Machitidu nga Akutumika 10:1-48
-
Chiwona chaku Koneliyasi (1-8)
-
Peturo wawona chiwona cha nyama zo Chiuta wakuzitowesa (9-16)
-
Peturo waluta kwaku Koneliyasi (17-33)
-
Peturo wapharazgiya ŵanthu amitundu yinyaki uthenga wamampha (34-43)
-
“Chiuta walivi sankhu” (34, 35)
-
-
Ŵanthu amitundu yinyaki alonde mzimu wakupaturika ndipuso abatizika (44-48)
10 Sonu ku Kayisareya kwenga munthu munyaki yo wadanikanga kuti Koneliyasi. Iyu wenga mura wa gulu la asilikali* lo ladanikanga kuti Italiyani.*
2 Koneliyasi wenga munthu wakwanja kusopa kweniso wawopanga Chiuta limoza ndi ŵanthu wosi a munyumba yaki. Iyu waperekanga mphasu zalisungu ndipuso waŵeyeriyanga Chiuta mwambula kulekeza.
3 Zuŵa linyaki mu ora la 9,*+ iyu wanguwona chiwona cha mungelu waku Chiuta wachiza kwaku iyu ndipu wangumukambiya kuti: “Koneliyasi!”
4 Koneliyasi wati wamulereseska, wanguchita mantha ndipu wangumufumba kuti: “Ntchinthu wuli Ambuya?” Iyu wangumuka kuti: “Mapempheru ngaku ndipuso mphasu zaku zalisungu vakwera kwaku Chiuta ndipu wativikumbuka.+
5 Sonu tuma ŵanthu aluti ku Yopa kuchidana Simoni yo wadanika kuti Peturo.
6 Munthu mwenuyu ndi mulendu waku Simoni wakunyukuta vikopa yo nyumba yaki ye mumphepeti mwa nyanja.”
7 Mungelu yo walongoronga nayu wati watuwapu ŵaka, Koneliyasi wangudana ateŵeti ŵaki ŵaŵi ndipuso msilikali wakwanja kusopa mweniyo wenga so mteŵeti waki.
8 Iyu wanguŵakambiya vosi vo vinguchitika ndipu wanguŵatuma ku Yopa.
9 Mawa laki, yiwu achilutirizga ulendu wawu ndipuso achifika pafupi ndi tawuni yo, Peturo wanguluta pachanya pa nyumba cha mu ora la 6* kuti wakapempheri.
10 Kweni iyu wanguvwa nja ukongwa ndipu wakhumbanga kurya. Achinozga chakurya, wanguja nge kuti wagona.+
11 Iyu wanguwona kuti kuchanya kwajulika ndipu chinthu* chinyaki cha nge chisalu chikulu cho achiko mumakona nganayi chasikiyanga pacharu.
12 Ndipu pachisalu cho penga mitundu yosi ya nyama za malundi nganayi, vakukwaŵa va pacharu kweniso viyuni vamude.
13 Sonu wanguvwa mazu ngakuti: “Peturo, yuka, baya ndi kurya!”
14 Kweni Peturo wangumuka kuti: “Ndingachita cha Ambuya, chifukwa ndechendaryepu chechosi chakukazuzgika ndipuso chakufipiskika.”+
15 Kachiŵi wanguvwa so mazu ngakuti: “Vinthu vo Chiuta wavitowesa, leka kuvikamba kuti vakufipiskika.”
16 Venivi vinguchitika so kachitatu ndipu nyengu yeniyo chisalu* cho chingutoleke kuchanya.
17 Peturo weche kuŵanaŵana kuti chiwona cho wanguwona ching’anamuwanji, nyengu yeniyo ŵanthu wo angutumika ndi Koneliyasi afumbanga ko kwenga nyumba yaku Simoni ndipu anguma pageti la nyumba yo.+
18 Yiwu angudaniriza ndi kufumba kuti aziŵi asani kunyumba ko kwenga mulendu zina laki Simoni yo wadanikanga kuti Peturo.
19 Peturo weche kuŵanaŵaniya chiwona cho, mzimu+ ungukamba kuti: “Awona! Ŵanthu atatu atikupenja.
20 Sonu soka, sikiya pasi ndipu ulutiyi nawu limoza, ungakayikanga cha, chifukwa ndaŵatuma ndini.”
21 Mwaviyo, Peturo wangusikiya ko kwenga ŵanthu wo ndipu wanguŵakambiya kuti: “Munthu yo mupenja, ndini. Ntchifukwa wuli mwaza kunu?”
22 Yiwu angumuka kuti: “Koneliyasi+ yo ndi mura wa gulu la asilikali, munthu murunji kweniso wakopa Chiuta mweniyo mtundu wosi wa Ayuda utimulumba, Chiuta wamukambiya kuporote mwa mungelu wakupaturika kuti watumi ŵanthu kuzikudana kuti uluti kunyumba kwaki kuti wakavwi vo yiwi wakumukambiya.”
23 Sonu Peturo wanguŵadaniya munyumba ndi kuja nawu nge alendu ŵaki.
Mawa laki, wangusoka ndi kulutiya nawu limoza ndipu anyaki mwa abali a ku Yopa nawu angulutiya nayu limoza.
