Ezekiyeli 29:1-21
29 Mu chaka cha 10, mu mwezi wa 10, pa zuŵa la 12 la mwezi wo, Yehova wangulongoro nani, ndipu wangukamba kuti:
2 “Yiwi mwana wa munthu, lazga chisku chaku kwaku Farawo fumu ya ku Ijipiti, ndipu kamba uchimi wakukwaskana ndi iyu kweniso charu chosi cha Ijipiti.+
3 Ukambi kuti: ‘Yehova, Ambuya Fumu Yikulu wakamba kuti:
“Ndilimbanengi nawi, yiwi Farawo fumu ya ku Ijipiti,+Yiwi chinyama chakofya cha munyanja cho chija mumigelu ya msinji waki wa Nayelu,+Yo wakamba kuti, ‘Msinji wa Nayelu* ngwangu.
Ndikuwupanga ndija.’+
4 Kweni ndazamuŵika mbeja munjegheyu zaku ndipu ndazamuchitiska kuti somba za mu Nayelu waku zikaniriyi kumamba ngaku.
Ndazakukutuzgamu mu Nayelu waku limoza ndi somba zosi za mu Nayelu zo zakaniriya kumamba ngaku.
5 Ndazakukutaya muchipalamba, yiwi ndi somba zosi za mu Nayelu waku.
Wazamukuwa pasi pamtandasanya, ndipu wazamuyoleka cha pamwenga kuwunjikika pamoza.+
Ndazakukupereka ku vinyama vamudondu va pacharu chapasi kweniso ku viyuni vamude kuti uje chakurya chawu.+
6 Pavuli paki, ŵanthu wosi a ku Ijipiti azamuziŵa kuti ini ndini Yehova,Pakuti ŵenga nge uteka* ndipu anguŵawovya so cha a munyumba yaku Isirayeli.+
7 Ŵati ako janja laku, yiwi unguphwanyika,Ndipu unguchitiska kuti aphajuwi phewa lawu.
Ŵati akuyegeme, ungufyoka,Ndipu unguchitiska kuti malundi ngawu ngambwakamiyi.”*+
8 “‘Mwaviyo, Yehova, Ambuya Fumu Yikulu wakamba kuti: “Ndikutumiyengi lipanga,+ ndipu ndibayengi ŵanthu ndi vinyama pakati paku.
9 Charu cha Ijipiti chazamusambuka mahami kweniso malu ngakunangika;+ ndipu azamuziŵa kuti ini ndini Yehova, pakuti yiwi wakamba kuti,* ‘Msinji wa Nayelu ngwangu; ini ndini ndikuwupanga.’+
10 Mwaviyo, ndilimbanengi nawi ndipuso ndilimbanengi ndi Nayelu, ndipu ndichitiskengi kuti charu cha Ijipiti chinangiki kweniso chimiri, chijengi charu chakunangika+ kwambiya ku Migidoli+ kuchifika ku Siyene+ mpaka kumphaka ya charu cha Ifiyopiya.
11 Ŵanthu kweniso viŵetu vazamujumphamu cha wapasi+ ndipu mwazamuja ŵanthu cha kwa vyaka 40.
12 Ndazamuchitiska kuti charu cha Ijipiti chinangiki ukongwa kuluska vyaru vinyaki, ndipu matawuni ngaki ngazamunangika ukongwa kuluska matawuni nganyaki kwa vyaka 40.+ Ayijipiti ndazakuŵambininiskiya mu mitundu ya ŵanthu ndipuso muvyaru vinyaki.”+
13 “‘Pakuti Yehova, Ambuya Fumu Yikulu wakamba kuti: “Asani vyaka 40 vamala, ndazamuwunganisa so Ayijipiti kutuliya mu mitundu yo ndinguŵambininiskiyamu;+
14 Ŵanthu a ku Ijipiti wo angutoleke ku ukapolu ndazakuŵaweze kucharu cha Patirosi,+ kucharu cho angutuliya, ndipu kweniko amuja ufumu wambula kuzirwa.
15 Ijipiti wazamuja wakusika ukongwa kuluska maufumu nganyaki ndipu wazamuja so ndi mazaza cha pa vyaru vinyaki.+ Ndazamuchitiska kuti Ayijipiti aje amana ukongwa mwakuti azamutondekanga kuthereska vyaru vinyaki.+
16 A munyumba yaku Isirayeli azamuthembanga so Ijipiti cha,+ kweni wazakuŵakumbusanga kuti angunanga kung’anamukiya kwa Ayijipiti kuti aŵawovyi ndipu azamuziŵa kuti ini ndini Yehova, Ambuya Fumu Yikulu.”’”
17 Sonu mu chaka cha 27, mu mwezi wakwamba, pa zuŵa lakwamba la mwezi wo, Yehova wangulongoro nani ndipu wangukamba kuti:
18 “Yiwi mwana wa munthu, Nebukadinezara*+ fumu ya ku Babiloni wanguchitiska kuti asilikali ŵaki agwiri ntchitu mwanthazi pakulimbana ndi Turo.+ Mutu wewosi unguchita phala, ndipu phewa lelosi lingulimuka. Kweni iyu ndi asilikali ŵaki angulonde malipiru ngengosi cha pa ntchitu yo angugwira pakulimbana ndi Turo.
19 “Mwaviyo, Yehova, Ambuya Fumu Yikulu wakamba kuti, ‘Ndipereka charu cha Ijipiti kwaku Nebukadinezara* fumu ya ku Babiloni,+ ndipu watongi chuma chaki ndi kuphanga vinthu vinandi mucharu cho; ndipu vinthu vo, vazamuja malipiru nga asilikali ŵaki.’
20 “‘Ndimupaskengi charu cha Ijipiti nge malipiru chifukwa cha ntchitu yo wangugwira pakulimbana ndi tawuni yo,* pakuti angundigwiriya ntchitu,’+ Yehova, Ambuya Fumu Yikulu ndiyu wakamba.
21 “Mu zuŵa lo, ndazamuchitiska kuti pa nyumba yaku Isirayeli pabuki sengwi,*+ ndazakukupaska mwaŵi wakuti ulongoro pakati pawu; ndipu azamuziŵa kuti ini ndini Yehova.”
Mazu Ngam'mphata
^ Yapa kweniso mu mavesi ngapanthazi, “Nayelu” wamiya Msinji wa Nayelu ndi migelu yaki yakwendamu maji ngakudiriya mbewu.
^ Mazu ngaki chayingu, “deti.”
^ Mazu ngaki chayingu, “viwunu vawu vimbwakamiyi.”
^ Mazu ngaki chayingu, “pakuti iyu wakamba kuti.”
^ Zina ili lilembeka so kuti, “Nebukadirezara.”
^ Zina ili lilembeka so kuti, “Nebukadirezara.”
^ Kung’anamuwa tawuni ya Turo.
^ Pamwenga kuti, “ndazamupereka nthazi pa nyumba yaku Isirayeli.”
