Ezekiyeli 7:1-27
7 Yehova wangulongoro so nani ndipu wangukamba kuti:
2 “Kweni yiwi mwana wa munthu, Yehova, Ambuya Fumu Yikulu wakambiya charu cha Isirayeli kuti: ‘Umaliru! Umaliru waza pa makona nganayi nga charu cho.
3 Sonu umaliru waza paku yiwi, ndikulongongi ukali wangu, ndikuyeruzgengi mwakukoliyana ndi nthowa zaku kweniso ndikumbengi mulandu chifukwa cha ntchitu zaku zakuseruska.
4 Jisu langu lazakukuchitiya chitima cha; ndipu ndazakukulenge lisungu cha,+ pakuti ndazakukulanga mwakukoliyana ndi nthowa zaku, wazamusuzgika chifukwa cha ntchitu zaku zakuseruska.+ Ndipu mwazamuziŵa kuti ini ndini Yehova.’+
5 “Yehova, Ambuya Fumu Yikulu wakamba kuti: ‘Awonani! Soka, soka lakuti lechendachitikepu, lituza.+
6 Umaliru utuza; umaliru wazamukuza; wazakukuyukiya. Awonani! Utuza.
7 Nyengu yaku* yafika, yiwi wakuja mucharu. Nyengu yituza, zuŵa le pafupi.+ Pamapiri pe chimtimbaheka, palivi chiwawa cha likondwa.
8 “‘Pambula kuswera yapa, ndipunguliyengi ukali wangu paku yiwi,+ ndikulongongi ukali wangu wosi,+ ndikuyeruzgengi mwakukoliyana ndi nthowa zaku kweniso ndikumbengi mulandu chifukwa cha ntchitu zaku zosi zakuseruska.
9 Jisu langu lazakukuchitiya chitima cha; ndipu ndazakukulenge lisungu cha.+ Ndazakukulanga mwakukoliyana ndi nthowa zaku, wazamusuzgika chifukwa cha ntchitu zaku zakuseruska. Ndipu mwazamuziŵa kuti ini Yehova, ndini nditikulangani.+
10 “‘Awonani, zuŵa! Awonani, lituza!+ Nyengu yaku* yafika; nthonga yachita maluŵa ndipu kujikuzga kwaphuka.
11 Chiwawa chakuwa ndipu chasambuka nthonga ya uheni.+ Palivi cho chazamupona, kwali ndiwu, chuma chawu, magulu ngawu pamwenga kutchuka kwawu.
12 Nyengu yituza, zuŵa lizengi. Wakugula wazamukondwa cha ndipu wakugulisa wazamuliya cha, pakuti ukali wazamuwiya ŵanthu wosi.*+
13 Pakuti wakugulisa wazamuwere cha ku chinthu cho chingugulisika, chinanga kuti umoyu waki ungapona, pakuti chiwona chiziyengi ŵanthu wosi. Palivi yo wazamuwelere, ndipu palivi yo wazamusunga umoyu waki chifukwa cha kunanga kwaki.*
14 “‘Yiwu amba mbata*+ ndipu weyosi wanozgeka, kweni palivi yo waluta ku nkhondu, chifukwa ukali wangu wawiya ŵanthu wosi.+
15 Lipanga libaya ŵanthu wo ŵe kubwalu kwa tawuni,+ ndipu mulili kweniso nja vibaya ŵanthu wo ŵe mukati mwa tawuni. Weyosi yo we kudondu wazamubayika ndi lipanga, ndipu nja ndi mulili vazamubaya ŵanthu wo ŵe mukati mwa tawuni.+
16 Ŵanthu ŵawu akupona, wo afiska kuthaŵa, azamuluta kumapiri, ndipu nge njiŵa za mumadambu, weyosi wazamuliya chifukwa cha kunanga kwaki.+
17 Manja ngawu ngosi ngazamulombotoka, ndipu makongonu ngawu ngosi ngazamunthonya maji.*+
18 Yiwu avwala vigudulu+ ndipu ambwambwanthiya. Weyosi wazamuchita soni ndipu mutu wewosi wazamumeteka phala.*+
19 “‘Yiwu azamutaya siliva wawu mumisewu, ndipu golidi wawu wazakuŵaseruska. Siliva wawu pamwenga golidi wawu, vazakuŵataska cha pa zuŵa la ukali waku Yehova.+ Yiwu azamukhorwa cha pamwenga kuzaza malufu ngawu, pakuti yivu* vasambuka chinthu chakuguŵiska cho chitiŵabudisa.
