Ezekiyeli 36:1-38
36 “Kweni yiwi mwana wa munthu, kamba uchimi wakukwaskana ndi mapiri nga ku Isirayeli, ndipu ukambi kuti, ‘Yimwi mapiri nga ku Isirayeli, vwani mazu ngaku Yehova.
2 Yehova, Ambuya Fumu Yikulu wakamba kuti: “Murwani wakamba vakukwaskana ndi yimwi kuti, ‘Khawu cha! Chinanga ndi malu ngapachanya ngakali ngaja ngidu!’”’+
3 “Mwaviyo, kamba uchimi ndipu ukambi kuti, ‘Yehova, Ambuya Fumu Yikulu wakamba kuti: “Pakuti yiwu akusambusani mahami ndipuso akuyukiyani kutuliya kuvigaŵa vosi, kuti ŵanthu akujaku* akutuliya pakati pa mitundu ya ŵanthu akutoni kuja ŵawu, ndipuso pakuti ŵanthu alongoro vaku yimwi kweniso akamba vinthu viheni vakukwaskana ndi yimwi,+
4 mwaviyo, yimwi mapiri nga ku Isirayeli, vwani mazu ngaku Yehova, Ambuya Fumu Yikulu! Yehova, Ambuya Fumu Yikulu walongoro ndi mapiri, mitunthu, misinji, madambu, malu ngo ngakunangika ndi kusambuka mahami,+ kweniso matawuni ngakujowoleka ngo vinthu vaki vaphangika ndipuso ngo nganyozeka ndi ŵanthu akujaku a mitundu yo yaŵazunguliya;+
5 Yehova, Ambuya Fumu Yikulu wakamba kuti: ‘Chifukwa cha ukali wangu wakukole,*+ ndazamususka akujaku a mitundu ya ŵanthu kweniso ŵanthu wosi a ku Edomu, wo mwakukondwa ukongwa kweniso mwakunyoza+ ato charu changu kuti chije chawu, kuti ato malu ngaki ngakuliskaku viŵetu kweniso kuti aphangi vinthu va mucharu cho.’”’+
6 “Mwaviyo, kamba uchimi wakukwaskana ndi charu cha Isirayeli, ndipu kambiya mapiri, mitunthu, misinji kweniso madambu kuti, ‘Yehova, Ambuya Fumu Yikulu wakamba kuti: “Awonani! Ndilongorongi chifukwa cha ukali wangu wakukole kweniso kukwiya, pakuti mitundu ya ŵanthu yakulengesani.”’+
7 “Mwaviyo, Yehova, Ambuya Fumu Yikulu wakamba kuti: ‘Ndisoska janja langu ndipu ndilapizga kuti mitundu ya ŵanthu yo yakuzunguliyani, yazamulengeseka.+
8 Kweni yimwi mapiri nga ku Isirayeli, mwazamuchita mphanda kweniso mwazamubaliya vipasu ŵanthu ŵangu Ayisirayeli,+ pakuti pambula kuswera yapa, aweriyengi mucharu chawu.
9 Pakuti nde namwi, ndazamung’anamukiya kwaku yimwi, ndipu mwazamulimika kweniso mwazamumijika ndi mbewu.
10 Ndazamuyandanisa ŵanthu ŵinu, nyumba yosi yaku Isirayeli, nyumba yosi, ndipu mumatawuni mwazamuja ŵanthu+ kweniso mahami ngazamuzengeka so.+
11 Ndazamuyandanisa ŵanthu ŵinu kweniso viŵetu vinu.+ Vazamuja vinandi kweniso vazamuyandana. Ndazamuchitiska kuti mwaku yimwi muzijengi ŵanthu nge mo venge kali,+ ndazamuchitiska kuti vinthu vizikuyendiyeningi umampha ukongwa kuluska kali;+ ndipu mwazamuziŵa kuti ini ndini Yehova.+
12 Ndazamuchitiska kuti ŵanthu ŵangu Ayisirayeli ayendi paku yimwi, ndipu mwazamuja ŵawu.+ Yimwi mwazamuja chihara chawu, ndipuso mwazamubaya so cha ŵana ŵawu.’”+
13 “Yehova, Ambuya Fumu Yikulu wakamba kuti: ‘Chifukwa chakuti ŵanthu atikukambiyani kuti, “Ndimwi charu cho chimeza ŵanthu kweniso cho chibaya ŵana a mitundu ya ŵanthu yo yija pakati pinu,”’
14 ‘mwaviyo, mwazamumeza so ŵanthu cha pamwenga kubaya ŵana a mitundu ya ŵanthu yo yija pakati pinu,’ Yehova, Ambuya Fumu Yikulu ndiyu wakamba.
15 ‘Ndazamuzomereza so cha kuti mitundu ya ŵanthu yikuneneningi pamwenga kuti ŵanthu akunyozeningi,+ ndipu mwazamuguŵiska so cha mitundu ya ŵanthu yo yija pakati pinu,’ Yehova, Ambuya Fumu Yikulu ndiyu wakamba.”
16 Yehova wangulongoro so nani, ndipu wangukamba kuti:
17 “Yiwi mwana wa munthu, pa nyengu yo a munyumba yaku Isirayeli ajanga mucharu chawu, anguchifipiska chifukwa cha nthowa zawu kweniso vinthu vo achitanga.+ Kwaku ini, nthowa zawu zenga nge vinthu vakufipiskika va munthukazi yo we ku mwezi.+
18 Mwaviyo, ndinguŵapunguliya ukali wangu chifukwa cha ndopa zo yiwu angudira pacharu cho+ ndipuso chifukwa chakuti anguchifipiska ndi angoza ŵawu akuseruska.*+
19 Mwaviyo, ndinguŵambininiskiya pakati pa mitundu ya ŵanthu kweniso pakati pa vyaru vinyaki.+ Ndinguŵayeruzga mwakukoliyana ndi nthowa zawu kweniso mwakukoliyana ndi vinthu vo achitanga.