24 Mawa laki so wangusere mu Kayisareya ndipu Koneliyasi waŵalindizganga kweniso wangudana abali ŵaki ndi abwezi ŵaki.
25 Peturo wachisere, Koneliyasi wangukumana nayu, ndipu wanguwa pamaphazi ngaki ndi kumujikamiya.
26 Kweni Peturo wangumusoska ndipu wangukamba kuti: “Soka, nani nde munthu nge yiwi.”+
27 Wachikambiskana nayu, wangusere munyumba ndipu wangusaniya kuti mwawungana ŵanthu anandi.
28 Peturo wanguŵakambiya kuti: “Muziŵa umampha kuti ntchakwenere cha kuti Myuda wachitiyi limoza vinthu ndi munthu wamtundu unyaki pamwenga kucheza nayu.+ Kweni Chiuta wandilongo kuti ndingakambanga so munthu weyosi cha kuti ngwawuyu pamwenga kuti ngwakufipiskika.+
29 Mwaviyo, ndati ndadanika, ndaza, ndakanaku cha. Sonu akambani, ntchifukwa wuli mwandidana?”
30 Sonu Koneliyasi wangukamba kuti: “Mazuŵa nganayi ngo ngajumpha kwambiya pa ora lenilinu, ndapempheranga munyumba yangu pa ora la 9.* Nyengu yeniyo, munthu munyaki yo wanguvwala vakuvwala vakuŵala wanguma panthazi pangu.
31 Iyu wangundikambiya kuti: ‘Koneliyasi, pempheru laku lavwika ndipu Chiuta wakumbuka mphasu zaku zalisungu.
32 Sonu tuma ŵanthu ku Yopa kuti akadani Simoni yo wadanika kuti Peturo. Munthu mwenuyu ndi mulendu waku Simoni wakunyukuta vikopa yo nyumba yaki ye mumphepeti mwa nyanja.’+
33 Mwaviyo ini ndingutuma ŵanthu nyengu yeniyo kuti akakudaneni ndipu mwachita umampha ukongwa kuza. Sonu isi tosi taza pa masu paku Chiuta kuti tivwi vinthu vosi vo Yehova* wakulamulani kuti mukambi.”
34 Peturo wati wavwa venivi, wangwamba kulongoro ndipu wangukamba kuti: “Sonu ndaziŵa nadi kuti Chiuta walivi sankhu,+
35 kweni iyu walondere munthu wakutuliya mu mtundu wewosi yo watimuwopa ndi kuchita urunji.+
36 Iyu wangutuma mazu kwa Ayisirayeli ndi kuŵapharazgiya uthenga wamampha wa chimangu+ kuporote mwaku Yesu Khristu ndipu mwenuyu ndiyu Mbuya wa ŵanthu wosi.+
37 Muziŵa nkhani yo yakambikanga mu Yudeya mosi kwambiya ku Galileya+ pavuli pa ubatizu wo Yohane wapharazganga.
38 yakukwaskana ndi Yesu wa ku Nazareti. Chiuta wangumusankha ndi mzimu wakupaturika+ kweniso nthazi ndipu iyu wangwenda mucharu chosi kuchita vinthu vamampha kweniso kuchizga ŵanthu wosi wo akandirizgikanga ndi Dyaboli+ chifukwa Chiuta wenga nayu.+
39 Ndipu isi te akaboni a vinthu vo wanguchita mucharu chosi cha Ayuda ndi mu Yerusalemu, kweni yiwu angumubaya mwakumupayika pachimiti.
40 Chiuta wangumuyuska pa zuŵa lachitatu,+ ndipu wangumuzomereza kuti wawoneke
41 ku ŵanthu wosi cha, kweni kwa akaboni wo Chiuta wangusankhiya limu, wo ndisi taryanga ndi kumwa nayu wati wayuskika.+
42 Kweniso wangutilamula kuti tipharazgengi ku ŵanthu ndi kupereka ukaboni mwakukwana+ kuti mwenuyu ndiyu Chiuta wakumuŵika mwadangu kuti wayeruzgi amoyu ndi akufwa.+
43 Iyu ndiyu achimi wosi atimuchitiya ukaboni+ kuti weyosi yo wavwana mwaku iyu wagowokereka maubudi kuporote mu zina laki.”+
44 Peturo weche kulongoro fundu zenizi, mzimu wakupaturika unguza paku wosi wo avwanga mazu ngo.+
45 Ndipu akusambira akudumulika* wo anguza ndi Peturo anguzizwa ukongwa, chifukwa mphasu yawezi ya mzimu wakupaturika yapungulikiyanga so pa ŵanthu amitundu yinyaki.
46 Pakuti yiwu avwanga ŵanthu wo achilongoro mu vineneru vachilendu* ndipuso akankhuskanga Chiuta.+ Pavuli paki, Peturo wangufumba kuti:
47 “Kumbi walipu yo wangakaniza maji kuti ŵanthu yaŵa, ŵeniwo alonde so mzimu wakupaturika nge isi aleki kubatizika?”+
48 Wati wafumba viyo, wangulamula kuti abatiziki mu zina laku Yesu Khristu.+ Pavuli paki angumupempha kuti waje nawu kwa mazuŵa nganandiku.
Mazu Ngam'mphata
^ Walamuliyanga asilikali 100.
^ Gulu la asilikali achiroma lo lajanga ndi asilikali 600.
^ Cha mu ma 3 koloku mazulu.
^ Cha mu ma 12 koloku msana.
^ Mazu ngaki chayingu, “chiyaŵi.”
^ Mazu ngaki chayingu, “chiyaŵi.”
^ Cha mu ma 3 koloku mazulu.
^ Wonani Fundu Zakukumaliya A5.
^ Pamwenga kuti, “akugomezgeka.”
^ Mazu ngaki chayingu, “mu malilimi.”
