Ezekiyeli 3:1-27
3 Pavuli paki, wangundikambiya kuti: “Yiwi mwana wa munthu, yirya cho che panthazi paku.* Yirya mpukutu uwu, ndipu luta, kuti ukalongoro ndi nyumba yaku Isirayeli.”+
2 Mwaviyo ndingujula mulomu wangu, ndipu wangundipaska mpukutu wo kuti ndiryi.
3 Iyu wangulutirizga kulongoro nani ndipu wangundikambiya kuti: “Yiwi mwana wa munthu, yirya mpukutu wo nditikupaska, ndipu uwuzazi mulufu laku.” Mwaviyo, ndingwamba kuwurya, ndipu wanong’omiyanga nge uchi mumulomu mwangu.+
4 Iyu wangundikambiya kuti: “Yiwi mwana wa munthu, luta munyumba yaku Isirayeli ndipu ukaŵakambiyi mazu ngangu.
5 Pakuti nditikutuma ku ŵanthu wo alongoro chineneru chakusuzga kuchivwa cha pamwenga alilimi lambula kuziŵika, kweni nditikutuma ku nyumba yaku Isirayeli.
6 Nditikutuma ku ŵanthu amitundu yakupambanapambana wo alongoro chineneru chakusuzga kuchivwa cha pamwenga alilimi lambula kuziŵika, wo mazu ngawu ungatondeka kungavwa. Asani ndingukutuma kwaku yiwu, atingi akakuvwisiyengi.+
7 Kweni a munyumba yaku Isirayeli amukana kukuvwisiya, pakuti akhumba cha kundivwisiya.+ Ŵanthu wosi a munyumba yaku Isirayeli mbamtafu ndipuso mtima wawu ngunononu.+
8 Awona! Ndachitiska kuti chisku chaku chiŵi chinononu nge visku vawu ndipuso ndachitiska kuti pachisku chaku paŵi panononu nge pavisku vawu.+
9 Ndachitiska kuti chisku chaku chiŵi nge dayamondi, kuti chiŵi chinononu kuluska mwa wa sangalawi.+ Ungaŵawopanga cha pamwenga kuchita mantha chifukwa cha visku vawu,+ pakuti yiwu ndi nyumba yakugaruka.”
10 Wangulutirizga kulongoro nani ndipu wangundikambiya kuti: “Yiwi mwana wa munthu, sunga mumtima ndi kuvwisiya mazu ngangu ngosi ngo nditikukambiya.
11 Luta pakati pa ŵanthu ŵaku*+ wo akutoleke ku ukapolu ndipu ukalongoro nawu. Ukaŵakambiyi kuti, ‘Ivi ndivu Yehova, Ambuya Fumu Yikulu, wakamba,’ kwali amuvwisiya pamwenga amukana.”+
12 Pavuli paki, mzimu ungundinyamuwa+ ndipu kuvuli kwangu ndinguvwa chiwawa chikulu kweniso mazu nganthazi ngakuti: “Unkhankhu waku Yehova uthamikiki kutuliya pamalu ngaki.”
13 Kwavwikanga chiwawa cha mapapa nga vamoyu ngachikwenthana,+ chiwawa cha vingelengeli vo venga pafupi ndi vamoyu,+ ndipuso chiwawa chikulu.
14 Mzimu ungundinyamuwa ndi kuluta nani, ndinguluta nde ndi mtima wakuŵaŵa kweniso ndakwiya, ndipu janja laku Yehova lingwamba kugwira ntchitu mwanthazi paku ini.
15 Mwaviyo ndinguluta ku Telu-abibu, ku ŵanthu wo angutoleke ku ukapolu, wo ajanga mumphepeti mwa msinji wa Kebara,+ ndipu ndinguja kwenuku ko yiwu ajanga; ndinguja pakati pawu kwa mazuŵa 7 nde wakutimbanyizgika maŵanaŵanu.+
16 Pati pajumpha mazuŵa 7, Yehova wangulongoro nani, ndipu wangukamba kuti:
17 “Yiwi mwana wa munthu, ndakusankha kuti uje mulonda wa nyumba yaku Isirayeli;+ ndipu asani wavwa mazu kutuliya mumulomu mwangu, unditcheŵeske ŵanthu wo.+
18 Asani ndakambiya munthu muheni kuti, ‘Ufwengi,’ kweni yiwi wamutcheŵeska cha, ndipu watondeka kulongoro kuti utcheŵeski munthu muheni ndi chilatu chakuti watuweku ku nthowa yaki yiheni kuti waje ndi umoyu,+ iyu wazamukufwa chifukwa cha kunanga kwaki pakuti ndi munthu muheni,+ kweni yiwi wazamuja ndi mulandu chifukwa cha ndopa zaki.+
19 Kweni asani watcheŵeska munthu muheni, ndipu iyu watuwaku cha ku uheni waki kweniso ku nthowa yaki yiheni, iyu wazamukufwa chifukwa cha kunanga kwaki, kweni yiwi wazamutaska umoyu waku.+
20 Kweni asani munthu murunji waleka urunji waki ndipu wachita vinthu viheni,* ndazakumuŵikiya chinthu chakuguŵiska panthazi paki ndipu wazamukufwa.+ Asani yiwi ungumutcheŵeska cha, iyu wazamukufwa chifukwa cha ubudi waki ndipu ntchitu zaki zaurunji zazamukumbukika cha, kweni yiwi wazamuja ndi mulandu chifukwa cha ndopa zaki.+
21 Kweni asani watcheŵeska munthu murunji kuti waleki kubuda, ndipu wabuda cha, iyu wazamulutirizga kuja ndi umoyu chifukwa wangutcheŵeskeka+ ndipu yiwi wazamutaska umoyu waku.”
22 Nde kwenuku, janja laku Yehova linguza kwaku ini, ndipu wangundikambiya kuti: “Soka, luta kuchidika ndipu ndamulongoro nawi kweniko.”
23 Mwaviyo ndingusoka ndipu ndinguluta kuchidika, ndipu awonani! unkhankhu waku Yehova wenga kweniko,+ wenga nge unkhankhu wo ndinguwona mumphepeti mwa msinji wa Kebara,+ ndipu ndingujikama ndi kusindama mpaka chisku changu pasi.
24 Pavuli paki, mzimu ungusere mwaku ini ndipu unguchitiska kuti ndisoki.+ Iyu wangulongoro nani ndipu wangukamba kuti:
“Luta, ukajijaliyi munyumba yaku.
25 Kweni yiwi mwana wa munthu, ŵanthu azamuŵika vingwi paku yiwi ndi kukumanga navu kuti utondeki kwenda pakati pawu.
26 Ndazamuchitiska kuti lilimi laku likaniriyi kuchavu cha mulomu waku ndipu wazamuja ŵaka cheti, wazamutondeka kuŵachenya, chifukwa chakuti yiwu ndi nyumba yakugaruka.
27 Kweni asani ndilongoro nawi, ndazamujula mulomu waku, ndipu uziŵakambiyi kuti,+ ‘Ivi ndivu Yehova, Ambuya Fumu Yikulu, wakamba.’ Yo watuvwa, wavwi,+ ndipu yo wakana kuvwa, wakani, chifukwa chakuti yiwu ndi nyumba yakugaruka.+
Mazu Ngam'mphata
^ Mazu ngaki chayingu, “yirya cho wasaniya.”
^ Pamwenga kuti, “pakati pa ŵana a ŵanthu ŵaku.”
^ Pamwenga kuti, “wachita vinthu vambula urunji.”