20 Kweni ŵati aluta ku mitundu yo, ŵanthu angufipiska zina langu lakupaturika+ chifukwa akambanga vaku yiwu kuti, ‘Yaŵa mbanthu aku Yehova kweni akutuwamu mucharu chaki.’
21 Mwaviyo, ndifipiyengi mtima zina langu, lo nyumba ya ku Isirayeli yafipiska pakati pa mitundu yo alutaku.”+
22 “Mwaviyo, kambiya nyumba yaku Isirayeli kuti, ‘Yehova, Ambuya Fumu Yikulu wakamba kuti: “Ndichitengepu kanthu chifukwa chaku yimwi cha, yimwi a munyumba yaku Isirayeli, kweni chifukwa cha zina langu lakupaturika, lo mukulifipiska pakati pa mitundu ya ŵanthu yo mukulutaku.”’+
23 ‘Kwambula kutondeka, ndazamutowesa zina langu likulu+ lo lingufipiskika pakati pa mitundu ya ŵanthu, lo mungulifipiska pakati pawu; ndipu asani ndazitoweseka pakati pinu mitundu ya ŵanthu yichilereska, mitundu yo yazamuziŵa kuti ini ndini Yehova,’+ Yehova, Ambuya Fumu Yikulu ndiyu wakamba.
24 ‘Ndazakukutuzganiku ku mitundu ya ŵanthu kweniso ndazakukuwunganisani kutuliya kuvyaru vinyaki vosi ndipu ndazamuluta namwi kucharu chinu.+
25 Ndazakukuwaziyani maji ngakutowa, ndipu mwazamutoweseka;+ ndazakukutowesani ku vinthu vinu vosi vakufipiska+ ndipuso kwa angoza ŵinu wosi akuseruska.+
26 Ndazakukupaskani mtima wufya+ ndipu ndazamuŵika mzimu wufya mwaku yimwi.+ Ndazamutuzgamu mtima wa mwa+ muliŵavu linu ndipu ndazakukupaskani mtima wa mnofu.*
27 Ndazamuŵika mzimu wangu mwaku yimwi, ndipu ndazakukuchitiskani kuti muyendengi mu marangu ngangu,+ mwazakungasunga ndipuso mwazamulondo vyeruzgu vangu.
28 Pavuli paki, mwazamuja mucharu cho ndinguchipereka kwa apapi ŵinu akali, mwazamuja ŵanthu ŵangu ndipu ini ndazamuja Chiuta winu.’+
29 “‘Ndazakukutaskani ku vinthu vinu vosi vakufipiska, ndazamukambiya mbewu kuti zibali vipasu vinandi ndipu ndazakukuwisiyani nja cha.+
30 Ndazamuyandanisa vipasu va muchimiti kweniso vinthu va mumunda, kuti nja yizileki kukuchitiskani so soni pakati pa mitundu ya ŵanthu.+
31 Pavuli paki, mwazamukumbuka nthowa zinu ziheni kweniso ntchitu zinu ziheni, ndipu mwazamuseruka chifukwa cha ubudi winu kweniso vinthu vaukazuzi vo mwachitanga.+
32 Kweni ziŵani kuti: Ndichita venivi chifukwa chaku yimwi cha,’+ Yehova, Ambuya Fumu Yikulu ndiyu wakamba. ‘Kweni chitani soni ndipuso lengesekani chifukwa cha nthowa zinu, yimwi a munyumba yaku Isirayeli.’
33 “Yehova, Ambuya Fumu Yikulu wakamba kuti: ‘Mu zuŵa lo ndazakukutowesiyani ku ubudi winu wosi, ndazamuchitiska kuti mumatawuni muje ŵanthu+ kweniso kuti mahami ngazengeki so.+
34 Charu chakunangika cho chenga mahami kuti weyosi wakujumphamu wachiwonengi, chazamulimika.
35 Ndipu ŵanthu azamukamba kuti: “Charu cho chenga mahami chaja nge munda wa Edeni,+ ndipu matawuni ngo ngenga mahami, ngo ngangunangika kweniso ngo nganguwisikiya pasi, sonu ngasambuka malu nga mpanda wakukho ndipu muja ŵanthu.”+
36 Ndipu mitundu yo yajaku kweniso yo yakuzunguliyani yazamuziŵa kuti ini Yehova, ndazenga vinthu vo vinguwisikiya pasi kweniso ndapanda vinthu mucharu cho chenga mahami. Ini Yehova, ndalongoro ndipu ndachita venivi.’+
37 “Yehova, Ambuya Fumu Yikulu wakamba kuti: ‘Ndazamuzomereza so kuti a munyumba yaku Isirayeli andipemphi kuti ndiyandanisi ŵanthu ŵawu nge mskambu, ndipu ndazamuchita nadi venivi.
38 Nge mskambu wa akupaturika, nge mskambu wa ku Yerusalemu* pa nyengu ya maphwandu ngaki,+ matawuni ngo ngenga mahami ngazamuzaza ndi miskambu ya ŵanthu;+ ndipu azamuziŵa kuti ini ndini Yehova.’”
Mazu Ngam'mphata
^ Pamwenga kuti, “ŵanthu wo apona.”
^ Mazu ngaki chayingu, “phamphu langu lakukole.”
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Kung’anamuwa mtima wakuvwiya fundu zaku Chiuta.
^ Yapa pangafwatulikiya so kuti, “Nge miskambu ya mbereri za sembi mu Yerusalemu.”
