Ezekiyeli 28:1-26
28 Yehova wangulongoro so nani, ndipu wangukamba kuti:
2 “Yiwi mwana wa munthu, kambiya mulongozgi wa ku Turo kuti, ‘Yehova Ambuya Fumu Yikulu wakamba kuti:
“Chifukwa chakuti mtima waku wajikuzga,+ ukamba kuti, ‘Nde chiuta.
Ndija pampandu waufumu waku chiuta pakati pa nyanja.’+
Kweni ndiwi munthu ŵaka, ndiwi chiuta cha,Chinanga kuti mumtima mwaku uŵanaŵana kuti ndiwi chiuta.
3 Awona! We ndi zeru kuluska Daniyeli.+
Ndipu palivi chinthu chakubisika kwaku yiwi.
4 Wajikhupusa chifukwa cha zeru zaku kweniso kuwamu,Ndipu ulutirizga kusunga golidi ndi siliva muvipinda vaku vakusungamu chuma.+
5 Ungusaniya chuma chinandi chifukwa chakuti wachitanga malonda mwalusu,+Ndipu mtima waku ungujikuzga chifukwa cha chuma chaku.”’
6 “‘Mwaviyo, Yehova, Ambuya Fumu Yikulu wakamba kuti:
“Chifukwa chakuti mumtima mwaku uŵanaŵana kuti ndiwi chiuta,
7 Ndikutumiyengi alendu kuti azikuyukiyi, ŵanthu ankhaza ukongwa pakati pa mitundu ya ŵanthu,+Yiwu azamusolo malipanga ngawu kuti anangi vinthu vosi vakutowa, vo ukusaniya chifukwa cha zeru zakuNdipu azamufipiska unkhankhu waku ukulu.+
8 Yiwu azakukusisiya muzenji,*Ndipu wazamubayika mwankhaza pakati pa nyanja.+
9 Kumbi munthu yo wazakukubaya wazakumukambiya mbwenu kuti, ‘Ndini chiuta?’
Wazamuja munthu ŵaka mu manja mwa munthu yo wazakukubaya, wazamuja chiuta cha.”’
10 ‘Wazamubayika ndi alendu nge ŵanthu ambula kudumulika,Pakuti ini ndalongoro,’ Yehova, Ambuya Fumu Yikulu ndiyu wakamba.”
11 Yehova wangulongoro so nani, ndipu wangukamba kuti:
12 “Yiwi mwana wa munthu, umbi sumu yakumba pakuliya yakukwaskana ndi fumu ya ku Turo, ndipu uyikambiyi kuti, ‘Yehova, Ambuya Fumu Yikulu wakamba kuti:
“Yiwi wenga chakuwoniyapu chakufikapu,*Wenga ndi zeru zinandi+ kweniso wenga wakutowa ukongwa.+
13 Yiwi wenga mu Edeni, mumunda waku Chiuta.
Ungutoweseka ndi mya yakuzirwa ya mtundu wewosi,Rube, topazi ndi jasipa; kurusolito, onekisi ndi yade; safiro, takoyizi+ ndi emeradi;Ndipu vakuŵikamu vaki venga vagolidi.
Vingupangika pa zuŵa lo ungulengeke.
14 Ndingukuŵika kuti uje mukerubi wakusankhika wakuvikiliya.
Wenga paphiri lakupaturika laku Chiuta,+ ndipu wayendanga mumya yamotu.
15 Wenga wambula kalema mu nthowa zaku kutuliya pa zuŵa lo ungulengekeMpaka po ungwambiya kuchita vinthu vambula urunji.+
16 Chifukwa chakuti wachitanga ukongwa malonda,+Unguzazika ndi chiwawa, ndipu ungwamba kubuda.+
Mwaviyo, ndazakukuponya kubwalu nge wakufipiskika kutuliya paphiri laku Chiuta ndipu ndazakukunanga,+Yiwi mukerubi wakuvikiliya, ndazakukutuzgapu pamalu ngaku mumya yamotu.
17 Mtima waku ungujikuzga chifukwa cha kutowa kwaku.+
Ungunanga zeru zaku chifukwa cha unkhankhu waku ukulu.+
Ndazakukuponya pacharu chapasi.+
Ndazakukuŵika panthazi pa mafumu kuti ngazikulereskengi.
18 Chifukwa cha mulandu waku ukulu kweniso malonda ngachinyengu ngo uchita, wafipiska malu ngaku ngakupaturika.
Ndazamubuska motu pakati paku, ndipu wazakukupiriza.+
Ndazakukusambusa vyotu pacharu chapasi pamasu pa ŵanthu wosi wo azakukulereskanga.
19 Ŵanthu wosi wo akuziŵanga pakati pa mitundu ya ŵanthu azakukulereskanga mwakuzizwa.+
Wazamumala mwamabuchibuchi kweniso wazamumala umampha cha,Ndipu wazamuŵaku so cha mpaka muyaya.”’”+
20 Yehova wangulongoro so nani, ndipu wangukamba kuti:
21 “Yiwi mwana wa munthu, lazga chisku chaku ku Sidoni,+ ndipu kamba uchimi wakukwaskana ndi iyu.
22 Kamba kuti, ‘Yehova, Ambuya Fumu Yikulu wakamba kuti:
“Yiwi Sidoni, ndikuyukiyengi, ndipu ndazamukankhuskika pakati paku;Ŵanthu azamuziŵa kuti ini ndini Yehova asani ndazipereka cheruzgu paku iyu kweniso asani ndazitoweseka pakati paki.
23 Ndazamutumiza mulili pakati paki ndipu ndopa zazamukwenda mumisewu yaki.
Asani lipanga lazimuyukiya kutuliya muvigaŵa vosi, ŵanthu wo azamubayika azamukuwa pasi pakati paki;Ndipu azamuziŵa kuti ini ndini Yehova.+
24 “‘“Asani venivi vazichitika, nyumba yaku Isirayeli yazamuzingilizika so cha ndi mikwakwazu yakupweteka kweniso minga yakuŵaŵa,+ kung’anamuwa ŵanthu wo atiŵanyoza; ndipu ŵanthu azamuziŵa kuti ini ndini Yehova, Ambuya Fumu Yikulu.”’
25 “‘Yehova, Ambuya Fumu Yikulu wakamba kuti: “Asani ndaziwunganisa so a munyumba yaku Isirayeli kutuliya mu mitundu ya ŵanthu mo angumbininikiya,+ ndazamutoweseka pakati pawu mitundu ya ŵanthu yichiwona.+ Ndipu yiwu azamuja mucharu chawu+ cho ndinguchipereka kwa mteŵeti wangu Yakobe.+
26 Azamuja mucharu cho mwakuvikilirika+ ndipu azamuzenga nyumba ndi kulima minda ya mphereska,+ azamuja mwakuvikilirika asani ndazipereka cheruzgu ku ŵanthu wosi wo akuŵazunguliya wo atiŵanyoza;+ ndipu yiwu azamuziŵa kuti ini ndini Yehova Chiuta wawu.”’”
Mazu Ngam'mphata
^ Pamwenga kuti, “mudindi.”
^ Mazu ngaki chayingu, “Yiwi wadindanga chakuwoniyapu.”
