Ezekiyeli 4:1-17
4 “Ndipu yiwi mwana wa munthu, to njerwa ndipu uyiŵiki panthazi paku. Ujambulepu tawuni ya Yerusalemu.
2 Uyizingilizi,+ uyizingilizi ndi mpanda wankhondu,+ uyizenge chimbumira chakuchitiyapu nkhondu,+ uyijinthiyi misasa ya asilikali ndipuso uyizingilizi ndi vidya vankhondu vakugumuliya mpanda.+
3 Uto chilata ndipu uchiŵiki pakati paku yiwi ndi tawuni yo kuti chije nge mpanda wachisulu. Pavuli paki, ulereseski pa tawuni yo, ndipu yizingilizikengi; yiwi ndiwi uyizingilizengi. Chenichi chijengi chisimikizu ku nyumba yaku Isirayeli.+
4 “Pavuli paki, ugone kumazge ndipu upingi ubudi wa nyumba yaku Isirayeli.+ Upingengi ubudi wawu mwakukoliyana ndi mazuŵa ngo ugoniyengi kurwandi limoza.
5 Uchitengi venivi kwa mazuŵa 390, mwakukoliyana ndi vyaka va ubudi wawu,+ ndipu upingengi ubudi wa nyumba yaku Isirayeli.
6 Utenere kumaliza mazuŵa ngenanga.
“Pavuli paki, ugonengi kachiŵi, ugoniyengi kumaryi ndipu upingengi ubudi wa nyumba yaku Yuda+ kwa mazuŵa 40. Zuŵa limoza kumiya chaka chimoza, zuŵa limoza kumiya chaka chimoza, lenili ndilu dangu lo ndakupaska.
7 Lazga chisku chaku kutawuni ya Yerusalemu+ yo yazingilizika, uku wakwiza laya la janja laku, ndipu uzikambi uchimi wakukwaskana ndi tawuni yo.
8 “Awona! Ndazakukumanga ndi vingwi kuti uzileki kung’anamukiya kurwandi linyaki mpaka po wamaliziya mazuŵa ngakuti uzingilizi tawuni yo.
9 “Uto tirigu, barile, nthamba zikuluzikulu, nthamba zimanazimana, maŵe ndi sipeloti,* uviŵiki muchiyaŵi chimoza ndipu uvigwiriskiyi ntchitu pakupanga chiŵandi. Pakuti uryengi chiŵandi chenicho, pa mazuŵa 390 ngo ugoniyengi kurwandi limoza.+
10 Zuŵa lelosi upimengi ndi kurya chakurya chakukwana masekeli 20.* Uryengi pa nyengu zakuŵikika.
11 “Ndipu umwengi maji ngakuchita kupima, ngajengi ngakukwana chigaŵa chimoza mwa vigaŵa 6 va mwesu wa hini.* Umwengi pa nyengu zakuŵikika.
12 “Uchiryengi nge mo ungaryiya chiŵandi chakuzunguliya cha balire; uchiwotchengi yiwu achilereska, pamotu wa mavi ngakumira nga ŵanthu.”
13 Yehova wangulutirizga kulongoro ndipu wangukamba kuti: “Umu ndimu Ayisirayeli azamuryiya chiŵandi chawu, chakufipiskika, pakati pa ŵanthu amitundu yinyaki ko ndazakuŵambininiskiya.”+
14 Pavuli paki, ndingukamba kuti: “Vo cha, Yehova, Ambuya Fumu Yikulu! Kwambiya pa unamana wangu mpaka sonu, ndechendafipiskikepu chifukwa cha kurya nyama yakufwa yija pamwenga nyama yakupalurika ndi nyama yinyaki,+ ndipu palivi nyama yakufipiskika* yo yikuserepu mumulomu mwangu.”+
15 Sonu wangundikambiya kuti: “Chamampha, ndikuzomerezengi kuti ugwiriskiyi ntchitu mavi nga ng’ombi mumalu mwa mavi nga ŵanthu, ndipu uwotchengi chiŵandi chaku penipo.”
16 Pavuli paki, wangundikambiya kuti: “Yiwi mwana wa munthu, ndichitiskengi kuti chakurya chisoŵi* mu Yerusalemu,+ ŵanthu azamufipa mtima achirya chiŵandi chawu chakwesa kupima,+ ndipu azamukuŵa ndi mantha achimwa maji ngawu ngakwesa kupima.+
17 Venivi vazamuchitika kuti asani asoŵa chiŵandi ndi maji, azilereskanengi ŵaka chifukwa cha kumala zeru kweniso kuti aziwondi chifukwa cha kunanga kwawu.
Mazu Ngam'mphata
^ Mtundu wa tirigu wambula kuzirwa yo wapandikanga ku Ijipiti.
^ Pafufupi magilamu 230. Wonani Fundu Zakukumaliya B14.
^ Pafufupi malita 0.6. Wonani Fundu Zakukumaliya B14.
^ Pamwenga kuti, “yaukazuzi.”
^ Mazu ngaki chayingu, “Ndiphwanyengi timiti ta viŵandi.” Panyaki iti nthimiti takutungaku viŵandi kuti visungiki.
