Ezekiyeli 37:1-28
37 Janja laku Yehova lenga paku ini, ndipu mwakugwiriskiya ntchitu mzimu waki, Yehova wangundito ndi kundiŵika pakati pa chidika+ ndipu chidika cho chinguzaza ndi viwanga.
2 Iyu wangundijumphisa muviwanga vo, ndipu ndinguwona kuti muchidika cho mwenga viwanga vinandi ukongwa. Viwanga vo venga vakumira ukongwa.+
3 Iyu wangundifumba kuti: “Yiwi mwana wa munthu, kumbi viwanga ivi vingaja so ndi umoyu?” Ini ndingumuka kuti: “Yehova, Ambuya Fumu Yikulu, yimwi ndimwi muziŵa.”+
4 Mwaviyo, iyu wangundikambiya kuti: “Kamba uchimi wakukwaskana ndi viwanga ivi, ndipu uvikambiyi kuti, ‘Yimwi viwanga vakumira, vwani mazu ngaku Yehova ngakuti:
5 “‘Yehova, Ambuya Fumu Yikulu wakambiya viwanga ivi kuti: “Ndazamuchitiska kuti mvuchi usere mwaku yimwi, ndipu mwazamuja so ndi umoyu.+
6 Ndazakukuŵikani misipi kweniso mnofu, ndazakukubenekeriyani ndi khungu ndi kuŵika mvuchi mwaku yimwi, ndipu mwazamuja so ndi umoyu; mwaviyo, mwazamuziŵa kuti ini ndini Yehova.”’”
7 Pavuli paki, ndingukamba uchimi nge mo iyu wangundilamuliya. Ndati ndakamba ŵaka uchimi, kunguvwika chiwawa cha viwanga vichikwaskana, ndipu viwanga vingwamba kuza pamoza, chiwanga ku chiwanga chinyaki.
8 Pavuli paki, ndinguwona misipi kweniso mnofu vichiza pa viwanga vo ndipu khungu linguvibenekere. Kweni muviwanga vo mwengavi mvuchi.
9 Pavuli paki, wangundikambiya kuti: “Mphepu yikambiyi uchimi. Kamba uchimi, yiwi mwana wa munthu, ndipu kambiya mphepu kuti, ‘Yehova, Ambuya Fumu Yikulu wakamba kuti: “Yiwi mphepu,* iza kutuliya ku mphepu zinayi, putiya pa ŵanthu yaŵa wo akubayika, kuti aje so ndi umoyu.”’”
10 Mwaviyo, ndingukamba uchimi nge mo iyu wangundilamuliya, ndipu mvuchi* ungusere muviwanga vo, vingwamba kuja ndi umoyu kweniso kuma wima,+ ŵenga mzinda ukulu ukongwa.
11 Pavuli paki, wangundikambiya kuti: “Yiwi mwana wa munthu, viwanga ivi vimiya nyumba yosi yaku Isirayeli.+ Yiwu akamba kuti, ‘Viwanga vidu vamira ndipu chilindizga chidu chamala.+ Tamaliya limu.’
12 Mwaviyo, kamba uchimi ndipu uŵakambiyi kuti, ‘Yehova, Ambuya Fumu Yikulu wakamba kuti: “Ndazamujula madindi nginu+ ndi kukuyuskani kutuliya mumadindi nginu, yimwi mwaŵanthu ŵangu, ndipu ndazakukuŵikani mucharu cha Isirayeli.+
13 Ndipu mwazamuziŵa kuti ini ndini Yehova asani ndazijula madindi nginu kweniso asani ndazikuyuskani kutuliya mumadindi nginu, yimwi mwaŵanthu ŵangu.”’+
14 ‘Ndazamuŵika mzimu wangu mwaku yimwi ndipu mwazamuja so ndi umoyu.+ Ndazakukuŵikani mucharu chinu; ndipu mwazamuziŵa kuti ini Yehova ndalongoro ndipuso kuti ndini ndachita venivi,’ Yehova ndiyu wakamba.”
