Ezekiyeli 30:1-26
30 Yehova wangulongoro so nani, ndipu wangukamba kuti:
2 “Yiwi mwana wa munthu, kamba uchimi, ndipu ukambi kuti, ‘Yehova, Ambuya Fumu Yikulu wakamba kuti:
“Liyani kuti, ‘Kotu ama, zuŵa lituza!’
3 Pakuti zuŵa le pafupi, zuŵa laku Yehova le pafupi.+
Lazamuja zuŵa la mitambu,+ nyengu yakuŵikika yakuyeruzgiya mitundu ya ŵanthu.+
4 Lipanga lizengi kuti liyukiyi Ijipiti, ndipu Ifiyopiya wazamutimbanyizgika pa nyengu yo ŵanthu azamubayika mu Ijipiti;Po chuma chaki chazamutoleka ndipuso po mafawundeshoni ngaki ngazamuwisikiya pasi.+
5 Ŵanthu a ku Ifiyopiya,+ ku Puti,+ ku Ludi, ŵanthu wosi akupambanapambana,*Ŵanthu a ku Kubi, limoza ndi ŵana a mucharu cha phanganu,*Wosi azamubayika ndi lipanga.”’
6 Yehova wakamba kuti:
‘Ŵanthu wo atovya Ijipiti nawu azamubayika,Ndipu nthazi zo zitimuchitiska kuti wajikuzgengi zazamumala.’+
“‘Yiwu azamubayika ndi lipanga kwambiya ku Migidoli+ mpaka ku Siyene,’+ Yehova, Ambuya Fumu Yikulu ndiyu wakamba.
7 ‘Vyaru vawu vazamunangika ukongwa kuluska vyaru vinyaki, ndipu matawuni ngawu ngazamunangika ukongwa kuluska matawuni nganyaki.+
8 Asani ndazibuska motu mu Ijipiti kweniso asani ndazinanga ŵanthu wosi wo akoliyana nayu, yiwu azamuziŵa kuti ini ndini Yehova.
9 Mu zuŵa lenilo, ndazamutuma mathenga musitima kuti ngakatenthemesi Ifiyopiya yo watijithemba; ŵanthu a ku Ifiyopiya azamutimbanyizgika mu zuŵa lo Ijipiti wazamubwangandulikiya, pakuti lizengi nadi kwambula kutondeka.’
10 “Yehova, Ambuya Fumu Yikulu wakamba kuti: ‘Mwakugwiriskiya ntchitu janja laku Nebukadinezara* fumu ya ku Babiloni, ndazamupulutuwa gulu la ŵanthu a ku Ijipiti.+
11 Iyu ndi asilikali ŵaki, ŵanthu ankhaza ukongwa pakati pa mitundu ya ŵanthu,+ atumizikengi mucharu cho kuti achinangi. Yiwu azamusolo malipanga ngawu kuti ayukiyi Ijipiti ndipu charu cho chazamuzaza ndi ŵanthu akubayika.+
12 Ndazamukamuska migelu ya msinji wa Nayelu,+ ndipu ndazamugulisa charu cho ku ŵanthu aheni kuti chije mu manja mwawu. Mwakugwiriskiya ntchitu janja la mulendu,+ ndazamunanga charu cho ndi vosi vo vilimu. Ini Yehova, ndalongoro.’
13 “Yehova, Ambuya Fumu Yikulu wakamba kuti: ‘Ndazamunanga so angoza akuseruska* ndipuso ndazamutuzgapu achiuta ambula fundu a ku Nofi.*+ Mucharu cha Ijipiti mwazamukuŵa so mulongozgi cha, ndipu ndazamuchitiska kuti ŵanthu a ku Ijipiti aje ndi mantha.+
14 Ndazamubwanganduwa Patirosi,+ ndazamubuska motu mu Zowani ndipuso ndazamupereka cheruzgu paku No.*+
15 Ndazamupunguliya ukali wangu paku Sini, malu ngakuvikilirika nga charu cha Ijipiti, ndipuso ndazamubaya ŵanthu a ku No.
16 Ndazamubuska motu mu Ijipiti, Sini wazamuchita mantha, mpanda wa ku No wazamugumulika ndipu ŵanthu azamuyukiya Nofi* lumwi le nyee!
17 Anyamata a ku Oni* kweniso a ku Pibeseti azamubayika ndi lipanga, ndipu ŵanthu a mumatawuni azamutoleke ku ukapolu.
18 Ku Tapanesi lumwi lazamuchita mdima asani ndazifyo magoli nga charu cha Ijipiti kweniko.+ Nthazi zaki zo zichitiska kuti wajikuzgengi zazamumala,+ mtambu wazakumubenekere, ndipu ŵanthu a mumatawuni ngaki azamutoleke ku ukapolu.+
19 Ndazamupereka cheruzgu pa charu cha Ijipiti, ndipu azamuziŵa kuti ini ndini Yehova.’”
20 Ndipu mu chaka cha 11, mu mwezi wakwamba, pa zuŵa la 7 la mwezi wo, Yehova wangulongoro nani, ndipu wangukamba kuti:
21 “Yiwi mwana wa munthu, ndafyo janja laku Farawo fumu ya ku Ijipiti; limangikengi cha kuti lichizgiki pamwenga kukulungika ndi bandeji kuti lije ndi nthazi zakunyamuliya lipanga.”
22 “Mwaviyo, Yehova, Ambuya Fumu Yikulu wakamba kuti, ‘Ndilimbanengi ndi Farawo fumu ya ku Ijipiti,+ ndifyongi manja ngaki, janja laki lanthazi kweniso janja laki lakufyoka,+ ndipu ndiwisiyengi pasi lipanga lo le kujanja laki.+
23 Pavuli paki, ndazamumbininiska ŵanthu a ku Ijipiti pakati pa mitundu yinyaki kweniso pakati pa vyaru vinyaki.+
24 Ndazamuchitiska kuti manja nga fumu yaku Babiloni ngaje nganthazi,*+ ndazamuŵika lipanga mujanja laki+ ndipuso ndazamufyo manja ngaku Farawo. Iyu wazamutamantha ukongwa pa masu paki* nge munthu yo we pafupi kufwa.
25 Ndazamuchitiska kuti manja nga fumu yaku Babiloni ngaje nganthazi, kweni manja ngaku Farawo ngazamuja ngambula nthazi; yiwu azamuziŵa kuti ini ndini Yehova asani ndaziŵika lipanga mujanja la fumu ya ku Babiloni, ndipuso asani wazilinyamuwa ndi kuyukiya charu cha Ijipiti.+
26 Ndazamumbininiska ŵanthu a ku Ijipiti pakati pa mitundu yinyaki kweniso pakati pa vyaru vinyaki,+ ndipu azamuziŵa kuti ini ndini Yehova.’”
Mazu Ngam'mphata
^ Pamwenga kuti, “ŵanthu wosi amitundu yinyaki.”
^ Panyaki akamba Ayisirayeli wo angukoliyana ndi charu cha Ijipiti.
^ Zina ili lilembeka so kuti, “Nebukadirezara.”
^ Pamwenga kuti, “Mefisi.”
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Kung’anamuwa Tebesi.
^ Pamwenga kuti, “Mefisi.”
^ Kudanika so kuti ku Heliyopolisi.
^ Pamwenga kuti, “Ndazamusazgiyaku nthazi za fumu ya ku Babiloni.”
^ Kung’anamuwa pa masu pa fumu ya ku Babiloni.