20 Yiwu anyadanga chifukwa cha kutowa kwa vinthu vawu vakutowese, ndipu vinthu vo* apangiyanga vikozgu vawu vakuseruska, angoza ŵawu akuseruska.+ Ndichu chifukwa chaki ndazamuchitiska kuti yivu vije vinthu vaunyakazi kwaku yiwu.
21 Vinthu venivi* ndazakuvipereka mu manja mwa alendu kuti aphangi ndipuso ndazakuvipereka mu manja mwa ŵanthu aheni a pacharu chapasi kuti alondi, ndipu azakuvifipiska.
22 “‘Ndazakuŵalazgiya gonthu,+ ndipu yiwu azamufipiska malu ngangu ngakuzirwa,* ndipu ankhungu azamusere mumalu ngo ndi kungafipiska.+
23 “‘Pangani simbi,*+ pakuti charu chazaza ndi vyeruzgu+ vandopa ndipu tawuni yazaza ndi chiwawa.+
24 Ndizengi ndi ŵanthu aheni ukongwa amitundu yinyaki,+ azamuto nyumba zawu,+ ndazamumalisa kunyada kwa ŵanthu anthazi ndipu malu ngawu ngakupaturika ngazamufipiskika.+
25 Asani urwirwi wawu waza, azamupenja chimangu kweni pazamuŵavi.+
26 Kwazamukuza soka pa soka linyaki, uthenga pa uthenga unyaki, ndipu ŵanthu azamupenja chiwona kutuliya ku mchimi,+ kweni dangu lakutuliya ku wasembi ndipuso ulongozgi wakutuliya ku ŵara,+ vazamuwovya ŵanthu cha.
27 Fumu yazamuliya,+ mulongozgi wazamufipa mtima ukongwa, ndipu manja nga ŵanthu a mucharu cho, ngazamunjekeme chifukwa cha mantha. Ndazakuŵachitiya vinthu mwakukoliyana ndi nthowa zawu ndipu ndazakuŵayeruzga nge mo yiwu ayeruzgiya. Ndipu azamuziŵa kuti ini ndini Yehova.’”+
Mazu Ngam'mphata
^ Yapa pangafwatulikiya so kuti, “Nkhata yaku ya maluŵa.”
^ Yapa pangafwatulikiya so kuti, “Nkhata yaku ya maluŵa.”
^ Kung’anamuwa kuti, akugula vinthu kweniso akugulisa, wosi azamuyanduwa cha, chifukwa chakuti pharanyiku lazamuwiya wosi.
^ Yapa pangafwatulikiya so kuti, “mwakugwiriskiya ntchitu kunanga kwaki.”
^ Anyaki akamba kuti, “lipenga.”
^ Kung’anamuwa kujikoze chifukwa cha mantha.
^ Kung’anamuwa kuti mitu yawu yazamumeteka chifukwa cha kuliya.
^ Kung’anamuwa siliva wawu ndi golidi wawu.
^ Kung’anamuwa vinthu vawu vagolidi kweniso vasiliva.
^ Kung’anamuwa siliva wawu kweniso golidi wawu yo apangiyanga angoza.
^ Mazu ngaki chayingu, “ngakubisika.” Viwoneka kuti yanga ndi malu ngamukati ukongwa nga nyumba yakupaturika yaku Yehova.
^ Kung’anamuwa simbi zaukapolu.
