje,+ yiwi mwana wa munthu, pakuti lipanga lapukwa ŵanthu ŵangu; lapukwa alongozgi wosi ŵa Ayisirayeli.+ Yiwu ndi ŵanthu ŵangu abayikengi ndi lipanga lo. Mwaviyo, jipamanthi pachiŵa chifukwa cha chitima.
13 Pakuti ŵanthu ŵangu afufuzika,+ sonu ntchinthu wuli cho chichitikengi asani lipanga lakana nthonga? Nthonga yo kuŵengevi,’+ Yehova, Ambuya Fumu Yikulu ndiyu wakamba.
14 “Ndipu yiwi mwana wa munthu, kamba uchimi ndi kumba manja ngaku ndipuso kamba katatu mazu ngakuti ‘Lipanga!’ Ili ndi lipanga lakubaya ŵanthu, lipanga lakupulutuwa ŵanthu, lo laŵazunguliya.+
15 Mitima yawu yazamusongonoka chifukwa cha mantha+ ndipu ŵanthu anandi azamukufwa pamageti nga tawuni yawu; ndazamubaya ŵanthu ndi lipanga. Lipanga lo ling’anima nge limphezi ndipu lapuputika kuti libayi ŵanthu!
16 Baya ŵanthu kumaryi! Baya ŵanthu kumazge! Luta kwekosi ko wuyi waku walazgiya!
17 Nani ndimbengi manja ndi kutunisa ukali wangu.+ Ini Yehova ndalongoro.”
18 Yehova wangulongoro so nani, ndipu wangukamba kuti:
19 “Kweni yiwi mwana wa munthu, jambula misewu yiŵi yo mwazamujumpha lipanga la fumu ya ku Babiloni. Misewu yosi yiŵi yituliyi mucharu chimoza, ndipu uŵiki chikwangwani* po msewu upatukana kuluta kumatawuni ngaŵi.
20 Jambula msewu umoza wakuti muzijumphi lipanga lo lazamuyukiya tawuni ya Raba+ ya Aamoni, kweniso msewu unyaki wakuti muzijumphi lipanga lo lazamuyukiya tawuni yakukho ya Yerusalemu+ ku Yuda.
21 Pakuti fumu ya ku Babiloni yama kuti yiwombezi pamphatukanu ya msewu, po misewu yiŵi yipatukana. Fumu yo yisukunyisa mivi. Yifumba kwa angoza* ŵaki; yisanda chiŵindi.
22 Vinthu vakuwombeze vo ve kujanja laki lamaryi valongo kuti yiluti ku Yerusalemu, kuti yikaŵiki vidya vankhondu vakugumuliya, kuti yikambiyi asilikali kuti abayi ŵanthu, kuti yimbi mbata ya nkhondu, kuti yiŵiki vidya vakugumuliya mageti, kuti yizengi vimbumira vakuchitiyapu nkhondu, kuti yizengi mpanda wankhondu.+
23 Kweni ŵanthu* wo yinguŵalapizgiya azamuwona nge kuti yawombeza vaboza.+ Kweni fumu yo yikumbuka mulandu wawu ndipu yazakuŵathereska.+
24 “Mwaviyo, Yehova, Ambuya Fumu Yikulu wakamba kuti: ‘Vosi vo muchita vavumbuwa mphulupulu zinu kweniso valongo pakweru maubudi nginu. Ndipu venivi vachitiska kuti mulandu winu ukumbukiki. Sonu pakuti mwakumbukika, mutolekengi mwakuchichizgika.’*
25 “Kweni zuŵa laku lafika, yiwi mulongozgi muheni wa Ayisirayeli,+ yo wapwetekeka ukongwa, nyengu ya chilangu chaku chakumaliya yafika.
26 Yehova, Ambuya Fumu Yikulu wakamba kuti: ‘Zuwa mphumphu kweniso zuwa chisoti chaufumu.+ Vinthu vijengi viyo pe cha.+ Kweza munthu wakusika+ ndipuso sisa munthu wakukwezeka.+
27 Ndibwanganduwengi, ndibwanganduwengi, ndibwanganduwengi ufumu. Chisoti cha ufumu chiperekekengi kwaku weyosi cha mpaka po munthu yo ngwakwenere mwadangu waziya,+ ndipu ndazakuchipereka kwaku iyu.’+
28 “Yiwi mwana wa munthu, kamba uchimi, ndipu ukambi kuti, ‘Ivi ndivu Yehova, Ambuya Fumu Yikulu wakamba vakukwaskana ndi Aamoni kweniso mazu ngakunyoza ngo akamba.’ Kamba kuti, ‘Lipanga! Lipanga lasololeka kuti libayi ŵanthu; lapuputika kuti libayi kweniso kuti ling’animi nge limphezi.
29 Chinanga kuti ŵanthu ŵaku akuwombeza akamba viwona vaboza kweniso awombeza vinthu vaboza vakukwaskana ndi yiwi, wazamuwunjikika pa ŵanthu akubayika,* ŵanthu aheni wo zuŵa lawu laŵafikiya, nyengu ya chilangu chawu chakumaliya.
30 Weze lipanga muchakuŵikamu chaki. Ndazakukuyeruzgiya mumalu ngo ungulengeke, mucharu cho ungutuliya.
31 Ndazakukupunguliya ukali wangu. Ndazakukuphutiya motu wa ukali wangu, ndipu ndazakukupereka mu manja mwa ŵanthu ankhaza, ŵanthu alusu pakubwanganduwa.+
32 Wazamuja nge nkhuni zakupembe motu;+ ndopa zaku zazamudirika mucharu cho, ndipu wazamukumbukika so cha, pakuti ini Yehova ndalongoro.’”
Mazu Ngam'mphata
^ Anyaki akamba kuti, “kumpotu.”
^ Mazu ngaki chayingu, “tamantha chiwunu chaku chichinjekeme.”
^ Kung’anamuwa kujikoze chifukwa cha mantha.
^ Kung’anamuwa lipanga laku Yehova.
^ Mazu ngaki chayingu, “janja.”
^ Mazu ngaki chayingu, “aterafi.”
^ Kung’anamuwa ŵanthu a ku Yerusalemu.
^ Mazu ngaki chayingu, “mutolekengi ndi janja.”
^ Mazu ngaki chayingu, “pa makhosi nga ŵanthu akubayika.”