15 Yehova wangulongoro so nani, ndipu wangukamba kuti:
16 “Ndipu yiwi mwana wa munthu, uto kamiti ndipu ulembepu mazu ngakuti, ‘Kaku Yuda ndi Ayisirayeli wo ŵe ndi iyu.’*+ Pavuli paki, uto kamiti kanyaki ndipu ulembepu mazu ngakuti, ‘Kaku Yosefi, kamiti kaku Efurayemu, kweniso a munyumba yaku Isirayeli wosi wo ŵe ndi iyu.’*+
17 Pavuli paki, utibanyi pamoza kuti tije kamiti kamoza mujanja laku.+
18 Asani ŵanthu ŵaku* atikufumba kuti, ‘Kumbi utikambiyengi cha kuti vinthu venivi ving’anamuwanji?’
19 uŵakambiyi kuti, ‘Yehova, Ambuya Fumu Yikulu wakamba kuti: “Ndazamuto kamiti kaku Yosefi, ko ke mujanja laku Efurayemu, kweniso mafuku ngaku Isirayeli ngo nge ndi iyu, ndipu ndazakuŵabanya kukamiti kaku Yuda; ndazamuchitiska kuti aje kamiti kamoza,+ ndipu azamuja kamiti kamoza mujanja langu.”’
20 Timiti to walembapu mazu tije mujanja laku kuti yiwu atiwoni.
21 “Pavuli paki uŵakambiyi kuti, ‘Yehova, Ambuya Fumu Yikulu wakamba kuti: “Ndazamuto Ayisirayeli kutuliya mu mitundu yo akulutaku, ndipu ndazakuŵawunganisa pamoza kutuliya kuvigaŵa vosi ndi kuŵaŵika mucharu chawu.+
22 Ndazamuchitiska kuti aje mtundu umoza mucharu cho,+ pamapiri nga ku Isirayeli, wosi azamulamulika ndi fumu yimoza+ ndipu azamuja so mitundu yiŵi cha; kweniso azamugaŵikana so cha kuja maufumu ngaŵi.+
23 Yiwu azakujifipiska so cha ndi angoza ŵawu akuseruska,* vinthu vaukazuzi vo achita, kweniso mphulupulu zawu zosi.+ Ndazakuŵataska ku vinthu vo anguchita chifukwa cha kuleka kugomezgeka, vo vinguŵabudisa, ndipu ndazakuŵatowesa. Yiwu azamuja ŵanthu ŵangu, ndipu ini ndazamuja Chiuta wawu.+
24 “‘“Mteŵeti wangu Davidi ndiyu wazamuja fumu yawu,+ ndipu wosi azamuja ndi mliska yumoza.+ Yiwu azamukwenda mu vyeruzgu vangu ndipuso azamusunga marangu ngangu.+
25 Yiwu azamuja mucharu cho ndingupaska mteŵeti wangu Yakobe, cho mwajanga apapi ŵinu akali,+ ndipu azamuja mwenimo kwamuyaya,+ yiwu, ŵana ŵawu* kweniso ŵana a ŵana ŵawu;+ Davidi mteŵeti wangu wazamuja mulongozgi wawu kwamuyaya.+
26 “‘“Ndipu ndazamuchita nawu phanganu lachimangu;+ lazamukuŵa phanganu lamuyaya. Ndazakuŵaŵika mucharu chawu ndi kuŵayandanisa,+ ndipu pakati pawu ndazamuŵikapu malu ngangu ngakupaturika kwamuyaya.
27 Hema langu lazamuja* pakati pawu,* ndipu ini ndazamuja Chiuta wawu, yiwu azamuja ŵanthu ŵangu.+
28 Asani malu ngangu ngakupaturika ngazija pakati pawu kwamuyaya, mitundu ya ŵanthu yazamuziŵa kuti ini Yehova nditowesa Ayisirayeli.”’”+
Mazu Ngam'mphata
^ Pamwenga kuti, “mvuchi; mzimu.”
^ Pamwenga kuti, “mzimu.”
^ Pamwenga kuti, “wo mbanyaki.”
^ Pamwenga kuti, “wo mbanyaki.”
^ Mazu ngaki chayingu, “ŵana a ŵanthu ŵaku.”
^ Mazu yanga ngakutuliya ku mazu nga Chiheberi ngo ngayanana ndi mazu ngakuti “mavi nga viŵetu” ndipu ngagwiriskikiya ntchitu pakuyuyuwa chinthu.
^ Mazu ngaki chayingu, “ŵana ŵawu anthulumi.”
^ Pamwenga kuti, “Malu ngangu ngakujamu ngazamuja.”
^ Pamwenga kuti, “paku yiwu.”
